#أقـدار 💛
#الحلقـة_12
#بقلـ ✍️ـم_نوودين=Πeedoo
عدت الأيام رتيبة ومملة بس لو أعرف كيف حياتنا المتزنة قبل سنين قادرة تتحول في لمح البصر بسبب غياب ناس دخلو فيها جديد 🙂💔
ساعات بقول ماليو دخل دي تنشنة الأمتحانات والقراية الكتيرة بس بلقي إني واهمة نفسي ودا م سبب مقنع خالص .. الجامعة مملة شديد .. كل حتة فيها بتذكرني مواقفي معاهو .. أو يمكن أنا اللي عايزة إتذكرو ..
من يوم إتصل علي بالليل تاني م إتكلمنا .. أنا قررت أركز مع دراستي شوية وأديهو مساحتو الخاصة كنت حاسة بإلتزام غير مبرر تجاهو ماعارفة ليه .. بس مع ذلك كنت حابة جدا الشعور دا .. كنت مشغولة مع الدراسة وقلت أفتح الميديا نهاية الاسبوع بس .. لأنو إمتحاناتي قربت شديد .. فتحتها بلهفة إفتكرت ح ألقي شي يطمني عنو بس لقيتو م رجع الواتس .. 💔
قلت م ح أتصل ليو هو أكيد م محتاج لي .. وفرضا إنو محتاج لي م ح أقدر أعمل ليهو شي فأحسن م أعشمو ساي .. فصلت النت ورجعت لقرايتي الماقادرة أفهما 😪
••••••••••♪•••••••••••♪•••••••••••••♪••••••••••••••♪••••
مع وائل:-
من يوم رجع أبوهو وهو ماطايق شي .. وائل ماخد في خاطرو كتير من أبوهو كمية تراكمات بقت تطلع في شكل تصرفات عدوانية .. أمو م قادرة تشرح ليهو إنو م صاح يعمل كدا لانو هو أساسا م غلط .. الغلط كان غلط أبوه .. ساعات الأهل لما يغلطو مابنقدر نعاقبهم بس دا م معناه نستحمل أخطاءهم .. ووائل ماقادر يغفر أخطاء أبوهو وفي نفس الوقت م طالع بيدو يعمل شي .. طبيعي ردة فعلو تكون كدا قصاد كل موقف مبتذل بيظهرو ليه أبوه
قاعدين في صينية الغداء وائل كان ساكت وماقاعد ياكل ..
-وائل ماتاكل مالك الأكل م عجبك؟
=ماجعان ياأمي أنا راجع غرفتي
_أبوهو قال ليهو أكلت شنو من الصباح لما تقول ماجعان إذا م عايز تاكل قعدت ليه من البداية؟
=جات كدا ..
"وطوالي إتحرك بالكرسي بتاعو ومشي "
شايفة أخرة الدلع بتاعك ليهو .. الولد خرب وبقا يرد علي .. مابحترمني وتقولي لي أمشيها ليو كدا كم مرة من جيت؟
=يعني لازم كل يوم زمن الأكل يحصل كدا ؟
إنت م تناقشو في الوقت دا .. وائل م صغير بقا راجل كبير إتكلم معاهو حاول تفهمو
-مافاضي ليهو .. وائل من يومو كدا من زمان دي عمايلو م جديد علي مابشبه المرحوم ولاتصرفاتو زيو مرات بفكر أنا نقصت عليو شنو .. قراية ماقصرت معاو .. قروش م حوجتو .. أي شي وفرتو ليهو .. أنا أقول ليهو تعال لي إجازة يقول لي مشغول؟
=المقارنة ياعبدالله وائل من زمان بقول لي إنت بتقارنو مع وليد الله يرحمو ومابيعجبك شي من البعملو شايل منك من زمان .. أسي وليد مشي لربو بس لسة العقدة م راحت .. وائل لسة بتحسس من كلامك معاهو .. بخاف تحرجو أنا م عاجبني وضع علاقتكم دا بس إنت حاول معاهو ع الأقل في الفترة دي ..
