احببت العنقاء امل العناني

الفصل الرابع والعشرون والاخير

الفصل الرابع والعشرين والاخير من #احببت_العنقاء_امل_العناني
خدروهم ودخلوهم العربية في الكرسي الخلفي ..وساقوا العربية هما ..
تمت العملية بسهولة محدش كان يتوقعها ..ربما لان سالي اخدت بالها منهم متاخر ...وربما قلة الحركة في الوقت دا  في الشارع وخوف كل واحدة فيهم علي التانية خلتهم يسكتوا وميصرخوش .
اتصل واحد منهم برقم وقال _العملية تمت يا معلمه .
_طيب حلو اوي ..بقالنا كتير بنراقبهم ومستنيين فرصه واهي جت لحد عندنا .غيروا العربية وتعالوا علي المكان اللي اتفقنا عليه .
____
صحيت سالي لقت نفسها مربوطه هي وسلمي مع بعض . ..حاولت تصحي سلمي ..وتتحرك لحد ما صحيت سلمي ..حست سالي انها خايفة ..رجعت راسها لورا وحركتها علي اساس بتطمنها .واتنفست بالراحه شهيق وزفير لحد ما فهمت سلمي ..وعملت زيها وهديت .بدات تقيم سالي المكان اللي هما فيه .بس معرفتش ..كل اللي واصلها ريحة حلوة زي ريحة الصابون المعطر .بس الاوضة اللي هما فيها قذرة .
دخلت ليهم واحدة كانت سالي بتتمني متشوفهاش طول عمرها ..فضلت شوية تبص عليهم وخصوصا لسلمي ..وبعدين اتكلمت .
قعدت مقرفصة قدام سلمي وقالت _انتي مش متخيلة انا زهقت منك قد ايه ونفسي تتمحي من الوجود ازاي بس مش مشكلة اظن ان امنيتي هحققها قريب .
شالت اللزقة من علي فم سلمي وقالت _معندكيش حاجة تقوليها لامك .
فهمت سالي بسرعه اللعبه ..بس خافت علي سلمي من نبيلة اللي شكلها ناوية المرة دي تخلص عليهم كلهم .
عيطت سلمي وهي مش فاهمه حاجة ولا عارفة تقول ايه ..
ضحكت نبيلة ولمست وش سلمي  بعنف ومسكت دقنها كانها عايزة تخلعه وقالت _الوش دا لسه حلو كدا ازاي ومتزوقة وروج وميك اب ..بقيتي احلي من الاول يا ملعونة ولا كان حصل حاجة ..علي الرغم ان حمودا قايلي  غرق وشك بماية النار كويس  ,كان المفروض تموتي بس انتي ايه بسبع ترواح يا بنت المحظوظة .
انكشمت معدة سالي وحست انها هيغمي عليها ..وافتكرت الحادثة اللي حصلت وفضلت تدعي بقلبها ان ربنا ينجيها هي واختها .
فضلت تفكر _يارب تلحقنا يا مازن .
حطت نبيلة اللزقة تاني علي وش سلمي بعد ما ضربتها بالقلم كم مرة لحد ما شفايفها جابت دم وهي بتعيط ومش قادرة تبطل .
وسالي مش عارفة تهديها .
دخلت نرمين اللي بقت اشرس من نبيلة ..تفت علي سلمي وجت قعدت نفس قعدة نبيلة قدام سالي وقالت _وانتي يا سهي هانم متقلقيش احنا مش هنموتك لاننا مش عايزين غير فلوسك وبس ..عشان تبقي تتكبري علينا ومترضيش تشتغلي معايا كويس ..اهو جزائك ...بس
قامت نرمين وقامت معاها نبيلة وهما بيبصوا لبعض ويضحكوا ...خافت سالي اكتر واكتر وحست ان اللعبة لسه منتهتش لحد هنا .
قالت نرمين _هنقتلكم بس بعد ما نموت الامورة الصغيورة فرح .
قالت الجملة دي وهي بتغنيها ..عيطت سالي وصوتت بس صوتها كان مكتوم  .
____
قلق مازن جدا لانه قايل لسالي تكلمه كل ساعه او تبعتله رساله ..بقالها اكتر من اربع ساعات ,,مفيش اي خبر .
نزل يكلم مصطفي ومامته حاولت تهديه بس قال _لا يا ماما انا مش هستني زي المرة اللي فاتت .
افتكر بسرعه البرنامج اللي حطه علي تليفون سالي ..عشان يعرف مكانها وفضل يدعي ..يارب يا سالي يكون تليفونك شغال .
ثريا _ممكن تليفونها فصل يا حبيبي ..ممكن اخدهم الوقت .
مازن _يالا يا مصطفي بسرعه شوف انت ..انا مش قادر اتحكم في اعصابي .ومعلش يا ماما انا مش هسيب المره دي فرصة لممكن .
شاف مصطفي اللوكيشن ..خرج مازن بسرعه وهو بيدعي ان ميكونش حصل اي حاجة ..راح معاه مصطفي ..
وصلوا للوكيشن ولقوا العربية مفتوحه وفي مكان مقطوع ..وشنطة سالي وسلمي مرمية في العربية ..
لقي حاجتهم اللي اشتروها زي ما هي في شنطة العربية ..كان هيدخل مصطفي العربية عشان يشوفها ..قاله مازن _لا يا مصطفي ..ممكن يكون فيه بصمات .
لانه شاف فيه سيجارة في طفاية العربية .
مشي مازن رايح جاي يحاول يهدي نفسه ..شكل الفرصة اللي كان مستنيها جاتله المرة دي بسرعه ..بسرعه اكتر ما كان يتوقع .
اتصل مصطفي بالشرطة ..اللي جت فعلا .بسرعه وحضر نبيل  هو كمان .
الوضع اتقلب ورفعت الشرطة البصمات عشان يودوها للمعمل الجنائي .نصحهم امين الشرطة انهم يروحوا .لانه  ممكن الخاطفين يتصلوا يطلبوا فدية .
روح مازن ومكلمش حد وطلع اوضته ..وهو مش عارف يعمل ايه .ولا يلاقي اي دليل .مفيش قدامه غير انه يدعي عشان ربنا ينور بصيرته .
____
راحت نبيلة ونرمين شقة نبيلة عشان يناموا ..شافهم البواب ودخل كلم مراته _انا هبلغ يا عزيزة .
ردت مراته بخوف _خلينا في خالصه ..ملناش دعوة ..الشرطة هي اللي تتصرف .
البواب_حرام علينا يا ولية ..تبقي الولية بنت الكلب قاتله جوزها ومراته ..وقاعده براحتها وراحة جاية ..انا لازم ابلغ عشان حتي ضميري يستريح .
_عندنا عيال نخاف عليهم ودي قتالة قتله .
_انا عندي اموت وانا عامل الصح احس ما اعيش وانا جبان .
مسك تليفونه وبلغ  عن نرمين .
___
نبيلة _ايه مش علي بعضك ليه .
نرمين _عايزة اشوف مامي .
_مامي ..يا روح مامي البوليس عامل عليها حراسة عشان يمسكوكي اول ما تروحي لها .
_منا عارفة شوفيلي طريقة بقي .
_ايه اريك نروح دلوقتي ..اهو الليل بيبقي اخف شوية ..ونرشيلنا كم ممرضة وتدخلك بس نغير من شكلك الاول .
_نغير ازاي .مفيش وقت .
دخلت نبيلة اوضتها وطلعت بطرحه  ولينسز .وميك اب وفستان طويل ..
خلصت نرمين بسرعه الصاروخ ..بصت نرمين لنفسها معرفتش روحها فعلا .
بصت لنبيلة وقالت _انتي فظيعه بجد .مفيش منك .
خرجوا من الباب ..لقوا البوليس علي السلم وقدامه بس دور واحد ويكون عندهم ..
جريت نبيلة ونرمين ودخلوا الشقة اللي قبالهم ..قفلت نبيلة الباب بالراحة وقالت _شفتي بقي ..انا بفكر ازاي ..انا اجرت دي احتياطي بس من الباطن .
نرمين بخوف _طول عمرك ناصحه ...دلوقتي هنخرج ازاي .
نبيلة _استني بس انا هقولك .
.فضلوا مراقبين البوليس وهو بيفتش شقتهم .وبعد ساعتين خلصوا ومشيوا ..
دخلت نبيلة اوضه في الشقة وطلعت وهي شخص تاني .بصتلها نرمين وقالت _يخربيتك ..دا انتي شيطان .
_ايوا ..اومال منا فكرت في كل حاجة .
نزلوا وهما  بيتسحبوا ..لقوا اتنين عساكر علي باب العمارة ..حطت نرمين مخده صغيرة وعملت انها حامل ..
اندمجت نبيلة في الدور وقالت للعسكري _ساعدني والنبي يخويا ..وقفلي تاكسي ..اختي هتولد .
ونرمين تزيد في الصويت .
مشيوا وهربوا من غير ما اي حد يشك فيهم .
_______