سجينة كارلس (باللهجة الجزائرية)

سجينة كارلس (الحلقة 20)

#سجينة_كارلس
الحلقة20:
كملو العشا و طلع هو الاول لبيتهم دخل قبالا للدوش يدوش احداث اليوم تعبوه بزاف و كان محتاج قصط من الراحة ، اما هي لحقاتو و دخلت للشومبرا لبست غوب دونوي نواغ تع حرير مع البينوار تعها ، طلقت شعرها و رفدت كتاب تكسلت في بلاصتها و بدات تقرا فيه ، حتى غاست بقات تتفكر كيفاش حكمها و مخالاهاش طيح و تفكرت تعنيقتو كيفاش زير عليها و يديه يرجفو كان واضح بلي راه خايف عليها، قلبها رجع يدق توترت وحد شوي خرج هو غير بالشورت حاكم سربيتة و يمسح في شعرو يحاول ينشفو من الما حتى هو كان غايس و يخمم كل واحد يخمم في الثاني
بقات تخزر فيه من تحت للتحت في الكور تاعو و شعرو و هو يقطر من الما صدرو تفكرت تعنيقتو ماحبتش تروح من بالها هذاك الجاست ممبعد نطقت
جيهان: كارلس...
كارلس: انعم
جيهان: ميغسي على قبيلة لوكان مشي نتا لوكان راني طحت و كاش ماصرالي
كارلس: بعيد  الشر ان شاء الله مايصرالك والو
تبسمت معاه ،و بقات تفكر صح كانت ظالماتو بحكمها عليه قبل ماتعرفو كيفاش داير فعلا المظاهر خداعة مي هي مسؤولة ماعطاتوش فرصة و زاد حتى هو راسو خشين تعامل معاها بطريقة خلاتها تخمم فيه هكذاك هو سجنها في هاذ الفيلا و نحالها كامل وسائل التواصل مع الناس، تيليفون انترنت و زاد دارلها حراس و مرافقين يعسوها كانها مرتاكبة شي جريمة و اي مرا في بلاصتها ماكانتش رح تتحمل هاذ المعيشة هاذي
تكسل قدامها في الفراش و طفا الضو وفي زوج خلاو الفيوزات ليقدامهم مشعولين ،و مارقدوش
جيهان: كارلس...
كارلس: وي
جيهان: جو سوي ديزولي
كارلس: على واش؟
جيهان: على كلش (و بدات تبكي)
دار ليها كانت عاطياتو بظهرها
كارلس: راكي تبكي؟؟؟
ماجاوباتوش
دورها شوية من ذراعها تقعدت و تكات على الصور تع البونك
كارلس: وعلاش راكي تبكي
جيهان : خاطرش ظلمتك بزاف و رغم هاذ الشي نقذت حياتي كي جيت رحا نطيح ماخليتنيش نوقع ، لوكان واحد غيرك بلاك يخليني نموت و مايهموش
كارلس: ماتحكيش هاذ الهدرة نسلم في حياتي و مانسلمش في حياتك، جيهان انا حبيتك رغم انك تكرهيني صبرت على هاذ الشي و متاكد يجي نهار و تحبيني فيه
جيهان: يعني تقدر تتحمل لهذاك اليوم
كارلس: و نقدر نتحمل كثر كوني معايا برك ، و ضركا امسحيلي هاذوك الدموع( طلع يدو و مسحهملها بحنانة) و رقدي راح الحال
تكا على جنبو مقابلها و غمض عينيه ، بقات تخزر فيه و غايسة تخزر تخزر مش عارفة علاه راهي تحس هكذا من جيهتو ، ماعرفتش ترقد زيد سخنت في البينوار تع الحرير هذاك و هي ديما ترقد محزمة ماعرفتش كيفاش دير كانت مديرونجيا بزاف منو
كارلس: تقدري تنحيها اذا ديرونجاك ماتخافيش مارحش نقرب منك
جيهان: لالا مش عليك ما..
كارلس: علابالي كيفاش تخمي من جيهتي مي ماتخافيش مارحش ندنى ليك مالغري متمني هاذ الشي مي اذا ديرونجيتي منو نحيه رح ندور للجيهة لوخرا مانخزرش فيك
جيهان: اوكي ، بونوي
دار على جنبو لوخر ، هي فتحت البينوار بش تنحيه و مرة على مرة دور موراها طل اذا راه يخزر فيها ، ممبعد نحاتو و دخلت في الفراش تغطات و رقدت

_______________________
صباح يوم جديد فاقت على الساعة 10:00 هزت تيليفونها تشوف الساعة
جيهان: او رقدت كامل هاذ الوقت و ماجبتش خبر خزرت قدامها ماكانش ثم
دخلت للدوش غسلت وجها ممبعد بدلت حوايجها و هبطت ، راحت للكوزينة
جيهان: كريستين وينو كارلس
الخادمة: صباح الخير مدام ميسيو كارلس خرج صباح بكري قلك عندي خدمة و بلاك يبطى باه يجي
جيهان: اوكي معليش ، المهم جيبيلي قهوتي كسف العادة للجاغدان راني نسنى
خرجت راحت ريحت في الجاغدان وحدها تحس بالسماطة حاشة روحها في شجن ديما محبوسة لهنا ، يدات تخمم في حياتها و في كارلس لؤي ولديها لي توحشتهم عندها بزاف ماشافتهمش، و 90 ٪ من تخمامها كان في كارلس ممبعد تبسمت وحدها حست بلي بدا يعجبها بدات تنجذب ليه هي تزوجت تزوجت ماعندها ماتتراجع ضرك على الاقل تحاول تعيش حياتها احسن من هكذا خير ملي تبقا في هاذ السجن  و قررت اليوم تبدا معاه بداية جديدة و تعطيه فرصة بلاك تولي تحبو
ناضت و راحت للخدامين تع الكوزينة عطاتهم اوامر بش يحضرو عشا شباب و ماينقصو شي
هذاك الوقت كارلس كان في اجتماع و فير كمل اجتماعو كي العادة رفد تيليفونو و عيط لواحد من الحراس لي دايرهم عليها و سقساه وش راهي دير
الشخص: المدام قبيل كانت في الجاغدان ضرك ماعلاباليش وين راهي بلاك تكون دخلت للفيلا
كارلس: ياحمار ادخل و روح شوفها وينراهي ياويلك يكون صاريلها شي
الشخص: اوكي ميسيو رح نشوفها
كارلس : وماتكوبيش نحب كي تشوفها تقلي
دخل البوديڨارد للفيلا و سقسا الخدامة
الحارس: وين راهي المدام
جيهان: راني موراك وش تستحق
الحارس: و لا شي مدام مسيو كارلس عيطلي يسقسي عليك هذا مكان
جيهان: اعطيني التيليفون نحكي معاه و روح شوف خدمتك
عطاهولها بتردد خاف من كارلس
جيهان: الووو
قلبو ولا يخبط مايعرفش علاه يصرالو هكذا كي يسمع صوتها يتشل كليا
كارلس: واش جيهان صفا سقسيتهم عليك اذا كان ناقصك شي
جيهان: سقسيتهم عليا و لا خفتني نهرب كيما ذيك المرا
كارلس: لالا مش هكذاك
جيهان: خلاص مايهمش نحب نقلك ماعندي وين نروح مارحش نهرب و حبيت نحكي معاك ضركا بش نقلك راني مستنياتك على العشا اليوم ماتبطاش سيلتوبلي
كارلس: اوكي ان شاء الله نحاول نجي بكري
جيهان: ميغسي و ضركا نخليك مع خدمتك اتهلى

اراءكم؟