#أقـدار 💛
#الحلقـة 7
#بقلـ ✍️ـم: نـوودين =Πeedoo
-رجلو متضررة شديد ومحتاج تاني عمليتين .. خلي أبوه يجي يتم الاجراءت القانونية لأنو الموضوع مستعجل .. وياحبذا لو العملية التالتة تتعمل ليه برة لأنو هنا الدكاترة م متاحين علي طول .. المرة دي الدكتور العملا معاي دا مامستقر هنا بيجي زيارات بس وم معروف المرة الجاية لو حيستني لحد م يصادفو أو لا ..
=يعني ولدي م حيقدر يتحرك تاني .. ماتقولي كدا يادكتورة
- إتماسكي شوية وإن شاءالله كلو حيبقي فل الفل أنا بس بقول ليكي علشان تلحقو من بدري .. ماكنت عايزة أكلمك وكان مفروض أقول الكلام دا لأبوه بس قلتي م موجود فلازم تتصرفو بسرعة الرجل اليمين عملنا ليها مسطرة ومفروض بعد شهرين نطلعا وم أظن موضوعا خطير بس الرجل الشمال محتاجة متابعة فيها مشكلة في الاعصاب ح أكتب ليك تحويل لقسم الدلك الطبيعي لازم يتابع في العلاج الفيزيائي وأهم شي يتقبل الموضوع ويبدا العلاج بسرعة وبإذن الله حيتحسن
=هسي المطلوب مني شنو ؟
-رسلو الموافقة للشركة يعملو ليكم جيك علشان تبدو العلاج وحيتحول من الـ pRoom وراجعي الحسابات عند الريسيبشن أديهم رقم الفايل بتاعو " وكتبت ليها ورقة فيها رقم "
أم وائل طلعت من عند الدكتورة مصدومة ماعارفة تقول شنو بقت تقول يارب قعدت في أقرب كرسي مسكت راسا مسافة وهي بتفكر في ولدا الوحيد .. مش كفاية وليد قبل كم سنة راح منها كدا برضو بسبب كلام الدكاترة المابطمن .. بسبب بعد أبوهو المابتواجد في اللحظات المهمة دي .. ليه مكتوب ليها تعيش وأولادا يفقدو شبابهم .. ليه مكتوب ليها الوجع ..
إستغفرت وشالت الورقة مشت الريسيبشن مدتا للبت من سكات راجعت الرقم وقالت ليها أنزلي الارضي أديهم الورقة دي حيدوك الفايل بعدها جيبي لي ..
نزلت جابتو وجات ليها كمية بتاعت جرجرة أدخلي هنا وأمشي هناك حيلا إتهد .. ولدا الوحيد راقد مقعد ف سرير م قادر يحرك رجلو .. راجلا مع أشغالو وقاعد بعيد عنهم كل يوم بقول ليها ح أجي ولسة م جا .. أهلا م هنا وأصلا م عندها زول قريب منها .. كلهم أهل بعيدين وكانو ف الأيام الأولي يوم يومين بيجوهم صباح ومسا وأسي ليهو حكاية 10يوم ف المستشفي الموضوع بقا روتين ومفروض يتعودو عليه ماف زول بكلف نفسو يجيهم كل يوم ..
أخوها كمان م بيقدر يسيب شغلو ويجي كل يوم جا الصباح إطمن عليهم ومشي .. ماعندها أخوات كتر خير جارتهم وبناتا والوقفة الوقفوها معاها ..
أعمامو م عندهم أولاد والبنات م بيقدرو كل يوم وتاني يجو .. كل المساعدات البتتقدم ليهم دعم مادي البيجي يتكفل بالعلاج .. البرسل ليهم مصروف .. البيطلب ليهم دليفري أكل جاهز .. وأهو قاعدين كدا 10يوم أمو م قادرة تطمن والليلة الطين زادوهو بلة .. ماكانت مطمنة من يوم العملية بس م حبت تبين شعور سيئ.
