قصه ..وحكمه.

التّسْتْمَالْ

شن هو التّسْتْمَالْ ؟ ومنين جت كلمة تستمال ؟(التستمال هو الغطاء اللي تلبسه النساوين فوق الراس).هذا ياسيدي بن سيد، قالّك كانت الجالِيات الأوروبية تعيش فى طرابلس منذ قديم الزمن ومنها المالطية واليونانية والإيطالية إلى جانب سفراء وقناصل مختلف دول العالم.وفي المنشيّة كانت ساكنة الشابة الطرابلسية (مبروكة) بنت اأحمد الشاوش وجارتها "رومية" شابة في عمرها تقريباً اسمها (مارية) زوجة انطونيو الحدِاد وكانت مارية تحب هدرزة مبروكة هادي تخبط كلمة عربي وكلمة طلياني وكذلك مارية..وفي يوم من الأيام جت مارية حاطة على راسها منديل كبير ومربوط بشدة على جبهتها، استغربت خالتك مبروكة قبل ديما مارية سافِرة وشعرها عريان ومبروكة تلبس في العصابة الشينة، مبروكة اشّرت لـمارية شن هذا اللي على راسك؟ ردّت عليها الرّومية بالإيطالي وقالت :o,testa Mali اوتيستا مالي ..بمعنى عندى صداع وراسي يوجع فيّا، خالتك مبروكة عجبها المنديل خفيف ظريف، لوّحت هاديكا العصابة على طول ايدها ولبست المحرمة زي الرومية وعقدتها على الجبهة وشافت روحها فى المرايه لقت روحها قنيّنة وطالعة عليها كويسة، جوها الجيران ثالت يوم بيهدرزوا عندها لقوها بهاديكا المحرمة على راسها، سألوها :شن هذا يا مبروكة؟ قالتلهم: (هذا تستمالي) على أساس فهمت اللغة الإيطالية اوتيستا مالي وعلى طول تم التقليد وانتشرت الموضة فى كامل المنطقة وانتقلت إلى المدينة القديمة وحارة اليهود ثم إلى الأُسر الأرستقراطيّة في بلاط أسرة القرمانلي، وتم عن طريق اليهود تحسين خدمة التّستمال وداروله الشناشيب فى الحواشي وخططوه زي الحوالي ليتناسق المنظر، وصارت ليه شنة ورنّة - أنواع التّستمال:* تستمال حقاني بالتل: يُستعمل للبدلة الكبيرة أو كسوة الصدرة، وهو من الحرير الطبيعي الخالص المزخرف والمُوشي بأسلاك من الفضة والتل.* تستمال حقّاني مطلوق أو صادة:ويستعمل للبدلة الصغيرة وهو من الحرير الطبيعي الخالص المزخرف وغير مُوشي بأسلاك الفضة أو التل.* تستمال برمبخ بالتل:وهو تقليد لما سلفه، ويحاك من الحرير الصناعي مع زخرفته بأسلاك معدنية برّاقة.* تستمال برمبخ صادة:وهو تقليد لما سَلفه، ويُحاك من الحرير الصناعي مع زخرفته بغير الأسلاك المعدنية إنما بمغزول الحرير الصناعي ذاته . ⁃ وتوا .. من مازال يلبس في التّستمال في الحوش زي عزيزاتنا زمان ؟ مع التعديل ..