رواية #كبرياء_شيفيكا_الاعمى
الجزء الثاني
عدي يومين كمان وطلبت بينكي أنيكا تاني وجت فعلا وكالعاده سابتها ودخلت بحجه الفلوس وكالعاده أنيكا دخلت عند شيفاي اللي كان موجود في بلكونته بيتأمل البحر وغرقان في افكاره فاق علي صوت كان عايز يسمعه تاني من غير ما يعرف ليه
أنيكا: صباح الخير ... ازيك
شيفاي: اهلا اهلا ..اتفضلي ..انا كويس وانتي؟
أنيكا: هاه تمام بخير .....ليك حق متشبعش من المنظر اللي قدامك ده انا فعلا لو كنت مكانك مكنتش هتحرك من هنا ..ولا ايه رأيك؟؟
شيفاي: اتوتر شويه وضغط علي عكازه اللي في ايده اللي أنيكا ما اخدتش بالها منه ومردش عليها
انيكا: انا بكلمك .ليه مش بترد!!!
شيفاي: افندم..عايزه ايه؟؟
أنيكا: ايه عايزه ايه دي ؟مش عايزه حاجه بسألك علي المنظر اللي شكلك عندك حساسيه منه
شيفاي: عايزاني اقول ايه يعني؟؟
أنيكا: ايه عايزاك تقول ايه دي؟؟؟؟
بقولك المنظر حلو وانت ايه رأيك ؟المفروض تقولي اه فعلا حلو ...عندك حق ...شكرا علي مجاملتك ..اي حاجه كده مش تقولي عايزاني اقول ايه
شيفاي:اكيد كنت هقولك كل الكلام ده بس لو كنت شايف المنظر ده أنيكا مش فاهمه قصده ايه او مرضيتش تفهم
أنيكا: ما تبصله بعينك ماهو قدامك اهو ولا انت اعمي يعني هههه؟
أنيكا قالت كلمتها بهزار وما اخدتش بالها انه في التلات مرات اللي شافته فيهم كان قاعد ولابس نظاره سودا ومعاه عكاز ابيض وما اتحركش من مكانه لانه فعلا (اعمي)😢😢
شيفاي: واحد لابس نظاره سودا وماسك عكاز وبيقولك مش شايف يبقي ايه ؟؟بيمثل انه اعمي مثلا ..علي العموم اجاوبك علي سؤالك ايوه يا ستي انا اعمي وما اعرفش شكل المنظر اللي قدامي ايه اللي انتي كل شويه تسأليني رأيي فيه ايه اعتقد كده جاوبتك ولا ايه؟؟
أنيكا:..........😨😨😢😢😢
معرفتش ترد لان كلامه كان صدمه استحاله يكون واحد في وسامته وشبابه ده اعمي ويتحرم من الدنيا وما فيها
شيفاي: اه سكتي .. وهتعملي زي الكل وتكلميني بشفقه وتغيري معاملتك ليا
أنيكا بسرعه تدراكت نفسها وعرفت انه كاره الشفقه والعطف اللي بيحسهم من كل اللي حواليه فلازم تتكلم بسرعه وتعالج الموقف
أنيكا: مين ده اللي مسكين؟؟؟ انت. انت مسكين انت؟؟ده انت كويس انك طلعت اعمي
شيفاي باندهاش: افندم ؟كويس اني اعمي ليه بقي؟
أنيكا: علشان تبقي زي باقي البشر
شيفاي بابتسامه: هو انا مش زي باقي البشر؟؟
أنيكا: لا طبعا ..هو انت نسيت شكلك ولا ايه؟؟ده انا من ساعه ما شفتك وانا عماله ابصلك عايزه اطلع فيك يا اخي غلطه مش لاقيه
فاخيرا لقيت فيك حاجه ناقصه مع انها مش تعتبر حاجه ناقصه لانها مش مغيره في شكلك يعني انت زي ما انت مفيكش غلطه
شيفاي: ايه الحقد والحسد ده كله.. ايه بقي اللي فيا غير باقي الناس؟؟
أنيكا: يعني اقوله ايه الراجل ده ؟..انت عايزني اعاكسك يعني ..ماشي هقولك اسمع يا سيدي
يعني بص انا مش هتكلم على انك مز قوي كده ولا حليوه خالص خالص ولا شياكتك نهائي ابسلوتلي ..ولا صوتك اللي بتتكلم بيه ده ولا الطريقه اللي بتتكلم بيها وانت باصص للناس من فوق كده ولا هحسدك نهائي علي الفلوس اللي متلتله عندك دي فلوس لو قعدت عمرك كله تصرف فيها مش هتخلص ولا الخدم اللي عندك ولا الشاليه ولا ولا ولا
شيفاي: اه اه..قلبي قلبي هتشل خلاص
أنيكا ضحكت بصوتها كله من طريقته اللي بيمثل بيها وهو ضحك علي ضحكتها
بينكي جت تشوفهم لما سمعت صوتهم عالي واتفاجئت بابنها بيضحك بصوته كله ومبسوط فانسحبت بهدوء
شيفاي: يخربيت حسدك ..اهدي عليا شويه كويس اني ماقابلتكيش قبل كده كنت قلت اني بقيت اعمي من حسدك ده
أنيكا: ايوه طبعا كنت هحسد اكتر من كده كان ممكن تجيلك صدمه وتموت فيها ولا حاجه
شيفاي: عارفه بقالي كتير ما ضحكتش كده ..
أنيكا. ايه ده لقيت فيك غلطه تانيه؟
شيفاي: وايه هيا بقي؟
أنيكا: انك غبي جدا سوري يعني
شيفاي: سوري ايه بقى هههه انتى قلتيها خلاص
بس ليه انا غبي 😆😆
أنيكا: لان مفيش حاجه في الدنيا تستاهل ان الواحد مايضحكش
وبعدين انت عندك كتير قوي مش ناقصك حاجه
شيفاي: عندي فعلا ..بس قوليلي ايه لازمه اللي عندي لو مش هقدر اشوف تاني
أنيكا: وفي ايه عايز تشوفه؟؟؟انت اعمي بقالك اد ايه؟
شيفاي: تلات سنين تقريبا
أنيكا: علي فكره مفيش كتير اتغير في التلات سنين دول
شيفاي بيضحك: بجد انا كنت فاكر ان كتير اتغير
أنيكا: لا بجد زي مابقولك كده
بص الشمس مكانها بتطلع من الشرق ومنوره والبحر اهوه ازرق ما اتغيرش نهائي والارض كرويه تدور حول نفسها
ضحكوا هما الاتنين
شيفاي: طمنتيني.... كنت خايف ليكون الشمس ولا البحر انحرفوا ولا اتغيروا ولا تكون الكوره بقت مستطيله ولا مربعه
أنيكا: هههههه ماانت بتعرف تهزر اهوه
شيفاي: علي فكره انا لحد دلوقتي ما اعرفش اسمك ايه؟
أنيكا: يعني انا اللي اعرف اسمك؟
شيفاي: اسمي شيفاي
انيكا: شوفت اهوه حتي الاسم
شيفاي: ههههه ماله الاسم كمان ؟؟؟
أنيكا: لايق عليك لازم يكون شيفاي فعلا
شيفاي: هههه ما علينا المهم اسمك ايه؟
أنيكا: اسمي أنيكا .
شيفاي: أنيكا.... امممم ❤❤
أنيكا: اممم دي يعني ايه لو وحش اغيرهولك نخليه لجين ولا جاكلين ولا جرمين ولا سمينار
شيفاي: بس بس ايه ماسوره الاسماء اللي بتفجريها دي لا أنيكا حلو جدا 😍😍
انيكا: يعني انا قلت يمكن مش عاجبك ولا حاجه
شيفاي: لا عاجبني ...المهم مفيش مجنون لانيكا ؟؟
أنيكا: لا مفيش الظاهر ان الناس كلها عقلت ولا ايه مش عارفه؟
شيفاي : هههههه متقلقيش مسيره حد يتجنن ويحب واحده حقوده زيك كده ويبقي مجنون أنيكا .زي مجنون ليلى
أنيكا : يا ابني ده اللي هيحبني هتكون امه دعياله وبتحبه جدا
شيفاي: قاصدك داعيه عليه مش دعياله ..هتكون قالتله روح يا ابني الهي يبتليك بمصيبه كده لسانها مترين
أنيكا: مصيبه!! مش هرد عليك علشان انا مؤدبه
شيفاي: فعلا مؤدبه باماره لسانك اللى ما سكت في اول مره قابلتك فيها
أنيكا: هو انت لسه فاكر .ده انت قلبك اسود قوي
هنا دخلت بينكي مبتسمه
بينكي: اسفه أنيكا ... اتأخرت عليكي شوتين
أنيكا: لا يا فندم مفيش تأخير ولا حاجه..واهيا فرصه دردشت مع ابن حضرتك شويه واتعرفت عليه
أنيكا: يالا استأذنكم انا بقي
شيفاي: سلام أنيكا خلينا نشوفك بقي
مشيت أنيكا وسابت شيفاي حيران وتايه في افكاره ..من امتي بيهزر وبيضحك كده مع واحده لسه عارف اسمها
عدي كام يوم واتفاجئت بينكي بابنها
شيفاي: ايه ماما هو اكل المطاعم مبقاش يعجبك ولا ايه؟
ابتسمت بينكي من ابنها اللي مش عايز يسأل صراحه عن انيكا
بينكي: لا يا حبيبي عاجبني انا كنت لسه هطلب المطعم حالا..بس بفكر اغير ؟ايه رأيك انت عندك حد معين؟
شيفاي: ليه هو مطعم اللي انيكا فيه مش بيعجبك ولا ايه؟
بينكي: لا يا حبيبي عاجبني بس انا قلت يمكن انت تحب تغير؟
شيفاي: لا مبحبش التغيير وانتي عارفه كده كويس....المهم هتطلبي أنيكا هيا تكون الديلفيري صح؟
بينكي: لو مضيقاك بلاش
شيفاي: لا لا تضايقني ايه؟بالعكس انا مرتحلها جدا
سابها وخرج واستني انيكا تيجي وفجأه وهو سرحان.......
ياتري ايه اللي حصل ؟
توقعاتكم ايه ؟
الرواية مقتبسة من رواية مصرية إبداع التأليف للكاتبة المصرية فقط غيرنا فى الأحداث لتناسب الطابع الهندي
#nonayasso
