شظايا ورماد

البارت الثامن

#شظايا_ورماد

رفل وينج ظل بالي حبيبتي صارلي ساعه ادك عليج... ليش ما تردين .. فتحت عيوني على وسعهن وارجف ..شنو جاي يصير ..لا اراديا كلت.. منو انت ..رد ..انا ميثم رفل شبيج.. اهاا خاف رجلج موجود ..المهم من يطلع خابريني مشتاقلج موت وباجر اذا تطلع عمتج خابريني اجيلج ..ايسر جان لازم التلفون من حجه هيج ايده ظلت ترجف وبسرعه سحب التلفون
ايسر : بعصبية.. اذاا رجاااال تعااال
رفل : هذاك بسرعه قفله وانا ارعش من الخوف ..جان يباوعلي بهدوء مفرط
ايسر : رفل منو هذا
رفل : وانا ارجف والدموع بعيني حتى الكلمات طلعت مني مخربطة ..والله ما اعرفه والله ..كملت الجمله وما اشوفه غير لزمني من رگبتي ودفعني على الحايط
ايسر : بعصبية.. رررفل مو انااا الي ينلعب وياااي
رفل : جان شكله يخوف وجهه احمر وعيونه بركان صارات من الغضب ودمارات رگبته كلها بارزه احسه انگلب وحش .. دموعي ضلت تجري ..والله ما اعرفه ولا اعرف منو هو وروح ابويه
ايسر : من انعل ابوج لا اليوم الي اجيتي بي
رفل : زاد البجي مالتي ..ما اعرف شنو جاي يصير هذا منين التلفون .. ترك رگبتي وانا ارجف اباوع علي بأي لحظه يموتني خلاص .. فرك وجهه بأيده وظل يفتر بالغرفة يحاول يهدي روحه وانا شوي واطب بالحايط على كدما لازكه بي ..رجع علي لزم وجهي بأيدي ولزك كصته بكصتي ..جان يتنفس بسرعه تخوف
ايسر : بهدوء ..رفل حبيبتي انتي اعترفي والله ما اسويلج شي اعترفي ترى كلبي خلصان ما بيه بعد والله ما بيه
رفل : ضليت ابجي على حاله وحالي ..والله ايسر والله العظيم ما اعرفه ..انا حجيت هيج وهو دفع راسي على الحايط وظل يضرب بقوة بأيده على الحايط
ايسر : بعصبية.. وووولج احجي راااح تموتيني احجي
رفل : جاااي احلفلك ما اعرفه ولا اعرف التلفون منين اجه .. يجوز احد حاطه هنا
ايسر : عقد حواجبه بعصبية.. يعني منو قصدج؟
رفل : والله ما اعرف بس مو مالتي والقرآن ..تركني وكعد على الجربايه لازم راسه بأيدي .. شوي ولزم التلفون
ايسر : شنو الرمز ؟
رفل : وانا ابجي.. جااي اكلك ما اعرف ايسر ليش ما تصدك
ايسر : حاولت افتحه للتلفون ما كدرت ..اخر شي فكرت اكتب مواليدها والصدمه انو انفتح ..كلتي ما تعرفين الرمز
رفل : كعد يباوعلي بصدمه على استهزاء.. لا ما اعرفه
ايسر : جر حسرة .. ماكو داعي بعد تجذبين من كتبت مواليدج انفتح
رفل : ضليت مصدومه وارجف شنو الي جاي يصير  معقوله هذا تلفوني وانا اعرف هالولد
معقولة ..انا مسوية علاقه وناسيه ..عقلي راد يوكف كل الادله ضدي ماكو مهرب بعد ..ظل يكلب بالتلفون وانا على نفس الوكفه والرجفة
ايسر : كعدت اگلب بالرسائل والمكالمات ..من قبل شهرين وهم يتراسلون والمصيبه كله حجي طايح حظه ..ردت اتخبل الا شوية ..بهدوء ..شنو هذا
رفل : اباوعله عيونه حمر ويخوفن جاوبت بخوف ...شنو.. انا حجيت هيج وهو رگع التلفون بالحايط
ايسر : بعصبية.. ووولج من الله ياخذذذج واخلص
رفل : ضليت ارجف ما اعرف شنو احجي .. اخذ حزامه من الميز  وطبگه ..انا شفته وضليت ارعش ..ايسر والله ما مسوية شي والقرآن.. بعدني ما مكمله ..اجتني الضربة الاولى ...ااااه فدوة لا الله يخليك
ايسر : اعترفي وانا ما اضربج
رفل : جاي اكلك ما مسوية شي بشنو اعترف بعد
ايسر : خلاص مثل ما تردين
رفل : رجع يضرب كل ضربه اقوى من الثانيه وانا اصرخ بكل قوتي اتوسل بي وماكو ما يسمع ...
ايلاف : ولكم شكو شصاير
اسماء : لا تتدخلين بينهم
ايلاف : يمه شنو ما ادخل لحدما يموتها ..ركضت عليهم للغرفة اول ما فتحت الباب صاح بيه
ايسر : ايلاف طلعي بررره
ايلاف : اباوع لرفل متمددة بالگاع وهو واكف وبيده الحزام
رفل : بتعب .. فدوة ايلاف ساعديني
ايلاف : ايسر شبيك عوفها البنيه قابل شمسويه وهيج تسوي بيها ..كملت الجمله وهو اجه سحبني من ايدي طلعني بره وقفل الباب ..لك ايسر ..ضليت ادك بالباب وماكو ..ايسرر .. نزلت جوه ﻷمي ..يمه روحي لخالي رياض لمحمود خلي يسوي شي راح يموتها
اسماء : ما الج علاقه ما نعرف شنو بينهم واذا دكيتي على احد انطيج بأيد ايسر وهو يتصرف وياج
ايلاف : ولكم انتو شنو ما عدكم رحمه
اسماء : اي ما عنده
ايلاف : منظرها يصعب على الكافر هذا شبي وياها ..اباوع لسيف لا يحجي ولا شي باوعلي ونزل راسه ..هذا شبي همين ....
رفل : قوتي خلصت وصوتي راح وهو مستمر بالضرب والغلط اشكال والوان غمضت عيوني واستسلمت حتى سمع ما اريد اسمع ..ما اعرف شكد مر وقت وبطل ضرب ..كعد منتجي على الجربايه وانا بس عيوني اكدر افتحها ما اكدر احرك اصبع
ايسر : وهو يرجف .. ما تستاهلين اي شي سويته علمودج ما تستاهلين اي شي
رفل : اخذ سلاحه ولم التلفون الفلشه قفل الباب وطلع .. وانا حتى بجي ما بيه ابجي .. ضليت على هالوضعيه للصبح كمت كوة غسلت وجهي وايدي ترجف ما اكدر الزم شي اريد ابدل ما اكدر ..تمددت على الجربايه بس اريد اجمع قوتي .. فتحت الثلاجه اريد ماي لكيتها فارغه
ما بيها لا ماي ولا اكل استغربت وين صار متت عطش ..رجعت تمددت على الجربايه ﻷن ما بيه اوكف اكثر ..للظهر دخل وبيده بطل ماي
ايسر : هاج شربي
رفل : بلعت ريگ واخذته منه ..اريد افتحه ما عندي قوة وايدي ترجف ...سحبه مني وهو يتأفف فتحه وانطانيا.. شربت وانا اباوعله خايفه
ايسر : خلصتي
رفل : هزيت براسي اي .. جاب الطابوريه وكعد مقابيلي
ايسر : اي احجيلي ست رفل من شوكت تعرفتي علي
رفل : باوعتله بنظرة توسل والدمعه مستقرة بعيني
ايسر : بعصبية.. رررفل جاااوبي
رفل : والله العظيم ما اعرفه
ايسر : جر الحزام من بنطرونه .. تعترفين لو لا
رفل : بتوسل .. الله يخليك لا والله ما اعرفه لا تضربني بعد كافي الله يخليك
ايسر : اذا اعترفتي مراح اضربج
رفل : ليش تريدني اعترف بشغله ما مسويتها جاي احلفلك ما اعرفه
ايسر : بعصبية.. ولج على منووو تجذبييين
رفل : بعدني ما حاجيه وبلش يضرب بكل قوة شكد حاولت ادافع عن نفسي بس بلا فايدة صرخت بجيت وهو ولا يمه فوك النص ساعه وهو يضرب ويغلط لحدما تعب وكعد بالكاع وانا حتى نفس مابيه اتنفس من الوجع احس نار وتطلع من جسمي.. الوجع اضعاف وجع البارحه ايدي ما بيه ارفعها احسها خدرت من الالم حتى وجهي انضربت بي ..غمضت عيوني وضليت على هالوضع لا اكدر انام من الالم ولا اكدر اتحرك بس اون و دموعي تنزل .. وهو كاعد مخلي راسه بين رجلي ما تحرك
ايسر : صوت ونينها جان يحرگ بكلبي حرگ ..بس كلما اتذكر الرسائل الي بينهم اكرها واكره روحي الحبتها ..لهالدرجه جانت مستغفلتني وانا مأمنلها .. خليتها بالغرفة وطلعت اذا بقيت اكثر اتخبل ..
رفل : بقيت بالغرفة لا اكل ولا شرب حتى بطل الماي اخذه وياه الم جسمي موتني ..اريد اكوم ما اكدر .. بقيت على هالحال لثاني يوم هم اجه وبأيده بطل ماي وبالايد الثانيه الحزام ..يا ربي اخذني وخلصني ولا هالعذاب يوميه ..اجه كعد مقابيلي
ايسر : شوفي رفل هذا بطل الماي اذا اعترفتي انطيج تشربين منه واطلعج منا بس اذا ما اعترفتي راح تنضربين مثل كل يوم وحتى قطرة ماي ما تشربين
رفل : جان الحل الوحيد للخلاص اعترف بشي ما مسويته ..شكو بيها اعترف ﻷن بعد ما اتحمل انضرب وحتى لو موتني وموتتهم هم ارحم من الي جاي اشوفه يوميه وهو مقتنع انو انا مسويه علاقه صارلي يومين احلف واتوسل وهو ممصدك بعد على شنو ابقى مصرة .. هزيت راسي بأي
ايسر : راح تعترفين ؟
رفل : بتعب ..اي
ايسر : يلا احجي
رفل : سندت نفسي على محجر الجربايه وكوة احجي ..شتريد احجي
ايسر : من شوكت تعرفتي علي قبل الزواج لو بعده
رفل : من قبل
ايسر : علمود هيج جنتي ما تقبلين اتقربلج حتى لا اكشفج مو
رفل : هزيت راسي بأي.. جنت اجاوب بأي شي يريده حتى اخلص
ايسر : منو جابلج التلفون هو
رفل : هزيت راسي بأي
ايسر : جنتوا تلتلقون ببيتي
رفل : هم هزيت راسي
ايسر : وعلى فراشي ؟
رفل : جان يحجي وعيونه نارر.. بس كلت اي ..هجم عليه بسرعه ولزمني من شعري
ايسر : بعصبية.. ووولج انتي شنو من بشررر ولج مأمن بيج طلعتي وحدة سا ... ووولج ليششش شسويتلج وهيج تجازيني
رفل : جان يحجي ويرجف ويجر على شعري اقوى .. ترك شعري ركض على المسدس رجع عليه حطه على راسي ..غمضت عيوني ..انتهى هاي النهايه بعد راح اموت ومتهميني بشرفي
ايسر : لازم تموتين واخلص منج ..اي لازم
رفل : جان يحجي ويرجف حتى المسدس مثابت اول مرة اشوفه بهالحاله ..فتحت عيوني اريد اشوفه شمنتظر  ما يضرب ويخلصني..صارت عيوني بعيونه ..فجأة صرخ بصوت عالي وشمر المسدس انرگع بالجامه مالت الكنتور فلشها تفلش
ايسر : جباااااان ..انااا جباااااان مااا اكدددر اكتلج جباااان
رفل : ظل يضرب على الحايط بأيدي بقوة ..اخر شي كعد بالگاع ساند ظهره على الحايط ويبجي ..جان هالمنظر مرعب بالنسبه الي.. ايسر يبجي ؟!.. كعد يضرب على صدره ويحجي
ايسر : كلبي الغبي الورطني بيج .. الدنيا لفتني لف ولعبت بيه لعب الشي الوحيد الحلو بحياتي جان انتي اول ما وعيت على الدنيا حبيتج ليش ما ادري ..يجوز الله يعاقبني على افعالي بيج ..بس والله ما استاهل كل هذا والله ..عفت كل سوالفي ولعبان النفس علمودج علمود لا اخسرج تالي هيج يصير وياي
رفل : جان يحجي ورافع راسه فوك وانا مستغربه الي اسمعه .. من شوكت يحبني ؟!
ايسر : ليش هي من دون البنات هم ما ادري ..خطبتها وابوها طردني بلا ما يسمع مني انا لو مطلعها بهذيج اللحظه من كلبي وعقلي جان هسه حالي اهون.. من تزوجتها جان اسعد يوم بحياتي جنت اقفل الباب عليها حتى امي لا تتعارك وياها لو تسمعها حجايه .. انا حسبالي تخاف تختنك من اقفل الباب تصيح وتكول اختنكت ..اثاري طلعت تريد تطلع وتتواعد وانا مثل الغبي كلشي ما ادري ..انا ايسر وحدة مثل هاي تلعب عليه
رفل : يحجي ودموعه تنزل وانا لا اراديا ضليت ابجي ..دعيت بحرگه من كل كلبي على خله التلفون بملابسي الله يحرگ كلبهم حرگ.. كام غسل وجهه وطلع وانا ابجي بشهگه ...
ايسر : ايلاااااف ...ايلااااف
ايلاف : ها
ايسر : روحي طلعيها من الغرفة وخليها بغرفتج لحدما تطيب واوديها ﻷهلها
ايلاف : شسوت حتى هيج تضربها
ايسر : بعصبية.. ايلااااف مناقصج انا نفذي الي اكوله
ايلاف : هو احنه بس انفذ .. صعدت فوك لكيتها على الجربايه وحالتها حاله ملابسها مشككه من كثر الضرب وحتى وجهها مورم ..بس بؤبؤ عينها تحركه ..بقيه ملامحها جامدة ..صخام هذا شمسوي بيج .. اجيت اريد اكومها عاطت
رفل : ايلاف جاي اتأذه
ايلاف : بس شوي تحملي ..يلا ساعديني
رفل : احاول اساعدها واساعد نفسي بس ما اكدر جسمي ثگيل ما بيه احرك اصبع .. عوفيني ايلاف والله ما اكدر اتحرك
ايلاف : ميخالف انا اسندج بس تحملي الالم شوي
رفل : هزيت راسي الها .. كومتني وكلما تلزم جزء من جسمي اصرخ كوة يلا نزلنا ودخلتني لغرفتها ..بتعب.. ليش جبتيني هنا
ايلاف : ايسر كال خليها بغرفتج لحدما تطيب وارجعها ﻷهلها
رفل : ليش ما يرجعني هسه
ايلاف : احتمال حتى ما يدرون او ما يريد يعرفون شمسوي بيج ..ما ادري بشنو يفكر الصراحه.. كشفت شوي من جسمها ..خرررب هاي شصاير بي ..شوفي راح ادور على عصارة او اي شي حتى اخليلج منه
رفل : ماشي ...
ايلاف : يمه عدنه عصارة مالت حروق هاي مشوه جسمها
اسماء : وانتي شدخلج عوفيها هاي زانيه تستاهل
ايلاف : يمه زانيه شنو دخيل الله
اسماء : بأذني سمعتها تكله اي انا ادخله وبفراشك هم
ايلاف : والله يمه ما ادري.. بس يا ريت ما يطلع الج ايد بالموضوع
اسماء : بعصبية.. شهالحجي شو انتي ما تستحين هي لاعبه لعب وحطيها براسي
ايلاف : مو احطها براسج بس ما جاي استوعب الي يصير رفل مو من هالنوع ..المهم ماكو عصارة
اسماء : بنتر ..لا ماكو
ايلاف : لا اله الا الله.. هسه شلون خطيه
اسماء : ما ادري و ما الي علاقه انا
ايلاف : يا الله. . رجعتلها لكيتها تصفن على السگف .. رفل كومي خلي ابدلج ملابسج
رفل : ما بيه
ايلاف : ميخالف حاولي ما يصير تبقين هيج ما تشوفينهن مليانات دم
رفل : ماشي .. جابت ملابس منها واجت تساعدني اكعد وانا الوب من الوجع
ايلاف : اريد انزعها ما اكدر ..هذن لازكات على جسمج هاي تسبحين يلا ما يصير هيج اذا انزعج أأذيج اكثر
رفل : ما اكدر اتحرك شلون اطب للحمام
ايلاف : انا اساعدج صح راح تتأذين بس احسن ما تبقين هيج
رفل : بتعب .. ماشي .. دخلتني للحمام وانا كل قطرة ماي تحرك بجسمي اكثر احس روحي جاي تطلع ..لعنت نفسي الف مرة لو معترفه من البدايه ولا هالالم كله .. خلصت كامت ايلاف تلبسني وترجف ..شكله منظر جسمي مرعب لدرجه ما تحملت تشوفه
ايلاف : راح اجيبلج
شي تاكلينه
رفل : لا ما اريد شي بس ماي عطشانه
ايلاف : وجهج اصفر اكلي شي
رفل : بتعب ..والله كوة احجي واتنفس ما اكدر ابلع شي اريد بس ماي
ايلاف : ماشي
رفل : طلعت شوي ورجعت جايبه عصير وماي
ايلاف : يلا كومي شربي
رفل : اجت ساعدتني حتى اكوم .. كعدت اشرب وهي تباوعلي ..يا ترى هي مصدكه انا خاينه لو لا ..كملت ورجعت تمددت الوجع لا خلص ولا خف ..اريد انام ما اكدر
ايلاف : شبيج جاي تتأذين
رفل : جسمي يحرگني ..كلتها وضليت ابجي بحرگة غطيت وجهي بأيدي ..ايلاف جاي اموت والله ما اكدر اتحمل
ايلاف : بعد ما اتحمل منظرها يكسر الگلب ..طلعت من الغرفة ركض
اسماء : شبيج
ايلاف : بعصبية.. ايسر اجه
اسماء : اي شتردين منه
ايلاف : ركضت بسرعه لغرفته ..دفعت الباب علي بقوة
ايسر : بعصبية.. شبيج مو اكووو باااب يندك
ايلاف : انت بشر انت
ايسر : وكفت بعصبية.. ايلاف سكتي ﻷن مالي خلك
ايلاف : دفعته بعصبية ..مالك خلك !! ..لك البنيه جاي تموت وتكلي مالك خلك ولك وحش انت وحش اكو واحد هيج يسوي بمرته
ايسر : بعصبية.. اييي اذا خاينته يسووي اكثر
ايلاف : بعصبية.. ومنو كال هي خاينتك ؟
ايسر : هي كالت اعترفت بنفسها
ايلاف : اي غيرررر من ورة الضرب اعترفت لك لو حيوان جان رحمته وحتى لو خاينتك طلگها وديها ﻷهلها مو تسوي بيها هيج انت بحياتك مجنت انسان زين وي اي احد امك متعاملها مثل العالم وانا وسيف ولا حسبالك اخوانك حتى مرتك ما سلمت منك انت من شنو معجون ما تكلي
ايسر : ايلاف طلعي برره
ايلاف : ما اطلع ..جيب دوه صخام اي شي البنيه ماتت بجي
ايسر : سحبتها من ايدها ودفعتها بره الغرفه ما اريد تحجي اي شي يخصها
ايلاف : افتح الباااب افتحه.. كعدت يم الباب ابجي ما اكدر اروح اشوفها بهالحاله .. يا ربي شسوي .. كمت رحت ادور عصارة اي شي يبرد عليها ..ماكو ..شفت ايسر طلع شوي ورجع شمر علاگه كدامي ..شنو هذا ؟؟ ..صعد وعافني مجاوب ..فتحتها لگيت عصارات ..رحت ركض للغرفة لكيتها تون من الوجع ..هاي جبتلج عصارات
رفل : فدوة بسرعه راح اموت
ايلاف : اي اي هسه .. بلشت ادهن بجسمها اكو مكانات زراگات صايرة واكو مجرحه وطالع دم منها جان منظرهن مرعب .. شلون صرتي هسه
رفل : شوي برد علي بس الوجع بعده
ايلاف : يلا المهم شوي احسن
رفل : اي
ايلاف : للفجر وهي تتگلب ما نامت وانا بس اشوفها تتحرك افز ..وجه الصبح يلا غفت شوي وانا هم نمت جان عندي سفرة و ما رحت للكليه .. لل11 يلا كعدت
اباوعلها بعدها نايمه بس مبين عليها الالم وجهها معقوش .. طلعت حتى اسوي ريوك ...
اسماء : واخيرا شرفت وحدة نايمات وعايفات البيت عليه
ايلاف : يمه البارحه ما نمنا والله للصبح يلا
اسماء : ما مجبورة كلي لاخوج يوديها ﻷهلها
ايلاف : هي بيها حيل تكوم حتى يوديها
اسماء : جنها حصان بس تتمضيگ
ايلاف : سكتت ما رديت اذا ارد منا لباجر ما نخلص ... خلصت جاي الم بالمواعين واباوع لسيف يباوعلي وينصي راسه شبي هذا ...سيف بيك شي
سيف : لا
ايلاف : يجوز خاف من الصار البارحه هو يخاف من تصير مشكله لو عركه بالبيت .. رجعت للغرفه لكيتها كاعده ..صباح الخير
رفل : بتعب .. صباح النور
ايلاف : شلونج اليوم
رفل : شوي احسن
ايلاف : الحمد لله راح اسويلج ريوك واجي
رفل : ماكو داعي
ايلاف : شنو ماكو داعي ..صارلج كم يوم ما ماكله حتى قوة ما عندج
رفل : ما اشتهي
ايلاف : ميخالف
رفل : خطيه راحت جابت الريوك ..جنت اكل وهي تساعدني
ايلاف : خلص اليوم مثل البارحه هم دهنت جسمها و كوة يلا نامت بس ايسر ما بين اليوم ..كعدت الصبح حضرت ملابسي وطلعت بره  الغرفة حتى لا تكعد بدلت وطلعت حتى ريوگ ما تريگت ما اشتهي ..جنت انتظر السايق يم الباب ودكت علي صاحبتي ..الو
ريهام : هلا ايلاف ترى السايق سيارته عطلانه وما يجي
ايلاف : لا تكولينها اليوم عدنه امتحان شلون
ريهام : انا ما عندي شي فراح ابقى بالبيت انتي شوفي احد من اهلج يوصلج
ايلاف : اووك ..سديته منها ..هاي شلون وايسر من البارحه ما جاي .. جاي احجي وي نفسي ودك هورن ..التفتت هذا كريم ..من شفته تذكرت رفل بلعت ريگي ..نزل الجامه وصاح
كريم : ليش واكفه هنا
ايلاف : جنت انتظر السايق بس سيارته عطلانه وما يجي
كريم : لعد تعالي اوصلج بطريقي
ايلاف : لا ماكو داعي هسه ادك على ايسر
كريم : كتلج بطريقي تعالي صعدي يلا
ايلاف : صعدت خايفه منه مدري احس راح يعرف برفل وينتقم مني على السواه ايسر بيها ..يمه الف فكرة سودة صارت براسي هو حرك وطول الوقت ساكتين لحدما حجه
كريم : بأستغراب.. شبيج ترجفين بردانه
ايلاف : هاا اي شوي
كريم : شو الجو حلو برودته خفيفة
ايلاف : بأرتباك.. بعد ما ادري يجوز ﻷن ما ماكله
كريم : يجوز ..ننزل بمطعم ناكل
ايلاف : لا لا هيج تتأخر وانا هم أتأخر
كريم : عاقد حواجبه.. انتي خايفة مني لو شنو صح ما صار وقت من تعرفنا بس مهما كان انتي بت عمتي يعني اكيد مراح اسويلج شي
ايلاف : لا ليش اخاف ..! !!...يتبع
#ارجوان