#أقـدار 💛
#الحلقـة_14
#بقلـ ✍️ـم_نوودين=Πeedoo
"دائمًا أراكَ كما لو أنَّك الشيء الوحيد الذي يجب عليّ أن أهدر الأيام معهُ ولا أبالي!.💛"
اليوم القبل يعملو ليهو العملية أمو إتصلت لأمي كلمتا بس جدو عيان وأنا قعدت معاهو ف البيت ماقدرت أمش مع أمي كنت مقلقة عليهو .. أمي كانت بتتصل تطمن علي جدو وفي نفس الوقت أنا بطمن عليهو ..
بعد المسا كدا يمة جات قالت لي خلتو كويس بس هي م عارفة إنو نتايج العملية دي م بتظهر زيما هو ببين كويس أو لا .. عادي بيطلع من العملية وبتونس وبعدين بتطلع نتيجة عكس كدا .. المرة الفاتت الدكتورة كلمتو عن الضرر الفي رجلو صاح هو بهظر كتير وم ببقي جادي حتي ف الأمور الجدية بس متأكدة بفضل شايل هم ومتوتر من الحيحصل م كل الناس بتشوف الحاجة دي ..
إتصلت عليو حوالي الساعة 8 م مارد ماقدرت أنوم كأني مستنياهو يطمني .. أو حتي يشاكلني م عارفة بحب أكتر شنو مشاكلنا ولا صوتو ..
عدت الأيام بي حلوها ومرها النتيجة شبه مطمنة ولو إنها ماعلي قدر كدا بس بحاول يكون إيجابي ومايفكر بسلبية .. تالت يوم مشيت ليو من الجامعة دا كان أول يوم ننزل السمستر التاني لقيت ناس ملاذ سبقوني وقاعدين يتونسو معاهو .. بعد طلعو منو مشيت سلمت عليو ع السريع كدا وطلعت ..
أصلا م كلمتا أمي إني ح أمشي ليهم ودا غير إنو محمد قال لي م تمشي أول يوم م بكون ف شي مهم أقعدي أنا الليلة قاعد ف البيت أعملي لينا بسبوسة حنستو قلت ليو بمش ألاقي صحباتي ومابتأخر ح أجي أعملا ..
رجعت البيت بدري .. قضينا يوم حلو جو بنات عمتو لمحمد قيلو معانا .. تقريبا دي عمتو الوحيدة العلاقتا حلوة معاعو وبتسأل عنو وكتير بتجينا ف البيت وبناتا كمان متواصلات معاهو .. حتي هو بحبهم شديد وكل فترة بيمشي ليهم .. دخلنا المطبخ عملنا بسبوسة وشاي لبن نص النهار 😂 وإتصورنا وإتبسطنا شديد العصر إتغدينا وقدمناهم كنت لابسة توب إفتكرت حنقدمم للظلط يركبو مواصلات وحنرجع البيت مأب قالت لينا أنا بحب بيتكم علشان جنب الكبري عليكم الله أرح 🤣🤣
-أرح طيب ...
هيييي ماشين حد وين أنا لابسة توب بس
وإذا يعني ف زول حيسألك أرح ساي
مشينا مسافة وتاني جينا راجعين محمد قال لي خلاص أرجعي البيت أنا ح أوصلهم وأجي
=يازول ماشة معاك
-أسي م قلتي لابسة توب م ماشة بعيد
=غيرت راي
وقف أمجاد علشان م ظريفة أركب المواصلات بي توب 😂 وصلناهم والمغرب أذن نزلنا صلينا وعمتو قالت لينا الا تشربو شاي المغرب معانا ..
قلت لمحمد الليلة جدو حيضبحنا 😂
-مابلاحظ أصلا هو بمشي المسجد م بيجي الا بعد صلاة العشا يمة بتتصرف لينا أقعدي وإستمتعي عمتو دي تاني أحسن زول ممكن يظبط،شاي
