الحلقة 10:
طبعت الباب و دخلت و المفاجئة كانت ليها، لقات لؤي مع المرة ليشافتها معاه ذاك النهار لي باستو و لي قلها ما تعنيلي شي لقاتهم في موقف محرج انصدمت وهي تكذب في عينيها
لؤي: جي ... جيهاان اصبري دقيقة نفهمك ، ناض يلبس في حوايجو
خرجت و خبطت الباب موراها و هبطت تجري و هو خرج موراها يجري كانو دموعها سابقينها فعلا حست بطعم الخيانة الشنعاء لاول مرة تتعرض لموقف كيما هذا طعنة في قلبها من الانسان ليحباتو و كانت مستعدة ترمي كلشي موراها و تسمح في كلش و تعترفلو بحبها و تبقى معاه، كانت مستعدة تحكيلو كلشي و تطلب مساعدتو باه يعاونها تتخلص من كارلس اما لؤي هو لي ضرها هو لي جرحها هو لي خانها قدام عينيها و ماكانش يستاهل وش كانت رح دير فيجالو
راح يجري شدها من ذراعها
لؤي: جيهان استناي نفهمك دقيقة
طبعاتو
جيهان: بعد يدك رد بالك تسيي تمسني
بقات تمشي و هو موراها
لؤي: ياجيهان استناي نفهمك ليصار انا ماكنتش مخططلو جيهان تعيشي اسمعيني
جيهان: قتلك بعدني ماتهدرش معايا ماعندي مانسمع من عندك ماراحلي فيك حياتك و نتا حر فيها دير وش تحب قيلني برك
لؤي: ياجسهان هي اغرتني هي كانت تغوي فيا و تقرب مني دخلت على غفلة ماكنتش حاسبلعا حساب نعرف غلطت مي هي ....
جيهان دارت يديها في وذنيها بش ماتسمعوش و هو باقي يتبع فيها و هي هابطة في الدروج
جيهان: قتلك ماتحكيلي والو المهم انا جيت بش نقلك لي انا انسانة مخطوبة و عرسي بقالو سمانة و بلي خممت و انا مانحبكش مش كيما كنت تخمم نتايا ماخليتنيش نحكيلك ذاك النهار و اليوم جيت ليك شخصيا مش نقلك تبعد من حياتي و بالاك تلحقني و لا تسيي تحوس عليا
لؤي: مخطوبة !! مستحيل جيهان قولي راكي تكذبي كي شفتيني في هذاك الموقف
جيهان: انا كلامي وقلتو و ماعندي مانكذب عليك بالسلامة
ركبت طونوبيلتها و قلعتها باقصى سرعة قريب حرقت الموتور ، كانت مجروحة جرح كبير ماكانتش تسنى فيه يدلها هكذا من سمانة اعترفلها بحبو و اليوم يخون فيها في اقرب فرصة قداشها كانت مخدوعة فيه فعلا المظاهر خداعة
بعد يومين عملولها لانيفارسار تعها و قفلت 19 سنة و بهاذ المناسبة رغم انها ماعزمتش كارلس الا انو ارسللها هدية كانت عبارة عن عقد الماس وورود و كان ناوي يعمللها عيد ميلاد وحدوخر ليلة عرسهم بينو و بينها
الخادمة: مادموزال جيهان هاذ الكادو جابوهولك ضركا قال مسيو كارلس هو لي بعثهولك
تبسمت على جنب
جيهان: حطيه فوق الطابلة و اخرجي
كانت مقابلة التاقة و تخمم تخمم فلي جايها و لي يسنة فيها ممبعد كيجات داخلة لفراشها فتحت الكادو و خزرت في العقد الالماسي
جيهان: همم ذوقو مليح
ممبعد حطتها بجيه و رقدت
_________________
يوم العرس:
كيما كل عروسة جيهان ناضت الصباح جاتها الكوافير و الميك اب ارتيست للدار سرحولها شعرها و مكياج عروس براق مجاو يكملولها حتى لحق الوقت ، كان عرس على الطريقة الجزائرية ، بعد مدة جاو يدوها و جا كورتاج كبير كانت الزرنة الجزائرية حاضرة و البارود و اجواء الاعراس تاوعنا تعرفوهم كامل فرنسا تتفرج و هي خرجت شادة في ذراع باباها لابسة الكراكو و البرنوس ، ركبت في الطونوبيل و دموعها على خدها مش لانها رح تبعد على عيلتها لانو اكيد رح تجي ليهم كل يوم و انما كانت تبكي على حياتها لي ضاعت و مخططاتها لي كانت حاطتهم في بالها و احلامها لي مراحش يتحققو ، كانت تتفكر في لؤي خسارة طلع مايستاهلش و خانها ، كانت تخمم في كارلس و الظروف لي جبرتها تتزوج بيه ماكانتش حاسة كامل بطعم الفرحة لي يحسوها كامل العرايس وقت يتزوجو بانسان هوما حبوه و ما انجبروش عليه و هي سارحة في تخمامها مافاقت غير على صوت الزغاريت كيف وصلو كان العرس في اوتيل 5 نجوم نزل باباها من الطونوبيل و نزلها و دخلو تحت تصفيقات الحضور كان كارلس واقف يستنا فيها بش يعقدو القران وقت دخلت عينيه راحو معاها خزر فيها من الفوق للتحت كانت الفرحة مش سايعاتو لانو و اخيرا رح يتزوج بحب حياتو لي ديما تمناها تكون قربو كانت طالعة مثل الملاك زين و بهاء ، وصلت لعندو سلمهالو باباها شدها من يظها اما استاذنت منو و من الجميع و طلبت انو تحكي معاه 5 دقايق على انفراد قبل عقد القران
اراءكم وشنو هي توقعاتكم للحلقات القادمة في رايكم وش تحوس تحكي جيهان لكارلس وعلاه طلبت تحاكيه على انفراد ؟
أنت تقرأ
سجينة كارلس (باللهجة الجزائرية)
Romanceتزوجتك دون ان احبك، قبلت بك و ضحيت بنفسي من اجل ان تعيش عائلتي ،تقبلت فكرة ان اكون زوجتك و لكني لم اتقبل ان اكون امراتك فسجنتني عندك حرمتني حريتي و حرمتني من كل شيء حطمت احلامي و ذكرياتي و تقول لي احبك ! اتسمي هذا حبا اتسمي هذا عشقا ........ يتبع
