شظايا ورماد

البارت الثالث

#شظايا_ورماد
#ارجوان
أيسر : انا ضابط عمري 29 سنه طويل جسمي مرتب ..ابوي توفى وانا عمري 3 سنوات يعني حتى ما اعرف شلون جان شكله بقينا عايشين عد خوالي لان عندي عم واحد ومسافر بره و3 عمات متزوجات .. ظلينه عد خوالي لحدما فد يوم امي اجوها خطابه وعرفت انو الي خطبها ابو المحل المقابيلنه جانت هواي تروح للمحل بحجه تشتريلي وصاير بينهم حجي وهالسوالف وخطبها واتزوجها على مرته جان عمري 9 سنوات شكد توسلت بيها حتى ما تعوفني ..جانت تكلي انت ولد اعتمد على نفسك حبيبي.. من تزوجت انتقلوا لغير منطقة بعد لا شفتها ولا اجت شافتني وحتى من صارت التلفونات ولا مرة دكت علي شكد كرهتها وحقدت عليها ..كبرت وظليت ادرس واشتغل رغم خوالي ما مقصرين بس جنت اريد اعتمد على نفسي ولا احتاج احد بهالفترة رغم الحقد والكره الي بداخلي من جنت اشوف رفل جانت كل همومي تبدد ما اعرف ليش رغم جانت صغيرة عمرها 12 سنه بس جانت نسمه باردة تمر على كلبي  صارت عيوني لا اراديا تتبعها كلما اجت لبيت خالي رياض او كلما اروح الهم للبيت.. تصرفاتها حركاتها ضحكتها حتى عصبيتها جنت احب كلشي بيها ..لدرجه كمت اروح وراها للمدرسه واذا ما الحك عليها من ترجع اوكف بالفرع حتى اشوفها من تدخل كلبي تعلق بيها بدرجه جبيرة ..المهم كملت دراسه وتعينت وحتى بيت اشتريت بنفس المنطقة رغم جان ناقصني فلوس بس تداينت من خالي رياض وبعدين رجعتهن اله ..كلت خلاص انا كملت كلشي اروح اخطبها ..من طلبتها تفاجئت بخالي رفضني رفض قاطع انصدمت ليش ..طلع شايفني داخل لمحل من محلات الشرب ..صدك بوكتها رحت وي جماعتي بس ما شربت جان واحد عازمنه ورحنا ومو كلها شربت ..حاولت افهمه انا ما شربت ما سويت شي بس وين ما انطاني مجال وطردني من البيت هالمرة حقدت اكثر عليهم كلهم ظليت اسوي شغلات انا نفسي اكرها ..بنات ولعبان نفس و ببيتي واخبص المنطقة خبص وشحدة الي يحجي ..كرهت نفسي وكرهت امي و خوالي وعمامي وكل الناس بس هي ما كدرت اطلعها من كلبي رغم شكد علاقات سويت بس هي متربعه بنص كلبي ..طلعت حقدي كله بالشغل جانو يسموني الوحش جنت اعامل المجرمين معامله وحشية لدرجه اكثر واحد يطول حتى اخلي يعترف يومين بس..وره فترة امي رجعت و وياها اخواني ولد وبنيه شكد حاولت اعاملها مثل اي ام عاديه بس ما كدرت احس هي السبب بكلشي صارلي ..بعدني لحد هسه ما مصدك شلون نطقتها وكلت انا اتزوجها ..يعني واخيرا راح تصير من نصيبي ..رجعت للبيت طاير الا شويه ..اول ما دخلت استقبلني سيف ..يمشي بكرسي متحرك لان جان معاق من الولاده  عندة ضمور برجلين
ولسانه ثگيل
سيف : أيسر اريد تشتريلي حلويات صار اسبوع محد مشتريلي
أيسر : بسته من خده ..يابه غير تدلل هسه اشتريلك ..طلعت اشتريتله ورجعت ..هاك هاي العلاگه كلها الك
أسماء : خير ان شاء الله الضحكة شاگة حلكك اليوم
أيسر : بتنهيدة ..والله يا اسماء خاتون انا سامعه الام من تشوف ابنها فرحان تفرحله وتكله ان شاءالله دووم هالضحكة بس انا امي تكلي خير ان شاء الله
اسماء : ما گلنا شي
أيسر : المهم باجر اعقد على رفل حضروا روحكم
أسماء : بعصبيه..شنووو شنوو ..لا بلا تريد تتزوج وحدة من بنات فاطمه لا هاي هيه
أيسر : وانتي شكو
اسماء : شنو انا شكو ..انا امك وادرى بمصلحتك
ايسر : بصياح.. ومن شوكت انتي امي ..هااا من شوكت من تركتيني وعمري 9 سنوات هااا احجي شوكت صرتي امي
اسماء : شوف اعرف انا قصرت وياك بس انت تدري بأختها وشنو سوت يجوز هي مثل اختها
ايسر : بعصبية..شوفي اذا هذا الحجي انعاد مرة ثانيه ما تلومين الا نفسج راح اتزوجها باجر غصبا عن اليقبل وال ما يقبل
اسماء : هاي سوالف خوالك ادري بيهم شمروها براسك
ايسر : اهوووووو شلون ما نخلص احنا اليوم
اسماء : يمه انا اريد مصلحتك
ايسر : لاااا تكوولين يمه انتي مو امي واذا مخليج هنا علمود جهالج وبس وهذا الموضوع ينسد هنا وبعد ما ينفتح ****
رفل : ظليت الليل كله كاعدة ..فكرة تجي وفكرة تروح حسيت راسي راح ينفجر للظهر وانفتح الباب
امل : يلا خواتين نزلن على الغده
رفل : كلبت عيوني ما عاجبني ..التفتت على رهف اكعدها ..رهف كومي انفك الاسر
رهف : كعدت افرك بعيوني ..هاا شكو ومنو فتح الباب
رفل : ست امل فتحته صاحتنه ننزل نتغده
رهف : تمام بس اغسل وجهي واجي وراج
رفل : اووك نزلت لكيت امي وكريم وامل كلهم على الميز مالت الاكل ..جريت كرسي وكعدت شوي ونزلت رهف ..كريم تلفوناتنه وين
كريم : وهو ياكل ..شتسوين بيهن
رفل : حاولت قدر الامكان ابقى هادئة ..ورانا دوام نحتاجهن
كريم : ماكو بعد دوام اكعدي واسكتي
رفل : بعصبية.. ليش بلا ماكو دوام شمسوين احنه لو هاي اوامر عمامك الزينين
كريم : ررررفلل الزمي حدج ..وعلى فكرة باجر يعقد عليج ايسر حضري نفسج
رفل : بأستغراب وكفت .. شنووو ..شتحجي انت لك شلون تقبل اتزوج واحد مجرم مثله ..كتل اختي هذا شبيك انت
كريم : ررررفل كااافي
رفل : لا مو كااافي مو بكيفك والله لو تنطبك السما على الگاع ما اتزوجه
امل : شبيج هيج معصبه فووك ما
لكيتي واحد يتزوجج
رفل : اسكتي انتي حاسبة البنات كلها مثلج تركض وره الزلم
امل : انا اركض وره الزلم؟؟
كريم : كااافي اثنينجن ..رفل باجر تعقدين واريد من الله ما توافقين تصير كتلتج على ايدي
رفل :شلون تقبلونها اتزوجه وهو حتى بابا طرده من البيت وكال لا تحاجونه بعد شو هو بابا مات وظليتوا تلعبون بكيفكم
كريم : صبري خلص وياج رفل حجايه ثانيه اكتلج والله
رفل : تعال اكتلني والله الموت ارحم من الي جاي تسوونه ..تقدم بأتجاهي يريد يضرب وماما صاحت
فاطمة : كررريم كااافي ..وانتي روحي حضري نفسج باجر وراج عقد
رفل : ولكم صدددك تحجون بابا مصارله اسبوع من مات وتردوني اتزوج
فاطمة : سدي حلكج وكافي لغوة خلي نلحك عليجن قبل لا تجيبن بلوة ثانيه على راسنا
رفل : كعدت يم رجليها احجي بتوسل ..يمه فدوة الله يخليج ما اريد اتزوجه ميخالف دراستي تولي بس ما اريد اتزوجه فدوة
فاطمه : كاافي مو زين قبل بيج
رفل : بعصبية.. ليش انا شبيه عورة عرجه لو لاگفيني وي واحد ..ما حسيت غير كريم اجه وضربني
كريم : كااااافي مو طلعتي روحي كااافي حجي يلا امشي ولي لغرفتج ..واذا اشوفج هنا اموتج والله ..ررهف كومي اخذي اختج وصعدي فوك يلا
رهف : كريم يحجي وانا اريد الرجفه تروح مني ماكو ..كوة اخذت رفل وصعدت فوك
رفل : حسبي الله ونعم الوكيل بيكم يا ربي لو تاخذهم لو تاخذني وارتاح ..بلا هسه انا شسوي ..اشرد ..انتحر ..اااخ يا بابا من بعدك شسوو بينا
رهف : اباوع عليها اخذت الغرفة تروح وتجي تروح وتجي ما كعدت وتدعي عليهم وعلى روحها جنت خايفة تسوي شي بنفسها ادري بيها تموت من ايسر وما تطيقة
رفل : براسي الف فكرة بس ادري كلها فاشله ومراح تجيب نتيجه ..شفت رهف صافنه علي وترجف والدمعه مستقرة بعينها... انتي شبيج خايفة وترجفين
رهف : انا هم راح يزوجوني مو
رفل : لا... ان شاءالله لا والله ما ادري رهف راح اتخبل والقرآن ..كريم وامي صافين وياهم ماكو واحد يكول خطيه هذن شنو ذنبهن
رهف : والدوام بعد ماكو
رفل : ندبرها هاي حتى لو هالسنه نترك وبعدين نكمل بس خلي اخلص نفسي من هالزواج والله كريم ***
ايلاف : ايسر ..ايسر ..كوم الساعة ب4
ايسر : اي كايم ..كايم ..غسلت ونزلت جوة ..ايلاف سويلي جاي
ايلاف : ماشي
ايسر : سيف وينه
ايلاف : نايم
ايسر : وامج وينها
ايلاف : كلبت عيوني ما عاجبني ..قصدك امك
ايسر : بنتر ..ايلاااف
ايلاف : راحت لخوالي
ايسر : شنووو
خرررب الحظ ادري بيها مراح تكعد وتسكت ركض لبست وطلعت
ايلاف : بأستغراب.. هذا شبي الحمد لله والشكر..هسه الجاي اخلي اطفي
ايسر : بعدني ما واصل واسمع صوتها شعلوة...
اسماء : لا تشمروون بلاويكم على ابني بت اخوكم احتاروا بيها انتوا زوجوها لولدكم حتى لو المتزوجين المهم ابني يطلع منها
رياض : نصي صوتج واحنه لا حاجينا ابنج ولا كلناله اتزوجها هو الي حجه وكال اريدها
اسماء : هذا الحجي مشو على غيري اخوتي واعرفكم كلش زين
ايسر : بعصبية.. اسماااء امشي للبيت
اسماء : والله ما اطلع لحدما اشوف حل لهالمصيبه
ايسر : لزمتها من ايدها بقوة وبعصبية .. تطلعين وياي لا وحق الله العب بيج طوبة ..يلا كدامي يلا .....
رفل : جنت كاعدة بالغرفة واسمع هوسه بره ..انا غرفتي الشباك مالتها على الشارع ..وخرت البردة اباوع واشوف ايسر يسحل بأمه سحل للبيت هي تنتر بأيدها وهو يرجع يسحبها ..هاك استلم هذا اذا يعامل امه هيج لعد شلون يعامل مرته
رهف : شكو
رفل : تعالي شوفي ابن عمتج شلون يسحل بأمه ويردوني اقبل بي لو ادري اموت والله ما اتزوجه ***
ايسر : بعياط.. اناااا شگلللت مووو كللت ما تتدخلين ..هاااا مو حجيييت وياااج
اسماء : لك انت ما تدري بنفسك شنو جاي تسوي يابه لو بنيه ما لاعبة بذيلها مثل اختها جان ما يزوجونهااا الك بهالطريقة
ايسر : انتي بس طلعي منها ولا تدخلين بالنص وهي تصير ما الج علاقة لاعبه ما لاعبه انا اريدهاا خووش لا تمثلين دور الام ﻷن ما لايگ عليج
سيف : بنعاس ..شكو شصاير
ايسر : ايلاف اخذي سيف ودخلي للغرفة
ايلاف : ماشي ..اخذته ودخلته للغرفة
سيف : شنو صاير ليش ايسر يصيح على ماما
ايلاف : عركاتهم المعتادة ما تعودت
سيف : هو ليش يكره امي
ايلاف : ما يكرها
سيف : لعد ليش يتعاركون
ايلاف : سوالف كبار ..فدوة سيف بعد لا تسأل
سيف : تمام ...
ايسر : وحسبي احاسبج تنظفين الغرفة وتجهزينها لباجر ..انا كلت لمرت خالي رياض تشتري جهاز لرفل ﻷن ادري بيج ما تدبرينها
اسماء : ولك انت مصدك روحك والله لو تموت ما تدخل لبيتي
ايسر : من يصير بيتج هذاك الوكت لا تدخلين احد بي ..والله ثم والله هاي اخر مرة احجي رفل ما الج علاقة بيها وتنفذين وانتي ساكته و لا تحجين كلمه بعد بهالموضوع لا تخليني اكرهج اكثر ****
رفل : ظليت الليل كله اتگلب اريد  تلفون اخابر خالي بي يجي يحاجيهم يشوفلي صرفة اي شي المهم ما اتزوج ..كلما انزل تطلع بوجهي امل
شكلهم اليوم مشددين الحراسه ومخلين هالجلب يراقب الليله ..يا ربي شلون هسه ..صار الصبح وانا ما نمت بس افتر اريد طريقة حل اي شي ماكو
رهف : كعدت من النوم اشوف رفل تحوم بالغرفة ..شنو ما نمتي ؟؟
رفل : يعني الي مثل حالتي شلون تنام بس فهميني ..شوي وانفتح الباب
امل : يلا يا عروس تعالي تريگي
رفل : لا اله الا الله.. يا ربي الصبر منك بس
امل : شتدردمين خاتون
رفل : وانتي شدخلج ..يلا رهف خلي ننزل نتزقنب ..نزلت وهاي تدردم فوك راسي ..اتفاجئت بوجود ام وسام بالبيت
ام وسام : هلا خاله شلونج
رفل : على الله.. بوستها وكعدت يمها
ام وسام : خاله هذا جهازج ايسر وصاني البارحه ورحت جبته عالسريع عذريني اذا ناقص شي
رفل : هي تحجي وانا اعصر بأيدي ما اكدر احجي امي وكريم وامل كلها كاعدة يمي ..هذا مصدك روحه وجايب جهاز همين
فاطمة : يلا ام وسام تعالي تريگي ويانه
ام وسام : لا خيه والله تريگت واجيت
رفل : كلهم التمو على السفرة ..بهمس ..خاله فدوة دبريني ما اريد اتزوجه
ام وسام : بهمس.. سودة علي خاله والله البارحه شكد حاجيت عمج كتله ما يصير على الاقل تطلع اربعينيه المرحوم
رفل : شكله كريم حس علينا جاي نحجي
كريم : رفل خاتون تعالي تريگي وراج عقد
رفل : هاا اي جايه ..باوعت ﻷم وسام بنظرة توسل عسى ولعل يطلع بأيدها شي ..رحت اكلت وياهم والكل يباوعلي احس حتى اللگمه كوة تعبر ..خلصنا وكلها بدأت تحضر امي بالكرسي مالتها وتفتر هذا سونه وهذا شيلنه وامل وياها وكريم كل شوي متصل على احد ..هذول مصدكين روحهم والله يا ربي ..صعدت فوك راسي صدع من وراهم لكيت رهف كاعدة تبجي ..خير شبيج تبجين
رهف : بعصبية.. انتي شبيج ليش ما جاي تبجين انا منج اكلب الدنيا على روسهم ما ادري ليش هيج باردة
رفل : يعني شنو تردين اسوي بجي بجيت صريخ صرخت توسل توسلت شسوي اكثر حسبالج اذا بجيت راح ينكسر كلبهم ..لا والله ولا يهمهم
رهف : اذا تتزوجين انا وراج يزوجوني والله وبنفس الطريقة
رفل : وانا حسبالي تبجين علمودي هههه طلعتي تفكرين بنفسج
رهف : رفللل والله مو هيج
رفل : شوفي اعرف شنو تفكرين بس والله ما اخليهم يزوجونج و لا دراستج تروح عليج بس صبري بلكت احصل خالي ويخلصنا منا
رهف : شلون تحصلينه وانتي العصر ياخذونج
رفل : بلكت احصله منا منا ..جاي نحجي وطبت امل علينا
امل : هاي انتي هنا وانا ادور عليج ..ما شفتي جهازج غير يخبل حظوظ
رفل: الحمد لله والشكر
بلا هاي شتحجي وياها
امل : رهف طلعي عندي حجي وي اختج
رهف : ظليت اباوع على رفل اشرتلي اطلع طلعت وعفتهن
رفل : كعدت على السرير وكتفت ايدي ..خير ست امل شتردين تحجين
امل : والله اجيت حتى افهمج شيصر بين الرجال ومرته اول ليله
رفل : خلي حجيج الج ما اريد تحجيلي اي شي
امل : طبعا اذا انتن مفتشات باللبن كلشي تعرفن هاي اذا ما مجربات
رفل : بعد كلمن يشوف الناس بعين طبعه
امل : بعصبية.. شنو قصدج ولج
رفل : قصدي واضح واذا ما عندج شي ثاني اطلعي برة
امل : مداج اي والله..روحي سبحي على الاقل مو ترحين بوصخج اله
رفل : انا اريد اروح بوصخي انتي شكو.. غمتني وراحت ..هاي الثانيه هم عايشه الدور ..مر اغلب الوقت وانا بالغرفة ما طلعت اخر شي سبحت ولبست قميص وتنورة سود ونزلت ..استوني بالدرج وطلعت بوجهي امل
امل : يوو ليش لابسه اسود على الاقل بس من تعقدين  لبسي شي ابيض
رفل : امل ترى روحي ما طايقتها ما ناقصتج والله..امي وين
امل : بغرفتها يعني وين
رفل : دخلت للغرفة لكيتها كاعدة والسبحه بأيدها تسبح ..تدرين يمه لا صلاتج ولا صيامج مقبول بعد ..ظلت تباوعلي بأستغراب.. اي ﻷن تشوفين الظلم وتسكتين مراح اسامحج بحياتي كلها مدام ما وگفتي وياي
فاطمه : انا كل هذا سويته لمصلحتج وحتى لا اتعبني واتعبن اخوجن
رفل : بأستهزاء.. وين مصلحتي بالموضوع انتي كلش زين تعرفين ايسر شنو وشنو سمعته ..انا سامعه الام تحمي بناتها وانتي بكل سهوله تشمرين بينا ..هاي هيه انا راح اطلع من هالبيت واي شي يصيرلي برگبتج و ما مسامحتج لا دنيا ولا اخرة ..طلعت وعفتها رغم شفت دموعها تنزل بس ما همني اذا ما نقذتني من هالزواج اليوم مراح اسامحها ابد ***
ايسر : للعصر جبت السيد  رحت لخوالي اخذتهم ورحنا لبيتهم ..فرحان لدرجه احس نفسي راح أطير
امل : يلا نزلي اجه السيد
رفل : نزلت وانا ارجف ..يا رب ساعدني ..جاي ادخل وصاحت علي ام وسام
ام وسام : خاله ما يصير تعقدين بالاسود اذا هاي لبسي جادر صلاة فوك ملابسج
رفل : لا خاله ما يحتاج راح اعقد بهذن
ام وسام : ما يصير يمه فال مو زين
رفل : ابتسمت على كلامها ..ميخالف بلكت اموت اطلگ ..دخل علينا كريم يحجي بعصبيه
كريم : يلا وين صرتي
رفل : جايه ..دخلت ..السيد بدأ يحجي ويلقن اخر سألني هل تقبلين ايسر.. زوجا لك..اخذت نفس وقويت نفسي ..لا ما اقبل
ايسر : التفت عليها بصدمه وكلها فتحت عيونها عليها بما فيهم السيد
السيد : ما يصير هيج جابيني واصلا البنيه ما موافقة
رياض : بأرتباك. .لا لا سيد هي موافقه بسس خايفة شوي ..بس انطيني مجال احجي وياها..تعالي بابا وياي
رفل : انا كاعدة وهو يعت بيه وكل شوي دافعني طلعنا من الاستقبال وهو لزكني بالحايط
رياض : وحق الله اذا ما تكعدين هسه وتكولين موافقة الا انهيج على ايدي انتي واختج
رفل : هزيت راسي ..تمام راح اكله موافقة
رياض : يلا دخلي
رفل : عدلت ملابسي ودخلت ..رجعت كعدت بمكاني وعيون الكل عليه
السيد : هاا بابا انبلش
رفل : هزيت براسي ..بدأ يحجي اخر شي كال
السيد : بابا انتي موافقة بأرادتج بلا ضغط من احد
رفل : هو حجه هيج وانا ما صدكت ..اي موافقه بس بضغط واجبار من الكل
ايسر : خرررب حظي اضحك مدري الطم على حجيها هاي ما تخاف لو شنو ادري بيها ما رايده هالزواج بس مو لهالدرجه
السيد : ترى ما يصير تجبرونها على الزواج البنيه فاهمه وجبيرة
رياض : سيد هاي ما تعرف مصلحتها احنه اهلها ادرى
السيد : لا ادرى ولا غيرها هيج زواج باطل وحرام علي وعليكم
رفل : كعد السيد ينطيهم محاضرة شطولها وشعرضها وانا مكيفة ..هو السيد طلع وانا كمت اتشاهد
محمود : بعصبية.. ولج انتي ما تستحين ما تخجلين هااا ولج من شنو مخلوقه انتي
رفل : يحجي ويتقدم بأتجاهي بعصبية ..كمت وكفت اريد اشرد ..بس ما لحكت لزمني من زندي بقوة
محمود : وين رايحه اليوم كتلتج على ايدي
ايسر : وكفت كدام خالي وشلت ايده عنها ..خالو عوفها
رياض : شيعوفها انت الثاني
ايسر : خلي نتفاهم بالبدايه نشوف شتريد  رياض : هاي هيه عوفوها علي ..كريم صيح لرهف يعقد عليها ايسر وهاي انا اعرف شلون اتصرف وياها خزتنه
رفل : رررهف شدخلها عوفوها بعدها صغيرة
كريم : لا عمي تعذرني رهف صغيرة ومريضه ما اكدر ازوجها هسه
رياض : انت شتخربط روح جيبها لا اسحلها انا مو طلعتوا روحي
كريم : عمي البنيه مريضة
رياض : انجب بلا وروح صيحلها
رفل : لا تصيحولها انا موافقه اتزوج
محمود : هي شنو لعبه موافقه ورافضه كل شوي
رفل : لا موافقه اخر مرة بس بشرط
ايسر :راسي صدع من وراهم كل حجايه وكلبي منقبض هاي بعدني ما متزوجها وشوفتني المر من اتزوجها شلون
رياض :لا وتتشرطين همين
رفل : بكيفكم يا تقبلون يا ما اتزوج وهم اختي لو تنكلب الدنيا ما اخليها تتزوجه
ايسر : خالي خلي تحجي و نشوف شنو شرطها
رياض : يلا احجي بلا خلي نشوف
رفل : رهف تكمل دراستها وما تزوجونها ﻷي احد ما تريده
رياض : بلا ما تنجبين دراسه بعد ماكو لا الج ولا ﻷختج
رفل : هذا الي عندي توافقون اهلا وسهلا ما توافقون تحلمون اتزوج
محمود : راح اجيب سيد ثاني واريد من الله ما توافقين اموتج بكاعج والله
رفل : الموت اهون علي من الي تسوونه .. لو تجيب عشرة هم راح احجي نفس الحجي
محمود : بعصبية. . ولج انتي منين طلعتيلنه هااا
ايسر : شفته يريد يتقدم يضربها صرت كدامه ..خالي مو هيج كالوها
محمود : شو وخرر انت هاي ما يفيد وياها بس الضرب
ايسر : خالي ليش ما توافقون على الشرط
محمود : هذن ماكو وراهن بس دوخه الراس شوي وتلكاها مسوية مثل مصيبه اختها
ايسر : زين انا اضمنها اذا سوت شي علي انا
كريم : وانا هم اضمنها
رياض : خوش حجي بس اذا صار شي عليكم انتو الاثنين
ايسر : ماشي
رفل : ظليت مصدومه ايسر وكريم اثنينهم موافقين والله ما مطمنه ابد
رياض : هاا هسه ما عندج حجه بعد
رفل : لا ما عندي شي بعد بس هاي كدامكم كلكم اذا تجذبون علي وما تسون الي كلته والله اجيبلكم فضيحه لا صارت ولا دارت
رياض : اهووو يلا بس سدي حلگج وخلي هاليوم يعدي على خير
رفل : شوي وجابوا سيد ثاني وكملنا العقد
رياض : يلا ايسر اخذ مرتك وروح
رفل : بس شوي خلي اودع اختي على الاقل
محمود : جيبوا اختها هنا هاي ما الها امان
رفل : كلبت عيوني ما عاجبني. .على اساس انتو الي الكم امان ..راح كريم صاح لرهف ..اجت بأتجاهي بلهفة حضنتني
رهف : حضنتها و همست يم اذنها ..انتي مو كلتي ما راح يتم هالزواج يعني راح ترحين وتعوفيني
رفل : رهف ما كدرت والله حاولت بس ماكو فايده ..سحبتها ولزمت وجهها بأيدي ..بس راح ترجعين للدوام
رهف : فكيت عيوني كلها ما مصدگه. .صدك والله
رفل : بأبتسامه ..اي ومحد راح يجبرج على زواج او اي شي
رهف : بأستغراب.. شلون هيج صار
رفل : معليج ..المهم خاف يحاولون يمنعونج ما ترحين للدوام لو يسون وياج شي كليلي وانا اتصرف ماشي
رهف : ماشي ..رجعت حضنتها بقوة ..راح اشتاقلج
رفل : وانا هم
رياض : يلا كافي ما شبعتن
رفل : اللهم صبر بس
ايسر : يلا نمشي
رفل : طلعت من بيتنا لبيتهم مشي صدك احنه بنفس الشارع بس على الاقل يجوبون سيارة توصلنا .. والمصبية اثنينه لابسين اسود عبالك رايحين مشايا
ايسر : دخلنا للبيت وطلعت امي بوجهنا .. بس ناقصني انتي ويكمل يومي ..خير تردين شي
اسماء : شبيك يمه كلت ابارك للعروسه ..مبروك عمه جان انتظرتي تفكين حزنج يلا تعرسين
ايسر : بعصبية ..انا مو كتلج لا تتدخلين
اسماء : ما كلنا شي
ايسر : سحبت رفل من ايدها وصعدت فوك ادري اذا بقيت راح تخبصنا وما نخلص من حجيها
رفل : بعصبية.. عووف ايدي هاي  شبيك ..فتح الغرفة دخلني وترك ايدي ..ضليت افرك بأيدي من الالم وهو ما حجه شي.. وبعدين امك ليش هيج تحجي عبالك كاتله نفسي حتى اتزوجك
ايسر : بتنهيدة.. ما الج علاقه بيها شنو تحجي لا تهتمين
رفل : بقيت اباوعله ما مفتهمه ليش يحجي هيج على امه
ايسر : انا داخل للحمام وانتي لبسي هذا وحضري نفسج
رفل : التفتت مستغربة على المكان ﻷشر علي ..شفت فستان مدري سيت نوم ابيض على الجربايه ..رفعتله حاجبي ..انت من كل عقلك تحجي ؟؟
ايسر : بأستغراب.. شكو شبيج
رفل : لا تحلم مجرد حلم تلمسني اصلا
ايسر : لا اله الا الله.. بعصبية.. شوفي ولج احنه عاقدين ودخلتي الليله عليج مو حسبالج كاعدين بأوروبا ولا تلمسني ولا بطيخ غصبا عنج اخذ حقوقي الليله فاهمه لو لا
رفل : لو تموت والله مراح يصير الي ببالك لو صدك سويتها غصبا عني وحق الله اكتل روحي ...تقدم بأتجاهي وظل صافن بعيوني بحيرة شوي و بعد عيونه وكال بهدوء
ايسر : اذا كتلتي نفسج اتزوج اختج مو مشكله
رفل :بعياط.. لك انت واحد بلا اخلاق
ايسر : اي هو انا واحد بلا اخلاق داخل للحمام والكاج جاهزة فاهمه لو اعيد
رفل : دخل وانا ضليت الوب بالغرفة ما اعرف شسوي ردت افتح الباب لكيته مقفول ..يا ربي شسوي هسه..باوعت على الفستان ما بي شي مستور مفتوح من كل مكان جان بي فتحه على طول الرجل لزمته من الفتحه وشگيته بالنص ..خليني اشوف منو يلبسه
ايسر : طلعت من الحمام كلت هسه الگاها جاهزة بعد التهديد ..بس وي منو.. لكيتها كاعدة على الجربايه مكتفه ايديها و الفستان يمها صاير نصين ..والله هاي تريد ارتكب بيها جريمه ..حسبالج اذا شگيتي الفستان مراح اسوي الي ببالي هاا
رفل : مراح يصير شي من الي ببالك ابد لا تتعب نفسك
ايسر : بعصبية.. غصبا عنج فاهمه لو لا واريد اشوف منو يمنعني
رفل : بعصبية.. مستحييييل جاااي تفهم لو لاااا انااا مستحييييل اخلي واحد مجرم مثلك يلمسني كاااتل اختي وفوك هذا واحد قذررر من مرة لمرة متاااح للجميع انت انا مو مثلك خليك بعالمك الوصخ وعوووفني لا تدنالي ..احجي وارجف بعدني ما مكمله ولزم شعري من وره الحجاب
ايسر : اذا عدتي هالحجي مرة ثانيه اموتج فااااهمة
رفل : حطيت عيني بعينه ..راح اعيده الف مرة ﻷن هاي حقيقة اخاف انت
انت ناسيها اذكرك بيها ...هاا وعلى فكرة مو مرجله تاخذ مرة مرايدتك ..اذا انت مو زلمه اخذ الي تريده ..انا حجيت هيج وهو جر شعري اكثر وظل يصيح بوجهي
ايسر : خررررب حظي العرفني بيج خرررب باليوم الوافقت بي عليج خررررب باليوم الجيت بي وشفتج بي
رفل : شمرني على الجربايه بكل عصبية واخذ السويج والموبايلات طلع من الغرفة وقفل الباب وراه ..كعدت على الجربايه ارجف اريد اهدأ ماكو ..مو طلع مو عافج وما سوالج شي على شنو هالرجفة بعد
ايلاف : نزل ايسر وجهه صاير احمر و يخوف من الغضب
اسماء : شكو شصاير اصواتكم وين واصله
ايسر : بعصبية.. انااا كم مرررة كتلللج ما الج علااااقة بيه
اسماء : هسه انا شحجيت
ايسر : ما اريد تحجييين شي ابد ...طلعت من البيت وانا كاره روحي بلا هاي شسويلها هسه ..رحت للگهوة اشرب نركيله شوي وصوت وراي فززني
ضرغام : كللللللللللللوشششش ..شاايف خير ومستهالها ..وهاي الرادها وهاي التمناها ....كللللللللللوششششش
ايسر : خرررب غيرتك ...يهلهل ويكمز بنص الگهوة ..فضحتنا ولك اكعد
ضرغام : ما اكعد اليوم اردح ردح واكسر الكاشية ..وهلا هلا هلا روح روح روح ...كلللللللللوششششش
ايسر : يبووو الناس تضحك علي وهو مستمر ما بطل ..كمت لزمته من ايده وكعدته ..ولك شبيك اثگل صدك جذب
ضرغام : ولك ما مصدك والله.. صاح بعلو صوته ..اليوم كل الي تطلبونه على حسابي ولكم ما مصدك
ايسر : غطيت وجهي بأيدي اضحك من الفشله ..بعلي انت فلم
ضرغام : ولك شلون تزوجتها احجيلي هو مو ابوها الاسبوع الفات مات ولك شلون حصلتها
ايسر : بعد ربك كريم
ضرغام : والله من خابرتني ما صدكت ..بعدين انت مو الليله عرسك ليش كاعد هنا ولك انا منك اسبوع ما اطلع من الغرفة ههههه
ايسر : ضربته على راسه ..ولك منا العالم اسكت
ضرغام : اي هسه غير تحجي مو طلعت روحي
ايسر : متزوجها غصب
ضرغام : احلف ولك شلون
ايسر : ما كدرت احجيله الصار وي رنا ..بعد من مات ابوها خوالي رادوا يزوجوهن بسرعه
ضرغام : عود ليش
ايسر : على اساس لا يظلن وهن بنات ومحد مسؤول عليهن وهالسوالف المهم انا صرت سبع وكتلهم انا اتزوجها وهم كيفو وهي اصلا ما رايدتني ولا طايقتني ومن اولها بدينه بعركه وعندك الحساب
ضرغام : لك يلا كلها تهون اهم شي صارت الك البقيه بعدين يجي
ايسر : الله كريم ..ضليت وي ضرغام بالگهوة سوالف وضحك
سالم : هلا شباب
ضرغام ،ايسر : هلا بيك
سالم : شخباركم
ايسر : على الله
سالم : صدك ايسر بت خالك شلونها هذاك اليوم شفتها حالتها حاله بالشارع!!!..يتبع
#ارجوان