#أقـدار 💛
#الحلقـة_17
#بقلـ ✍️ـم_نوودين=Πeedoo
"تمرّ الأيّام ولا ننسى .. من أفلَت يدَنا ومن تمسَّك! 💙"
الأيام دي كانت أسؤ أيام مرت بي .. مشكلتي بصمد كتير بس بقع فجأة وم بقوم سريع .. موقف بسيط قادر يهزني .. إتمنيت يوما لو مارديت ع المكالمة الخلتني أرجع لنقطة الصفر .. كنت متجاوزة حكاية إنو أبوي م شغال بي وأنا حياتي مفصولة عن حياتو بس مكالمة واحدة قدرت تهدم كل الفاصل البانياهو سنين .. كانت أيام سيئة حتي محمد م ف سافر العرس وبقا مشغول عني ..
وائل ماقصر حاول بكل جهدو يغير لي جو بس هو كمان الفيهو مكفيهو .. قال لي زهجان شديد من القعدة هناك وحاسس إنو م مرتاح ..
مابعرف ليه بنسي مشاكلي وقت الموضوع يتعلق بيهو كان عامل ستوري: -
"والغريب اني عديم الصبر، ومع ذلك صبرت."
دخلت إتكلمت معاو كان مضايق حكى لي حاجات كتيرة .. ماتوقعتها .. إفتكرت إنو حياتي ممكن تكون أسؤ حياة بس فعلا تشوف مصيبة قوم تهون عليك مصيبتك ، الأسؤ من إنو أبوك يكون بعيد عنك وم شغال بيك إنو يكون جنبك بس وجودو وعدمو واحد .. مابيدعمك .. بحطمك وبكسر مجاديفك .. بينتقدك علي طول .. يخت حواجز بينو وبينك علي قدر م تحاول تصلح البينكم هو بيهدمو ..
حاجات كتيرة بتضايق ف الحياة دي أكتر من فقدان حبيب وكسرة صاحب .. لما تكون مجروح من ناس أمنت ليهم ساعتا حتعرف إنو وجع الدنيا كلو م بيساوي ذرة من وجعك ..
رغم جروحي طبطبت عليو وقلت ليو مامشكلة م حتنكسر وتستسلم بالبساطة دي .. أنا أكتر واحدة عارفة قدر شنو إنت عنيد وبتصل للعايزو .. أكيد حتقدر توصل ليو وجهة نظرك وتواجهو بردة فعلك .. كل مشكلة وليها حل .. إنت موضوعك بسيط لسة أبوك معاك وجنبك وبفكر فيك بغض النظر عن الحاصل المشكلة الأكبر إنو الموضوع يبقي م مشكلة وقتها مستحيل تلقي حل ..
قصدك شنو؟
=ولاشي م تركز ماعلينا أها عامل شنو والحاصل عليك وبديت العلاج ماشي معاك كيف؟
-أنسيني من كل دا مشتاق ليك شدددديدددد والله .. بلد تحرمني شوفتك ياخ تبا بس 😪
إتونسنا مسافة ومشيت خلصت قرايتي .. محمد إتصل لي كان مفروض يجي من أمس بس قال لي أهلو م خلوهو كل م يمشي مكان يمسكو عندهم .. إتكلم معاي وقال لي هو كلم عمتو حنان إنو عايز تبيان بس المشكلة بقت في إنو م فاتح أمي وجدو في الموضوع دا شاكلتو قلت ليو كيف يعني تكلمم قبل أمي أكيد حتزعل منك
-قدر م تزيدي العلي أنا عارف م كان مفروض أعمل كدا بس إضطريت جا مجتبي ولد عمي حسن قال عايزا أخليها ليو؟
=عشان كدا أنا بكره أهلك ديل 😒
-أنا كمان ياخ بس دا م موضوعنا أسي لو أمي وجدو سمعو الكلام دا واطاتي بتكون أصبحت
