شظايا ورماد

البارت الخامس

#شظايا_ورماد

رفل : ما حسيت غير ضغطت على الزناد واندفعت وره من قوة السلاح .. سمعت صوت طبه قوية فتحت عيوني لكيت ايسر بالكاع بس ساند ظهره على الحايط ودم يصب بالكاع جسمي ظل يرعش من الخوف وعيوني غوشت ما جاي اركز الدم منين يطلع للحظه صحيت على السويته ...شسويت انا شسويت ..كعدت الطم على وجهي ورجليه ..يا ربي مات مات شسويتي شصخمتي ..ركضت على الباب رغم قريب بس كوة يلا وصلت ضليت ادك الباب بخبال ..عممممه ..ايلااااف وينجن عمممممه
ايسر : بتعب ..اظن راحن ما موجودات
رفل : التفتت بفرح وخوف ...انت بعدك عايش
ايسر : اي ..ااااه خررررب حظج
رفل : جان لازم كتفه ويصيح.. رحت يمه كعدت على ركبي ..انا اسفة والله ما ادري ..لا ادري بس ما قصدي والله ردت بس اهددك
ايسر : بتعب.. جيبيلي خاولي
رفل : تمام ..جان يتنفس سريع تحس شويه ونفسه يوكف.. اخذ الخاولي مني وحطه على الجرح وضغط بقوة كدما جان متأذي ضرب راسه بالحايط
ايسر : جيبي التلفون بسرعه
رفل : ماشي ماشي ..رحت ركض اجيبه والغرفة كلها كزاز من التكسير ..جبته وانطيته اله جان عركان وايده ترجف كوة لازم التلفون ..راح تتصل على الشرطه مو
ايسر : شوف هاي يا ربي ..دكيت على ضرغام ..الو
ضرغام : هلا شلونك
ايسر : بسرعه تعال لبيتنا وكبل اصعد للطابق الفوك
ضرغام : خير شكو بيك شي صوتك ابد ما يطمن
ايسر :هسه تعال بسرعه وانت تفهم
ضرغام : ماشي جايلك
رفل : جنت حاطة ايدي على كلبي لا يدك على الشرطه
ايسر : طلعت المفتاح من جيب البجامه ..هذا حطي جوة الباب
رفل : بأستغراب.. ليش ؟؟
ايسر : بعصبية.. ما بيه حيل احجي نفذي وبس
رفل : ماشي ماشي ..حطيته جوة ورجعت يمه
ايسر : دخلي للحمام وقفلي الباب عليج لا تطلعين الا من اطلع
رفل : تمام ..سويت مثل ما كال دخلت وقفلت الباب .. يا ربي دخيلك ادري انا غبيه واستاهل كلشي يصير بيه بس ارحمني اذا صحه يموتني واذا مات ابتلي لا يا ربي لا يموت والله ما اكدر  اسامح نفسي اصير مجرمه مثله ..شوي وسمعت صوت بره
ضرغام : ايسسسر انت وين
ايسر : هنا اول غرفة ..تلكه المفتاح جوة الباب
ضرغام : هاا ماشي ..فتحت الباب لكيته سابح بالدم ...خرررب ولك شنو هاي شصاير
ايسر : مو وكتك هسه اخذني راح اموت والله
ضرغام : تمام تمام ..سندته وطلعنا من الغرفة
ايسر :اوكف اقفل الباب
ضرغام : بأستغراب.. لييش؟؟
ايسر : بتعب..ولك شكد تحجي اقفله وانت ساكت
ضرغام : براحتك لا تحجي ..قفلته وطلعنا للمستشفى .. جان اكو دكتور صديقنا گبل رحناله
حتى لا ندخل بسين وجيم ..استقبله الدكتور وسوه اللازم
الدكتور : الحمد لله وضعه مستقر بس نازف دم هواي وعالجنا الموضوع
ضرغام : تسلم دكتور مراح انسالك هالوكفه
الدكتور : ما بينا هيج حجي ضرغام ..يلا اروح انا ان شاءالله ما عنده بس العافيه
ضرغام : تسلم ***
رفل : طلعت من الحمام ركضت على الباب جنت اريد اشرد قبل لا احد يجي ..بس كأنه قرأ افكاري لكيته مقفول ..اباوع على الدم والكزاز المطشر بكل مكان ..شنو راح يصير هسه.. لج غبيه اكو وحدة تسوي هيج ظليت اضرب على راسي وابجي على الحاله الوصلت الها ..مرت اكثر من ساعه وانا على نفس الحالة لحدما سمعت صوت جوة ركضت للباب حتى اسمع منو جوة ..صوت عمتي وايلاف وسيف وياهم جان صوتهم عادي وضحك شكلهم ما يدرون بالصار .. رحت ركض لميت الغرفة ومسحت الدم جان الخوف والتوتر مسيطرين علي اخاف احد يفتح الغرفة ويشوف الدم ***
ايسر : فتحت عيوني والالم ذابحني ...خرررب
ضرغام : الحمد لله على سلامتك
ايسر : الله يسلمك ...ااااه شنو هالوجع هذا
ضرغام : قابل هي لعبه طلقة يابه طلقه ..اي ما كتلي منو ضربك ولو اعرف منو بس اريدك تحجي
ايسر : مدام تعرف المن تسأل
ضرغام : خررب حظك شسويت وضربتك هيج
ايسر : ما سويت شي هي البنيه تكرهني واجتلها الفرصة
ضرغام : من وراك بطلت احب او اتزوج
ايسر : اي ظل هيج احسن ...اااااه ولك ماكو مسكن شي ..صدك الساعة بيش
ضرغام : ب11
ايسر : خرررب ولك كل هذا نايم كوم نروح
ضرغام : وين وين الدكتور كال تبقى هنا اليوم
ايسر : لا يا ابقى يا بطيخ مناك هذيج قفلت الباب عليها
ضرغام : منو مرتك ؟؟
ايسر : اي
ضرغام : يعني جانت بالغرفة من قفلنا الباب
ايسر : اي ولك اي شكد تسأل يلا كووم سويلنا خروج يلا
ضرغام : ما ادري انت شلون تفكر والله.. رحت سويت خروج وطلعنا
ايسر : شلعت كلبك اليوم مشكور على كلشي
ضرغام : هذا واجبي يابه غير خوان احنه
ايسر : غصبا ما عليك
ضرغام : ههههههه ابو المصايب اكعد راحه لا اضربك هسه واخليك تنزف
ايسر : هههههه دروح خلي التفت للمصايب مالتي
ضرغام : ان شاء الله محضرتلك هالمرة بندقيه هههههه
ايسر : خااب دروح ..راح وهو يصيح
ضرغام :  الله وياك الله ينصرك
ايسر : هههههه الله ياخذك ..دخلت للبيت جانت ايلاف كاعدة
ايلاف : بأستغراب.. ايسر !!..حسبالي انت فوك ..باوعت على ملابسه كلها دم ..هاي شبيك ليش هيج ملابسك
ايسر : انضربت..لا يظل بالج خفيفة
ايلاف: ماشي بس ديربالك
ايسر : تمام ..صعدت فوك فتحت الغرفة لكيتها كاعدة على الجرباية
وعيونها مورمه من البجي ..اول ما شافتني كامت.. ما اهتميت الها طفيت الضوه ونمت
رفل : شو هذا تجاهلني تماما ..يلا احسن اهم شي عايش وشكله زين لو جنت محضرة نفسي لكتله ..انا هم فرشت فراشي ونمت ....
ايسر : كعدت ميت من الالم ...خرررب ابليسج على هالدكه ..كوة بدلت ونزلت اتريك
ايلاف : اصبلك ريوك
ايسر : اي بس بسرعه مستعجل
ايلاف : تمام
اسماء : خير شبيك ايلاف كالت امس اجيت و كلك دم
ايسر : ماكو شي حادث بسيط
اسماء : اهاا
ايسر : تريكت بسرعة وطلعت لبيت خالي نائل ...دكيت الباب
امل : اي جاايين ..ايسر
ايسر : اي ايسر شبيج مستغربة ..سويلي مجال افوت
امل : بأرتباك.. كريم طالع للشغل
ايسر : منو كلج انا جاي على كريم
امل : اهاا.. لعد تفضل
ايسر : دخلت وراها للاستقبال.. صيحي رهف اريد احجي وياها
امل : رهف مريضه ونايمه
ايسر : ميخالف كعديها .. راحت شوي واجت هي ورهف جانت عيونها حمر الظاهر من البجي ..رهف غسلي وجهج وبدلي حتى اوصلج للمدرسه
امل : لا خطيه مريضه لا تتعب نفسك حتى كريم كال مدام مريضه خليها بالبيت
ايسر : جانت تحجي بتوتر وخوف ..رهف سوي الي كتلج علي وامل تعالي هنا اريد احجي وياج شوي
امل : ماشي
ايسر : راحت رهف تركض بفرح وهاي كعدت كبالي .. شوفي امل رهف اذا اجيتي يمها مرة ثانيه ما تلومين الا نفسج فاهمه لو لا
امل : ما مسويتلها شي انا
ايسر : بتنهيدة.. امل ترى لزمت وائل وساعتين يمي حجه الاكو والماكو ..صار وجهها اصفر وكامت تبلعم
امل : بأرتباك.. يا وائل انت شنو تحجي
ايسر : بأبتسامه.. لا تعرفين شنو احجي كلش زين وائل الي اعتده على رنا واعتقد فهمج كفايه
امل : بعصبية.. انت شنو تشمر بلاوي علي انا لا اعرف وائل ولا اعرف شنو علاقة رنا بي
ايسر : كمت وكفت .. شوفي امل مو انا الي تضحكين علي ..انطيها الج من الاخير رهف اذا صار عليها شي او حجيتي وياها حجايه وحدة التسجيل مال وائل يروح لكريم وانتي اعرف بعد كريم شنو ممكن يسوي
امل : ايسر والله انا ما الي علاقة يعني ...
ايسر : اششششش انا ما يخصني هالشي المهم كلامي ينسمع واذا صار شي ما يعجبني يصير شي ما يعجبج ..طلعت بره الاستقبال وعفتها ...يلا رهف وين صرررتي
رهف : جايه جايه ..بسرعه نزلت وصعدت وياه بالسيارة ..رفل كالتلك مو
ايسر : اي ..شوفي هذا رقمي اي شي يصير وياج دكي علي
رهف : ماشي ..شكرا على كلشي
ايسر : هذا واجبي
رهف : جان يسوق وكل شوي لازم كتفه بألم ..وصلنا للمدرسه مدري شنو حاجه الحارس ودخل وراي
رهف : تكدر تروح اخاف تتأخر على شغلك
ايسر : بس احجي وي المديرة شوي
رهف : بأستغراب.. اهاا ..دخل للمديرة وانا انتظرته يم باب الادارة ..شوي وطلع هو والمعاونه
المعاونة : بنتي تعالي وياي
رهف : بأستغراب.. وين؟؟
المعاونه : انطيج الكتب الناقصه عندج
رهف : بفرح ..صددك والله
ايسر : هههه اي والله يلا روحي وره المعاونه
رهف : شكرررا ايسر وكفتك هاي مراح انساها
ايسر : ما سويت شي
رهف : رحت اركض وره المعاونه علمود اخذ الكتب
ايسر : ظليت اضحك على شكلها شلون تركض ..جاي اطلع ولكيت وسام صحت علي ..وسااام
وسام : التفتت شفت ايسر ..بأستغراب.. خير شتسوي هنا
ايسر : هيج تستقبل ابن عمتك
وسام : ايسر اختصر شرايد
ايسر : مرايد شي شفتك وكلت اسلم ..اصلا ما ادري انت تشتغل بهاي المدرسه
وسام : لا اريد سلامك ولا اريد اشوفك ايسر رجاءا
ايسر : بعصبية.. هييي انت شنو شايف نفسك لا تحجي وياي بهالطريقه ترى امسح بيك الكاع
وسام : لا اخاف تكتلني ..روح هاي مدرسه بنات مو قاعه مصارعة
ايسر : والله لو ما بنات منا جان علمتك شغلك ..تركته ورحت وانا افور هذا شحاسب نفسه ****
رفل : كعدت ما لگيته.. هذا شوكت يطلع شو ما احس علي ..غسلت وكعدت ادور على الريوك شو ماكو اليوم مجايب ريوك يعاقبني هذا لو شنو .. ما اعرف ليش فكرت افتح الباب فتحته وانفتح ..خرررب هذا مفتوح اخاف ناسي .. هسه اطلع لو لا ..اطلع والي يصير يصير نزلت جوة شفت سيف كاعد يلعب بالايباد .. احم احم
سيف : هلو رفل شنو اليوم الباب مفتوح
رفل : اي لكيته مفتوح
سيف : لعد خلي اشكل البلي حتى نلعب
رفل : تمام بس اتريك واجيك .. كعدت بالمطبخ اطلع شكو بالثلاجه واكل من الفرح ..
سيف : يلا رفل وينج
رفل : هياتني اجيت .. رحت كعدت يمه .. استعد ترى هالمرة افوز عليك
سيف : بأبتسامه.. ماشي
رفل : عمه وين ..نزل راسه وحجه
سيف : بالغرفة يجوز ترتبها
رفل : اهاا ..جنت العب واحجي وياه ..تدري انت كلش حلو
سيف : هههههه وانتي هم حلوة
رفل : لا والله جديات انت احلى واحد بأهلك على منو طالع هيج
سيف : يكولون على بيبي ام بابا ..انا ما شايفها يكولون كلش تشبهك
رفل : اهاا ..زين انت تعرف تقرأ او تكتب
سيف : لا ما اعرف
رفل : باوعتله مستغربه ..لعد ليش ما تدخل مدرسه
سيف : من اجينه هنا ايسر دخلني لمدرسه اهليه ..بس جانوا الطلاب يضحكون ويصيحون علي المعوق ما كدرت ابقى فبطلت
رفل : التفتت علي بقهر .. شلك علاقة بيهم انت المعوق مو بجسمه العوق الحقيقي عوق العقل هاي الناس صدك ما تستحي
سيف : لا تحاولين تغيرين الواقع هي الناس تهتم للمظاهر وبس ما يهمها اي شي ثاني
رفل : بتنهيدة .. صح كلامك ..زين شنو رأيك انا اعلمك القراءة والكتابة
سيف : راح اتعبج
رفل : لا لا عادي اصلا ما عندي شي هاي اذا اخوك يحن علي ويفتح الباب كل يوم
سيف : ههههه تمام
رفل : جاي نحجي ونضحك ودخلت عمتي الظاهر ما شافتني بالبدايه
اسماء : انت شوكت تبطل هالوصاخة ترى تعبت وانا انظف وراك كبرت وبعدك توصخ فراشك شسويلك بعد مو اوديك للحمام قبل النوم شبيك بعد فهمني
رفل : اباوعله خطيه نزل راسه  ترك  اللعب وحرك الكرسي مالته راح للغرفة وسد الباب ...شكد انقهرت علي وهالحجي صار كدامي شكد عيب
اسماء : هاا انتي اليوم هنا شنو فك الاسر ابني الزين
رفل : اي
اسماء : لعد ما تكومين تسوين شغله بيها خير كاعدة تلعبين ..يلا كومي نظفي البيت
رفل : ماشي .. كعدت انظف وامسح وهي تطبخ الغدة وتدردم .. خلصت كلشي وكعدت اساعدها انا مو كلش اعرف اطبخ بس الي اكدر علي اسوي .. لحدما اجت ايلاف
ايلاف : هاي شنو اليوم البيت منور هههههه
رفل : وهو انا جنت منورة بس فوك
ايلاف : ههههه خررب ابليسج ..يلا انا ابدل وانزل اساعدكم
رفل : ماشي ..من شكلهم و تصرفاتهم وياي الظاهر ما يعرفون شنو صار البارحه الحمد لله ما كايللهم.. نزلت ايلاف وكملنا شغل شوي واجه ايسر اول ما شافني عقد حاجبه بعدين ظل يتصرف طبيعي
ايلاف : يلا بدل بسرعه منتظرينك
ايسر : ماشي .. بدلت واجيت ..سيف وينه
ايلاف : صدك هو كل يوم اول واحد يجي ..خلي اشوفه اخاف نايم
ايسر : ايلاف راحت تصيحله ورفل تباوع بخوف ﻷمي شكو هاي شبيها .. شوي ورجعت
ايلاف : نايم هذا
ايسر : اكو واحد زاعجه او حاجي وياه
رفل : جان يحجي و منزل راسه على الصحن ياكل ..باوعت لعمتي ما مهتمه كأنها ما مسوية شي
ايسر : مو جاي احجي وياكم
ايلاف : والله هو من اجيت بغرفته ما طلع منها
اسماء : جان يلعب وي رفل وبعدين دخل لغرفته وما طلع منها
رفل : خرررب هاي شمرتها براسي ..ضليت ابلعم ما اعرف شنو احجي
ايسر : اي شنو صار اليوم
رفل : يحجي ويباوع بوجهي ..احم جنه كاعدين نلعب وعمه حاجته حجي مو حلو ودخل لغرفته
اسماء : مو حلو !! .. اووي يالنازكه حبيبتي انا دائما احجي وياه هيج ويجي يتغده بس هالمرة ليش ما اجه اكيد مسويتلج سواية وياه
رفل : عقدت حواجبي بعصبية.. سوايه شنو شتحجين انتي ..الولد جان كاعد ويلعب شمرتي علي الحجي كدامي اكيد يخجل وما يحب احد يشوفه بعد وخاصه انا
اسماء : لا بلا بكيفج انتي تحجين اكيد تغطين على سواياتج
رفل : بعصبية.. اهوووو ياااا سوايات تشمرين بلاويج عليه شمسويتلج اناا
ايسر : ضرب أيده على الميز بعصبية .. كااااافي انتن ما تحترمن احد
اسماء : شوف مرتك الي ما عدها احترام ﻷي احد
ايسر : اششششش..اسكتن ولا وحدة تحجي
رفل : الكل سكت وبدأ ياكل وهو جان لازم كتفه بعصبية  والم..خلصنا وهو راح للغرفه حتى جاي ما شرب لميت السفرة وي ايلاف وغسلت المواعين اريد بس أتأخر بلكت نام ..كملت صعدت فوك لكيته كاعد يگلب بالتلفون اول ما شافني كام وكتف ايدي
ايسر : شنو هذا الي صار جوة
رفل : شنو
ايسر : بتنهيدة.. رفل كلامي وياج واضح ليش ما تحترمين وجود احد تعلين صوتج وتزمخين بالعالم شنو رجل كرسي انا
رفل : مو هيج بس هي صارت تحجي علي شغلات انا ما مسويتها لذلك فقدت اعصابي
ايسر : اهااا خوش حجه والله البارحه فقدتي اعصابج ورميتني بالمسدس باجر عگبه الگاج كاتله سيف وتكولين فقدت اعصابي
رفل : بعصبية.. شنو شايفني مجرمه مثلك على الاقل انت بعدك عايش بس اختي اندفنت بسببك ..بعدني ما مكمله اجه لزمني من زندي بقوة ...اااااييي
ايسر : ولج صبرت عليج هواي .. اختج هي الكتلت روحها مو انا الكتلتلها
رفل : بعصبية ..انت شتخربط
ايسر : شخربط !!.. اسمعي لعد انا اجيت اسحب منها حجي جنت مخلي المسدس بيني وبينها حتى تعرف اذا ما حجت الحقيقة راح اكتلها ستوني جاي احجي وهي سحبت السلاح وضربت نفسها بدون اي مقدمات وخالي رياض يعرف بهالشي اخاف ما كلج من رحنا نغسلها شاف مكان الطلقة سألني وكتله
رفل : جان يحجي بعصبيه وعينه بعيني يحجي وانا ما مستوعبه ..كمل كلامه وشمرني على الجربايه وطلع بقى كلامه يطن بأذني ..يعني هي الي كتلت نفسها خرررب وانا ماخليت شي ما سويته بي زين ليش ما حجه من قبل ليش ستوه يلا كال ..بقيت كاعدة بالغرفه لليل اندك الباب ..تفضل
ايلاف : تعالي تعشي
رفل : حبيبتي ما الي نفس بالعافيه عليكم
ايلاف : تمام براحتج
رفل : ما جنت اريد اتواجه وياه وفوك هذا ما اريد سيف يشوفني وينحرج وغير هذا الافكار الي جاي تاكل براسي اكل ..مرت هالفترة ايسر يتجاهلني بصورة مو طبيعيه حتى حجي ما بينا اي شي يريده يصيح لأيلاف تسوي اما سيف بس يشوفني جان يدخل للغرفة فصرت ما انزل هواي واذا نزلت ابين اله انو ما مهتمه للكلام الي سمعته
جنت اتشاقة وياه هو و ايلاف عادي حتى لا يحس بشي شوية شوية رجع مثل قبل بس مو كلش مجان يحجي هواي بالنسبه لعمتي شانه الحرب وياي كل يوم سالفه طالعتلي بيها ... بيوم كملت شغلي ورحت لغرفة سيف ..دكيت الباب
سيف : الباب مفتوح
رفل : احم ..ممكن ادخل
سيف : بأستغراب.. رفل تردين شي
رفل : رفعت الدفتر والقلم ..احنه مو اتفقنا نتعلم
سيف : اي بس مو لازم
رفل : لا شنو مو لازم يلا اتبعني على الاستقبال حتى نبدي
سيف : ماشي
رفل : كعدت بالاستقبال كعد يمي وبلشنا اول 3 أحرف اعلمه عليهن ..جاي ندرس واندك الجرس
اسماء : سيف روح شوف منو
رفل : راح سيف ورجع ..هاا منو
سيف : عمه انهار وبتها
رفل : عمتك ؟؟
سيف : اي
رفل : الصراحه انا لا اعرف عمات ايسر ولا عماتك
سيف : ههههه احسن
رفل : شوف انت احفظ الكلمات هاي علما اقدملهم شي عيب
سيف : ماشي
رفل : رحت سويت عصير و دخلت عليهن ..السلام عليكم
انهار : وعليكم السلام.. شنو هاي مرة ايسر
اسماء : بتنهيدة..اي هي
رفل : شبيهن هذن ما عاجبهن المرة هي وبتها كصني من فوك ليجوة ..انا بطبيعتي حتى من جنت ببيتنا اسوي شعري كعكه ما احب افتحه ولبسي دائما عريض ﻷن ارتاح بي اكثر ..فجنت لابسه تراك اسود عريض ومسوية شعري كعكه
انهار : ايلاف كالت لنورة ايسر تزوج بس ما صدكت ... بس ولا مبين عليج عروس
رفل : رفعت حاجبي ..يعني شلون ما مبين علي
انهار : يعني ملابسج  وشكلج مو مال وحدة متزوجه
رفل : يعني شنو خاله انزلج بملابس النوم حتى يبين علي ..انا حجيت هيج وعمتي غصت بالعصير ..اسم الله عمه
اسماء : بهمس..الله ياخذج ولج اكو وحدة هيج
انهار : انا مو قصدي تلبسين ملابس النوم وتجين بس قصدي الرجال ما يحب المرة الي تلبس اسود وهيج ملابس عبالك ما متزوجه يعني عذريني بس بنتي حتى بالبيت ما تلبس هيج
رفل : هاي ستوها كعدت واخذتني حاصل فاصل ..خاله مو كلها سوه المهم هو عاجبه
انهار : اي هم صح بس انا اكول لو تلبسين الوان احسن
اسماء : اي المفروض هيج تسوي شو ابوها وطلعت الاربعين مالته
انهار : ياااا يعني هي بت اخوج المرحوم
اسماء : اي بته
انهار : لعد شعجب تزوجت قبل الاربعين
اسماء : بعد شنسوي
رفل : عمتي تحجي وتگلب بعيونها كلت خلي اطلع احسن ..يلا انا اترخص
انهار : اخذي راحتج
رفل : يمه احس هسه يلا تنفست شنو من بشر هذول شدخلكم بيه وبلبسي..رحت كعدت يم سيف حتى اكمل تدريسه شوية ومل كال خلي نلعب هم ظلينه نلعب لحدما عمتي صاحت علي
اسماء :رفل وطرش وينج
رفل : بدأت رحمه الله
خير عمه تردين شي
اسماء : بعصبية.. تعالي ساعديني نسوي غده
رفل : شنو راح يبقون على الغده
اسماء : اي ليش عندج مانع
رفل : لا شدخلني انا ..كمت وياها نحضر بالغدة شوي واجت ايلاف سلمت عليهم واجت ساعدتنه ..صبينه السفرة واجه ايسر ..نورة بت انهار بس شافته كمزت
نورة : هلا ايسر شلونك شخبارك كالو تزوجت والله ما صدكت مو كلت شايل الفكرة من راسي بس على العموم مبرووك
رفل : جنت اباوع مستغربة حالتها اكلته اكل بالسلام ..هو جان عين عليها وعين عليه رفعتله تك حاجب بأستفهام منتظرته شيرد عليها
ايسر : هلا بيج لا بعد كبرنا لازم نستقر ..احم انا صاعد ابدل وانزل
ايلاف : ماشي منتظرينك
رفل : اجه وكعدنا كلنا على السفرة وهاي ما بطلت تسأل و يجاوب وهو مدنك على الصحن ياكل. ..وانا كلما تسأل اتوتر اكثر احسها تعرفه من زمان مو شغله غيرة بس هي زودتها ولا يكول انا كاعده امها ضربتها بعكسها مرتين وهي ما بطلت وعمتي اسماء شاگة الحلك للاذن ومرات هي تجاوب عن ايسر
سيف : رفل ليش ما جاي تاكلين
رفل : من حجه هيج رفعت راسي شفت ايسر يباوعلي صارت عيني بعينه بعدين نزل عينه بهدوء على الصحن مالتي عدل كعدته ورجع نزل راسه على صحنه ياكل ..لا شبعت
اسماء : طبعا اذا تكعدين متأخرة وريوكج متأخر اكيد مراح تاكلين على الغده
رفل : اي هو الظاهر هيج ..الحمد لله. .كمت من الاكل وانا اغلي من جوة حطيت الجاي على النار و حضرت الستكاين وانا ادردم
نورة : تحتاجين شي
رفل : كمزني صوتها ..لا ما محتاجه شي
نورة : بس لا تضايقتي مني
رفل : لا ليش اتضايق ..احجي وكوة  لازمه نفسي
نورة : يعني ما تتضايقين من اكلج انا وايسر جنه على علاقة
رفل : جنت دايرة ظهري احضر بالصينيه من كالت هيج ايدي رجفت ..درت عليها بأبتسامه مصطنعة..انتي كلتيها جنتوا يعني فعل ماضي وانا الحاضر والمستقبل مالته فما يهمني هالحجي ..وجهها انكلب وظلت تبلعم
نورة : بس خاله اسماء كالت تزوجج مجبور
رفل : ههههه يا مجبور احنه من زمان واحد يحب الثاني بس بالفاتحه مالت بابا هواي ناس خطبوني ما تحمل وتزوجني بسرعة حتى عمامي كالوله اصبر وره الاربعينه بس هو ما قبل ..جنت احجي وابتسم خليتها تموت بغيضها
نورة : اهاا لعد امه تكول كل يوم عركه هو وياها وصياحهم يوصل للشارع وابني ما مرتاح وياها
رفل : خررررب بيج عمه ..الحجي بينا عمتي ما جانت رايدتني اله لذلك هيج تحجي كدام اي احد يجيلنا
نورة : اهاا
رفل : ابتسمت ابتسامة انتصار يمه ارتاح كلبي من شفت شكلها انكلب هيج انداريت اكمل شغلي شفت ايسر واكف منتجي على باب المطبخ ومكتف ايدي كوة لازم ضحكته ..اختفت ابتسامتي لا اراديا وبلعت ريگي.. غمزلي وراح جانت نورة وره القاطع ما شافته ..امداني اي والله اكيد سمع كلشي
نورة : تحجين وياي ؟؟
رفل : لا ..كله من وراها شجابها علي اليوم ..بعد ما خلصوا صبيت الجاي قدمته الهم وكعدت ..اباوع ﻷيسر كل شوي رافع عينه بأتجاهي  ومنصي.. شوي وصعد فوك بقت نورة وامها للعصر حجي وسوالف وحش بالناس ..جنت خايفة اصعد فوك والكاه فبقيت يمهن
انهار : يلا مع السلامة احنه نترخص
اسماء : خليكم على العشا
انهار : لا وين يا عشا تأخرنا هسه رجلي يخبصني غير مرة ان شاءالله
اسماء : تنورين
رفل : راحن وانا صعدت فوك كلت هسه الگاه نايم ..فتحت الباب على كيفي شفته كاعد على الجربايه ..اووه هذا كاعد خرررب حظي هو شافني وابتسم ورجع نزل راسه حركته موتتني سديت الباب و وكفت كباله .. ترى انا حجيت هيج حتى لا تحس زواجنا مو طبيعي وترى امك ممخليه شي ما حاجيته الها وهاا صدك ﻷن هي اخذت راحتها هواي بالحجي المفروض تحترم وجودي مو هيج تحجي لذلك حجيت هيج لا يروح بالك بعيد
ايسر : جانت تحجي وتفرك بأيديها التوتر مبين عليها .. ليش بالي وين راح مراح بعده بمكانه
رفل : يحجي ويبتسم.. اهاا مراح بعيد زين مو المفروض تكلي جان عندك علاقة بيها حتى ما اتفشل وياها
ايسر : انتي مو كلتي.. انا الحاضر والمستقبل مالته .. بعد شلج علاقة بالماضي
رفل : بعصبية.. انا ما كلت هيج حبا بيك كلت هيج ﻷن تفشلت كدامها زوجي المحترم طلع عنده علاقة وياها والله اعلم بعد شنو همين
ايسر : عاقد حواجبه.. شنو قصدج الله اعلم بعد شنو هاا
رفل : انا مو غبيه وترى سمعتك سابقتك الله اعلم وي كم وحدة لاعب ويجوز نورة وحدة منهن
ايسر: لزمتها من زندها بقوة .. تحجين عدل لا افركلج حلگج فرك شوفي انا ما محتاج ابررلج بس حتى يصير عندج علم انا مسوي علاقات وي بنات كومه ما انكر بس غير سوالف اكو بيوت وملاهي لهيج سوالف ماشي.. وترى شغله خليها ببالج انا ولا مرة دخلت على بنيه وحاجيتها كل هنا اليشمرن روحهن علي وهن الي يبدن مراسلات ومن البدايه اكلهن انا لا مال حب ولا مال زواج وهن يلزكن ونورة جانت وحدة منهن وبس عرفت هي بت عمه ايلاف وسيف انطيتها بلوك رغم حاولت وياي هواي بس ما انطيتها مجال
رفل : نترت ايدي منه..اي مو توم كروز انت
كاتلات روحهن عليك مو جنك حميت زيادة
ايسر : بعصبيه ..ررررفل كاااافي ترى صبري نفذ وياج تردين تصدكين تردين لا بكيفج وما يهمني لا كلامج و لا كلام غيرج المهم انا اعرف نفسي زين
رفل : بعصبية.. زين ليش ما بررت من اتهمناك بكتل رنا ليش هسه يلا حجيت ليش ما كلت من قبل وهسه علمود سالفه تافهه جاي تبرر
ايسر : بتنهيدة.. رفل ترى مليت والله وطلعت روحي ابرر ما يعجبج ما ابرر هم ما يعجبج احسن شي اعوفلج البيت واطلع
رفل : اخذ غراضه وطلع بره الغرفة ..كعدت على الجرباية غطيت وجهي بأيدي وظليت ابجي ما اعرف على شنو بس احس نار بروحي اريدها تطفى .. مر اليوم وهو لليل ماكو ما بين نمت ..كعدت الصبح ب8 باوعت هم ماكو وفراشه مثل ما هو ..هذا ما اجه بالليل معقولة بايت عد وحدة ويجوز عد نورة ..هزيت راسي. .لا لا شنو هالخرابيط واذا نايم يم وحدة انتي شكو يولي لا تفكرين بي .. نزلت تريكت و نظفت البيت
سيف : هاا رفل نلعب
رفل : بالبدايه ندرس وبعدين نلعب
سيف : لا حبابه خليها بعدين اتعب
رفل : لا عيني هاي من بدايتها هيج ..اول ندرس يلا نلعب
سيف : ماشي بس ما نطول
رفل : اووك ..جبت الدفتر والقلم وبلشنا وره ما خلصنا لعبنا شوي
اسماء : يااا ربي هاي هم محسوبة جنه علي ولج كاعدة تلعبين وعايفه البيت
رفل : عمه نظفت ورتبت كلشي بعد شسوي قابل
اسماء : طبخي الغده
رفل : والله عمه ليش اجذب عليج انا كلشي ماكو بالطبخ اسوي زلاطه اگلي اي بس بعد كلشي ما اعرف
اسماء : امداني اي والله ضحكوا على ابني وخذاج
رفل : اي عمه ضحكو علي خلي يرجعوني ﻷهلي ههههه
اسماء : الحمد لله والشكر ربي
سيف : يمه ما اشتريتيلي شي
اسماء : ششتريلك ؟؟ سيف : كاكاو شبس اي شي
اسماء : يمه كبرت على هالسوالف انت بدل ما تشتغل وتجيب فلوس تكول اشترولي والله يا الله
رفل : تمشي وتهز بأيدها ..هو خطيه ظلت الدمعه بعينه بس مستمر يلعب ما يريد يبين علي ..فوكاها تكله روح اشتغل هم الصاحين الي بعمره ما يشتغلون ليش تحسسه بالعجز يا ربي مو ام هاي انتقام ..انا شوي وجايه
سيف : وين بعدنا ما مكملين
رفل : هسه اجي ..رحت لبست شالي وجبتي واخذت من الفلوس الجبتها وياي من اهلي جان المبلغ قليل كلت بلكت احتاجه ..المهم طلعت محد شافني عمتي جانت بالمطبخ وسيف بالاستقبال جان اكو محل بالفرع اشتريت حلويات كومه ورجعت اول ما فتحت الباب ..عمتي فكت عيونها على وسعهن
اسماء : وولج وين جنتي يمعزاية
رفل : عمه شبيج خرعتيني
اسماء : خرعتج هااا والله الا اكول لأيسر عليج اخلي يعلكج بالبنكه اليوم
رفل : ضليت اهز بأيدي الحمد لله والشكر ربي ..صعدت نزعت الجبه واجيت ..هاا بس لا غشيت من وراي
سيف : ههههه لا ما غشيت ..وين رحتي طولتي
رفل : رفعت العلاگه بوجهه .. جبت شي ناكله تعبت دراسه ولعب
سيف : بصدمه .. انتي جبتيهن ؟؟
رفل : اي
سيف : اخاف ايسر ما يقبل ويتعارك وياج
رفل : لا عادي قابل انا وين رحت هو هذا المحل واذا على العرك فأحنه كل يوم نتعارك بسبب وبدون سبب
سيف : ههههه اوك جيبي ناكل
رفل : ههههه ماشي .. كملت لعب وياه ورحت احضر الغده كالعادة اجت ايلاف وبعدها اجه ايسر ..اول ما دخل عمتي حجت
اسماء : اي انت تتعب وتشتغل ومرتك دايحه بالشوارع
ايسر : بأستغراب .خير شكو
اسماء : التفتت على ايسر ..مرتك طلعت بره بدون ما تكول ﻷحد وفد ساعه مدري ساعتين يلا رجعت مدري وين جانت
رفل : ضليت فاكه حلكي على حجيها ..شكد جذابه انتي انا شوي ورجعت
سيف : اي صح شوي ورجعت
اسماء : اي دافعلها ضحكت عليك بكاكاو علمود تدافعلها
رفل : بعصبية.. شنو ضحكت علي شنو هالحجي انتي تدرين علمود شنو انا رحت بعد لا تطولين بالسالفه
اسماء : تعالي اخذيلج راجدي بعد شو انتي ما تستحين تعلين صوتج علي
ايسر : كااااافي دخيييل الله الواحد يجي من الشغل يرتاح انا تتلگوني بالمصايب ..التفتت على امه انتي سكتي ورجع التفتت علي وانتي تعالي وياي
رفل : اجه لزمني من ايدي وصعدني فوك .. دخلنا وركع الباب بقوة
ايسر : اطلع من البيت بعركه وارجع بعركه شوكت اخلص ست رفل
رفل : محد جابرك علي طلگني وارتاح
ايسر : لا اله الا الله هاي شلون وياها .. وين رحتي اليوم بلا ما تستأذنين من احد
رفل : رحت للمحل الي بالفرع اشتري لسيف .. كلتها بلا مبالاة
ايسر : من سمعت كالت المحل انعاد شريط حياتي كله كدامي ..بعصبية.. شنو شنو كلتي
رفل : اباوعله انگلب وجهه كله وعيونه صارت حمر من الغضب ..شبيك رحت للمحل ..بعدني ما مكمله وجررني من شعرري بكل قوته ..اااااييي شبيك عووف شعرري
ايسر : بعصبية.. شتسووووين رااايحه هنااااك هااا شستوووين
رفل : يعني شسوي اشتري شبيك انت ..شو هذا دفعني على الجربايه بقوة صعد يمي وضربني راجدي بقوة
ايسر :  انااا تستغفليني اناااا.. حسبالج ما ادرررري بسوالفج
رفل : هو يضرب وانا ادفع بي ..شبيك انت شبيك تخبلت ..ادفعه ويرجع علي اخر شي خرمشته من ركبته
ايسر : بعصبية.. الله ياخذجن واخلص الله ياااخذجن كلجن نفس الطينه
رفل : قوتي خلصت من كدما ادافع عن نفسي وانا لحد هسه ما مفتهمه شبي يضرب مثل المخبل ..ما بقى عندي حل
غير احمي نفسي من ضرباته غطيت وجهي بأيدي وهو يسب ويغلط عليه وعلى امه نص حجيه ما مفهوم ..جان سيف جوه يصيح حجايه اسمعها وحجايه لا وهو ولا يمه ما وكف ضرب
سيف : ايسر هي ما مسوية شي والله علمودي راحت
ايسر : ما جنت اسمع ولا احس بشي عقلي وكف اضرب بلا رحمه جانت تصرخ تحجي تدفع وانا ابد.. بس اضرب للحظة حسيت على نفسي.. وكفت هي شافتني بطلت ضرب وخرت ايديها من وجهها جان شعرها مكفش و شفتها وخشمها ينزفن
رفل : ضليت صافنه علي جانت ايدي  ترجف عاقد حواجبه وشعره مهوس وجهه احمر وعركان  يتنفس بسرعة وعيونه جانت حمرة ..لزم راسه بأيدي وظل صافن علي بخوف شوي و طلع بره الغرفة..هذا شبي الله ياخذه كسرني تكسر وياخذ امه وياه من ضربته بالمسدس ما سوه هيج شبي هذا اليوم
ايسر : نزلت اريد اطلع صاح سيف وهو يبجي
سيف : والله راحت شوي ورجعت جابت حلويات الي ﻷن امي ما قبلت تشتريلي والله
ايسر : اخاف انا جان ناقصني وضميري مأنبني سيف زودها علي ..عفته وجاي اطلع شافتني امي
اسماء : هاا شسويت وياها .. شنو هاي شبيك انت الكاتلها لو هي الكتلتك شوف شعرك وركبتك
ايسر : والله كل مصايبي من وراج ..عفتها وطلعت ****
رهف : من بعد ما اجه ايسر للبيت امل تغيرت وياي كلش ظلت لا تصيح لا تأمر انزل اسوي شغل او ما انزل ما تحجي ..يا ترى شنو حجه وياها جان هذا السؤال يدور براسي ..مرت ايام واجت امتحانات نصف السنه جنت ذابه حيلي كله على الدراسه وكلهن الحمد لله زينه بيهن لحد اخر يوم امتحانات ..خلصت وطلعت وشفت وسام
وسام : هلا يا حلوة شلونج بالامتحان
رهف : بأبتسامه.. تمام الحمد لله انت شلونك
وسام : كلش زين والله وفرحان وطاير هم
رهف : ههههه يا الله طيرنا وياك
وسام : ههههه هسه اطيرج.. انتظريني شوي واجي اوصلج واحجيلج
رهف : بفرح.. تمام ..يا ترى شنو صاير ..ضليت نص ساعه منتظرته لحدما اجه
وسام : تأخرت عليج ؟
رهف : اي والله متت برد
وسام : اسف والله بس كملت الدفاتر يلا
رهف : مو مشكله ..صعدنا بالسيارة شو هذا شغل اغاني ومنطرب وياها كلش ...ههههه خير شبيك اليوم
وسام : خطبت الاحبها واهلها رجعوا الموافقه اليوم !!!... يتبع
#ارجوان