سجينة كارلس (باللهجة الجزائرية)

سجينة كارلس (الحلقة 14)

الحلقة14:
رجع للدار بعد تفكير عميق و طويل دخل لقا الخدامات لي طلبهم جاو ماكانش حامل شوفتهم ، هو الاول كان مخطط يقضي شهر فترة غير هو وياها برك وحدهم و ضرك تبدلت ڨع الخطة لي كان راحها، جاتو الخدامة
الخادمة: ميسيو كارلس العشا واجد تحب نحطهولك
كارلس: حطيه و عيطي للمدام تجي تتعشى
الخادمة : اوكي ميسيو

وجدولهم الطابلة و حطولهم كل انواع الاكل و الفواكه و الاطباق الشهية راح قعد على راس الطاولة و بقا يستنى فيها تنزل، بعد شوي جات الخدامة
الخادمة: مسيو كارلس المدام جيهان ماحبتش تهبط قاتلك ماهيش جيعانة كول وحدك
ضرب الطابلة بيدو حتى الخدامة قفزت
كارلس: روحي قوليلها تهبط ضرك دقيقة ماتزيدهاش و اذا رجعتي بلا بيها نتي رح تروحي فيها
راحت تجري ذيك الخدامة ترجف تترعد دخلت قبالا بلا ماتطرق الباب من خوفها
الخادمة: مدام جيهان الميسيو قلك اهبطي ضرك و راه مقلق بزاف نخاف كاش مايعمل
جيهان: خلاص روحي نتي ضرك نجي
دارت موراها صابتها واقفة موراها
جيهان: وشبيك مش قتلك روحي راني جايا
الخادمة: اسمحيلي مدام مسيو كارلس قلي اذا رجعتي بلا بيها رح نروح فيها و انا نخاف نخسر خدمتي مدام
جيهان: اووووف هاني جيت تقدري تروحي ضركا
كانت جايا لصالا مونجي و هو شافها جايا تبسم بجيها و عاود زير وجهو ، جات قعدت في كورسي بعيد عليه
كارلس: جيهان هاذيك مش بلاصتك نوضي و ارواحي تقعدي هنا( قدامو)
جيهان: بففف ( ناضت و راحت قعدت قدامو)
كارلس: هكذا خير احسنلك تقعدي عاقلة و تسمعي الكلام و انا رح نكون مليح معاك
جيهان: ماعندكش كاش اوامر وحدوخرين ميسيو كارلس
كارلس: بلا ماتستفزيني بزاف انا راجلك مش ميسيو
جيهان: و مدامك تعطيني الاوامر و تعاملني كيما الخدم وش حبيتني نقلك
كارلس: بلا هدرة زايدة مانيش نعاملك كي الخدم لوكان التزمتي حدودك و ماخممتيش تهربي مع صاحبك مانتصرفش معاك هاذ التصرفات
جيهان: قلتلك الف مرة ماكنتش هاربة معاه و ماني هاربة مع حتى واحد
كارلس: و الي عملتيه الصباح وش تسميه اكيد كنتي معولة تروحي ليه بش تهربو مي انا فقتلك و جبتك اصلا قتهالك وين تروحي نجبدك تروحي لسابع ارض و نوصلك
جيهان: مي نتا مريض نتايا مالبارح و انا نغنيلك ماكنتش هاربة و مستحيل نعمل هاذ الشي مع شخص خاني
خزر فيها وحد الخزرة
كارلس: خانك و نتي خنتيه يعني استعملتيني وسيلة بش تغيضيه تزوجتيني لمصلحتك الخاصة
جيهان: كيفاش ... وش راك تخلط نتايا تهدر وخلاص نتا مريض نتايا
حكمها من شعرها و هي قدامو و اجبدها ليه
كارلس: ايه انا مريض و تعرفي هاذ المريض وش يعمل، اما نقلك حاجة عمرك مارح تخرجي من هاذ الدار و باه نزيدلك تيليفونك تمديهولي مارحش نخلي عندك حتى تيليفون لانو وحدة كيما نتيا ماتستهلش نكون مليح معاها
وطلقها و ناض من بلاصتو
كارلس: شبعت كولي وحدك
بدات جيهان تبكي و طبع في هذيك الماكلة بسيف و تحكي مع روحها
جيهان:  واحد مريض مختل قال يحبسني قال ينحيلي تيليفوني ، هايسجني وخلاص وش بقا مهبول

_________________
دخل لبيتو بدل حوايجو لبس بيجامتو تع رقاد و تسطح فوق البنك ، بعد شوي دخلت ليه لقاتو متكسل فوق الفراش قلبت وجها
جيهان: ماتقليش راح ترقد هنا معايا
كارلس: مش هذا هو المفروض انا راجلك و ترقدي جنبي بسيف عليك ماتحاوليش تلفي و دوري بزاف
جيهان: شوف اذا راك تخمم في حاجة وحدوخرا غير انساها لانو مستحيل يصرا ذاك الشي
كارلس: ماني نخمم في والو، لايكون نتي راكي تخمي فيها صح راكي تهدري غير على هاذ السوجي بزاف قوليهالي اون ديراكت ولا حشمتي
تربثت وجها حمار مالحشمة
جيهان: تي... تي مهبول نتايا مستحيل نخمم هكذاك راني نوصي فيك برك بش تحطو في بالك
و راحت للخزانة جبدت غوب دونوي تعها مع بينوار ، جات داخلة للدوش تبدل لقاتو مغلوق بالمفتاح زيرت وجها و خزرت فيه
جيهان: وين راه المفتاح تع الدوش
كارلس: راكي تحكي معايا ؟!!
جيهان: كارلس اعطينس المفتاح
كارلس: مهبولة نتي وش ندير بالمفتاح تع الدوش انا
جيهان: وش دير بيه باينة درتها بلعاني بش مانلقاش وين نلبس و نبدل قدامك
كارلس: شوفي جيهان......
دق دق دق
جيهان: اتفضل
الخادمة: اسمحيلي مدام حتى ضركا بش تفكرت الصباح كي كنتي نقي في الدوش انا غلقتو بالمفتاح و نسيت بش نفتحو هاكي مدام
جيهان: و هذا وين فقتي اعطيني يرحم باباك و روحي ماتوريليش وجهك مافهمش في هاذ الدار كامل مرضى تمشو و تسكرو في البيبان
هي كانت متوترة وجها حمر يعني ظلماتو و اتاهماتو بحاجة مادارهاش ، بدات تسيي تحل في الباب تسيي دخل في المفتاح ماحبش يتحللها
جيهان : بففف وشبيه هذا تاني عوج
ناض من بلاصتو فكلها المفتاح من يدها و من غير اي حرف بلاصاه في الثقبة تع الباب و فتحهولها و رما المفتاح في الطابلة
كارلس: المفتاح لاباس بيه نتي مافهمتش وشبيك
وراح لبلاصتو ، الوقت هذاك دخلت هي تلبس و خرجت رابطة البينوار مليح محزماتو ، كي خرجت لقاتو راقد دخلت في الفراش معاه و هي شادة في ذاك البينوار ممبعد ركزت مع وجهو مليح اول مرة تركز معاك هكذا ، كان سمر عينيه صح لونهم عسلي و يماه بيضة مي هو جاي سمر كيما باباه شعر ارطب و مبيكيه بالجال مرجعو للور، لحيتو تفتق هي مزينتلو وجهو و هو راقد كان يبان عاقل و يجذب تقول مش هذاك الوحش ليكان الصباح معاها ، جات رح تمسلو وجهو بيدها حبت تتحسس لحيتو ممبعد سحبتها
جيهان: تي وش راني ندير ضرك ينوض و تصرا عركة جديدة
تغطات حتى هي و عطاتو بظهرها و رقدت
وقتها هو فتح عينيه ، كان قاعد و داير روحو راقد و حس بيها وقت كانت تشوف فيه و تحاول تمسو ، يعني ممكن تكون بدات تميل ليه و لا حتى يعجبها شوي معليش
كان شعرها كامل على المخدة و قريب لوجهو ، شدو بيدو و بدا يشم فيه ، تفكر وقت جبدها منو كي قلقاتو ، ديما يعمل الحاجة و يندم عليها هي تستفزو و تخليه يدير حاجات مايحبش يديرهم من بعد يندم لي اذاها اما وقت يفكر لي هي تنجم تسمح فيه و لا تخليه و تروح لوحدوخر يجن جنونو ، هو خلاص تعود عليها و حبها و مستعد يصبر عليها حتى تحبو اما وقت يفكر لي هي ممكن تهرب مع غيرو ماينجمش يتحمل هاذ الشي بلا مايفيق بروحو دنا ليها و جبدها ليه و هو مور ظهرها و عنقها و باقي يشم في ريحتها حتى رقد.

اراءكم 😍