شظايا ورماد

البارت الثالث عشر والاخير

#شظايا_ورماد
البارت الاخير

ولو هو محذرني ما اوكف يم اي ولد ..يجوز هذا سبب العصبيه مالته وصلنا للبيت وانا احاول الگه فد مبرر حتى لا يعصب .. اول ما دخلنا للبيت صاح
ايسر : رفل تعالي فوك
رفل : حجاها بهدوء وانا هدوءه يخوفني اكثر من عصبيته .. صعدت وراه سويت نفسي طبيعيه حطيت جنطتي وملازمي على الميز و هو واكف منتجي على الحايط ..جانت الغرفه هادئة ولا صوت لحدما حجه
ايسر : رفل منو جان واكف يمج من اجيت
رفل : جان يحجي طبيعي ..خفت اكله منو ويگلب الدنيا عليه .. زميل وياي سألني على المحاضرات ..حجيتها وانا اكلب بالملابس محاطه عيني بعينه
ايسر : بس !!
رفل : اي بس
ايسر : شنو اسمه
رفل : بأرتباك.. ما اعرف ما ممنتبهه
ايسر : اهااا .. يعني ما اسمه ضياء محمد
رفل : هو كال اسمه وانا الخوف سيطر عليه .. باوعتله بخوف وهو صااح بعياط
ايسر : ووولج شنوو شاايفتني غببي كدااامج هااا غبي انا تضحكين عليه
رفل : بخوف ..ايسر بس اهدأ خلي افهمك
ايسر : شتفهمين كووولي شتفهمين ولج حسبالج ما اعرفه لو ما اعرف شنو بينكم قبل هااا
رفل : ما بينا شي والله بس ...
ايسر : كاااافي تجذذذبين كااافي ..ترى انا اعرفه من زمان من جنت اجي للكليه علمود اشوفج فالجذب ميفيد
رفل : صح انا جذبت بس والله  ﻷن خفت منك تسوي هيج ..شوف احنه ما بينا شي والله ما اجذب هو جان وياي ويحجي وياي مرات بس والله اكثر من هيج ماكو والله..جنت احجي وارجف هو سمعني وعاط بيه
ايسر : بعصبية.. ووولج مو جاااان يرريد يخطبج موو  جااان يحبج وانتي تعرررفين بهالشي المن ضاله واااكفه ويااه ااالمن حنيتي تردينه جاااوبي تررردينه
رفل : جان يحجي ويكسر بالشغلات الموجودة على الميز ..من علو صوته وصوت التكسير غمضت عيوني وغطيت اذاناتي بأيدي خفت يضربني
ايسر : شفتها ترجف ومغطيه اذاناتها بخوف ما تحملت تقربت منها وسحبتها بحضني .. انا آسف والله آسف مقصدي اخوفج خفت لا ترجعيله خفت ترحين مني
رفل : حضني بقوة جان يتنفس بسرعه وكلبه يدك سريع.. هو حجه هيج وانا شبيه بجي بجيته
ايسر : اششش كافي لا تبجين
رفل : وانا ابجي.. ما اريد احد انا ما اريد غيرك والله كتله متزوجه حتى يوخر والله
ايسر : مصدكج والله مصدكج انا مدري شبيه من شفته تخبلت ..بس وحق الله اذا اشوفة مرة ثانيه يمج الا اموته خلي يصير عندج علم
رفل : لا لا بعد ابد بس اشوفه اشرد ما اوكف وياه
ايسر : لزمت وجهها بأيدي ومسحت دموعها.. يلا كافي روحي غسلي
وجهج خلي ننزل نتغده
رفل : هزيت راسي بأي..غسلت وجهي ونزلت وياه ..دخلت للمطبخ اساعد ايلاف هي شافتني اجت بسرعه لزمتني من ايدي
ايلاف : شكو شصاير اصواتكم وين واصله
رفل : ماكو شي دنتناقش
ايلاف : بس انتو سابع جار يسمع نقاشاتكم والله يا الله.. وجهها احمر وتكول جاي نتناقش يلا يلا تعالي ساعديني شدخلني انا
رفل : هههههه ماشي .. مرت الايام عاديه ضياء بعد ما لمحته وصرت اتجنب اكعد لوحدي حتى لا اتعرض لنفس الموقف مرة ثانيه ****
رهف : بالليل كاعدين كلنا سوه نسولف .. كريم شوكت تتزوج
كريم : اذا كملت احتمال بنصف السنه
فاطمه : يمه لعد خلي نرتب البيت غرفتك هم نغير صبغها
كريم : اي على بالي بس خلي يقترب الموعد يلا ما اريد نستعجل من هسه
فاطمه : براحتك يمه
رهف : هم يحجون وتلفوني يرن بس مخليته صامت .. يلا انا اروح انام
كريم : وين باجر عطله تعالي كملي الكعدة
رهف : ميته نعاس خليها على باجر
فاطمه : خليها تنام كاعده من الصبح
كريم : هاا اشتغل وزير الدفاع هههه
رهف : تغار ههههه ..يلا تصبحون على خير
فاطمه : وانتي من اهله
رهف : رحت ركض للغرفة ..اول ما دخلت رديت علي ..الو
وسام : وينج وينج صارلي ساعه ادك
رهف : جنت كاعده يم امي وكريم
وسام : احم ترى حاجيت امي وابوي نجي الجمعه نخطبج حضري نفسج ترى
رهف : بفرح ..صدك والله
وسام : ههههه اي لعد شكو مأجلين بعد
رهف : وسام كلبي ظل يأذيني من الفرحه والله احس شي راح يصير على كد ما فرحانه
وسام : هههههه لا مجرد احساس هيج من الفرح
رهف : ان شاءالله
وسام : اي شلونج شسويتي اليوم بالكليه ****
رفل : وتسوين حنه لا
ايلاف : اي اسوي بس ما اروح صالون هنا بالبيت ارتب نفسي
رفل : اي احسن ..والعرس اتفقتوا بقاعه لو بالبيت
ايلاف : لا بقاعه
رفل : الحمد لله يعني ميحتاج اگلب البيت واسوي حمله تنظيف علمودج
ايلاف : وعلمود اخوج لو نسيتي
رفل : ههههه لا ما نسيت ..جاي نحجي وسمعنا صوت صريخ وبجي ..التفتت على ايلاف..يا ستار شكو
ايلاف : ما ادري ..كوومي نشوف
رفل : طلعنا بره الغرفة جان نشوف عمتي تضرب بسيف راجديات مثل المخبله واحد وره الثاني تضرب وتغلط وهو محتمي بأيدي ويبجي بصوت عالي..يااا عمه شبيج وياه عووفي
ايلاف : وكفت بينها وبين سيف ..يمه شبيج ليش هيج تضربينه
اسماء : عوفيني ما الكم علاقه يلا ولي انتي وياها خلي اشوف شغلي وياه
رفل: جان يبجي ويشهگ منظره
يگطع الگلب ..عمه صدك جذب ليش هيج تسوين الولد لا حول ولا قوة حرام عليج
اسماء : بعصبية.. حرمت عليج عيشتج ام المصايب ولي منا لا ادوس ببطنج
ايلاف : شبيج يمه شكو شصاير شمسوي وهيج تضربينه
اسماء : انتي وخري منا روحي صفي وياها بعد خذيتي اخوها روحي هاي تفيدج
ايلاف : لا اله الا الله ..اصف بصفها شنو هو منو الي جاي يتعارك ..يمه اهدي وفهميني شبيج
اسماء : شنو انا مخبله واهدأ
ايلاف : يا ربي. .انا ما حجيت هيج بس فهميني شمسوي هو
اسماء : ما الج علاقه يلا روحي
ايلاف : رحت يم سيف جان ميت خوف وبس يشهگ ويباوع ﻷمي .. حبيبي شكو شصاير ..ما حسيت غير امي جرتني من ملابسي
اسماء : انا مو كتلج ما الج علاقة هااا بعد شكو تسألينه
ايلاف : يممه
اسماء : وغمه يلا وولي
رفل : دفعت ايلاف واخذت سيف بالكرسي لغرفته وقفلت علي الباب .. عمه ليش تقفلين الباب خطيه الولد
اسماء : اشششش انتي بالذات صوتج ما اريد اسمعه فاهمه لو لا
رفل : التفتت على ايلاف .. ولج شكو
ايلاف : وانا شمدريني .. امي صايرة تخوف اول مرة اشوفها هيج
رفل : وهسه شنسوي ندك على ايسر
ايلاف : لا لا يگلب عاليها واطيها ..هسه شوي تهدأ واحاجيها
رفل : ماشي انا صاعده فوك ﻷن شكلها ابد مطايقتني
ايلاف : ماشي
رفل : صعدت فوك منتظرة ايلاف تجيب خبر .. دخل ايسر
ايسر : بأستغراب.. شبيج جنتي منتظرتني
رفل : بأرتباك.. اي وين جنت تأخرت
ايسر : يم ضرغام
رفل : ما طلعت هاي كل يوم يمه
ايسر : شنو تغارين منه ؟
رفل : اي ليش ما اغار وانت عايفني ورايح يمه
ايسر : هههههه تدللين راح اقلل روحاتي اله
رفل : اممم ماشي .. خفت اگله وتصير مشكله ..نمت وانا ببالي انو ايلاف حلت المشكله ..كعدت الصبح على وكت لگيت ايلاف كاعده ..ها ولج شصار وياج
ايلاف : ماكو شي حاجيتها و طردتني من الغرفة والمشكله الاكبر ردت احاجي سيف من وره الباب جان يبجي وطردني همات
رفل : وهسه شلون ..شنو رأيج نكول لأيسر
ايلاف : ما ادري ..شوفي شوي واحاجيها اذا ما انطتني المفتاح اكول ﻷيسر
رفل : ماشي ..حضرت ريوك وصعدته فوك ..قبل لا ادخل سمعته يحجي بالتلفون ..وكفت
ايسر : شلون تريدني اكللها .. ضرغام لا تلح انا ما صدكت صرنا زينين هسه اخرب كلشي بأيدي .. لا جاي اكلك مراح تنسى ..بس اكللها انا اعرف ومن زمان تگلب الدنيا علي .. اووووه ولك والله متعرفها بگدي ما تسامح ما تسامح خليني ساتر على روحي احسن الي ..اي عود نتفاهم بعدين
الله وياك
رفل : دخلت علي مستغربة هو من شافني ارتبك
ايسر : من شوكت انتي هنا
رفل :رفعت تك حاجب.. من زمان .. شنو الشي الضامه عليه
ايسر : ماكو شي يلا انطيني الريوك اريد اروح
رفل : بعصبية.. كتلك شنووو الضاامه عليه
ايسر : لا تعلين صوتج علي
رفل : اذا محجيت هسه بس تطلع اروح ﻷهلي
ايسر : اللهم صبرج يا روح.. شي مو مهم وما يخصج اصلا
رفل : لعد يخص منو هاا منو الي ما تسامحك منو الي صرتوا زينين انت وياها اذا عندك وحدة غيري كول
ايسر : لا ما عندي ..فركت وجهي بأيدي.. كعدي خلي احجيلج
رفل : هاي كعدت يلا
ايسر : ما راح تعصبين ماشي
رفل : ماشي بس كول
ايسر : ادري بيها جذابه بس راح احجي ﻷن ما بيدي حيله ادري ما تخليني اطلع اذا محاجي كلشي .. شوفي اكمل للنهايه يلا تحجين
رفل : بتنهيدة.. هم ماشي
ايسر : التلفون الي لكيته بملابسج صلحته واخذت الارقام منه وبعد مدة عرفت صاحب الرقم منو المهم ما اطول عليج اعترف انو انتي ما الج علاقه وهاي لعبه لاعبها هو ووحده الي لحد الان ما اعرف منو هي ..بوكتها صارت سالفه كريم ورجعتي هنا فما فتحت الموضوع بعد
رفل : بعصبية.. يعني انت تعرف انا بريئه وساكت تعرف انا ما مسويه شي وساكت لك انت تعررف شكدد عانيت تعرف شنو اسمع من امك كل يوم واسكت ﻷن ما عندي دليل تدري حتى تلفون ما اطلب منك اخاف تكول تسوي بي شي ..وانا اكول هذا شلون سامحني وما عنده دليل هلكد يحبني يعني
ايسر : والله احبج اكثر من روحي
رفل : بعصبية.. وووين الحب وووينه غير المفروض تكولي شنوو صاار ..وفوك هذا جنت تهددني تحجي لكريم على شي انا ممسويته
ايسر : والله بس حجي ما جنت راح اسوي جنت خايف ترحين وما اكدر اسوي شي
رفل : لو تدري شكد اكرهك.. وخرر من طريقي
ايسر : بعصبية.. ووين
رفل : اروح لبيت اهلي وبعد ما ارجع
ايسر : لزمتها من ايدها بقوة .. ما ترحين ﻷي مكان
رفل : نترت ايدي منه ..مو بكيفك ..بشنو تهددني بعد هاا بشنو اروح واحجيلهم كلشي
ايسر :بعصبية.. رفل خلي نفسج بمكاني شنو راح تسوين
رفل : افتهم اشوف شنو السالفه
ايسر : والله بس حجي والله بهذاك الوقت عقل ميضل عندج تفكرين بي
رفل : ما يهمني ..اريد اروح ﻷهلي
ايسر : ما ترحين والله حتى لو اضطر احبسج من يطلعوني جثة منا عود روحي
رفل : بعياط .. هو بكيفك انا اررريد اطلع
ايسر : ما تطلعييين .. بهالاثناء صرخت ايلاف
ايلاف : لحگوووني ولكم لحگووا
رفل : صوتها هز البيت هز ..ايسر ضل يباوع للباب ويرجع يباوعلي ضل محتار ..اخر شي ركض جوة
وانا وراه .. وصلنا لغرفة سيف لگيناه متمدد على الجربايه ولا حركه وايلاف يمه تصرخ عمتي يم الباب صافنه
ايلاف : ايسر فدوة الحك
ايسر : شبي احجي
ايلاف : ما جاي يتحرك ..جسمه كله بارد عبالك قطعه ثلج ايسر فدوة شوفه
ايسر : بلا شوي وخري .. تحسست نبضه ماكو شي ايدي ضلت ترجف ..جسمه بااارد ..باوعت على الميز الي يمه علبتين دوه فارغات ..فكيت عيوني كلها.. هذا منتحر
ايلاف : ضخاااام شتدكول انت
رفل : من الصدمه جمدت بمكاني .. ايلاف هجمت على عمتي
ايلاف : بعياط ..كله منج كله منج انتي السبب
ايسر : ايلاف مو وكتج هسه ..رفل جيبي السويج وفتحي السيارة بسرعه
رفل : ضليت صافنه ما اكدر اتحرك
ايسر : وولج رفل احجي وياج بسرعه تحركي
رفل : اي اي بسرعه رحت جبته وفتحت السيارة ..راح هو ركض اخذه للمستشفى لوحده .. عمتي لا بجت ولا حجت شي ضاله مصدومه ..وايلاف ملخت روحها تملخ وكل شوي تحجي على عمتي
ايلاف : كله منج موتي اكو وحدة تضرب طفل هالشكل هااا بس مو صوجج صوجي انا ما كلت ﻷيسر من البدايه خفت لا تصير مشكله هسه لو كايلته جان لحگنه علي
رفل : كعدت بس ابجي لا بيه اهديها ولا اسوي شي جان منظره يخوف ..مسحت دموعها ودخلت لغرفة سيف وعمتي ضلت بمكانها ما تسوي شي بس تصفن ****
ايسر : ركضت بي للطوارئ اصيح اريد احد يساعدني .. والله شويه واجو ممرضين اثنين اخذوا من ايدي فهمتهم هو شارب دواه كله .. جسمي كله يرجف من برودة جسمه اريد افهم طفل ليش ينتحر شنو صار ..كاعد والافكار ماكلتني اكل بهالاثناء طلع الدكتور وكفت
الدكتور : انت ويه الطفل المنتحر
ايسر : اي
الدكتور : البقية بحياتك اخي
ايسر : بتوسل ..لا تكولها دكتور
الدكتور : ترى هو ميت صارله اكثر من ساعتين
ايسر : كعدت على الكراسي البره لازم راسي بأيدي
الدكتور : ولازم ينفتح تحقيق بهالشي
ايسر : التفتت علي ..احنه ما ندري بي من انتحر كعدنه الصبح لكيناه هيج
الدكتور : لا مو علمود هالسالفه الطفل متعرض للتعذيب الجسدي اكو آثار حروق بأيدي
ايسر : فكيت عيوني على وسعهن.. شتحجي انت دكتور ماكو هيج حجي اخاف غلطان
الدكتور : لا اذا تريد تفضل وشوف
ايسر : دخلت علي مثل المخبل ما مصدك. .وكشف ايدي كلها اثار حروق واكو جديد .. مستحيل منو مسوي هيج ..ردت اتخبل الا شويه من شفت المنظر ..رحت ركض للسيارة عفت سيف والمستشفى كلها ورجعت للبيت
رفل : جنت كاعده بالمطبخ مخليه راسي على الميز وابجي
ودخل علينا ايسر والغضب تارس وجهه جان شكله يخوف
ايسر : بعصبية.. ووولجن شمسويااات بي منووو مسويه هيج بي احجن
رفل : ضليت اباوع مستغربة شيقصد
ايسر : يلااا كووولن منو ..التفتت على امي انتي مو انتي جنتي تسوين بي هيج
رفل : بهاللحظه طلعت ايلاف من الغرفة تبجي
ايلاف :  اي هي الجانت تسوي هيج
ايسر : وليييش مااا كلتي
ايلاف : رفعت الورقه بوجهه ستوني عرفت ..كاتب كلشي هنا هي مسويه كلشي .. حجيتها وانا ابجي
ايسر : سحبت الورقه منها .. جان الخط مكسر بس ينفهم كاتب "ايسر انا اسف رفل انا اسف انا شفت امي من صعدت التلفون بغرفتكم بس ما كدرت اكلكم ..امي من حاجيتها حرگتني حتى لا احجيلكم وكلما اريد احجي تحرگني واليوم ردت اكول لرفل.. لزمتني وضربتني وقفلت عليه الباب " .. اقرأ وجسمي يرجف كل هذا وانا ما ادري .. التفتت على امي .. ولج انتي شنو من بشررر ولج لو مرت ابوه ما تسوي هيج .. تخربين بيت ابنج و تتهمين بنت اخوج بالزنا و تلعبين لعبتج ويه واحد متعرفينه وتدفعين مليون بس علمود تخربين حياتنا وهسه تعذبين طفل بس علمود تغطين على سوايتج ولج انتي من شنو مخلوقه
رفل : جان يحجي بعصبيه يصيح ويغلط عليها حتى ضربها وهي ولا حركه متحركت اصلا .. ايلاف جانت تباوعله و تبجي وتشهگ بحركه وانا دموعي اريدها تبطل ماكو .. عافنه وراح للمستشفى وبقينا انا وايلاف وحدة تباوع للثانيه ..اجيت يمها حضنتها وضلينا نبجي على اساس اهديها ما كدرت اهدي حتى نفسي .. شوي والبيت انترس عمامي ونسوانهم و ولدهم واجه ايسر هو وكريم وضرغام جايبين التابوت .. ايلاف شافته وشمرت روحها علي تبجي وايسر جان كاعد على صفحه يبجي وعمامي يهدون بي .. خلصت الفاتحه وخلصنا وياها ..ايلاف مرتين طاحت علينا لا تاكل ولا تشرب بس تبجي ملخت روحها تملخ وعمتي اصلا ما طلعت من غرفتها شكد دخلوا عليها وحاجوها جانت بس تصفن كلشي ما تحجي ..وره ما طلعت العالم صعدت فوك لكيت ايسر بالكاع كاعد يبجي .. من شفته لا اراديا ضليت ابجي .. تقربت منه باوعلي ونزل راسه ..كعدت يمه وسحبته لحضني مثل ميسوي من يشوفني ابجي .. كاافي الله يخليك احنه نقوة بيك لا تسوي هيج بنفسك
ايسر : وهو يبجي..رفل طفل طفل وادفنه بأيدي لج ممأذي احد ليش هيج تسوي بي ام هاي ام
رفل : ضليت امسد على راسه .. ميخالف علمود ايلاف خطية محمله نفسها الذنب ﻷن ما كالتلك بليلتها
ايسر : اناا هم السبب صارله فترة متغير بدل ما اسأله
جنت اسألها هي وتكول ما بي شي لو شفتي الاثار الي بأيده والله ردت اشتكي عليها واخليها تگضي عمرها بالحبوس لو ما ضرغام سد السالفه
رفل : جان يحجي ويبجي .. وانا من سمعت هالحجي ضليت حاضنته وابجي وياه بعد ما اكدر احجي شي .. مر اسبوعين على وفاة سيف وحال البيت نفس ما هو واتعس حتى دوام مداومنا ..ايلاف مخلصتها بجي ما تقبل احد يحاجيها حتى كريم اجه مرتين يحجي وياها وهي نفس الحاله عمتي من الفاتحه لحد هسه هي على نفس الصفنه والكعده حاجيت ايسر يوديها لدكتور مقبل كال مو زين مخليها هنا لحد هسه .. اما ايسر رجع لشغله بس مكسور مو مثل قبل ..جانت الوجوه كلها كئيبه ..لحدما فد يوم واكفه بالمطبخ اسوي غده ما حسيت غير الدنيا افترت بيه و وكعت ...
ايلاف : سمعت صوت طبه قوية بالبدايه ما اهتميت بس خفت صاير شي ..طلعت اباوع منا منا ماكو شي دخلت للمطبخ وشفت رفل مغمى عليها .. ررررفل ..رررفل فدوة كوومي رررفل ..ركضت على نقالي ..دكيت على ايسر ..الو
ايسر : الو ها ايلاف بيج شي
ايلاف : الحگ رفل واگعه وما اعرف شسوي
ايسر : خرررب الحظ  انا هسه جاي .. لو اكلج دكي على كريم خلي ياخذها للمستشفى علما اوصل
ايلاف : ماشي ماشي ..دكيت على كريم شوي واجه ..اخذها ورحت وياه
كريم : هي شبيها عدها شي تشتكي من شي
ايلاف : لا بس يجوز تعبت هالفترة وانا مخليه كلشي براسها معتكفه على نفسي وناسيتها ..جنت احجي وابجي ..اذا صار بيها شي هالمرة والله ما اسامح نفسي
كريم : لا ان شاءالله ماكو شي ..بس لا تبجين فوك راسها كافي ما شبعتي بجي
ايلاف : والله مو بأيدي الي صار مو شويه
كريم : هذا قدر ما يصير راح يم رب العالمين ميصير هيج تسوين صليله ادعيله بدل مكاعدة بس تبجين
ايلاف : مسحت دموعي.. ان شاءالله.. وصلنا للمستشفى اجت دكتورة اخذت المعلومات منه وراحت ..شوي وطب ايسر
ايسر : هااا وينهااا
كريم : يم الدكتورة بعدها ما طالعه
ايلاف : جاي نحجي وطلعت الدكتورة من يمها
ايسر : هااا دكتورة خير بيها شي
الدكتورة : انت زوجها
ايسر : اي شكو
الدكتورة : مبررروك زوجتك حامل بس عدها ضعف لازم تنتبهون لصحتها
ايسر : هي تحجي وانا بقيت صافن ما مصدك .. هي كالت حامل ؟
ايلاف : بفرح ..اي حامل راح يجي سيف ثاني
ايسر : هي حجت هيج وضلت تبجي ..وانا حضنتها ممصدك
كريم : هههههه كلبتوها مناحه شبيكم ..مبروك ابو النسب اليوم الي
ايسر : هههههه الله يبارك بيك
ايسر : دخلنا عليها ستوها جانت صاحيه
رفل : رفل شكو شبيكم
كريم : ولج زعطوطه راح تصيرين ام
رفل : بصدمه.. منو انا
ايلاف : يعني منو قابل ههههه
رفل : والله تحجون صدك لو تتشاقون
ايسر : لا صدك
رفل : حطيت ايدي على حلگي ممصدكه وانا اشوف الفرحه بعيونهم
ايلاف : يلا شدي حيلج حتى يجي سيف ثاني للبيت
رفل : باوعتلها خطيه متريد تنسى سيف .. واذا بنيه بلا
ايلاف : هم نسميها سيف هههههه
رفل : هههههه براحتج بعد انتي عمته .. رجعنا للبيت والفرحه مسايعتنا قبل كم ساعه جان البيت حزين سبحان الله شلون انگلب حالنه بسرعه ****
رهف : جنت بالكليه افتر انا وصديقتي واجه ولد بأتجاهنا
الولد : السلام عليكم
رهف : وعليكم السلام
الولد : اريد احاجيج ممكن
رهف : بعدني ماراده علي وفززني صوت وسام
وسام : لا مو ممكن
الولد : وانت شكو
وسام : خطيبتي شنو شكو
الولد : اهااا اعتذر ما ادري بيها مخطوبه
رهف : راح الولد وانا ضاله صافنه على وسام ..على كيفك مو هيج
وسام : لعد شتريدني اسوي ..يلا تعالي وياي
رهف : وين
وسام : لبيتكم احاجي كريم متت تعبت شوكت نخطب
رهف : يااا من كل عقلك بعدها الاربعينه ممخلصه مالت الولد
وسام : انا حظي زفت كلما اخطب يموت واحد
رهف : اصلا حظك حلو ﻷن ماخذ وحدة مثلي
وسام : هههههه اي يلا بس خلصيني خلي نمشي
رهف : شنو شكله معاجبك
وسام : هههه لا عاجبني وغصبا ما عليه
رهف : اي حسبالي
****
رفل : وره الاربعين خطبوا رهف و وسام اخيرا وبعطلة نهايه السنه تزوجوا رهف و وسام وكريم وايلاف كلهم سوه ..وانا ما مليت من الركص ولبست بدلتين رغم ايسر موصيني بس ما مشيت بكلامه اخوي واختي وحماتي وابن عمي كلهم معرسين اليوم ويريدني اكعد واسكت رغم بطني واصله لخشمي وكلها تضحك علي بس ما كعدت ..بيومها من رجعت اخذت رزاله معدله بس مهتميت ..جان فراگ ايلاف صعب جانت شكد تعتني بيه وبالروحه والرجعه تصيح ديربالج على سيف ... انا تخرجت بطلعان الروح جانت سنه صعبه عليه كلش و وراها بفترة ولدت سيف كلها جانت موجودة يمي خو ضرغام اجه خبص الجو بالهلاهل وكلها تضحك علي.. حياتنا جانت طبيعيه لا لا مو طبيعيه اذا بالاسبوع منتعارك مرتين او 3 ميمر هالاسبوع بس جان احلى شي بأيسر ميخليني نايمه وانا زعلانه نتصالح وثاني يوم ندور مشكله نتعارك عليها هههه ..شكد بجيت وتوسلت من رادوا يزوجوني ايسر بوكتها شكد كرهته بس الحمد لله الله دائما يختار الاحسن النا لو متزوجه غير ايسر مجان اتحملني هلكد .. رهف حياتها هادئة هي و وسام مأجلين موضوع الاطفال هسه هلمود دوامها اما ايلاف حامل وهم ناويه تسمي سيف  اما عمتي بقت على حالتها .. النهايه
#ارجوان