#أقـدار 💛
#الحلقـة 1
#بقلـ ✍️ـم: نـوودين =Πeedoo
في الكافتريا بينما الجو هادئ وكل الناس مشغولين ببعض فجأة علت أصوات ولد وبت بتشاكلو
-إنت م بتشوف!؟
=وإنتي لازم تطلعي ف وشي فجأة كدا يعني؟
-الجامعة حقتك لاسمح الله!
=لو حقتي ماخليتك فيها ثانية 😒
-لو حقتك أصلاً م ح أقعد فيها نانو ثانية
=ماناقصك أختيني يابتنا ..
-إكسيوزمي..! ع أساس أنا ناقصاك مثلا شوف الوهمي دا بلاي
=ح أتجاوزك لأني مافاضي ليك المرة دي .. بس م تفتكري دي ح أفوتا ليك..!
-ياريت المرة الجاية م تطلع ف وشي علشان كل م أشوفك بتحصل لي حاجات سيئة وبتخرب لي يومي
=تصدقي نفس الشي ولامرة شفت وشك دا وحصل لي شي حلو دا علشان إنتي واحدة منحوسة الله يعين الحيعرسك "ومشي خلاها "
-نينينينيني .. يارب م أشوفك تاني ..
البت الوهمية دي أنا كل ماالاقيها لازم تحصل لي مصيبة حمراء يعني "كان بنضف في جزمتو لانو العصير إتكشح ووسخ ليهو بنطلونو وجزمتو "
*ووبعلي منك لسانك الطويل دا مالك علي ود الناس!؟
-إنتي التانية أختيني م ناقصاك .. شايف روحو حاجة سمحة كرهني الجامعة من يوم مشينا الكلينك والكوت بتاعي كان في الدراي كلين الجنبنا مشيت أجيبو وأبا يدخلني وإتناقشت معاهو ومن وقتها كل م نتلاقي بحسو بنتقم مني بتصرفاتو دي قاصد ..
=يابت إنتي بتكبري المواضيع والله هو بكون نسي أصلاً .. أرح صلحي شكلك دا عايني بقيتي مسخرة ..
-كلو بي سببو مازعلانة علي العصير علي قدر م زعلانة علي لبستي الاتبرزعت بي سببو .. أووف منو متخلف، أهبل، غليظ،
=بيبي أعصابك ماترفعي ضغطك هو ولا إشتغل بيك مشي مع أصحابو 😂
عدا إسبوع إرتحت منو ومالاقيتو خالص .. رغم أني في كل لحظة كنت بتوقع يظهر لي في وشي بس الغريبة م لاقيتو
الإسبوع البعدو بقيت واقفة في باب الـ DR "المشرحة " متعودة كل أسبوع نتلاقي هنا .. صاح هو سنيري ومابينا علاقة حميمة يتقال عنها بس بنتلاقي كل أحد هنا .. القروب حقهم بكون طالع ونحن داخلين .. كنت واقفة برة وسرحانة عندي مشكلة بفكر فيها .. فجأة جا ولد طق طق لي في وشي قال لي سرحانة وين؟
إتخلعت وماعرفت أقول ليهو شنو قعد يضحك ضحكة مستفزة وقال لي خوافة ومشي خلاني واقفة ماعرفت أنبزو ولا أضحك علي غبائي وردات فعلي البتجي متأخرة 😪 من وقتها وبقت بينا صدف كتيرة ..
هو دايما بتصنع المشاكل وبخرب لي مزاجي .. أنا م عندي أخلاق لأولاد الجامعة ديل علشان كدا بتشاكل معاهو طوالي .. ماحصل جمعنا موقف م إتشاكلنا .. مرة ماشين زيارة ومن حظي لقيتو معاي ف نفس السكشن وحسب إني يداب متدربة وهو شغال يأمر فيني ومشيت بكيت لصحبتي قلت ليها تبدلني بس ممنوع إستحملتو وعديتا ليهو ..
تاني في مرة عندنا كاميونتي ودراسة بحث في الجامعة الدكتور إعتذر وقال ليناأي قروب يسلمو البحث لليدر بتاعهم مشيت ليهو مالقيتو إضطريت إنتظرو اليوم كلو لانو أخر موعد للتسليم وبرضو زهجني ..
دا غير المواقف الكتيرة بتاعت اللابات مرة جيت داخلة م معاي قلوفز قلت ليهو بشيل من صحبتي جوة عندها فائض قعد يديني محاضرة عن الاعتماد علي النفس ومامفروض أكون مستهترة وأجيب معاي حاجاتي وكدا ماينفع أبقي دكتورة أقسم بالله كرهني الطب وسنينو ☹️
وقفت كتير كأني مستنياهو يجي .. أصلا إتعودت كل أحد نتشاكل هنا 😂 وقت م جا حسيت باليأس دخلت وبالي مشغول عليهو م من عاداتو يغيب صاح مستهتر وبجي متأخر بس كمان مالدرجة مايجي بالمرة ..أول م خلصنا طلعت وبقيت مستنية قروبهم يطلع .. كلهم طلعو وهو م معاهم جات صحبتي قالت لي أرح مستنية منو ..!؟
-ولا حد ح أكون مستنية منو يعني؟
=أنا عارفة ليك شايفاك واقفة و
-ديك مش ملاذ صحبة وائل وبمشو سوا طوالي ؟
=أي مالا..!؟
-الليلة مالا واقفة مع شلة أولاد وهو م معاهم.!
=رايك شنو تمشي تسأليهم تقولي ليهم وائل وين؟
-😒 غلطانة أنا علشان سألتك أرح 🙂
أصلا أنا لو م غبية م كان بسأل عنو أثناء م نحن نازلين جينا جنب ناس ملاذ وشلتهم سامعاها قالت ليهم وائل عمل حادث ياشباب وهو حاليا ف مستشفي الزيتونة أمشو ليهو في شكل قروبات علشان م نكتر الزيارة ...
أنا بقيت واقفة في مكاني وزي التقول دخلتني صدمة .. وعد بعد مشت مسافة لقتني واقفة جات راجعة جرتني من يدي قالت لي مالك ياخ حنتأخر ..
حسيت العبرة خانقاني وماقادرة أتحرك من مكاني قلت
ليها وائل ..
-شكلك فاقدة جرعة المشاكل البينكم صاح؟
=حصل ليو حادث ياوعد .. علشان كدا الاسبوع الفات دا كلو م شفتو .. أنا قلت ليو يارب م أشوفك تاني
-براحة ي بت أهدي دا قضاء وقدر م ليك ذنب وإنتي عرفتي من وين ؟
=ملاذ كانت بتكلم أصحابو .. بقيت جراها من يدها وبقول ليها أرح معاي أنا لازم أشوفو
-واللكشر الدكتور حيمينصنا تعالي نمش بعدها ..
=إنتي أمشي أحضري أنا ح أمش ليو
-طيب دقيقة نتفاهم ..
م إنتظرتها طلعت الكوت وماطبقتو ربطو في كتفي وبقيت ماشة بسرعة جيت قاطعة الظلط بدون م إنتبه حتي المستشفي م كانت بعيدة .. جيت داخلة السكيورتي وقفني قلت ليو ماشة العظام قال لي الطابق التالت .. راكبة السلم بسرعة وصلت أخدت نفس ويداب إستوعبت أنا جاياهو ليه؟ بصفتي منو؟ أصلا أقول للرسيبشن عايزة منو؟ ح ألاقيهو بأي وش؟ حيقول عني شنو؟ أسئلة كتيرة خطرت ع بالي ماعرفت إجابتا قعدت جنب أقرب كرسي وقعدت أبكي ..
#يتبع
#نهاية_الحلقة_1
#بقلـ ✍️ـم_نوودين_بت_من_حب
