شظايا ورماد

البارت الرابع

#شظايا_ورماد

ايسر : هذا منين اجاني هسه ..الحمد لله زينه
سالم : هي شبيها
ايسر : خررب حظي غير يسكت ..لا بس جلب راكض وراها وطايحه بالگاع ومتبهذله
سالم : هاا ..صدك قبل كم يوم سمعت صوت طلق بالمنطقة ما تعرف شنو قصته
ايسر : بتنهيدة. .لا سالم ما اعرف ..لميت غراضي وكمت
سالم : هاا وين رايح
ايسر : للبيت صارلي هواي هنا
سالم : هاا الله وياك
ايسر : الله وياك
رفل : من طلع كلت اغير ملابسي فتحت الجنطه مالت الجهاز ..يبووو شنو هالملابس كلها تخزي زين والله جبت ملابسي السود وياي..بدلت وظليت افتر بالغرفة ..عود هو ليش قفل الباب ..ياربي شنو هالملل هذا ..شغلت التلفزيون وكعدت اتفرج والله متت جوع وهذا قافل الباب ..انتبهت اكو بالزاويه ثلاجه صغيرة ..رحت بسرعه فتحتها بيها فواكه وحلويات واجبان ..واخيرا شي ينوكل ..اخذت موزه وتفاحه ورجعت اتفرج تلفزيون ..لليل واجه ايسر بأيده علاگة سويت نفسي ما مهتمه
ايسر : احم ..هذا عشا
رفل : خلاه على الميز وراح تمدد على الجربايه ..بالبدايه ما كمت بعدين شفته ملتهي بالتلفون رحت اخذت من العلاكه لفة وكعدت آكل اكلت شويه ﻷن كل شوي ويباوع حتى اللكمه توكف بالنص ما تنبلع ..كملت لميت الغراض وكعدت افتر بالغرفة هذا متمدد على الجربايه وانا منعسه كلش واريد انام شلون
ايسر : شفتها تلوب تروح وتجي ..شتريد هاي ..شكو شبيج
رفل : احم ..اريد انام
ايسر : وما تنامين منو لازمج
رفل : وين انام ؟
ايسر : هاي الجربايه شكبرها ما تنامين عليها
رفل : لا يا انا يا انت على الجربايه ما يصير اثنينه
ايسر : اهاا اوك لعد الجربايه الي وانتي وين ما تردين تنامين نامي ..هاا صدك اكو فراشات بالغرفة الثانيه جيبيلج شي ونامي علي
رفل : رفعت حاجبي بأستغراب. . مو لازم الولد هو الي ينام جوة والبنيه على الجربايه
ايسر : لا اله الا الله الظاهر تتفرجين هواي مسلسلات وبعدين انا ما منعتج تنامين على الجربايه انتي الي رفضتي
رفل : تمام تمام خلص راح اجيب فراش
ايسر : اي بس مو احد يشوفج
رفل : اي خوش ...جبت فراش فرشته نمت وانا ادردم علي ..طاح حظك اي والله ****
رهف : كعدت من الصبح بنشاط ما مصدكه راح اداوم واخيرا غسلت وتريكت وصعدت ابدل ..نزلت حتى اطلع صاح علي كريم
كريم : رهف صبري حتى اوصلج
رهف : استغربت.. تمام ..انتظرته يخلص وامل يمه مدري شنو تكله وهو كل شوي خازرها ..يا ربي بس لا تحش براسه حتى ابطل
كريم : يلا نطلع
رهف : صعدت بالسيارة وياه شغلها بالبدايه جان ساكت بعدين كال
كريم : هذا تلفونج
رهف : ما صدكت ..ردت آخذه سحبه
كريم : صبر قبل ما تاخذينه لازم اكلج شي
رهف : شنو
كريم : تعرفين شلون خلوج ترجعين للمدرسه
رهف : بأستغراب.. لاا
كريم : رفل ما قبلت تعقد اذا ما يخلونج تكملين دراسه عمامي ما قبلوا بس ايسر كفلج وانا هم ..شوفي رهف انا صح بالبدايه وكفت ضدجن خاصه رفل ﻷن جانت تعرف شي وضامته علينا و رنا وسكوتها كل هذا ما كدرت ادافع عن اي وحدة بيجن اصلا ما اكدر ادافع ﻷن الي صار مو شويه والله ستر وما انفضحنا جان هسه الله العالم شنو حالنا ..المهم الي اريد تفهمينه انا وياج وراح ترجعين لدراستج ولحياتج بس والله ثم والله اذا سويتي غلط ولو صغير ما تلومين الا نفسج ومحد راح يحاسبج غيري ..وهسه هاج التلفون
رهف : اخذته وانا منثوله ..كريم والله ما فهمت خربطت عقلي رفل وايسر شدخلهم
كريم : وصلنا للمدرسه انزلي ورتبي الي كلته الج براسج وراح تفتهمين
رهف : نزلت شبه سكرانه ..وديت التلفون للأدارة ودخلت للصف ..كعدو المدرسات يعزوني بوفاة بابا حتى الطالبات وانا مسطورة حتى الدرس ما فهمت منه شي ..طلعنا فرصه بالساحه كاعدة وافكر بكلام كريم يعني رفل ما قبلت تتزوج الا انا اكمل ..زين شلون يعني شنو صار و ايسر ليش كفلني ..افففف راسي راح ينفجر ..انا كاعدة واجت وحدة
سماح : كوومي منا هذا مكاني
رهف : هو ناقصني بس انتي ..دروحي بابا روحي .. انا حجيت هيج وهي دفعتني وظلت تصيح
سماح : كووومي منا لا انعل الخلفج يلا كوومي
رهف : عقدت حواجبي بعصبية ..ولج تنعلين منو انتي ..احجي وادفع بيها
سماح : انااا تمدين ايدج علي ﻷنعل اليوم ال أجيتي بي
رهف : لزمتني من شعري وكعتني بالگاع وهي منا ضخمه ادفع بيها ماكو عضيتها من زندها اريد اخلص روحي وهي صرخت التمن البنات كلها علينه هي تضرب وانا اضرب المدرسات يفاككن وهي تدفع بيهن وترجع علي.. هي ما لابسه حجاب ومسويه ظفيره لزمتها منها وجريتها بقوة ..بهالاثناء الادارة كلها التمت والمدرسين همات ..المديرة والمعاونه سحبنها مني وانا لازمه شعرها
المديرة : عووفيها شنو جلبتي
رهف : تركتها وكمت انكت بملابسي و اعدل بحجابي
المديرة : تعالوا وراي للادارة
رهف : رحت وراها طبينا وسدت الباب وبلشت الرزايل على انتن ما تستحن وما تعرفن الاخلاق هاي مدرسه مو سوك ومن هالحجي كلما نطقت بكلمه ترزلني اكثر انطتنه انذار
وطلعتنه
سماح : والله الا اندمج بسيطه
رهف : اهووو دروحي ..شفت وسام واكف بعيد يباوعلي بعتب اجه تقدم بأتجاهي
وسام : عاقد حواجبه.. شنو هذا الي صار قبل شوي
رهف : نزلت راسي ..هي البدأت وضربتني قابل اسكتلها
وسام : ما كلت اسكتي بس عيب تضربينها وتتعاركن بنص المدرسه هيج اكو ادارة وروحي اشتكي عليها ..يعني هذا منظر يشوفونه الاساتذة
رهف : ما عرفت شنو احجي بس دموعي ظلت توكع بالكاع
وسام : اووو رهف صدك جذب ما تتحملين حجايه ..تعالي وياي تعالي
رهف : مشيت وراه  أشرلي اكعد على مصطبه بالساحه ..جابلي ماي واجه
وسام : هاج شربي وغسلي وجهج بي
رهف : اخذته وشربت منه
وسام : انا اعتذر صيحت عليج وانتي اصلا ما ناقصج ..شلونج نفسيتج شلونها
رهف : بتنهيدة .. زينه
وسام : اهم شي رجعتي لدراستج والله عاشت ايدها رفل هالمعروف ما لازم تنسينه ابد
رهف : وسام انا حجالي كريم بس ما فهمت شي شنو صار وليش رفل شرطت اكمل دراستي
وسام : من نرجع للبيت احجيلج هسه الفرصه خلصت يلا على الدرس
رهف : ماشي ..وشكرا على كلشي
وسام : العفو بس لا تعيدين الي صار اليوم
رهف : لا ابد **** رفل : كعدت الصبح ماكو بالغرفة ..خرررب ظهري مكسر الله ياخذك يا ايسر ..يااا الساعه بالعشرة كل هالوكت نايمه ..كمت بسرعه لميت الفراش وغسلت ..جاي افتح الباب اريد اطلع ماكو ما ينفتح ضليت اجر بي منا منا ماكو ...الله ياخذك ..كعدت ادك بالباب..افتحووا الباااب ..اكوو احدد هنا جاااي تسمعووني لو لااا
اسماء : هاي شبيها تصيح
ايلاف : تكول فتحوا الباب هو ايسر ليش يقفل الباب عليها
اسماء : يخاف من سوالفها
ايلاف : وهسه شسوي
سيف : خطيه هي مو عروس ليش يحبسها
اسماء : انت ما عليك اخذ الايباد والعب بي بالغرفة يلا
ايلاف : خطية نزل راسه وراح ..يمه على كيفج وياه سيف بسرعه يتأثر
اسماء : اوووو كاافي هاي منا تصيح وانتي منا واخوج من جهة
ايلاف : انا راح ادك على ايسر
اسماء : سوي الي تردي على اساس هو يسمع منه ****
ايسر : كعدت من الصبح رحت للشغل
ضرغام : هاا ولك غير عريس شعندك جاي
ايسر : خااب ما تولي من وجهي انت يا عريس يا بطيخ
ضرغام : هاا اذا هيج اكو واحد صارلنا اسبوع وياه وما حاجي شي تدخل علي تشوفه
ايسر : اي جيبه جيبه اطلع حركه العرس بي هذا امه داعيه علي
ضرغام : ههههههه خطيه من هسه انقهرت علي
ايسر : صدك طلعت بي قهري كله ساعه ما طول واعترف بكلشي ..رجعت
رجعت للمكتب جان تلفوني يدك ..هلا ايلاف
ايلاف : اكلك ايسر رفل جاي تدك بالباب وتصرخ تريد تطلع
ايسر : تمام شوي وجاي للبيت ..سديته منها وطلعت ****
رفل :  خررررب حظي العرفني بيكم ولللكم ولا واحد عنده رحمه ...افتحوووو الباااب لا اكسررره
اسماء : على اساس تكدر تكسره وما كسرته
ايلاف : يمه عوفيها هسه ايسر يجي
اسماء : اي يعوف شغله ويلتهي بهاي والله وكت
رفل : ايدي صارت حمرة من الدك وصوتي راح وهم ولا احد اجه كعدت وره الباب ابجي على حظي الي جابني هنا
ايسر : اول ما دخلت للبيت امي صارت بوجهي
اسماء : ايسر شوف صرفه لمرتك دوختنا اول ما كعدت بس تصيح ما طلعت هاي
ايسر : اصلا انا طالعلها يعني ماكو داعي لهالحجي
اسماء : هو صدك انت ليش قافل الباب عليها
ايسر : اووووووه ..انا مو كتلج ما الج علاقه
رفل : اول ما سمعت صوت القفل طفرت من يم الباب ومسحت دموعي ..شفته دخل ملابسه عليها دم وشعره مهوس ..صدك مجرم هذا
ايسر : شكو شبيج خابصه الدنيا
رفل : بصياح..انت صدك تحجي شنو شبيه ليش تقفل الباب ترى اكو بشر هنا
ايسر : هييي انتي لا ترفعين صوتج من تحجين وياي وبعدين اذا طلعتي بره الغرفة شتردين تسوين يعني الحمام و موجود وثلاجه وموجودة بعد شكو مسوية هالدراما
رفل : يا دراما انا ما تزوجتك حتى تحبسني هالحبسه
ايسر : لا انتي تزوجتيني حتى اختج تكمل مو ..هاي اختج جاي تكمل لعد تحملي الباقي
رفل : انا اعرف ليش هيج تسوي ﻷن ما خليتك تقتربلي حسبالك بهالطريقة راح اتنازل بأحلامك والله ..انا كملت وهو لزمني من شعري قوي
ايسر : سدي حلگج وعرفي شنو تحجين انا اذا اريد اتقربلج ماكو قوة بالارض تمنعني مرتي وحلالي وغصبا عنج ..بس محترمج واكول ما اسوي شي هي ما تريده
رفل : يحجي وعينه بعيني ضليت ابلعم انا شحجاني ..اخر شي دفعني ودخل للحمام ..خرررب حظج جان رحتي بيها .. شوي وطلع يمشط  ملابس فانيله اباوع لجسمه اغلبه آثار اكو جروح واكو مكان خياطات حسبالك اجسام المجرمين الي بالافلام
ايسر : خير شكو صافنه علي
رفل : بأرتباك.. هااا لا مو عليك
ايسر : يلا عدلي نفسج خلي ننزل جوة نتغدة
رفل : بأستهزاء.. ليش خليني محبوسه هنا
ايسر : لا اله الا الله رررفل كووومي بسرررعه ..وخليها ببالج اذا انا موجود تنزلين وياي ما موجود تنقفل الغرفة وهذا الحجي مراح اعيده وصوتج ما اسمعه
رفل : اي ليششش فهمننني
ايسر : كيفييي وانتي تمشين على كيفيييي
رفل : شنو امشي على كيفك ترى ما يصير هيج انا هم بشر اختنك والله
ايسر : هاي بعد وافقتي علي تتحملين ويلا نزلي
رفل : دخيلك ربي شتحمل بعد ..نزلت جانوا جاي يحضرون بالسفرة ..اول ما شافتني عمتي كالت
اسماء : واخير الاميرة ديانا نزلت
رفل : بعدني ما حاجيه شفتها سكتت ودارت وجهها التفتت على ايسر جان خازرها ..هاي اذا امه ما ينطيها مجال ويعاملها هيج بعد لا تعتبين شنو ما يسوي بيج ..كعدنا كلنا على السفرة ..جذبني سيف انا شايفته قبل رغم ما يجي هواي لعمامي بس اول مرة اركز بشكله هيج جان كلش حلو رغم ايلاف وايسر حلوين بس هو احلى .. انتبهلي من اباوعله
سيف : بأبتسامه.. انتي راح تعيشين ويانه مو
رفل : اي
سيف : ماشي حتى نلعب بلي سوه
رفل : بس ما اعرف العب بي انا
سيف : انا اعلمج سهل علمت حتى ايلاف علي
رفل : بأبتسامه.. تمام لعد
ايسر : احنه ناكل واباوعلها مندمجه وي سيف
رفل : كملنا اكل لميت السفرة وي ايلاف ..شوي وصاحلي ملك الموت
ايسر : رررفل
رفل : تنهدت التفت علي ايلاف
ايلاف : روحي يمه علما اصب الجاي
رفل : تمام ..رحت كعدت يمهم وهو كل شوي يباوع امه تسولف وسيف يباوعلي وينصي راسه ومن اباوعله يبتسم مدري شبي خجلان يجوز ..جابت ايلاف الجاي وكعدت يمي
ايلاف : رفل انتي يا كليه
رفل : اداب انكليزي
ايلاف : اهاا والله حلو ومطلوب هم
رفل : خلاص راحت علي بعد ماكو دوام
ايلاف : بأستغراب.. ليش
رفل : بعد هيج صار
ايلاف : بهمس ..ايسر معارض تكملين
رفل : كلها مو بس ايسر ..المهم انتي ادارة وإقتصاد مو
ايلاف : اي
رفل : اليوم ما مداومه
ايلاف : اليوم الاوف مالتي
رفل : اهاا ..جاي نحجي وصاح ايسر
ايسر : يلا رفل
رفل : وين
ايسر : عقد حواجبه.. يعني وين للغرفة
سيف : ايسر خليها شوي بعد حتى اعلمها بلاستيشن
ايسر : لا حبيبي غير مرة ..يلا كومي
رفل : كمت وراه ..دخل وقفل الباب طفه الاضوية ونام على الجربايه .. يا ربي هذا شلون وياه ..ترى ما اريد انام انا
ايسر : وشسويلج يعني
رفل : اريد اتفرج تلفزيون مدام محبوسه بالغرفة
ايسر : يابه شغلي بس نصي الصوت
رفل : كلبت عيوني ما عاجبني.. اي ماشي ..شغلته وكعدت اتفرج وساعه افتح الثلاجه واكل ..ملل يا ربي ..شفته كأنو غفه عليت التلفزيون خباثه شسوي ما عندي شي اشغل نفسي بي
ايسر : بعصبية.. هييييي نريد ننام
رفل : هاا اعتذر نسيت ****
رهف : بعد ما حجالي وسام كل الي صار بيوم
بيوم العقد قررت احارب حتى انجح وارفع راس رفل بيه وما اضيع الي سوته علمودي..خطيه هواي حاولت تتخلص من هالزواج بس ما كدرت يا ترى شلونها هسه شلون عايشه وي ايسر
امل : رررهف نززلي جووة سويلج شغله شنوو عايفين الشغل كله براسي
رهف : لا مبين راح اكدر احارب وست امل موجودة بالبيت ****
ايسر : كعدت الصبح كالعادة سبحت وبدلت جاي امشط و وكع العطر بالگاع ..خررب هسه وكتك ..التفت على رفل حسبالي كعدت ..بس ولا يمها ولا تحركت ..معقوله ما حست اجيت يمها تربعت جان شعرها مغطي نص وجهها شلته وخليته وره اذنها .. عدها شامه بارزة بحنكه جوة شفتها ضايفتلها جمال خاص كعدت اتلمس بيها وهي ولا حاسه ..شحلاتها وهي نايمه مو من تكعد صوتها يلعلع ..اروح لشغلي احسن قبل لا تكعد وتتحول... خلصت شغلي بين القضايا وناس طابه طالعة رجعت للبيت تغدينه مثل امس سوه وهم صعدت قفلت الباب والعشا كذلك جانت تضوج من اقفل الباب ما تدري انا علمودها اسوي هالشي ادري بأمي ما تسكت ولا راح تخليها براحتها وهي هم ما ناقصها السان يعني اذا ارجع من الشغل الكه البيت محترك من وراهن ..وره العشا رحت للكهوة وطولت هناك سالفه تجر سالفة ..من رجعت لكيتها نايمه ..تمددت على الجربايه وضليت اتگلب ساعه ساعتين ما نمت اباوعلها وهي نايمه تخبل ..نزلت يمها اتلمس بوجهها وهي ولا حست ..من شفتها هيج شلتها وخليتها على الجربايه خفت تكعد بس ولا يمها نمت بصفها وكعدت اتفرج عليها ..كلما اريد امد ايدي احضنها اتراجع اخاف تكعد .. يلا ايسر اصلا هي ما تحس .. حضنتها من خصرها وتقربت بهدوء عليها لدرجه انفاسها الحارة تضرب بوجهي ..جان كلبي يدك بسرعه رهيبه بحياتي محاس هيج احساس جان حلو ويخوف بنفس الوقت خليت گصتي على گصتها ورحت بسابع نومه
رفل : اول ما فتحت عيوني الصبح شفت وجهه ...كمزت من مكاني وفوكاها ايده على بطني..خرررب شجابك هنا شجاي تسوي انت
ايسر : كعدت على صوتها ..شبيج شكو
رفل : اباوع انا على الجربايه شنو صاير البارحه شسوي انا هنا..بلعت ريگي.. شجابني هنا ؟؟
ايسر : شمدريني سألي روحج
رفل : بعصبية..لا تستغبيني شنو سألي روحج وانت ماخذ راحتك كعدت وانت لازك بيه
ايسر : لا تدوخين راسي من الصبح البارحه كعدت لكيتج على الجرباية تفاجئت كتلج يابه شتسوين هنا ما رديتي اخر شي كلتي بردانه احضني كلت خطيه وحضنتج
رفل : لا بلا وتريدني اصدك مستحيل انا ما اسوي هيج
ايسر : والله عاد كيفج تصدكين او لا المرة الجايه اصورج حتى تصدكين ..بدلت وطلعت
رفل : هذا يحجي صدك ..بس لا صدك يا ربي والله فشله.. انا اتذكر رهف جانت تكول نومج ثگيل وتحجين وانتي نايمه بس ما اذكر مرة كالت تمشين وانتي نايمه ..هسه حسباله اتقرب منه ..شوي وانفتح الباب
ايسر : هذا ريوكج
رفل : اخذته منه ..لا تقفل الباب عفيه ..ولا كأنه سمعني طلع وقفل الباب ..روح الله لا يوفقك وان شاء الله بكل مكان تلگه عكرة من امداك اي والله ..اخذت العلاكه اكلب بيها ..بلا خلي اشوف لفه شنو هاي ***
رهف : جنت كاعدة اراجع بالساحه كالعادة ..اجت بنيه يمي
اسراء : انتي رهف ؟؟
رهف : اي انا
اسراء : انا اسراء صف خامس
رهف : اهلا
اسراء : هلا بيج حبي حبيت اسألج انتي صدك تصيرين بت عم استاذ وسام
رهف : بأستغراب.. اي ليش
اسراء : هاا مو الصراحه راح اكلج من الاخير انا معجبه بي كلش واريد رقمه واكثر من مرة احاجي اكله اريد رقمك حتى اتواصل وياك علمود الدروس يرفض ويكول تواصلوا وياي عن طريق صفحة المدرسه فياريت تنطيني الرقم وهالمعروف بحياتي ما انساه الج
رهف : ضليت فاكه حلكي ..شتخربطين انتي ؟؟
اسراء : فدوة عليج الله والله راح اموت علي
رهف : شبيج ترى الولد خاطب واجل خطوبة بسبب وفاه بابا
اسراء : ياا صدك.. حلفي
رهف : قابل اجذب عليج يا حبيبتي
اسراء : وهي حلوة لو لا
رهف : تموت اصلا تخبل
اسراء : لا تكولينها والله جنت متأمله بي
رهف : حبيبتي انصحج شوفي غيره هذا يموت على خطيبته ما يشوف غيرها
اسراء : هو انا حبيته ﻷن ثگيل وما ينطي وجه للبنات اثاري طلع يحب وحدة
رهف : يلا ترى ولد الحلال هواي شوفيلج واحد منهم ..انا اترخص راح يبدي الدرس
اسراء : اخذي راحتج
رهف : كالتها بخذلان ..انا معجبه بي احجي واقلد عليها ..والله يا الله مو بنيه ****
ايسر : رجعت من الشغل للغرفة ..لكيتها كاعده منتظرة
رفل : تأخرت ترى متت جوع
ايسر : هو هذا وقت شغلي ..يلا انتظري شوي وننزل سوه
رفل : راح انزل قبلك علما تكمل ..بعدني ما مكمله وخزرني
ايسر : بعصبية.. ابد ما تنزلين وحدج فاهمه اكمل وننزل سوه
رفل : ترى مراح اشرد ..اكعد يمهم لحدما تجي
ايسر : انا شكلت ما تنزلين اذا انا مو وياج
رفل : اي تمام يلا خلص بسرعة ..بدل ونزلنا سوه ..نفس الحاله كملنا اكل وكعدنا نشرب جاي ..جان روتين ممل بشكل
سيف : رفل نروح نلعب
رفل : يلا
ايسر : وين يلا ووين
رفل : نلعب
ايسر : ماكو لعب يلا صعدي
سيف : بتوسل ..ايسر حباب الله يخليك شوي ساعه ما نطول
ايسر : لا اله الا الله.. تمام وين راح تلعبون
سيف: هنا بالاستقبال
ايسر : ماشي يلا روحوا وانا اجي وراكم
رفل : يا بوويه شكد فرحت حسبالك كالولي راح تسافرين لباريس ..شكل البلي على الكهرباء وشغلنا هو يعلمني وانا العب ومتونسه وملك الموت ورانا يباوع ..هيج مو
سيف : اي عفيه عليج
رفل : اي شحسبالك لعد
سيف : هههههه يلا لا تنفخين روحج علينا
ايلاف : هاا يا بذات من لكه احبابه نسى اصاحبه
سيف : العبج بعدين مو زين ايسر وافق خطيه
رفل : اي انا خطيه ..وبرطمت لأيلاف بضحك
ايلاف : هههههه خررب حظج
رفل : هو خربان من عرفت اخوج شيخرب بعد ..نسيت هو موجود
ايسر : عاقد حواجبه بعصبية.. شكلتي ؟؟
رفل : ضليت ابلعم انا شلون نسيته ..لا ما كلت شي
ايلاف : شبيك ايسر جاي نتشاقة
ايسر : خلصي لعب بسرعه.. يلا سيف فضها
سيف : ما بقى شي راح يخلص الگيم
رفل : كعدت العب بسكته ما طلع صوتي ابد
سيف : هيييي فززت
رفل : اي انا بعدني مبتدئة شوي شوي اتعلم وافوز عليك
سيف : اي منتظرج
ايسر : مو خلصتي ..يلا امشي
رفل : تمام
اسماء : بدل ما تلعبين جان سويتي شغله بالبيت
رفل : انا ....قاطعني ايسر
ايسر : بعصبية.. اناا شكلت
اسماء : اي فهمنا
رفل : صعدنا فوك ..ركع الباب وراه بقوة
ايسر : اي ست رفل احجي
رفل : شنو احجي ما فهمت
ايسر : خرب حظج من عرفتيني مو ؟؟
رفل : الصراحه هو خربان من البدايه بس من عرفتك خرب اكثر
ايسر : امشي طفي الضوه اريد انخمد يلا
رفل : ماشي ..طفيته ونمت انا هم جانت حياتنه ماشيه على هالروتين ما تغير بيها اي شي ..مر  شهر تقريبا واحنه على هالحال ......
ايسر : جهزي روحج باجر نروح ﻷربعينه ابوج
رفل : بفرح... صددك والله
ايسر : قابل اجذب عليج
رفل : تمام تمام ..كعدت احضر شغلاتي ..صدك كم يوم نبقى
ايسر : ولا يوم بنفس اليوم نرجع بالليل
رفل : اهاا ماشي ..الفجر نطلع مو
ايسر : اي
رفل : كعدت اجيب منا واخلي منا حسبالك راح ابقى شهر ..الصدك جان عندي امل اهلي ياخذوني وبعد ما ارجع هنا بلكت اطلگ منه ..نمت وانا فرحانه ..كعدني الفجر
ايسر : يلا كوومي راح نتأخر
رفل : ماشي ..كمت بسرعه غسلت وبدلت
ايسر : اباوعلها شلون تتحرك بفرح ..يلا ننزل نتريك
رفل : لا ماكو داعي خلي نروح اخاف نتأخر
ايسر : بعد وقت وترى ايلاف تروح ويانه
رفل : وعمتي ؟
ايسر : لا ما تكدر تروح منو يبقى يم سيف
رفل : اهاا ماشي.. نزلنا جانت
ايلاف محضرة الريوك ..والله فشله هسه لو يخليني انزل اساعدها ..كعدنا اكلنا وطلعنا وانا متحمسه اشوف اهلي شكد اشتاقيتلهم ..وصلنا لبيتنا جانت المنشأة جبيرة واكفه وكريم وعمامي يمها ردت ادخل للبيت حتى اسلم على رهف وامي جان يلزمني ايسر من ايدي بقوة ..بأنزعاج ..شبيك اريد ادخل
ايسر : هسه يطلعون وتسلمين عليهم ماكو داعي تدخلين
رفل : ايسر الله يخليك حباب خليني ادخل
ايسر : كلت ماكو يعني ماكو
رفل : اففففف
ايسر : لا تتأفأفين لا نرجع للبيت
رفل : هاا لا سكتت والله ..انتظرت يمه اجوا عمامي وكريم سلموا علي وانا درت وجهي عنهم حتى ما رديت السلام ..شوي وطلعت رهف تدفع بعربانه امي ..صحت عليها..رررهف
رهف : انا شفت رفل تركت كلشي بأيدي وركضت عليها ..حضنتها بقوة ..مشتاقتلج كلشششش
رفل : وانااا اكثررر والله.. يبوو كعدت ابوس بيها و ارجع احضنها كدما مشتاقتلها
ايسر : كاافي انتن بالشارع
رفل : من سمعنا صوته وحدة تركت الثانيه ..احم شلونج
رهف : الحمد لله زينه
رفل : باوعت ﻷمي تباوع علينا رحت عليها بست ايديها وحضنتها تبقى امي شنو ما تسوي ويانه ..ردتلي الحضن بس ما حجت شي ..مشتاقتلج هواي يمه ..هم ما ردت
كريم : يلا صعدوا راح نتأخر
رفل : صعدنا انا ورهف وحدة لازمه الثانيه وكعدنا سوه
ايسر : رفل تعالي هنا
رفل : لا مرتاحة هنا يم رهف
ايسر : بعصبية.. انا كلت تعالي هنا
رهف : شفته عصبي.. رفل روحي يمه وانا وراج نحجي سوه همين
رفل : ماشي ..كعدت يمه بس مطنكرة وايلاف كعدت يم رهف ... وصلنا للمقبرة وكلها كعدت تبجي يم كبر بابا امي ورهف كريم وعمامي ..انا ردت اروح ما قبل ايسر .. اريد اروح يم الكبر مو هاي العالم كلها هناك
ايسر : منا شوفي وابجي علي اذا تردين
رفل : يا ربي هذا ليش هيج يتصرف وياي شنو حسباله اشرد لو شنو جان بيني وبين بابا متر ونص تقريبا وانا اشوفهم شلون يبجون ..بابا ترى كلهم ظلموني بابا من بعدك محد رحمنا كلها اذتنا ..احجي وابجي .. جنت ما تقبل احد يضربنا لو يحجي علينا شوف هسه شكد انضربنا وشكد تأذينا بابا اخذني يمك ..انا حجيت هيج وشهكت شهكه..تعبت والله تعبت اخذني يمك ارتاح
ايسر : تحجي وتشهگ كلبي تشكك من وراها ..كاافي رفل ما يصير هيج تحجين
رفل : لا مو كافي خلي يسمع شنو جاي يصير بيه خلي يشوف شكد جاي اتعذب ..بابا ترى زوجوني لواحد طردته من بيتنا لواحد جنت تكول لا تحجون وياه ..شفت شسوو بيه ..كملت الجمله وكعدت بالكاع ابجي وايدي على وجهي
ادري بي يمي ويسمع بس ما كدرت اسكت بعد محد اكدر اشكيله انا جاي اتعذب وهو يدري بس مجاي يسوي شي بالعكس يزيد ما ينقص ..جلبت الشهكة اريد اسكت ما اكدر
ايسر : ايلاف تعالي اخذيها للسيارة
ايلاف : تمام ..رفل كومي وياي
رفل : فدوة خلوني ابوس كبره على الاقل الله يخليكم
ايلاف : شنو القصة ايسر خليها تروح هذا كبر ابوها ترى
ايسر : بتنهيدة. . ماشي ماشي بس خلي يكومون من يمه واخليج ترحين
رفل : تمام ..كعدت امسح دموعي بكف ايدي ..انتظرتهم لحدما خلصوا وكعدت انا ..ابجي يم الكبر ..يا ترى يسمعني جاي يشوف شيصير بيه ..ما كدرت احجي شي بس حاضنه الكبر وابجي
ايسر : رفل كافي يلا نروح
رفل : باوعتله بنظرة توسل ..عفيه خليني بعد
ايسر : راح يرحون محد بقى هنا بس احنه ..يلا كومي
رفل : كمت وياه انكت بعباتي من التراب ..صعدنا للسيارة ورحنا نزور الامام زرنا وتغدينا ورجعنا الطريق جان كلش متعب تكسرت تكسر ..وصلنا جاي ننزل وامي صاحت
فاطمة : ايسر
ايسر : ها خاله
فاطمه : اريد رفل تتعشا عدنا
رفل : من كالت هيج لا اراديا ابتسمت وباوعت على ايسر
ايسر : خاله غير وقت ستونا راجعين وتعبانين
فاطمه : ميخالف ابني عندي موضوع وياها
ايسر : تمام بس انا اجي همين
فاطمة : هلا بيك
رفل : فد فرحت دخلت ركض للبيت وايسر وراي مبين من شكله ما عاجبه ..رحت للغرفة مالتنا انا ورهف ..كعدت ابوس بالباب والحايط.. يبووو شكد مشتاقتلها
رهف : ههههه خرررب عقلج شدسوين
رفل : مشتاقتلكم كوومه والله تدرين حتى مغثة امل من الصبح مشتاقتلها والله الحياة بدونكم صعبة
رهف : يعني ما مرتاحه هناك وي ايسر
رفل : يا صخام شتحجين انتي هناك حتى الهوا ممنوع خليها سكته احسن
رهف : بأستغراب.. يعني شلون
رفل : خلي ننزل نجهز العشا وبعدين احجيلج
رهف : اي والله هسه هاي تكول مخلين الشغل كله علي
رفل : لعد كوومي بسرعه ..نزلنا وحدة تكصص والثانيه تگلي وسوالف وضحك ما حسبالك ستونا جايين من الاربعينه بس على كد ما صارلنا هواي ما متشاوفين وامل تجي يمنا تهز ايدها وتروح واذا اطل للاستقبال الكه ايسر عاقد حاجبه وكوة كاعد ..صبينا العشا وتجمعنا كلنا حتى كريم جان يسولف ويانه جانت هاللمه تسوه حياتي ابيع الدنيا كلها بس ترجع لمتنه قبل على نفس السفرة ..كملنا ولمينه كلشي شوي وماما صاحت علي انا ورهف
رهف : اي ماما جايين
رفل : ما تعرفين بشنو تردينه
رهف : علمي علمج
رفل : رحنه وره ماما للغرفه مالتها
فاطمه : سدو الباب وراكم
رهف : ان شاءالله..سديت الباب وكعدت يم رفل الي مستغربه الوضع مثلي
فاطمه : شوفوا بنات انا صح ظلمتكم بس من وره الي صار ما عرفت شنو اتصرف ابوكم جان القوة الي بحياتي جنت متمسكه بالحياة بسببه من راح ما كدرت اسيطر على اي شي واختكم هم وسالفتها وانتوا تعاقبتوا همات بسببها فأريدكم تسامحوني على السويته بيكم
رفل : يمه انا مسامحتج اهم شي نرجع مثل قبل كلشي ما رايده
رهف : وانا همات مسامحتج مهما كان انتي امنه ما النا غيرج
فاطمه : بس اريد اكلجن شي خالجن ابو نور راح يسافر اللبنان فترة لان شركته عدهم فرع هناك ورشحوا يروح هو وافق وانا راح اروح وياه
رفل : بعصبية.. شنوو ؟؟
فاطمه : بس صبرري علي خلي اكمل ..كال هناك هم تغيرين جو وهم اشوفلج دكتور علمود وضعج قابل ما تبقين هيج طول عمرج على كرسي
رفل : لا لا لا يمه كولي غيرها فدوة وين ترحين وتعوفينه ستونا جاي نكلج انتي الي بقيتي عدنه
فاطمه : يمه غير اعالج
رفل : بعصبية.. يمممه لا تخبليني هنا اكو الف مكان تتعالجين بي واذا كلش كلش روحي ﻷربيل هم يعالجون هيج حالات ..كعدت على ركبي يم رجليها ..يمه فدوة لا تخلينا واذا مصرة اخذينا وياج اي لعد شكو باقين احنه هنا
فاطمه : وين اخذجن هاي عدها دراسه وانتي عندج رجل بعد شنو اخذجن
رفل : انا اطلك مو مشكله و رهف هم تترك هالسنه ميخالف بس لا تعوفينه وترحين
فاطمه : شنو تتطلكين هي لعبة هذا رجلج مداريج بعد شتسوين بيه
رفل : بعصبية.. ياا مدااريني يمه يا مداريني انتي كاعده وياي شايفته شمسوي بيه يمه حتى الباب يقفله علي وما يخليني اطلع من باب الغرفة الا وياه اختنك اموت احترك محد يدري
فاطمه : اي غير يخاف لا تسوين شي مثل اختج
رفل : يممممه اناااا شدخلني باااختي والي سوته يممه والله جاي تحملوني فوك طاقتي يمه اخذيني وياج
فاطمه : وين اخذج خالج زين منه راح يتحملني اجيب بعد فوكاي اثنين شتحجين انتي
رفل : بعصبية وصياح..انتي وحدة انانيه ما تحبين بس نفسج لج حتى ما تفكرين بأحد غير روحج ما تكولين بناتي شيصير بيهن من وراي ..بدل ما تكولين اخذهن واخلصهن منا ولج وحدة غيرج من تسمع هيج يصير ببتها تكلب الدنيا انتي بحياتج ما حبيتينا جنتي تحبين نفسج وبابا وبس ..اناااا اكرررهج اكرررهج اذا رحتي بعد والله ما اساامحج لو تنطبگ السما على الارض
كريم : شبيجن صوتجن وين واصل
رفل : تدري بأمي
راح تسافر ؟؟
ايسر : سمعت صوت رفل عالي تصيح كريم دخل ودخلت وراه
كريم : اي كالي خالي من رحنا نزور
رفل : وانت شلون تخليها تروح
فاطمة : رررفل كافي شنو انا صغيرة وبكيفكم امشي
رفل : يمه اذا سافرتي بعد ما اريد اشوفج ابد وما اسامحج بحياتي لان فضلتي نفسج علينا
ايسر : رفل يلا نمشي
رفل : باوعت ﻷمي ردتها تحجي شي تكول شي ماكو
رهف : شفت رفل شلون تباوع ﻷمي ..شلون تخليها تروح بعد ما عرفت تصرفات ايسر وياها .. رفل لا ترحين ابقي ..ايسر حباب خليها عدنا
ايسر : لا ما اكدر لازم نروح ..يلا رفل امشي
رفل : طلعت من البيت والقهر الشايلته يهدم الدنيا بكبرها ..شنو جاي يصير ليش اهلي جاي يرحون شنو سويت انا حتى هيج يصير وياي معقوله ﻷن سكتت بهذاك اليوم عن رنا ..وصلنا للبيت وانا راسي مصدع ما اكدر احجي شي كبل فرشت فراشي نمت وغطيت راسي بالبطانيه بجيت بجي طلعت كل قهري بي
ايسر : اسمعها وهي تبجي وتشهگ بخنگه ما كدرت اسوي شي الها ولا كدرت اطلع من الغرفة اخاف تسوي شي بنفسها
رفل : ما اذكر شكد مر وقت ونمت من التعب ..مر اسبوع وانا حالتي من سيء الى اسوء عرفت من عمتي امي سافرت حتى ما اجت ودعتني ظليت لا احجي ولا اناقش وي اي احد حتى مرات ما انزل على الغدا او العشا سيف وايلاف خطيه حاولوا وياي بس ماكو احس الحياة انتهت بالنسبة الي ما عندي احد جانت امي الامل الوحيد الباقي الي بس حتى هالامل راح ادري بيها تحب بابا وما تكدر على فراگة بس مو هيج تشمرنا وره ظهرها بلا ما تفكر شنو ممكن يصير بينا ****
رهف : وره ما طلعت رفل شكد توسلت بأمي تبقى ماكو جانت مقررة وخالصه .. قهرتني رفل ماكو احد منتبه لحالها حتى تلفون ما عدها حتى ادك عليها ..سافرت امي وتركتنا وبدأت ست امل بالاوامر كل يوم مطلعتلي شغله اسويها و فوك كل هذا ما يعجبها الخاتون ..بيوم جنت جايه من المدرسه ..كبل رحت لغرفتي بدلت وصليت وفتحت كتبي ﻷن عدنا امتحان رياضيات وما الحك ادرس حتى غدا ما تغديت ..سمعت صوت امل من جوه تصيح
امل : ررررهف ..رررهف
رهف : خير شكو
امل : نزلي غسلي المواعين
رهف : جاي ادرس وبعدين انا البارحه غاسله وجبتين اليوم عليج وهو بس انتي تغديتي من يجي كريم اغسل مواعينه عود
امل : جاي اكوول نزلي غسليهن
رهف : ما انزل ...انا حجيت هيج وما اسمع غير صوت ركضها على الدرج رفست الباب ودخلت علي ..شبيج ؟؟
امل : من اكول نزلي يعني نزلي فاهمه لو لا
رهف: وانا كتلج عندي دراسه
امل : دراسه مو ..انا اعلمج شلون تصير الدراسه
رهف : هجمت على كتبي وكعدت تشكك بيهن ...ااااامل لااااا ااامللل ..خرررب امل عوووفيهن ..انا اسحبهن وهي تشكك ..ادفع بيها وماكو مستمرة تغلط علي وتشكك بالكتب ..ولج ااامل لااا لا تشككينهن ..شككت نص الكتب وانا اصرخ واصيح
امل : هاي حتى بعد ما تكولين عندي دراسه ويجي كريم واذب عليج بلوة شكبرها حتى بعد تحلمين تكملين دراستج ادبسزز
رهف : وانا ابجي واملخ بروحي ..الله لا يوفقج الله ياخذج ليش هيج ليييش من الله ياخذج ****
رفل : هالايام بس اريدها تعدي صارت ثگيله على كلبي مرات افكر انتحر واخلص ..اكول رب العالمين هم يحاسبني هو يعرف شنو جاي يصير وياي بس استغفر الله وارجع افكر برهف يجوز اذا متت صدك ايسر يتزوجها وتعيش حياتي وهم عمامي مراح يرحمونها ..وانا الافكار تاخذني وتجيبني ندك الباب جانت الساعة بالوحدة الباب مقفول و ايسر بعده ما جاي وايلاف همات بالدوام ..بأستغراب. .منو ؟؟
اسماء : انا انا هاي اختج دكت علي وصارلها ساعه تون وتتوسل انطيج التلفون هاج هذا خلصي المكالمه ورجعي
رفل : استغربت من كلامها ..دخلت التلفون من جوه الباب اخذته ..الو
رهف : رررفل حبابه ساعديني الله يخليج
رفل : جانت تبجي وتشهگ بحركه ...شبيج رهف منو وياج
رهف : امل ..امل شككت كل كتبي وكالتلي بعد ما تداومين وهمين كالت اذب عليج بلوة حتى كريم بعد ما يخليج تداومين
رفل : بعصبية.. شنو هي بكيفها قابل
رهف : فدوة ساعديني رفل ما عندي غيرج
رفل : ماشي ماشي بس لا تبجين وراح اشوف منو ما يخليج تداومين
اسماء : يلا شنو ما خلصتن
رفل : اي عمه خلصت ..يلا رهف باي ..رجعت التلفون من فتحه الباب ..عمه
اسماء : هاا شكو
رفل : افتحي الباب حبابه اريد اروح ﻷهلي
اسماء : ما عندي المفتاح وحتى لو عندي ما افتحه
رفل : زين خابري ايسر خلي يجي
اسماء : يشتغل عندج هو كل شوي مخابرة الولد عايف شغله وراكض وراج
رفل : عمه الله يخليج
اسماء : اهوووو كافي شكد تلحين روحي انثبري بالغرفة
رفل : كعدت ادك على الباب ..عمممه فدددوة فتحي عممممه ..ساعه كامله ادك واصيح ولا كأنما اسمع صوت سيف يكلها فتحي الباب وهي تغلط علي وعليه ..يا ربي شسوي هسه.. أتصال رهف ونبرة صوتها حرك شكو حقد وكره بداخلي للكل يعني انا مسجونه هنا حتى هي تكمل اخر شي امل هيج تسوي بيها ..رجعت ادك ونفس الحاله سمعت ايلاف هم اجت وعمتي تكلها معليج بيها .. يا ربي هسه شلون شنو الحل هسه غير يجي ويفضها ..نص ساعه مرت وسمعت صوته من سمعته ضليت ادك بقوة على الباب ..ايسسسر ..ايسسسر
ايسر : بأستغراب.. شكو شصاير
اسماء : ماكو شي
اختها دكت عليها ومدري شحاجتها وكامت علينا
ايسر : عاقد حواجبه.. ومنيلها تلفون تخابر اختها
اسماء : يمه اختها دكت علي وكالت اريدها بشغله مهمة دخلته الها من الباب
ايسر : بعصبية.. لا اله الا الله
اسماء : ايسر ترى انا رايحه للدكتور سيف عنده مراجعه وراح اخذ ايلاف وياي
ايسر : شوف هاي انا وين وهي وين.. صعدت فوك بسرعه فتحت الباب لكيتها واكفه مبين عليها العصبيه وجهها احمر وترجف ..شكو شبيج
رفل : اريد اروح ﻷهلي بسرعه
ايسر : ليش شصاير
رفل : اختي محتاجتني وخرر خلي اطلع
ايسر : وين تطلعين كولي شبيها وانا احل السالفة
رفل : ما اريدك تحلها اريد اروح انا ..يلا عفيه وخر
ايسر : فهميني شصاير وياها
رفل : اهوووو ..يابه امل مشككه كتبها وتكلها ما ترحين للمدرسه بعد
ايسر : سهله انا احلها
رفل : بعصبية.. جاي اكلك انا اريد اروح ..دفعته ..شو وخر منا اريد اشوف منو يلزمني اليوم
ايسر : بعصبية لزمتها من ايدها قوي وقفلت الباب بأيدي الثانيه ..اذا مرة طلعي منا بدون اذني كتلج انا احلها كعدي وسكتي
رفل : بصياح.. مااا ارريد اسكت كااافي موتوني كتلك اريد اطلع
ايسر : سحبت المفتاح من الباب طلعت ملابسي ودخلت للحمام وهي مستمرة تصيح وتغلط
رفل : كعدت ادك باب الحمام علي .. ولك انت من شنو معجون ما تكلي ..افتح الباب يلا
ايسر : روحي منا رفل اريد اصخم اسبح
رفل :بسيطه والله اذا ما اعلمكم واحد واحد ..كعدت اكسر شكو موجود بالغرفة تحفيات عطور على الميز طلعت حركتي بيهن كلهن ..انتبهت للمسدس مالته موجود على الميز اخذته وايدي ترجف
ايسر : من سمعت صوت التكسير خفت لا تسوي بروحها شي لبست بسرعه وطلعت ..لكيتها لازمه المسدس وترجف..بأستغراب.. هذا شيسوي عندج عووفي
رفل : لا ما اعوفه ..رفعته بوجهه ..افتح الباب ترى افرغه براسك
ايسر : اباوعلها عركانه وترجف شكلها ابد مو طبيعي..رفل لا تتهورين انطيني السلاح هذا مو لعبه
رفل : لا ما انطيك انت واحد مجرم كتلت اختي لازم تموت
ايسر : بعصبية.. اناا ما كتلتهااا..انطيني السلاح وانا افهمج
رفل : بصياح.. جذااااب ما انطيك اكتلك واخلص واخلص العالم منك
ايسر : رفل راح تدخلين للسجن
رفل : على اساس انا مو بسجن عادي مراح تفرق
يجوز هناك ارحم
ايسر : رفل لا تتهورين
رفل : السلاح ما جان ثابت ايدي ترجف بصورة مو طبيعيه.. جان اكو صوت بداخلي يكول يلا ضربي راح تخلصين ..غمضت عيوني بلحظه غباء وضعف وعصبيه ضغطت على الزناد !!! ..يتبع
#ارجوان