كبرياء شيفيكا الاعمى

13

رواية #كبرياء_شيفيكا_الاعمى
الجزء 13
أنيكا نفذت وعدها بانها تهتم ببنكي بس بينكي صحتها خلاص اتحسنت وهيا لازم تمشي وراحت لشيفاي تبلغه بقرارها
أنيكا: شيفاي ممكن نتكلم شويه؟؟
شيفاي: طبعا اتفضلي.
أنيكا سكتت شويه ومعرفتش تبدأ كلامها ازاي
أنيكا: مامتك خلاص اتحسنت..
شيفاي فهم هي عايزه تقول ايه ...
شيفاي: اه الشكر للقدير ...وكمان الفضل ليكي لوقفتك جنبها ..ودلوقتي عايزه تمشي صح؟؟؟
أنيكا فكرت انه للدرجه دي عايز يخلص منها بسرعه
أنيكا: انا خلاص قمت بدوري كامل صح؟
اتمنت انه يقولها لأ ..يقولها دورك انك تحبيني وتفضلي جنبي ..بس دي امنيات ....في نفس الوقت شيفاي كان عايزها تقول انها بتحبه وهتفضل جنبه ومش هتبعد عنه ابدا بس برضه دي امنيات
******
زي ما قلنا كبرياؤهم أعمى
******
شيفاي: براحتك أنيكا ..مش همنعك اكتر من كده...
أنيكا: خلاص بكره الصبح همشي ..بس مامتك؟؟؟
شيفاي: سيبي امي عليا انا هكلمها
سابته أنيكا ومشيت علشان ما يحسش بدموعها اللي نازله غصبا عنها ..خلاص انتهي.. كل شيئ انتهي...
بالليل شيفاي دخل عند بينكي واول ما قعد جنبها
بينكى: خلاص هتسيبها تمشي ؟؟؟
شغ: انتي مين قالك انها هتمشي؟؟
بينكي:علشان انت ابني وانا عارفاك وبعدين انا شايفاكم بتعاملو بعض ازاي وعارفه انكم مستمرين علشاني وعلشان ما تزعلونيش ..بس شيفاي انت بترتكب غلطه كبيره..
شيفاي: لا يا امي انا بصلح غلطه اكبر ..ارجوكي بلاش كلام في الموضوع ده تاني واقفليه لحد كده..
جه تاني يوم وأنيكا لمت حاجتها ومشيت وودعتها بينكى بدموعها ورودرا وصلها للمحطه وشيفاي رفض اصلا مقدرش يوديهم وهى ماشيه.
شيفاي حس انه لتاني مره بيخسر حاجه غاليه عنده قوي ومش بايده يتصرف زي بالظبط لما خسر نظره ..النهارده حس انه بيخسر نظره لتاني مره..
شيفاي ساب لانيكا شيك ثمن اتعابها بس هي اديته لبينكى وقالتلها انها مش هتقدر تاخد فلوس منه وقالتلها ان شيفاي سابلها الفلوس علشان يأمن مستقبلها بس هي مش عايزه فلوس ..هيا كانت عايزه حبه...
رجعت أنيكا لجوز امها ولشغلها القديم وكل حاجه رجعت زي الاول بس الفرق انها قبل كده كانت بتحلم وتتمني لكن دلوقتي بقت ميته عايشه من غير روح..
في يوم بعد ما رجعت من شغلها جالها كابير جوز امها
كابير: انا عايز فلوس يا بت انتي..
أنيكا طلعت مرتبها واديتهاله
كابير: ايه ده يا بنت انتي؟انتي فاكراني اهبل ولا ايه؟
أنيكا: عايز مني ايه ؟ما انا اديتك اللي معايا.؟
كابير: لا يا اختي مش عايز دول..دول خليهملك...انا عايز من ملايين حبيب القلب..
أنيكا: حبيب القلب ده مالكش دعوه بيه ..وبعدين انا ما اخدتش منه حاجه..
كابير: عليا انا ؟؟؟
أنيكا: قلتلك ما اخدتش حاجه منه
ضربها كابير وسابها ومشي لما ملقاش معاها حاجه وقرر انه يروح لشيفاي يطلب منه فلوس
أنيكا فضلت تعيط وجتلها امها
الام: وبعدين يا حبيبتي واخره العياط ده ايه؟
أنيكا: طيب اعمل ايه ؟مش عارفه اعيش من غيره؟
الام: طيب انتي سيبتي ليه لما بتحبيه؟
أنيكا: مش انا اللي سيبته هو اللي سابني ..مره واحده بعد ما روحتله لقيته انسان تاني اتغير معرفش ليه؟
الام: انيكا هو انت ما اخدتيش منه فلوس ولا بتضحكي علي كابير ؟؟
أنيكا: لا ما اخدتش منه اي حاجه حتي كل هداياه سيبتهاله..مش عايزاه يفتكر انه اشتراني بفلوسه..
الام: انا عايزه اقولك حاجه بس خايفه تزعلي بس يمكن تكون هي السبب في اللي حصلك
أنيكا: قصدك ايه وحاجه ايه؟ قولي
الام: بعد ما اتجوزتي ومشيتي لاحظت ان كابير معاه فلوس كتير وبيصرف كده براحته
أنيكا: هاه وبعدين
الام: سألته الفلوس دي منين رفض يقولي بس سمعته وهو سهران مع اصحابه بيقول ان المحامي بتاع جوزك عطاله الفلوس دي علشان يوافق انك تتجوزي شيفاي الاعمي؟
أنيكا: انتي بتقولي ايه؟ كابير قبض ثمن جوازي من شيفاي ؟
الام: ايوه وباينله قبض كتير قوي كمان
أنيكا: علشان كده هو اتغير معايا وبقي بيكلمني بالفلوس علي طول ...انا لازم اروحله وافهمه كل حاجه
الام: هتروحي فين ده احنا بليل وقت تاخر خليكي للصبح الدنيا مش هتطير
فعلا قررت أنيكا تروحله الصبح بدري..
كابير خرج وركب اول قطار وراح لبيت شيفاي واول ما وصل طلب يقابل بينكى الاول...بينكى نزلت تقابله بسرعه قبل ما ابنها يحس بيه.
بينكى: انت ايه اللي جابك هنا ؟ وعايز ايه؟
كابير: ده ايه المقابله دي ؟ده انا برضه من ريحه الحبايب ولا ايه؟
بينكى: اخلص قول عايز ايه وبلاش رغي؟
كابير: عايز فلوس ...فلوس ثمن سكاتي علشان معرفش البيه باتفاقنا.
شيفاي كان نازل من غرفته وهو علي السلم سمعهم وعرف صوت كابير وفضل واقف علشان يعرف هو عايز ايه من امه ودخله هو ايه؟
بينكى: ما انت قبضت وقبضت كتير كمان؟
كابير: خلصوا يا هانم انتي عارفه الدنيا بقت عامله ازاي ..وبصراحه البت أنيكا لما رجعت واشتغلت تاني في المطعم الفلوس اللي بتجيبها مش كفايه واحنا خدنا علي العيشه الناعمه..
شيفاي استغرب ان أنيكا رجعت شغلها ..امال الفلوس اللي عطاهلها راحت فين والفلوس اللي قبضتها من امه فين؟؟
بينكى: انت فاكر ان دي بقي التكيه اللي كل ما تحتاج فلوس تيجلها..انا مش عارفه أنيكا ازاي تقبل تعيش مع واحد زيك كده عاله عليها؟؟؟
كابير : جوز امها بقي هتعمل ايه.؟؟ وبعدين ما تنسيش ان انا جيبتهالك لحد عندك وخليتها تتجوز الننوس بتاعك..ولا تحبي اقوله انك اشتريتهاله بالفلوس.؟؟؟
بينكى: اخرس ..انت اصلا اللي حبستها غصب عنها منعتها تقابل ابني وانت اللي بعدتها عنه وانا اضطريت ادفع علشان انت تسيبها ترجعله ..انا دفعتلك بس علشان اخلص أنيكا من ظلمك وقهرك ليها لاني عارفه انها بتحب ابني وهو بيحبها ومكنتش هسمح لكلب زيك يفرق بينهم..كان لازم احافظ علي حبهم باي طريقه...ودلوقتي اطلع بره..
كابير: لا يا هانم مش طالع بقي غير لما اقابل الننوس بتاعك واقوله
فجأه شيفاي دخل: اعتقد سمعت امي وهيا بتقولك اطلع بره
اتفاجئت بينكي بابنها وكابير كمان
كابير: يا باشا انا....
قاطعه شيفاي: اطلع بره مش عايز كلمه زياده منك
نادي شيفاي علي الحرس
شيفاي: طلعوا الراجل ده بره ولو حاول يدخل هنا تاني اطلبوله البوليس
اخدوا كابير وطلعوه بره ..فضل الصمت مسيطر علي المكان
شيفاي افكاره كلها بتتخانق مع بعضها وافتكر كل لحظه ظلم فيها أنيكا وهانها ..طول الوقت بيجرح فيها ويبيع ويشتري فيها وهي مظلومه
بينكى:شيفاي انا اسفه ..بس كنت فاكره اني كده بسعدك
شيفاي: تسعديني بايه؟بانك تشتريلي عروسه؟؟؟انت عارفه انت عملتي فيا ايه؟؟انتي عارفه انا عملت ايه؟
شيفاي كان بيزعق بصوته كله
بينكي: انا اسفه حقك عليا .انا عملت كده علشان بحبك
شيفاي: انا عارف انك بتحبيني ..بس انتي خليتيني اقضي علي الانسانه اللي بحبها بايدي ..انا سمعتك وانتي بتكلمي المحامي ويتقوليله انه يدفع لحد ما يوافقوا وكنت فاكر ان أنيكا هي اللي هتقبض ..عندك ادني فكره انا عاملتها ازاي؟؟؟
بينكي بعياط: انا اسفه بس انت ليه مقولتليش؟
شيفاي: لاني كنت مجروح منك ومنها ؟
ازاي أنيكا تقبل تبيعني كده وانت ازاي تشتري لابنك عروسه بالشكل ده؟
كنتي عايزاني اقولك ايه.؟؟
سابها شيفاي وطلع غرفته وهيا جريت وراه
بينكى : هتعمل ايه ؟
شيفاي: هروحلها وياريت ما اكنش اتأخرت كتير لازم اصلح كل حاجه
بينكى:طيب خليك الصبح
شيفاي: لا مش هستني اكتر من كده ارجوكي سيبني
رودرا جه وسمع صوت بينكى وشيفاي وحس انهم بيتخانقوا علشان صوتهم عالي طلع السلم وحط شنطة اوراقه وشنطة اللاب من ايده علي اخر السلم وراحلهم
رودرا: صوتكم عالي كده ليه؟ مالك يا ماما بتعيطي ليه؟ شيفاي في ايه؟ فهموني ايه اللي حصل؟
شيفاي: مفيش حاجه ..انا لازم اسافر دلوقتي لأنيكا
خرج شيفاي من اوضته مستعجل من غير عكازه وكل همه يروح لحبيبته...وفجأه اتكعبل في شنط رودرا ووقع علي السلم ..اتدحرج السلم كله لحد ما استقر تحت..
رودرا جري وراه بس ما لحقوش وبينكى صرخت علي ابنها
رودرا : شيفاي رد عليا ارجوك رد عليا شيفاي..
شيفاي اتكلم بصعوبه: أنيكا هاتلى أنيكا رودرا
وغاب عن الدنيا ..............
يا تري أنيكا هتلحق حبيبها ولا هيموت قبل ما توصل؟
شيفاي هيلحق يعترف لحبيبته بحبه ولا حبه هيعيش ويموت جواه؟

‏١٤‏/٠٢‏/٢٠١٩ ٢:٤٨ م‏