خرافة اليوم علي مثل يقول..(ياهارب من الغـــــولة يا طايح في ســـلال القلـــــــــــوب)ياحزاركم يامزاركم ..![]()
.كان فيه مراء ماتحبش الموت وتخاف من الجبانة لأنها سامعة أن اللي يموت تطلع غولته وهيا تخاف من الغولة وبعد سنين مرض حاشاكم راجلها وبعدين توفى، داروا عزاه,وبعدين بعيد عليكم الشر دفنوه وحتى الزيارة ماعاد زاراته ماتحبش,تشوف القبور خايفة تطلعلها غولته، وكل ماتسمع بحد مريض ولا توفى ترعش,وتخاف حتى العزي,تمشي بالسيف تخاف من ذكر الغولة وتعقدت من الموت ومن الجبانة وبدت تحلم وتتخايل في روحها حتى هيا لما تموت ويدفنوها بتطلع غولتها ولا بعيد وبرة وليدها كان توفى كيف بدير لغولته وقالت في نفسها بنمشي ندور بلاد مافيهاش,لا جبانة ولا غولة ، وبدت تنشد اللي جاي واللي مسافر بالك سامعين ببلاد مافيهاش جبانة ومايطلعوش فيها الغولة بنمشيلها وبنعيش فيها وكل واحد يقلها كلام لين فيه واحد قلها في بلاد بعيدة يعيشو فيها عرب يم يم ماعندهمش,جبانة يدفنوا فيها، وفي ليلة بلا قمر طبت ولدها ومايلزمها وتسقدت لعرب يم يم وقعدت اتبع في النعتة ووين مايمساها الليل تبات لغاية ماوصلت لهديكة البلادواختلطت بناسها وعاشت بينهم ومروا سنين وهداكة وليدها كبر ولا راجل وزوجاته ببنية من بنيات عرب يم يم وفاتوا سنين ومروا وكنينتها فرحتها بوليد وهيا كبرت في السن وحفيدها سكر العامين ، وفي يوم من الايام وليدها قلها يااميمتي اني بنسافر في تجارة ومرات نعطل حتى شهر ردي بالك من روحك واهي,معاك كنينتك وحفيدك يونسوك لين نجي، قتله برة وليدي زينة . وتسقد هداكة الولد و العزيز قعدت مع كنتها تعاني فيها، وفي يوم الصبح جتها كنينتها قتلها نوضي ياعمتي خيرك عطلتي في النوم وما نضتيش؟ نوضي افطري معاي !! قالتلهااني اليوم نحس في روحي مريضة وراسي يوجع فيا وما خاطريش في شئ..تعجبت الكنه وقالتلها شن يوجع فيك؟ قالت العزيز على حسن نية .راسي يوجع فيا هلبة!!!! .مشت الكنه تجري لاماليها وقالتلهم..تعالوا بنزردوا..قالولها شن فيه قالتلهم عزوزي راسها يوجع فيها..التموا اماليها واقاربها ويصفقوا فرحانين..العزيز ياناري حارت جايين ينشدوا ولا يصفقوا فرحانين !!!كيف؟!!قالولها احني من عاداتنا اللي يمرض ندبحوه و.نلتموا نديروا عليه زردة وناكلوه!! .بكت العزيز وخبطت وقتلهم مافيا شيء !!مافيش فايدة..مابوش يسمعوا كلامها ..بعدين قالت اااااه!!! توة عرفت علاش,بلادهم مافيهاش جبانة واني خيرني ليا سنين معاهم وماسالتهمش وين يدفنوا في موتاهم؟ تاريته اللي يمرض يذبحوه وياكلوه مايذفنوش فيه. ولما تلاقوا عليها وجوها بيذبحوها قتلهم خلوا وليدي لين يروح ونشوفه قالولها لا !!! قتلهم باهي خلوله حتى هو ماياكل، خلوله من كل حويجة طريف!! شوية من الرية وشوية من الكبدة وشوية من الراس وشوية من كل شي ..قالولها باهي وذبحوها ودسوا من كل حاجة طريف لوليدها وكلوها!!! وبعد شهر رجع ولدها..قال لمرته وين امي مش باينة..قتله امك مرضت قريب ماتت علينا لحقنا عليها تلحيق بالموس لكن ماتخافش,خلينالك حصتك من كل حويجة طريف ومشت جابتهوله ، شافها رعش ودار روحه مايندري علي شيء هيا تحسابه حتى هو من عرب يم يم زيهم وماباش يقوللها وراجى لين ليل الليل وخنب ولده وهرب بيه بيرجع لبلاده ، بلاده بعيدة والمسافة طويلة يمشي ويرتاح والماكلة عليه تمت وقال خلي نحط ولدي علي كتافي ونخفف سرعتي باش نوصل فيسع ونلقوا ماناكلوا .... مشي مشي وهداكة الولد جاع وينقز علي ودن بوه وياكلها !!عيط الراجل وخدي هداكة الوليد اللي طالع حتى هو لخواله من عرب يم يم وحذفه في الوادي وقال حتى اني مالقيت ماندير جايب معاي عرب يم يم، ورجع لبلاده بروحه وتزوج بنت من بلاده وبدي اللي ينشده خيرك روحت؟ ووين امك ؟يقوله ياهارب من الغـــــولة يا طايح في ســـلال القلـــــــــــوب وهاذي قصة المثل يا هارب من الغولة ياطايح في سلال القلوب.!! وان شاء الله عجبتكم الحكاية منقول
