سجينة كارلس (باللهجة الجزائرية)

سجينة كارلس (الحلقة 11)

الحلقة 11:
دخلو لاشوبر تما في لوتيل و بداو يحكو
جيهان:نظن علابالك علاه حبيت نحكي معاك قبل مانعقدو
كارلس: خزر فيها مستغرب، لايكون كاش حاجة ناقصة في العرس نقلهم يسڨموها
جيهان: لالا كلشي تمام ، نحكي على الوثائق لي قتلك عليهم انا مارحش نوقع على وثيقة الزواج الا اذا رجعو كامل المستندات و املاكنا باسم بابا كيما كانو في الاول
كارلس: حتى انا مانسيتهومش راهم كامل واجدين مي في بالي بعدما يخلاص العرس نمدهملكم مكنتش ضان بلي راكي مزروبة عليهم هكذا
جيهان: مش مزروبة اما هكذا كان اتفاقنا
(هو تفكر هدرت سيف كي قلو عندها شرط وحيد قال اكيد تقصد هذاك الشرط، و هي على الاتفاق تقصد كلام سيف كي قال لباباها اذا حاب املاكك ترجعلك و ماتصفاش في الشارع كارلس موافق على الشي بالمقابل تزوجلو بنتك)
كارلس : ااا اوكي مكاش مشكل ضرك نقلخم يعيطو لباباك بش يجي يسينيي عليهم

كيما كان الحال عيطو لمسيو حسان سينيا على الورق و الاتفاقية و دا نسخة منهم ممبعد رجعو دخلو لاصال تع العرس و كي جات تسينيي على عقد الزواج كانت مترددة تفكرت لؤي ذكرياتهم تفكرت تامر تفكرت حياتها لي رح تتبدل 360° من بعد ماتسينيي على هاذ الوثيقة و كيما كان الحال وقعت على وثيقة الزواج و لبسو الخواتم و ضرك ولات زوجة كارلس*** رسميا .
تعالت التصفيقات ممبعد بدا الغنا طلعت لشمبرتها في لوتال بش تبدل مادارتش تصديرة كبيرة غير زوج لبسات و لاغوب بلونش و كيكانت تلبس في لاغوب بلونش سمعت الطبطيب في الباب في بالها كارلس جا بش يهبطها غلقت السلسلة تع لاغوب بسرعة و هي عاطياتو بظهرها
جيهان: ادخل مي مازال ما كملتش (بلا ماتشوف شكون)
لؤي: يعني كنتي تحكي صح مانيش مصدق بلي كنت مخدوع فيك هذاك الوقت كنتي مخطوبة و تتلاعبي بيا و كي شفتيني مع سيلينا هذاك النهار سميتيني خائن مي نتي طلعتي اكبر مخادعة
دارت مخلوعة كي صابتو قدامها
جيهان: لؤي وش جابك مهبول نتا لوكان شافك كاش واحد
لؤي: علاش عملتي فيا هكذا كنت مستعد نركع عند رجليك بش تسامحيني حسبتك تتمسخري و نتي رحتي تزوجتي من غير ماتعطيني حتى فرصة نشرحلك لي صار
جيهان: فات الوقت يا لؤي كان لازم تخمم في هاذ الشي قبل ماتخوني ، انا صحيح كنت مخطوبة كي تعرفت بيك مي كنت مستعدة نتخلى على كلشي في جالك حتى نهار جيت ليك كنت حابة نحكيلك كلشي باه تعاوني نحل مشكلتي و نبقى معاك نتايا مي كانت اكبر ضربة ليا لقيتك تخون فيا و شفتك بعينيا كون سمعتها من وحدوخر نكذب لؤي مايعملش هكذاك مي شفتك انا و تقلي نبررلك عذر اقبح من ذنب قال هي غواتك لي يحب عمرو مايخون
لؤي: جيهان انا صح غلطت مي نبقى انسان يغلط ماكاش واحد مكمول تعيشي سمحيني و حبسي كلشي نوعدك ماعادش نغلط تعيشي هيا نهربو و نوعدك نساعدك بش تتحصلي على الطلاق و نتزوجك وعد مني جيهان مانيش حاب نخسرك
خزرت فيه بحسرة كبيرة شوي و تضعف قدامو اما كبرياءها منعها
جيهان: ماعدتش نصدقك لانو وعدتني من قبل قتلي نحبك و نستناك حتى تقوليلي شعورك و نهار جيت نعترفلك بحبي في اول فرصة خنتني ، خلاص لؤي روح اصلا مش من حقك تحكي معايا ضرك انا مرا متزوجة و مانيش ناوية نخون راجلي لانو طعم الخيانة واعر و مامتمنى ختى واحد يعيشو روح لؤي خليني في حالي
راح يجري يعنق فيها و زير عليها حتى مانجمتش تفتك منو
جيهان: اطلقني لؤي روح قتلك لالا خلاص افهم ماتحطنيش في موقف صعيب كيما هذا
لؤي: مستحيل نطلقك علابالي نتي تان تحبيني هيا نهربو
في هاذيك اللحظة و هو معنقها مزير عليها دخل كارلس وشافهم في ذيك اللقطة و سمع اخر كلمة نهربو
كارلس: نع**** و راح ليه ضربو ببونية لوجهو طيحو في الارض ، و دخل عليه بالضرب يعني ناويين تهربو ، جيهان بدات تضبح و تسيي تسلكو مانجمتش
جيهان: اطلقو كارلس اطلقو سيبو ( ورجليها يرجفو مالخوف)
حتى دخل سيف كان جاي يشوفهم كي بطاو حتى سمع الضبيح دخل فكهم و دا لؤي خرجو من الشومبرا ، و كارلس راح لجيهان حكمها من شعرها و جبدها ليه
كارلس: يعني كنتي ناوية تهربي مع صاحبك مالا هكذااا نبانلك واحد بهلول تنجمي تضحكي عليه
ولات تبكي و تحاول تتفك منو
جيهان: شيبني سيبني اطلقني ماكنتش ناوية نهرب اصلا ماعندي وين نروح اطلقني ( رجليها يرجفو و هي خايفة)
كارلس : هههه تهربي تطلعي للسما السابعة نعاود نهبطك وين تكوني نجبدك ، تبانلك انا انسان مليح و يساعف حبيتك و تزوجتك مالغري كنت قادر نستعمل الف طريقة و نجيبك لعندي تحت رجليا مي نتي وشنو ناوية تهربي بش تضحكي عليا و هاذ الحاجة تخلصيها غالية ضرك تشوفي وش ينجم كارلس يعمل فيك امشي قدامي ، و داها من شعرها يجبد فيها و هي تبكي و شادا في يدو تحاول تتفك منو ، ممبعد غاضتو مالغري راه مجروح منها بزااااف مي كس شافها تبكي هكذاك غاضتو طلقها هبطلها الفوال على وجها و خرجو من الباب الخلفي تع لوتيل و ركبها في الطونوبيل و قلع
جيهان و هي تشهڨ من البكا: هئ هئ هئ .. و الع ... و العرس ضرك يشوفونا رحما هكذا وش يقولو
كارلس: العرس فض مكاش خليت سيف يتصرف ضرك يقولو العريس ماصبرش و دا عروسو بش يقعدو وحدهم هههه ماعلابالهمش بلي العروسة خانتني نهار عرسنا و كانت ناوية تهرب
جيهان: هئ هئ ... ماكنتش رح نهرب قتلك ماكنتش هاربة هو جا ليا معرفتش كيفاه لقاني و نتا دخلت و ... هئ هئ

زاد في السرعة تع الطونوبي وقت تفكر الموقف ليصابهم فيه متعانقين جن جنونو ولا يسوق بالفور قريب عملو اكسيدون جيهان خافت منو بزاف و ماحبستش بكا
جيهان: بركا بركا اهههئ رح تقتلنا بركاااا
لحظتها حس بخوفها غاضتو بزاف فرينا الطونوبيل حبس وسط الطريق و جبدها ليه لصدرو عنقها و بدا يحككلها في ظهرها
كارلس: خلاص ماصار شي خلاص سامحيني مافقتش بروحي كيوليت نجري هكذاك
جيهان: هئ هئ هئ
كارلس: شووووت خلاص قلنا مسحي دموعك

اراءكم ؟
وش هي الاحداث ليراح تصير في الحلقات القادمة توقعو المزيد من التشويق و الحب و الكره و الرومانسية 😍