شظايا ورماد

البارت الثاني عشر

#شظايا_ورماد

ايسر : لا ما اجذب عليكم انا خاطب
رفل : جذاب ..عمتي وشكلها من نسألها على خطيبتك كل مرة بعد مجانت طايرة من الفرح اول ما دخلت علينا من الخطوبه ضايجه ..وانت حتى ملابس حلقه ومن نكلكم نريد صورة الها ما تقبلون وهسه من ارد على حبيبتك يطلعلي صوت ولد يكلك الامر منتظرك ..كل هذا يعني جنت تجذب علينا
ايسر : طلعتي ذكيه والله. . اي جنت اجذب ما خاطب ولا شي
رفل : بعصبية.. لييش انت تريد بس تلعب بأعصابي
ايسر : لا ردت ابين الج شكد تحبيني وتغارين عليه
رفل : بعصبية.. لااا غلطااان اناا لا احبك ولاا اغار عليك ..مو حسبالك الي سويته غيره لا جنت اسوي هيج حتى تطلگني لا اكثر
ايسر : بس انا اشوفه حب وغيره
رفل : شوفه مثل متشوفه المهم بعد لا تحجي وياي اخر خيط بيني وبينك انگطع
ايسر : ليش ﻷن كشفت مشاعرج؟ ؟
رفل : لاااا ﻷن انت واحد متستاهل جاي تلعب بأعصابي بكل دم بارد
ايسر : رفل اسمعي
رفل : حطيت ايدي على اذاناتي ..بعصبيه.. ما اريد اسمع كااافي كااافي .. تركته ورحت للغرفة كعدت على الجرباية ابجي
ايلاف : وهي تفرك بعيونها.. ولج شبيج شكو من الصبح
رفل : ايسر طلع جذاب ما خاطب
ايلاف : ياا صددك !!.. وانتي ليش تبجين المفروض تفرحين
رفل : دمر اعصابي بتصرفاته علمود يشوفني اغار علي لو لا
ايلاف : وهسه انتي كاعده تبجين ﻷن دمر اعصابج لو ﻷن غرتي علي
رفل : وانا ابجي.. ما ادري ايلاف ما ادري والله
ايلاف : الله يهديكم اثنينكم ما ادري من شنو مركبين و ما معروف بشنو تفكرون
رفل :  عافتني وطلعت ..انا غطيت روحي بالبطانيه وضليت ابجي على شنو ما ادري بس احس گلبي محترك واريد اطفي ما اكدر .....
اسماء : ايسر اريد احجي وياك
ايسر : اذا موضوع مو مهم أجلي
اسماء : لا مهم
ايسر : تمام احجي
اسماء : البارحه اجت ام وسام تخطب ايلاف
ايسر : بأستغراب.. لوساام ؟
اسماء : لا لكريم
ايسر : اهاا أسأل ايلاف واشوف
اسماء : ليش خو نرد الرفض الهم
ايسر : رفعت حاجبي.. ليش نرفض ؟
اسماء : مطلگ ليش نقبل بي
ايسر : عادة اذا اجه واحد مطلگ يسألون شنو سبب طلاقه ويردون القبول او الرفض بس احنه نعرف بكريم ليش طلگ
اسماء : اي بس يظل مطلگ
ايسر : بتنهيدة.. المهم انا لو اعرفه مو خوش جان رفضت من البدايه لذلك راح اسأل ايلاف وهي الوحيدة الي ترفض او تقبل هي الي راح تتزوج مو احنه
اسماء : گول ﻷن اخو مرتك انت موافق
ايسر : شدخلها مرتي والله يا الله..ايلااااف ..ايلاااف
ايلاف : اي جايه جايه ..دخلت للاستقبال جانوا ايسر وامي كاعدين .. رايد شي
ايسر : تعالي كعدي هنا عندي حجي وياج
ايلاف : كعدت يمهم ..جانت امي متوترة مدري ضايجه المهم شكلها ما مرتاحه
ايسر : البارحه اجت ام وسام خطبتج لكريم
ايلاف : هاا
ايسر : شنو هاا اجه خطبج .. موافقه علي او لا
ايلاف : ضليت اصفن ..الي تشوفونه
ايسر : ماكو الي نشوفه مو احنه الي راح نعيش وياه فكري عدل ورجعيلي خبر
ايلاف : تمام ..كلتها وانا ميته خجل اول مرة انحط بهيج موقف .. رحت ركض للغرفة ..رررفل ولج ررفل كومي ..شلت البطانيه عنها ..ولج هاي شنو شوفي عيونج شلون ورمانه من البجي كومي كومي غسلي
رفل : ما اريد عوفيني ايلاف.. ورجعت تغطيت بالبطانيه
ايلاف : ولج كومي اخوج خطبني
رفل : بصدمه .. يا اخو
ايلاف : ليش انتي كم اخو عندج
رفل : هو واحد ..يعني قصدج كريم خطبج
ايلاف : اي
رفل : بفرحه .. يا الله.. كمزت عليها حضنتها
ايلاف : خرررب ولج شكلج يضحك عيونج حمر وخشمج احمر وكاعدة تضحكين هههههه
رفل : ضربتها على راسها بخفة .. مو صوجج صوج الفرحتلج
ايلاف : هههههه حبابه لا تزعلين انتي حماتي ادور رضاج انا
رفل : دروحي روحي
ايلاف : هههههه يلا لا تزعلين حماتي الحلوة
رفل : اي بدأت اللواگه .. اي شوكت المهر
ايلاف : ولج بعدني مموافقه
رفل : تخوصرت .. لا بلا وشبي اخوي وبعدج مموافقه
ايلاف : افكر حبيبتي هذا موضوع مصيري
رفل : هجم بيتج
ايلاف : اكلج شي وما تكولين
رفل : اي كولي
ايلاف : هو حاجاني قبل كم يوم وكال انا رايدج اذا موافقه رديلي خبر و وره يومين كتله موافقه
رفل : حلفي
ايلاف : والله ههههه
رفل : لعد ما ترجعين الموافقه هسه
ايلاف : لا خلي تمر يومين حتى لا يشكون
رفل : واخيرا راح يصير عدنا عرس ..الحمد لله على كد ما جنت ضايجه على كدما فرحتيني
ايلاف : ان شاء الله دووم فرحانه
رفل : مر يومين وردت الخبر الهم عمتي شكلها مموافقه ﻷن اكثر من مرة شفتها تحاجي ايلاف وتقنعها انو تبطل بس هي ولا يمها شكلها طايحه بغرام اخوي ههههه ..التهينا نجهز للحفله بالنسبه ﻷيسر ما احاجي ولا نكعد بنفس المكان ..لحدما اجه يوم الخطوبة تمنيت انا هناك يم رهف اكيد مخبوصه بس ادري ام وسام وبنات عمي ما يعوفنها لوحدها .. راحت عمتي وايلاف للصالون وانا كاعده ارتب الكوشه وهالسوالف بهالاثناء دخل عليه ايسر
ايسر : احم محتاجين شي
رفل : رديت بنتر ..لا
ايسر : ماشي
رفل : دار ورجع التفتت عليه
ايسر : هاا صدك ترى مكياج وملابس قصيرة او ضيگه ماكو
رفل : اعتقد انا بالبيت مطالعه والعريس اخوي بعد شنو مو كافي مخليتني اروح للصالون
ايسر : كلت ماكو يعني ماكو ماشي وخلي اشوفج مسويه العكس وشوفي شيصير
رفل : حجه هيج وراح ..هذا مشتهي عركه الظاهر صارلنا هواي ممتعاركين فيريد يتعارك .. اذا يريد انا مستعدة اموووت على المشاكل .. خلصت التجهيزات وجهزت نفسي على اخر حبه لبست فستان ذهبي واسود ضيگ طويل وبي فتحه على طول الرجل شعري فتحته وسويته برمات ومكياج ناعم .. اجت النسوان والبيت انترس شوي و وصلت العروس وبدأت الهلاهل والديجي يشتغل .. بعدين صاحولها من وره الباب حتى يعقد السيد كملوا ودخل كريم وهم كامت الهلاهل وطشوا الجكليت ورهف بنص تركص الگاع ما شايلتها
رهف : رررفل تعالي وياي
رفل : لا لا ما اريد عنتر ابن شداد ما يقبل
رهف : ولج محد يگله تعالي هسه
رفل : على واهس رهف كمت اركص وياها .. لبسوا الحلقات وكملوا كل طقوس المهر واخوي فرحته متنوصف ..اول مرة ادري هو حاط عينه على ايلاف وايلاف هم مبين تحبه من نظراتها اله ..خلصت الحفله واحنه على هالحال هلاهل وركص حتى العروس ركصناها...
رهف : يمه والله فرحانه ﻷن راح تصيرين جنتنا
ايلاف : ﻷن راح اصير جنتكم لو حتى اكرب وياج
رهف : الاثنين هههههه
ايلاف : هههههه ادري بيج انا
ام وسام : يلا رهف ماشين
رهف : اي جايه .. بوست ايلاف ورجعت حضنت رفل  يلا مع السلامه
ايلاف ورفل : الله وياج
ايلاف : رفل جيبي تلفوني تلكينه على الشحن بغرفة ايسر
رفل : وليش حاطته هناك
ايلاف : ﻷن الغرفة مقفولة ومحد من الجهال يدخللها يلا عفيه ولا اخذت صورة بالتلفون
رفل : ماشي ماشي .. صعدت فوك ستوني فصلت التلفون من الشاحنة ودخل ايسر .. گلبي طاح بالگاع من شفته
ايسر : اباوعلها شمسوية بروحها هاي هيج طالعة كدام النسوان.. بعصبية.. انا شحجيت
رفل : بلعت ريگي من الخوف جانت نظرات عيونه تخوف ما كدرت افسرها شنو .. حجيت بأرتباك.. خطوبة اخوي يعني مو واحد غريب
ايسر : وانا شنو كلت
رفل : جان يحجي بهدوء ويتقدم بأتجاهي .. شوف ترى هالشي من حقي هو اخوي الوحيد ومن حقي افرح واسوي الي يعجبني .. صار قريب مني هو يتقرب وانا ارجع ليوره لحدما لزكت بالحايط صارت تفصلنا كم خطوة بس ..جاي افلت گطع الطريق علي بأيده .. وحط ايده الثانيه من الجهة اللاخ صرت محصورة بين الحايط وجسمه .. اباوع علي
نظراته تغيرت وصوت نفسه تخربط.. بلعت ريگي صار يخوف اكثر احس راح يغمى عليه من الخوف ..عينه ما نزلها مد ايده وشال خصله من شعري خلاها وره اذني وايده ترجف ..بخوف ..ايسر وخر .. انا حجيت هيج وهو غمض قوي وسند راسه بگصتي
ايسر : ليش تسووين هيج تردين تخبليني
رفل : يحجي وصوته يرجف حتى ايده الي ساندها على الحايط ترجف وانا ساكته ..حجه بهدوء
ايسر : انتي متحسين بيه متنقهرين عليه ولج راح اموت من وراج
رفل : رجفه ايده وصوته وانفاسه الي تضرب بوجهي كلها شلت حركتي ما كدرت اسند نفسي بعد لزمت سترته بقوة ذبيت كل ثگلي علي
ايسر : تنفسي من حلگج
رفل : مفهمت شنو يقصد .. هاا
ايسر : بعصبية.. اريد انفاسج راح اموت
رفل : ستوني جاي اتنفس ما حسيت غير طبع بوسه على شفتي ..هالحركه قطعت اخر خيط مقاومه عندي بعد مكدرت اتحكم  لا بگلبي ولا بعقلي كلشي جان خارج سيطرتي ..هو كان المسيطر الى ان ......
كعدت الصبح بحركه ايده على وجهي
ايسر : كعدتج
رفل : هزيت براسي اي
ايسر : انا ما نمت
رفل : بأستغراب.. ليش؟
ايسر : اخاف انام ويطلع حلم الي انا بي
رفل : بأبتسامه.. لا حقيقة مو حلم
ايسر : بتنهيدة.. احبج واموت بيج والله
رفل : غطيت وجهي بأيدي وظليت اضحك
ايسر : اكو وحدة يكللها زوجها احبج وتسوي هيج غير تكولين وانا همات شي
رفل : وانا اضحك ..والله هالكلمه تضحك
ايسر : رفعت راسي فوك .. يا ربي شنو هالبنيه الي حتى مشاعرها معوقه
رفل : ههههههه يلا كوم تأخر الوقت
ايسر : ما اروح للشغل انا عريس اليوم
رفل : ياااا صددك نسيت تلفون ايلاف من البارحه وصتني انزله
ايسر : هههههههه من البارحه وهسه راح تجيبينه الها
رفل : كوم كله منك
ايسر : انخبصت ضلت تدور على التلفون ..هذا هو شبيج ترى البارحه ظل يرن هواي وقفلته
رفل : يبووو هسه تموتني اختك .. نزلت جوة ركض لاكيت ايلاف متخوصرة وتهز برجلها ..بأبتسامه.. صباح الخير
ايلاف : يا خير هذا انا مو كتلج نزلي التلفون
رفل : بصوت ناصي.. غير اخوج شافني مخالفه اوامره وحبسني
ايلاف : بس لا ضربج ولج
رفل : لا لا بس رزاله ..هاج حبيبتي واسفه بس مو بأيدي
ايلاف : ولج كريم راد يتخبل يدك وما يحصلني اخر شي دك على امي
رفل : يااا خطيه اخوي
ايلاف : شوف هاي مقهورة على اخوها وانا كعدت افتر كدام باب الغرفة اريدها بس تنفتح ماكو
رفل : ههههههه خرررب شوف الحب شيسوي .. حل بيج حتى بعد لا تخلينه بغرفة ايسر
رهف : كررريم ..كرريم
كريم : دخيلك يا ربي شكو ولج ليش تصيحين
رهف : النتائج نزلت وصارلي ساعه اريد اطلعها ما تطلع
كريم : منو كلج نزلت
رهف : الدنيا مگلوبة مواقع التواصل والگروبات كلها ..عفيه حباب گلبي راح يوكف والله شوف حتى ايدي ترجف
كريم : على كيفج شنو السالفه ..هسه اشوفها الج بس كعدي
رهف : تمام تمام .. كعدت وانا متوترة فوك النص ساعة يلا طلعت
كريم : ولج مبروك جايبه 95
رهف : عاااا كووول والله
كريم : هههههه والله
رهف : يا يمه هاي صدك ..وهلا وهلا هلا هلا ..كمت اكمز واركص
كريم : هههههه مبروك دثبتي شوي
رهف : راح اخابر رفل ابشرها .. رحت ركض للتلفون دكيت على ايسر ..الو
ايسر : هلا رهف
رهف : هلا بيك اريد رفل بسرعه
ايسر : خير اكو شي شبي صوتج
رهف : لا لا ماكو شي بس ﻷن صعدت الدرج بسرعه هيج صوتي يلا بسرعه انطينياها
ايسر : تمام
رهف : شوي وردت رفل ..الو رفل باركيلي
رفل : على شنو بس لا النتائج طلعت
رهف : اي اي ومعدلي 95
رفل : الف الف الف مبرررروك حبيبتي انتي تستاهلين والله
رهف : الله يبارك بيج ..عفيه رفل بهالمناسبه كولي لأيسر خلي يجيبج يمنه
رفل : تمام انا احاجي ولج ممصدكه
رهف : هههههه حتى انا ..يلا باي عندي مكالمه ثانيه ومو تنسين حاجي ايسر
رفل : تمام تمام باي
رهف : سديته منها .. جان وسام يدك فتحته ..الو
وسام : وينج صارلي ساعه ادك
رهف : جنت اخابر رفل
وسام : مبررروك تستاهلين كل خير
رهف : شكرا
وسام : توقعت تجيبين هيج معدل اذا مو اكثر
رهف : ارتبكت ما عرفت شنو احجي سكتت وهو سكت
وسام : رهف
رهف : هممم
وسام : شلونج
رهف : الحمد لله زينه ..وانت
وسام : مو زين
رهف : تجرأت وسألته.. ليش شبيك؟؟
وسام : بتنهيدة ..انتي بيه
رهف : عضيت شفتي بقوة و ضليت ساكته
وسام : ليش ما تردين.. جاي ازعجج ؟؟
رهف : لا
وسام : رهف لشوكت ؟
رهف : يصير تنطيني مجال
وسام : بلهفة.. يعني اكو امل
رهف : اي بس اريد افكر بعد
وسام : اخذي راحتج الج الوقت كله
كريم : رررهف ..رررررهف وينج
رهف : انا رايحه كريم ديصيح
وسام : اووك باي
رهف : نزلت الدرج على صوت كريم بسرعه وجان اشوف امي .. بأستغراب.. يممممه !!......
رفل : بالليل كاعدين بالغرفة وانا كاعده احوس ما اعرف شلون ابدي بالموضوع .. ايسر
ايسر : صارلج ساعه تحوسين اريدج بس تحجين ماكو ..كولي
رفل : حجيت بسرعه .. اريد اروح ﻷهلي عفيه ابارك لرهف
ايسر : تدللين باجر نروحلهم
رفل : احلف
ايسر : والله
رفل : زين عندي طلب ثاني
ايسر : وهو
رفل : حاوطت رگبته بأيدي رغم هو اطول مني بهواي بس رفعت نفسي حتى اوصله
ايسر : ابتسمت على حركتها ..شكله الطلب خطير
رفل : اريد اكمل كليه
ايسر : لا ماكو كليه بعد
رفل : بعصبية.. وخرت ايدي منه ..اي ليش ؟؟
ايسر : ماكو وخلاص
رفل : اهاا يعني يضيع تعب 15 سنه علمود انت مموافق ترى ما يصير حرام عليك والله
ايسر : رفل ما الها داعي ترى ممحتاجه الشهادة انتي
رفل : ليش ممحتاجتها انت تدري باجر او عگبه شيصير ترى محد دايم ﻷحد اذا صار عليك شي انا شلون اعيش وحتى شهادة ما عندي
ايسر : رفل اجلي الموضوع اريد انام بعدين نحجي بي
رفل : اي هو بكيفك تأجل وتناقش شوكت متريد.. عفته وطلعت بره يم ايلاف ما طولت هواي يمها ﻷن الوقت تأخر ..رجعت للغرفه بعده كاعد وانا طنكرت كلش طلعت فراش فرشت بالگاع ونمت
ايسر : شعندج نازله جوه
رفل : بنتر ..كيفي انزل او اصعد بكيفي
ايسر : ولج لا تشلعين گلبي وتعالي نامي هنا
رفل : ما اريد
ايسر : لا اله الا الله.. كمت شلتها من مكانها وحطيتها على الجربايه
رفل : دعوووفني ما اريد انام يمك
ايسر : دتحركي منا وشوفي شسوي
رفل : هو شنو غصب اكلك ما اريد يعني ما اريد
ايسر : خلاص موافق
رفل : عقدت حواجبي.. على شنو
ايسر : على الدوام
رفل : كعدت عدل .. صدك والله
ايسر : اي
رفل : طفرت علي حضنته ..والله انت احلى زوج بالعالم
ايسر : اي ضحكي علي ستوج فارشه بالگاع وهسه احلى زوج
رفل : هههههه اي شسوي انت ما تتفاهم گبل ترفض
ايسر : انا ما اتفاهم لو اخاف عليج
رفل : من شنو تخاف علي ترى انا 3 سنين عدت بالكليه ومحد يكدر يحجي وياي بكلمه
ايسر : هو هم صح انا لازم اخاف على العالم منج مو اخاف عليج
رفل : لا بلا
ايسر : هههههه ولج انا شلون حبيتج ما ادري لسانج اطول منج محد يكدر عليج
رفل : عقدت حواجبي.. والله انا فقيرة ليش هيج تحجي عليه
ايسر : عمي انا الفقير
رفل : اهاا انت الفقير لا تخليني هسه احجي سوالفك كلهن
ايسر : الظاهر هالليله مراح تخلص ..سديت حلكها بأيدي وحضنتها بالايد الثانيه هي ضلت تتحرك تريد تفلت روحها مكدرت ﻷن انا اقوى واضخم منها من بعدما تعبت هدأت والله شوي ونامت .....
رفل : من الصبح كعدت احضر روحي حتى اروح ﻷهلي .. يلا ايسر وين صرت تأخرنا
ايسر : اجيت يابه ..يلا نمشي
رفل : طلعنا للبيت گبل .. كريم فتحلنا الباب
كريم : هلا تفضلوا
ايسر : هلا بيك والله
رفل : دخلنا. .اول ما شفت رهف ركضت حضنتها ...الف مبرررروك يا عمري انتي
رهف : الله يبارك بيج حبيبتي
ايسر : مبروك رهف
رهف : الله يبارك بيك
رفل : بهالاثناء طلعت وحدة من المطبخ بالبدايه معرفتها بس ركزت بيها طلعت امي ..فتحت عيوني على وسعهن.. يمممه ..ركضت بأتجاها حضنتها وابجي ..يمه انتي هنا صدك
فاطمه : اي يا عمري انا هنا
رفل : والله ممصدكه
فاطمه : سامحيني يمه عفتجن ورحت بس والله متت الف موته من فاركتجن
رفل : وانا ابجي واشهگ.. مسامحتج يمه مسامحتج بس بعد لا تعوفيني بروح بابا لا تعوفينه مرة ثانيه
فاطمه : مراح اعوفجن بعد ما بقالي بهالدنيا بس انتوا
ايسر : الوضع جان متوتر والكل دموعهم تصب .. عمه الحمد لله على السلامه
فاطمه : الله يسلمك ..شلونك امك شلونها
ايسر : الحمد لله بخير
فاطمه : ان شاء الله دومكم بخير
ايسر : يلا انا اترخص وره الغده اجي آخذج
رفل : تمام
فاطمه : خليك ويانه اليوم
ايسر : لا عمه عندي شغل وامس متغيب ما يصير اليوم هم اغيب ..يلا مع السلامه
فاطمه : الله وياك
رفل : باوعتلها ورجعت حضنتها يممه والله مشتاقتلج
كريم : اهوو مراح نخلص البارحه رهف مجلبه بيها واليوم رفل
رفل : غيران ﻷن ما محصلك حضن
كريم : انا اول واحد حضنتها بس ما لزكت هيج
رفل : هههههه مشتاقيلها شنسوي
فاطمه : والله ما ادري شحجي شلون عفتجن ورحت شلون كلبي انطاني ما ادري بس والله وره وفاه ابوجن ايست من الدنيا كلها جنت اتمنى اموت واخلص
رفل : لا تحجين هيج فدوة ..ايام وراحت حتى ما نريد نتذكرها اهم شي انتي هسه يمنا
رهف : اي والله كلشي منريد بس تبقين يمنا ما تدرين شكد تعبنا من رحتي
فاطمه : حبيباتي انتو ان شاءالله مراح اعوفكم بعد
رفل : ضلينا نسولف تحجيلنا عن عمليتها و العلاج للعصر واحنه ما خلصنا سوالف كل وحدة تحجي شصار وياها
كريم : رفل اجه ايسر
رفل : لا تكولها شبسرعه
كريم : ولج من الصبح عدنا شنو شبسرعه
رفل : والله محسيت بالوقت ..حضنت ماما ورهف ودعتهم وطلعت .. لكيته واكف بره ينتظر
ايسر : بعد شتليني بالشمس اكثر
رفل :  والله اسفه حبيبي انت بس تعرف صارلي هواي مشايفتهم
ايسر : حبيبي انت !!!
رفل : اي
ايسر : على هالكلمه راح اسامحج بعد شتردين
رفل : ههههه كلشي ما اريد بعد .. هالايام كانت من اسعد ايام حياتي انا وايسر هواي صار تغيير بحياتنا ايلاف طلعات وطبات وي كريم سيف شوي تغير من يشوفنا نسولف ونضحك
يشارك ويانه بس عمتي دوم تبسمر بكلامها بس ممهتمه الها ﻷن من يجي ايسر متفتح حلگها وياي ..بلشت دوام بالكليه وايسر ياخذنا ويرجعنا انا وايلاف ..اما رهف طلع قبولها هندسه نفط ...
رهف : اول ما بلشت دوام جانن رفل وايلاف وياي متركني ابد لحدما تأقلمت ﻷن حياه الجامعه مو مثل المدرسه ابد كلشي يختلف الناس نفسياتهم شكلهم كلشي .. كاعدة بالكافتريا جاي اگلب بالملزمه ما اعرف راسها من رجليها كله بالانكليزي وانا ضعيفة بالانكليزي وسمعت صوت وراي
وسام : احم ممكن اكعد يمج
رهف : ههههه وسام شجابك
وسام : هسه اكعد لو تخليني واكف
رهف : لا لا اكعد
وسام : شكلج يضحك صارلج ساعة تگلبين بالملزمه
رهف : والله دخت انا وين والهندسه وين
وسام : ههههه
رهف : اي ما كلت شتسوي هنا
وسام : جاي اتطمن على حبيبتي ميصير
رهف : ليش حبيبتك هنا ..ما ادري غير تكول حتى اتعرف عليها
وسام : بعصبية.. ررررهف
رهف : هههههه خلاص و الله اخر مرة شبيك ما تتحمل شقة
وسام : كلت هاي گلبت كل شويه برأي
رهف : خلص ثبتت ماكو بعد
وسام : عندج شي هسه
رهف : لا خلصت محاضرات
وسام : لعد خلي نفتر وهم اعرفج على بقيه الكليات
رهف : ماشي يلا *****
رفل : بالكليه دائما اكعد لوحدي ﻷن هالدفعه ما اعرف اي احد بيهم ..فمرة كاعدة بالقسم اسجل ملاحظات جان اسمع واحد يصيح اسمي
ضياء : بأستغراب.. رفل!!
رفل : بصدمه.. ضياء !!
ضياء : هههه اي ضياء شلونج شخبارج
رفل : بأرتباك.. الحمد لله زينه
ضياء : شنو السالفه اختفيتي من الكليه فجأة بعد مكدرنا نوصلج
رفل : ظروف صارت مكدرت اكمل
ضياء : اي گالت سارة والدج توفى بس متوقعت تختفين هيج حتى سارة راحت لبيتكم اكثر من مرة كايليلها مموجودة
رفل : اي تزوجت
ضياء : عقد حواجبه بأستغراب.. تزوجتي !
رفل : اي
ضياء : اهاا مبروك الصراحه ما توقعت
رفل : بلعت ريگي ما اعرف شنو اكول ..بهالاثناء فززني صوت ايسر
ايسر : رررفل
رفل : التفتت علي ميته خوف جان عاقد حواجبه ومبينه العصبيه علي .. يلا انا استأذن زوجي اجه
ضياء : الله وياج
رفل : رحت ركض بأتجاه ايسر الي بوجهه الف سؤال ..وصلنا للكراج وهو محجه ولا كلمه جانت ايلاف موجودة بالسيارة
ايلاف : يلا وين صرتوا
رفل : دخلت للسيارة احاول ما ابين نفسي خايفة وهو كوة لازم نفسه حتى دمارات رگبته مبينه من العصبيه ..بس الله اليستر هذا شبي عصبي هيج ترى عادي واكف ممسوين شي حاله حال اي زميل. ..!!!!.. يتبع
#ارجوان