واحدة صاحبتي كانت كل شوية تهزر وتقول انا شكلي هتطلق يوم فرحي، حتي لو كانت بتعمل شاي وطلع ناقص سكر كانت تقول الكلمتين دول
شاء ربنا انها تتخطب ويحصل عقد وكل حاجة تمام والاسرتين متفقين، لحد يوم الزفاف حصلت مشكلة تافهه بينها وبين العريس والاهل اتدخلوا والمفاجأة إنه طلقها فـ نفس اليوم وكرامتها ماسمحتلهاش انه يردها بعد كدة.
تيتة كانت بتحكيلي عن شخص كان بيتمتع ببُنيان جسدي قوي وصحته كويسة أوي لكنه كان بيخاف من الحسد، فلما كان بيقرب من المنطقة اللي ساكن فيها كان بيعمل نفسة بيعرج ويمسك عكاز عشان يبعد العين عنه
وفـ يوم وهو راجع من الشغل حصلتله حادثة اتسببتله في اعاقة دايمة في رجله وفعلا مابقاش يعرف يمشي من غير العكاز .
أنا من أول مااتجوزت وكل ماحد يفتح معايا موضوع الحمل أقولهم بضحك وهزار:-
دة انه من اول يوم حمل هصلي وانا قاعدة..
كنت اقصد وقتها ان من كتر خوفي عالبيبي هحافظ عليه
لكن يشاء ربنا اني اُرزق بالحمل لكن كان مُصاحب لأعراض اجهاض مُنذر وكان لازم مااعملش اي مجهود او حركة غلط وفعلا من اول يوم كنت بصلي وانا قاعدة ودة كان غصب عني
💬الخُلاصة:-
❄️الكلمة سهم فاحذر إنه يصيبك في مقتل..
قال النبي صلى الله عليه وسلم لما نهى عن الطيرة قال: وَيُعْجِبُنِي الْفَأْلُ, قَالُوا: وَمَا الْفَأْلُ؟ قَالَ: كَلِمَةٌ طَيِّبَةٌ. متفق عليه.
❄️العين حق لكن ماتستموتش عشان تبعدها عنك وماتنساش .. "قُلْ لَوْ كُنْتُمْ فِي بُيُوتِكُمْ لَبَرَزَ الَّذِينَ كُتِبَ عَلَيْهِمُ الْقَتْلُ إِلَى مَضَاجِعِهِمْ"
❄️اياك تنكر نِعَم اللَّه عشان خايف من بشر وافتكر دايما.. "وَأَمَّا بِنِعْمَةِ رَبِّكَ فَحَدِّثْ"
- رنا السمان
