رواية #كبرياء_شيفيكا_الاعمى
الجزء 14
وقع شيفاي وغاب عن الوعي وجت الاسعاف بسرعه ونقلوه المستشفي .بينكي طلبت من رودرا يروح بسرعه يجيب انيكا زي ما شيفاي طلب وفعلا سافرلها ووصل لها علي طلوع النهار وقابلها نازله من بيتها .
أنيكا اول ما شافته قلبها اتقبض لانها طول الليل بتحلم بشيفاي وهو بينادي عليها .
أنيكا: رودرا في ايه وايه اللي جابك هنا؟
رودرا:شيفاي اصله..تعالي بسرعه
من غير ما يزود كلمه تانيه كانت راكبه عربيته وفي الطريق حكالها كل اللي حصل ..طول الطريق وهيا بتعيط وتدعي ربها انه يديلها فرصه تانيه تقوله انها بتحبه..
ولعنت كبريائها الاعمي ولعنت غبائها اللي خلاها تتخلي عن حبيبها
اخيرا وصلو المستشفي وجريت علي بينكي وحضنتها وفضلت تعيط في حضنها
بينكي: انتي لازم تكوني قويه..فاهمه؟؟
أنيكا: يا ريتني ما مشيت يا ريتني
بينكى: لا يا حبيبيتي انا اللي عملت فيكم كل ده ..يمكن لو مكنتش اتدخلت بينكم كانت كل حاجه مشيت صح ..سامحيني
عيطت بينكى وأنيكا ضمتها
أنيكا: اسامحك علي ايه بس ؟؟
انتي عملتي كل ده بحب لكن احنا اللي كنا اغبيه احنا ما صارحناش بعض بالحقيقه...انا عايزه اشوفه يا ماما ارجوكي
دخلت أنيكا عند شيفاي كان نايم في سريره واجهزه كتير قوي واصله بيه وصوت نفسه عالي من الجهاز ونبضات قلبه ضعيفه ..ما استحملتش منظره ده فعيطت اكتر واكتر ..دخلت الممرضه عليها
الممرضه: ممنوع يا فندم العياط هنا ووجودك كمان غلط ..ارجوكي اطلعي بره لو سمحتي
أنيكا: انا مراته مش هيعط هفضل جنبه بس ارجوكي سيبيني
الممرضه: اسفه بس هو مش هيحس بيكي هو في غيبوبه حاليا
أنيكا بتعيط اكتر والممرضه بتاخدها وتطلعها بره...
عدي اسبوع كامل وهو في غيبوبه ومفيش اي تحسن زي ما يكون استسلم خلاص للموت....أنيكا وهيا جنبه مسكت ايده
انيكا: ارجوك فوق بقي ..كفايه كده ..انا بحبك مش عايز تسمعني بقولها؟؟؟
فوق وانا اقولهالك كل لحظه وكل ثانيه ..هفضل لاخر لحظه في عمري احبك ..بس فوق علشان خاطري... فوق
عيطت أنيكا علي ايديه ودموعها نازله علي ايده شويه وحست بيه بيتحرك.....أنيكا جريت بسرعه تنادي علي الممرضه والدكتور
الدكتور: شيفاي ..سامعني؟؟ انت حاسس بيا؟؟
شيفاي: ...........................
الدكتور: اي حركه او اشاره هعرف انك سامعني
شيفاي: ...........................
الدكتور بدأ يفحص فيه ويشوف ردود افعاله ولحظات وغاب تاني عن الدنيا.......
الدكتور طمنهم بانه طالما فاق يبقي ده علامه كويسه ..شويه شويه وكل يوم يفوق لحظات ويغيب تاني
في ثالث يوم شيفاي فاق والدكتور عنده حاول شيفاي يتحرك بس ما قدرش يتحرك نهائي
الدكتور: في ايه مالك؟؟حاسس بايه
شيفاي: مش قادر اتحرك نهائي ..مش قادر احرك راسي او ايدي او اي حاجه
فعلا طلب الدكتور من شيفاي يحرك رجليه او صوابعه بس شيفاي ما قدرش
شيفاي: ايه بقيت مشلول كمان؟؟؟؟؟
الدكتور: لا مشلول ايه ؟؟ده بس من اثر الوقعه كام يوم وهتتحسن بس انت ما تقلقش.
أنيكا كانت بتقضي طول النهار والليل مع شيفاي وكل ما يحاول يتكلم تسكته وتقوله مش دلوقتي هنتكلم براحتنا بس مش دلوقتي ..
عدي كام يوم وشيفاي برضه مش قادر يحرك اي حاجه في جسمه نهائي
الدكتور مع بينكى وأنيكا
أنيكا: دكتور طمني عليه ..هو مش بيقدر يتحرك ليه وامتي هنقدر نمشي من هنا؟؟؟
الدكتور : انا مش هخبي عنكم هو حالته سيئه..الخبطه عملت نزيف علي المخ والنزيف اتجمع وبيضغط علي مركز الحركه في المخ ومحتاج لعمليه علشان نشيل الدم اللي اتجمع ده ونخفف الضغط علي مركز الحركه..
أنيكا: طيب مستنين ايه؟ ..اعملوله العمليه
الدكتور :الموضوع مش سهل نهائي والعمليه خطيره جدا ومش اي حد يقدر يعملها
بينكي: احنا ممكن نسافر بره قولنا اسم دكتور كويس للمخ والاعصاب واحنا نسافرله
الدكتور: حضرتك برضه المشكله مش في مين اللي هيعمل العمليه؟؟
بينكي: قصدك المشكله في اضرار العمليه صح مش ده اللي عايز تقوله؟؟
الدكتور:..............
بينكى: انا عديت بالمرحله دي قبل كده فارجوك هات من الاخر وقولي اضرار العمليه
الدكتور: لو نجحت هيمشي تاني وهيعيش حياته طبيعيه..
أنيكا: ولو فشلت ؟؟؟
الدكتور: لو فشلت هيفضل مشلول شلل كلي ده غير المخاطر التانيه اللي ممكن يتعرضلها في العمليه
بينكي: مخاطر زي ايه؟؟
الدكتور: زي انه يفقد ذاكرته ويفقد هويته مع كل الاضرار الناتجه عن فقدانه لعقله
أنيكا: يعني ايه انا مش فاهمه..
الدكتور: يعني ممكن يفقد كل حاجه بتخليه انسان ..يعني هيكون مشلول تماما مع عقليه طفل لسه مولود معندوش عقل نهائي يعني مش هيعرفكم ولا هيميزكم ولا هيقدر يتكلم ده غير انه اعمي من الاخر مش هيكون الانسان اللي انتو تعرفوه غير بشكله بس.وده اسوء سيناريو ممكن يحصل
نزل كلام الدكتور زي الصاعقه عليهم وهنا انهارت بينكي تماما وطلعت كل العياط اللي كانت حبساه جواها من ساعه ما ابنها عمل الحادثه من 3 سنين ..دلوقتي حست انها خسرت ابنها
أنيكا: خلاص مش هنعمل العمليه
الدكتور: هيفضل مشلول ده غير ان النزيف ممكن يزيد او يتحرك من مكانه وساعتها ممكن
أنيكا: ممكن ايه ؟؟
الدكتور :: ممكن يخسر حياته..انا اسف عارف ان كلامي صعب بس انتو طلبتو الحقيقه..قرروا براحتكم وبلغوني قراركم
بينكي: هنعمل ايه أنيكا؟؟؟
أنيكا: مش عارفه بس ده قرار شيفاي هو المفروض ياخده
بينكي: انت ناويه تقوليله؟؟
أنيكا: طبعا ده شيئ مش هينفع نخبيه ..وما ينفعش ناخد قرار زي ده من غير موافقته ..انا عن نفسي مش هقدر اخد قرار زي ده
دخلت انيكا عند شيفاي واول ما حس بيها
شيفاي: اخيرا جيتي؟؟ كنتي فين كل ده وسيباني لوحدي
أنيكا: انا جيت اهوه كنت بشم هوا بره عندك مانع؟؟
شيفاي: طول ما بتبعدي عني يبقي عندي مانع خليكي جنبي ..بس لو متضايقه قولي
أنيكا: لا شيفاي لو اطول افضل في حضنك علي طول.
شيفاي: طيب وايه اللي مانعك ؟؟ ما تقربي من حضني لو قادر كنت شديتك غصب عنك
أنيكا نامت علي صدره ودموعها نزلت غصبا عنها
أنيكا: انا في حضنك اهوه ..( مسحت دموعها) بس انت ما تزهقش مني
شيفاي: مخبيه ايه عني؟؟؟ قولي اللي تاعبك وريحي نفسك..أنيكا لو عايزه تبعدي...
أنيكا قاطعته بسرعه: لا عايزه افضل في حضنك انا بندم علي كل لحظه عدت وانا مش في حضنك ..
شيفاي: توعديي تفضلي جنبي مهما يحصل واوعديني لو في يوم عايزه تبعدي قوليلي ..ما تسيبينيش للافتراضات
أنيكا: اوعدك ان افضل علي طول في حضنك
شيفاي: ايه بقي اللي مضايقك؟؟ قولي بقي..
أنيكا: انا هنادي للدكتور وهو يشرحلك احسن مني
شيفاي بهزار: ايه قالك هموت ولا ايه؟؟
عارفه حتي لو هموت مش هزعل لانك جنبي.. وكفايه عليا قوي اني حبيت واتحبيت
الدكتور خبط ودخل وبدأ يشرح لشيفاي حالته كامله وقاله علي كل الاضرار
شيفاي كان بيسمع بهدوء شديد لحد الدكتور ما خلص كلامه
الدكتور: عندك اي استفسارات؟؟
شيفاي: لا شكرا الكلام كله واضح
الدكتور: اسيبكم لوحدكم بعد اذنكم
سابهم وخرج وفضلو الاتنين في صمت لحد ما أنيكا قطعت الصمت ده
أنيكا: ناوي علي ايه؟؟
شيفاي: ............
أنيكا: ارجوك ما تسكتش كده اتكلم
شيفاي: عايزيني اقول ايه؟
أنيكا: قول اي حاجه اتكلم معايا
شيفاي: عملت حادثه وخسرت حياتي وفضلت في المستشفي من عمليه لعمليه وخرجت وقابلتك وقلت انك تعويض واتعذبت في حبك واخيرا كل حاجه كانت هتتعدل وانا كنت هجيلك بس اتكعبل علي السلم واقع ودلوقتي انا مش بس اعمي لا كمان بقيت مشلول والمفروض اعمل عمليه يا اما تنجح وده احتمال ضعيف جدا او تفشل وابقي ...ابقي ايه؟؟ مش عارف ابقي ايه؟؟
أنيكا: مهما كان قرارك انا هفضل جنبي
شيفاي: هتفضلي جنبي؟؟؟لامتي؟؟
أنيكا: لاخر يوم في عمري
شيفاي: انتي مش واخده بالك ان انا بقيت مشلول يعني ما انفعش لاي حاجه وانا عمري ما هقبل تضيعي عمرك وشبابك مع واحد زيي
أنيكا: انا بحبك وهفضل جنبك مهما يحصل
شيفاي: سيبيني لوحدي لو سمحتي
أنيكا: لا شيفاي مش هسيبك لوحدك ارجوك ما تيأسش كده..وبعدين احنا في مركب واحده يا نغرق مع بعض يا نوصل لبر الامان مع بعض
شيفاي:انتي مش واخده بالك انا في الحالتين ميت ..لو معملتش العمليه وفضلت مشلول ده بالنسبالي الموت بعينه ولو عملتها وفشلت وده الاكيد هموت او اسوء من الموت مليون مره
انيكا: او تعمل العمليه وتخف ده اختيار ثالث ليه ناسيه
شيفاي: مش ناسيه بس انتي ما سمعتيش الدكتور وهو بيقول نسبه نجاح العمليه اقل من 5%
أنيكا: وانا بؤمن بالفرص المستحيله..ايه فرصه ان واحده بتغسل صحون في مطعم تتجوز مليونير
شيفاي: مليونير اعمي محدش بيبصله
أنيكا: انت لو شاورت مليون واحده هتترمي تحت رجليك..انت ما شفتش تيا كانت هتموت عليك ازاي؟ ولا رودرا بيغير منك ازاي؟
شيفاي: تيا هتموت عليا علشان فضلت واحده عليها ورودرا من صغره بيغير
أنيكا: انت ليه مصمم تقلل من قيمه نفسك؟؟
شيفاي: انيكا خلاص ... خدي انت القرار نيابه عني ..واللي تقوليه هعمله..لو قلتي اعمل العمليه هعملها
أنيكا: لا انت بتقول ايه؟؟لا طبعا ما اقدرش اخد قرار زي ده نيابه عنك
شيفاي: ليه لأ ؟ مش احنا في مركب واحده زي ما بتقولي..خدي انتي القرار واللي يسري عليكي يسري عليا
أنيكا: شيفاي حرام عليك تحملني قرار زي ده ..وتحملني ذنب ما اقدرش اشيله ..لو جرالك حاجه مش هقدر اسامح نفسي ابدا
شيفاي: قربي مني وبوسيني ..بوسيني بكل الحب اللي جواكي
قربت أنيكا منه وفضلت تبوس فيه 💋💋 بجنون ..بتبوسه في كل حته في💏💏💏 وشه..وبعدين عيطت علي صدره
شيفاي: أنيكا لو هموت مفيش حاجه هتمنع ان ده يحصل ..وكفايه عليا قوي انك بتحبيني .....لو فضلت مشلول أنيكا يبقي ميت ولو عملت العمليه وفشلت برضه ميت يبقي فاضل ال 5% انه ممكن تنجح.زي ما انتي قلتي
أنيكا: يعني نخاطر بال 5%....... بس لو معملنهاش هتفضل جنبي هتفضل عايش معايا
شيفاي: ما تفكريش بانانيه أنيكا ..ارجوكي ,,لو مشلول مش هبقي عايش هبقي عاله علي كل واحد وده وضع مش هستحمله انا يدوب قدرت اتقبل وضعي كأعمي بس اخد مني 3 سنين لكن الشلل مش هقدر اتقبله ابدا ابدا
أنيكا: يبقي تعمل العمليه ونقبل ال 5 % يمكن القدير يعوضنا عن كل اللي فات ويحققلنا المعجزه
شيفاي: بس عايزك لو مت تعيشي حياتك وتخلي بالك من امي ومتوفقيش حياتك علي كده اتجوزي تاني
أنيكا: ارجوك شيفاي بلاش الكلام ده
شيفاي: لا انيكا ده شرطي انك توعديني انك تزعلي عليا فتره وبعدها تخرجي للدنيا وتتجوزي تاني ..بس بلاش رودرا هتخنق وانا ميت لو اتجوزتيه
أنيكا بتضحك: مش هتجوز رودرا انا مش عايزه اخنقك برضه
شيفاي: عايزك تخلفي عيال كتير وتحكيلهم عن قصه حبنا القصيره اللي الغباء كان مسيطر عليها من اولها لاخرها
أنيكا ضحكت: واسمي اول عيل باسمك وافتكرك في كل لحظه في حياتي
بعد كده عيطت قوي وهو كمان عيط في حضنها ..قالو للكل انه قرر انه يعمل العمليه وبينكى جواها امل كبير ان القدير هيشفي ابنها ويرجعهولها تاني
ياتري شيفاي هيتشل ولا هيقوم تاني؟
رودرا هيعمل ايه؟
شيفاي هيطلب طلب غريب من رودرا ياتري ايه هو ؟ ورودرا هينفذهوله ولا؟
القصة مقتبسة من رواية مصرية إبداع التأليف للكاتبة المصرية فقط غيرنا فى الأحداث لتناسب الطابع الهندي
#nonayasso
