شظايا ورماد

البارت السادس

#شظايا_ورماد

وسام : خطبت الاحبها واهلها رجعوا الموافقه اليوم
رهف : بهاللحظه كأن واحد ضربني على راسي بقوة بحيت اذاني كامت تطن وكلبي يأذيني.. الساني انعقد ما كدرت احجي شي ...التفتت علي بنظرة توسل والدمعه مستقرة بعيني بلكت يطلع يتشاقه او انا سمعت جذب
وسام : اباوعلها صفنت علي ..بأستغراب. .شبيج رهف
رهف : احم.. انت تحجي صدك لو تتشاقه
وسام : اي اكيد قابل اتشاقه بهيج موضوع
رهف : ما كدرت بعد انطق شي ..يعني شنو راح مني ..زين انا شنو بحياته ..هاي الاسئله جانت تدور براسي
وسام : عاقد حواجبه ..رررهف
رهف : جاوبت وانا اباوع من شباك السيارة ما اكدر احط عيني بعينه ..هاا
وسام : شنو ماكو مبرووك شي
رهف : اعذرني بس انصدمت ما تخيلتك تحب يعني شكلك ما مبين علي هيج ..احجي وكوة ابتسم حتى لا يلاحظ
وسام : ههههههه خرررب ابليسج يعني شلون الواحد يبين علي يحب بلا
رهف : ما اعرف بس ولا مرة كلت شي عن هالموضوع ..جريت حسرة ..انت شلون تعرفت عليها
وسام : بالكليه هي بعدها طالبه هالسنه اخر سنه الها
رهف : اهاا ..هو ظل يحجي شلون تعرف عليها وانا دايرة وجهي لجهة الشباك و كلبي يأذيني كلما ذكر اسمها ﻷول مرة اتمنى اوصل للبيت بسرعة قبل ما يحس علي .. وصلنا طلعت بسرعه ودخلت للبيت حتى ما سلمت علي
وسام : رررهف ..هاي شبيها حتى سلام ما سلمت
رهف : دخلت للبيت جسمي كله يرجف دموعي بعد ما كدرت اسيطر عليهن ..كعدت بالگاع ابجي واشهگ بحركة
امل : بأستغراب.. رررهف شبيج
رهف : اريد اسكت ماكو ظل صوتي يعلى اكثر ما كدرت اسيطر على نفسي ما همني شنو ممكن يحجون ..نار وشابه بصدري ما جاي تطفى وما اعرف شلون اطفيها
امل : كرريم الحك رهف مدري شبيها
كريم : عاقد حواجبه.. رهف شبيج ولج منو وياج احجي
رهف : كعد كريم بمستواي يهز بيه وانا ما بطلت الشهگة تطلع من كلبي للحظه حسيت خلاص راح يوكف كلبي
كريم : دخيلك ربي ولج احجي ..امل طلعي البخاخ من جنطتها لا تختنك
امل : تمام تمام
رهف : من خله البخاخ بحلكي هدأت شويه شوية بقت بس الشهگة جلبت بيه
كريم : بخوف.. رهف شبيج احد وياج
رهف : هزيت راسي ب لا
كريم : تمام كومي وياي دخلي جوة
رهف : دخلنا ..جاب ماي غسل وجهي وشربت شوية
كريم : شبيج شنو صاير
رهف :  ما جاوبت بالامتحان
كريم :بربج رهف ردتي تموتين الا شوية علمود امتحان قابل هي امتحانات الوزارية
رهف : ظليت ابجي ..بس انا درست عدل وما جاوبت
كريم : يلا ما صار شي مسحي دموعج
كريم : امل روحي وديها للغرفة ترتاح
رهف : كومتني امل وانا رجليه كوة شايلاتني ..دخلنا تمددت على الجربايه وغطيت راسي ابجي ..ليش هيج يصير وياي زين هو ليش يعاملني بهالطريقة اذا يحب وحدة ثانيه لييييش ****
ايسر : بعد ما طلعت من البيت رحت لضرغام ..دكيت الباب
ضرغام : اي اي جايين .. ايسر خير ما خلصنا منك مو البارحه عدنا خلينا ناخذ راحتنه يا اخي
ايسر : دولي من وجهي خلي افوت
ام ضرغام : يمه منو بالباب
ضرغام : هذا ايسر
ام ضرغام : هلا بي
ضرغام : حجية لا تنطينه وجه شوفي البارحه بات عدنا وتريك ورجع هسه هذا رجله اخذت هنا
ام ضرغام : ولك يمه عيب
ايسر : هههههه شفتي خاله ابنج ما يعامل الضيف عدل
ضرغام : يا ضيف بعد انا راح اطلع ويصير بيتك تكعد بي اكثر مني
ايسر : خب دروح ..بس كلي شنو غداكم ﻷن ميت جوع
ضرغام : هاج استلمي يمه حتى غداه صار علينا
ايسر : ضربته على راسه ودخلت سلمت على الحجيه ..هي اصلا تصير عمه ابوي ..واكلنا وسوالف ضرغام الماتخلص خلصنا وكعدنا انا وضرغام
ضرغام : ما حجيت شي كدام الحجيه بس شكلك وركبتك تكول متعارك هههههه
ايسر : بتنهيدة..والله تعبت من نفسي ومن الدنيا كلها
ضرغام : خير شصاير
ايسر : ضربتها
ضرغام : بأستغراب.. ليش ؟؟
ايسر : راحت للمحل تشتري لسيف من جابت سيرة المحل عقلي وكف تخيلتها جاي تخوني وتتواعد وي ابو المحل مثل امي من جانت تجذب علي
ضرغام : جان يجي ويذب حسرات ...لا إله إلا الله بس لا اذيتها
ايسر : اذيتها هواي ضربتها حسبالك واحد مجرم وفوك هذا اذيتها بالحجي همين ما خليت غلطه تعتب علي .. والله ما اعرف شلون سويت هيج وما اعرف شلون اصلحه
ضرغام : زين ايسر ليش ما تطلگها حتى اثنينكم ترتاحون لا انت مرتاح ولا هي
ايسر : بعصبية.. لا لا لا تكمل كلامك ابدددد ..انت اكثر واحد تعرف هي شنو بالنسبه الي وتريدني اطلگها ..مستحييل لو اشوفها تموت كدامي ما اطلكها
ضرغام : الله يساعدك والله ما عندي اي حل لحالتك هاي
ايسر : هو انت يمتى لكيتلي حل حتى هسه تلكه
ضرغام : اهااا هيج صارت يلا كووم رووح لبيتكم يلا نريد انام نرتاح بالشغل مگابل وجهك وبالبيت هم دروح يابه
ايسر : ولا اروح اليوم ابات عدكم
ضرغام : خب دمشي يبات عدنا ***
رفل : من راح ما طلعت من الغرفة كعدت امسح بوجهي واسب بي وبأمه ..شوه وجهي الحقير.. هسه بس اريد افتهم شبي انكلب وحش مو جان هادئ ..الله ياخذه ..لليل وهو ماكو
وانا هم ما نزلت ما اريد تصير عركه ثانيه ..ردت انام ماكو بس اتگلب صارت ب1 وهو ماكو.. وين يا ترى يجوز وي وحدة منا منا ..انا جاي افكر وسمعت صوت على الدرج ..تلفلفت بالبطانيه وسويت روحي نايمه خاف حسباله منتظرته ...انفتح الباب بهدوء الغرفه ظلمه اشوف بس حركة رجلي يجي منا ويروح منا اخر شي وكف يمي ظليت ابلع بريگي ..تربع يمي غمضت عيوني اخاف يشوفني ..شوي وشال شعري من وجهي خلاه وره اذني ظل يتلمس بوجهي بهدوء ..بعدين نزل على شفتي بمكان الجرح مالت ضرب اليوم يتلمس بي ..دنك وباسني بنفس المكان انا ظليت ارجف ما اعرف اكعد لو ابقى امثل انا نايمه زين من اكعد شنو اكله ..كلبي احسه طلع من مكانه على كدما يدك بقوة.. حسبالي خلص رجع يتلمس بالشامه الجوة شفتي  وباسها  ردت اضربه هذا حيل ماخذ راحته بس كلت خلي اشوف وين يوصل
ايسر : آسف والله آسف واعتذر ما ادري شلون مديت ايدي عليج بس آسف
رفل : جان يحجي ويمسح على شعري ..هذا شبي يكتلني ويجي يعتذر وانا نايمه صدك جذب لعد كل ليله الله اعلم شيسوي وانتي نايمه وما تحسين ..شوي و وخر اسمع بس نفسه بالغرفة ..فتحت عيوني شوي لكيته كاعد قريب علي مرجع راسه على الجربايه يدخن و مدد رجلي بالكاع وكل شوي مباوعلي وانا مسويه نفسي نايمه ما ادري شكد طولت يلا نمت وهو جكارة وره الثانيه ..كعدت الصبح ما لكيته احتاريت انزل جوة لو لا ..اليوم ايلاف بلشت عطلتها ﻷن خلصت امتحانات ..قررت انزل وما احجي وي عمتي ابد ..نزلت لكيت ايلاف تنظف اول ما شافتني استغربت ﻷن صار اثر بوجهي من الضرب ..بعدين ابتسمت
ايلاف : صباح الخير
رفل : بأبتسامه.. صباح النور اساعدج بشي
ايلاف : لا راح اخلص
رفل : ماشي .. تريكت ورحت لسيف لكيته نايم ..يلا كووم كسلان ورانا دراسه
سيف : وهو يفرك بعيونه ..رفل شنو هذا وجهج شصاير بي.. كله مني انا
رفل : لا  مو منك ولا من غيرك اخوك هو عصبي دوم ..يلا كووم لا تأخرنا
سيف : تمام كايم
رفل : اساعدك
سيف : اي بس قربي الكرسي
رفل : ماشي ..قربت الكرسي منه وطلعت هو شوي وطلع وراي سوتله ايلاف ريوك وكعد يتريك ..اما عمتي تروح وتجي لو تخزر لو تغمني لو تهز ايدها وتروح ..ما حاجيتها الظاهر تدور مشاكل ..كمل سيف وكعدنا ندرس من خلصنا رحت ارتب بالغرفة مالتي ..شوي وصاحت عمتي
اسماء : رررفل ..رررفل
رفل : خير عمه صاير شي
اسماء : مدام ايلاف نظفت كومي طبخي
رفل : عمه ما اعرف اطبخ كتلج انا ليش حرمات العب بنعمه الله واخر شي ما تاكلونه
اسماء: والله مو مشكلتي اليوم الطبخ عليج
رفل : براحتج
انا كتلج وحذرتج انا ما الي علاقه بعد
اسماء : دمشي كدامي امشي يلا
رفل : رحت احضر الغده وانا كلشي ما اعرف ..كلما تجي ايلاف يمي امها تسحبها ..خلصت واجه ايسر بس شفته كلبي ظل يدك سريع تذكرت شنو  سوه البارحه ..بينت نفسي ما مهتمه بس كلما تقربت منه ارجف مدري شبيه وهو حتى عينه ما يرفعها بوجهي
ايسر : خررررب شنو هذا ليش هيج الاكل
اسماء : اليوم مرتك طابخه
رفل : كتلج ما اعرف اطبخ وانتي اصريتي
اسماء : لعد تبقين هيج كلشي ما تسوين ومحسوبة جنه علي
ايلاف : يمه كافي مو جاي تنظف وتغسل
اسماء : انتي لا تتدخلين
رفل : الحمد لله شبعت ..كمت من سفرة وعفتهم ما بيه حيل اناقش.. هو انا شنزلني لو باقيه فوك احسن.. شوي وصعد ايسر جان يحوس بالغرفه ما يعرف شيسوي
ايسر : اريد اعتذر بس شلون ما اعرف وامي زوتها خاف هي ناقصة كعدت اكلب بالكنتور كلشي ما اريد بس ما اكدر اباوعلها...احم انا اعتذر على امس ..حجيتها وانا داير ظهري عليها
رفل : ضليت فاكه حلكي.. هااا.. دار وجهه عليه
ايسر : وجعا شبيج كتلج اعتذر
رفل : رفعت حاجبي.. وجعااا وياها ..اصلا اعتذارك ما مقبول
ايسر : غصبا عنج تقبلينه
رفل : لا بلا
ايسر : اي ﻷن انا سامحتج من ضربتيني بلا ما تعتذرين فهسه مجبورة تقبلين اعتذاري
رفل : اي مو هي تصفيه حسابات ..ترى صح انا طلعت بلا اذنك بس مو هيج تضرب
ايسر : خلاااص كتلج اعتذر الف مرة وهالموضوع ما ينفتح بعد
رفل : كمل وطلع بره .. بكيفة يفتح مواضيع وينهيها والله يا الله ****
امل : رهف تعالي تغدي
رهف : تمام ..كمت من الفراش كوه لا عشا البارحه ولا ريوك خفت ابقى اكثر ويحسون ..باوعت لنفسي بالمرايه شعري مخربط وعيوني ورمانه ..غسلت ونزلت
كريم : هاا شلونج اليوم
رهف : بأبتسامه مصطنعة.. احسن
كريم : يلا ترى ما يسوه هو امتحان
رهف : هزيت راسي ..وبديت آكل ..ما اعرف ليش حسيت هالمرة الاكل مر وكوة اللكمه تمشي ببلعومي
كريم : عندي خبر الج راح يفرحج
رهف : وانا مدنكه آكل ..شنو
كريم : وسام خطوبته الاسبوع الجاي
رهف : ابتسمت وسوي نفسي متفاجئه.. صدك
كريم : والله
رهف : جان يحجي بفرح ما يدري حجيه جان سجاجين بصدري .. الله يتممله على خير ****
ايلاف : رفل سمعتي
رفل : شنو ؟؟
ايلاف : وسام خطوبته الاسبوع الجاي
رفل : بفرح ..والله
ايلاف : قابل اجذب عليج والله فرحانه راح يصير عدنه عرس من اجينه لحد هسه ما حضرنا ولا عرس
رفل : وعرسي نسيتي
ايلاف : هههههه خررب حظج خليها سكته رفل ما اريد اجرح مشاعرج
رفل : هههههه ...تنهدت ..اتشاقه وياج والله فرحتله وسام يستاهل كل خير ..تتوقعين ايسر يخليني اروح للحفلة
ايلاف : ما ادري والله.. احجي وياه وشوفي
رفل : شحجي وياه هو احنه ما نحجي مثل العالم الطبيعيه ..بس احجي حجايتين نتعارك
ايلاف : ههههه الله يساعدكم هو نار وانتي بنزين بسرعه تگبون
رفل : اي والله صح كلامج ..شرايج انتي تكوليله
ايلاف : لا يمه شدخلني انا
رفل : عفيه الله يخليج ويحفظج ويرزقج الرجل الصالح
ايلاف : ههههه هوووب هووب وين وصلتي .. تمام راح اكله بس تساعديني
رفل : هو انتي بس احجي وانا اساعدج .. لليل تعشينا وخلصنا وانا وايلاف وحدة تباوع للثانيه اريدها تحجي ماكو
اسماء : خير شكو شبيجن
ايلاف : هاا جاي اكول شنو البس بخطوبة وسام
اسماء : نشتريلج مو مشكلة
ايلاف : اي خوش فكرة نروح انا و انتي ورفل نشتري
رفل : اول ما كالت رفل ايسر رفع راسه من يخزر بيها
ايسر : رفل ما تروح وياجن
ايلاف : قصدك ما تروح للسوك
ايسر : لا للحفله كلها ما تروح
رفل : لا بلا ليش يعني هو هم ابن عمي
ايسر : كلت ماكو روحه
رفل : عفتهم وصعدت فوك بعصبية
ايلاف : خطيه ليش خليها تطلع تشوف ناس يعني صارلها شكد من تزوجتك وما طالعه بس بالاربعينيه مالت ابوها
ايسر : ايلاف لا تتدخلين بيني وبينها
اسماء : اي ما الج علاقه بينهم انتي مرته وبكيفه
رفل : ضليت ارجف من العصبيه اريد شي يهديني ماكو ..عود ليش هيج يخبث وياي ليش هسه كون مسدس وافرغه براسه اكو احد يلومني ..جاي احجي وانفتح الباب
ايسر : دخلت عليها لكيتها تفتر والعصبية مبينه عليها
رفل : انت ليش هيج تسوي وياي هاا
ايسر : وسام علاقتي بي مو زينه لذلك ما اريدج ترحين
رفل : لا بلا علاقتك وياه مو زينه شدخلني بيك انا مو هاي امك واختك راح يرحون ليش انا لا ..لا تكول ﻷن علاقتي مو زينه وياه كول ﻷن اكررهج امووت منج ماا اريدج ترحين تتونسين اريدج تبقين تعفنين هنا تموتين هنا محد يشوفج.. هيج كول لا تطلع حجج
ايسر : جانت تحجي وترجف بعصبيه ..تقدمت بأتجاها بهدوء ..بس اهدي شوي خلي احجي وياج مثل العالم
رفل : بعصبية.. مااا اررريد اهدأ ماا اررريد تحجي وياااي ماا ارريد
ايسر : بعصبية.. كل هذا علمود كتلج مااا تررحين
رفل : بعصبية.. لااااااا ..لااااا تعرف مو علمود الروحه بس اختنكت منك ومن عيشه وياااك كلشي لا لا ما يصير لا تطلعين
ايسر : وجهها صار احمر من العصبيه والدمعه مستقرة بعينها شوي وتبجي
ايسر : بدون مقدمات سحبتها بأتجاهي وحضنتها بقوة
رفل : سحبني لحضنه بقوة وانا شكو بيه بجي بجيته ..صار يحضني اقوى ويمسد على شعري
ايسر : اششش كافي ..انا آسف والله آسف. .تمام مثل ما تردين روحي للحفله مو مشكله
رفل : ضليت ابجي واشهگ بخنگه ..ما اريد ما اريد اروح خليني اموت هنا احسن
ايسر : ههههه.. ضربتها بخفة على راسها ..لا غصبا عليج ترحين
رفل : دفعته مني ..وضليت امسح دموعي بظهر ايدي ..يعني صدك راح تخليني اروح
ايسر : هههه اي ويلا حضري روحج حتى نروح نشتريلج شي للحفله
رفل : فكيت عيوني على وسعهن ..والله صدك تحجي
ايسر : اي قابل اتشاقة ..يلا قبل لا اغير رأيي
رفل : ايسر بيك شي اخاف مريض شي
ايسر : بكيفج ضلي اذا تردين انا رايح
رفل : لا لا هسه بسرعه ابدل ..بدلت وانا ما مصدكه نزلنا سوه وايلاف تغمزلي وانا وراه اسويلها علامه اووك
اسماء : خير وين رايحين
رفل : ما رد عليها طلعنا من وصلنا للسوك يا فستان أأشر علي مايقبل ..ايسر شبيك ولا فستان عجبك
ايسر : ما تشوفينهن شلون كلهن مفتحات ادري شنو قله قماش دمشي امشي ..تريد تلبس هذن كدام وسام
رفل : ياا شبيك يا وسام هن بس نسوان ومن يجي نلبس عبايات
ايسر : شوفي هذاك الفستان عجبني
رفل : باوعت علي جان فستان اسود طويل ردان مقفل من كل الجهات ما بي شي مميز غير الحزام ذهبي.. شنو هذا يابه
ايسر : بعصبية.. رفل لا تتدلعين هذا الفستان تلبسينه ماكو غيره
رفل : يلا يلا عسى ما گونيه اهم شي اروح
ايسر : اهم شي الروحه
رفل : اي طبعا ..اشتريناه ورجعنا للبيت ..اسبوع مر وانا خابصه روحي خبص حسبالك عرسي كل يوم مطلعتلي شي .. بيوم الحفله لبست الفستان رغم جان طويل ومقفل بس مخصر على الجسم وفتحت شعري على طوله ولبست حذاء عالي ﻷن انا قصيرة الفستان طويل جاي البس الاكسسوارات ودخل ايسر
ايسر : عاقد حواجبه.. هيج ترحين ؟؟
رفل : باوعت لنفسي شبيه ..اي بس اخلص البس عبايه فوكاه
ايسر : ما تلبسين هذا الفستان لبسي غيره
رفل : ياااا ايسر شبيك مو انت اختاريته
ايسر : وانا شمدريني هيج يطلع عليج ..نزعي ولبسي اي شي
رفل : ما طلعت هاي والله كول لا ترحين وخلصني
ايسر :اي  لا ترحين احسن
رفل :والله عرفت من البدايه انت ما راضي وجاي تطلع حجج ..خلاص ماكو داعي اروح..شمرت الحذاء من رجلي ونزعت الاكسسوارات وكعدت على الجربايه مكتفه ايدي ..روح اخاف عندك شغل وتتأخر واقفل الباب وراك همين مو تنسى ..كلتها بنتر
ايسر : جر حسرة .. تمام يلا كملي خلي نروح بس اذا تطلع شعره منج كدام اي احد اموتج والله وهاي الكحله مسحيها يلا لا نتأخر
رفل : هي بس كحله لعد لو مخليه حمرة شتسوي
ايسر : افرك حلگج فرك ..ديلا تأخرنا
رفل : اي هسه ..كمت بعصبية. .طلع الروحه من خشمي لو كاعدة وساكته بالبيت احسن .. كملت ونزلت استغربت محد موجود بالبيت.. وين البقية
ايسر : راحو من زمان بالكوسترات
رفل : واناا ؟
ايسر : انا اوصلج لبيت العروس واذا ادك على ايلاف تطلعين مو تبقين هناك
رفل : بتوسل.. خليني ارجع وي ايلاف وعمتي
ايسر : لا ..ترحين وياي وترجعين وياي مفهوم لو اعيد
رفل : تنهدت ﻷن تعبت منه ومن اوامره.. ماشي ****
رهف : اسبوع مر وانا حتى طاقه للبجي ما ظلت عندي طول الوقت بس اصفن امل تروح وتجي للسوك تحضر بنفسها شكد لحت علي اروح وياها بس انا جنت ما طايقه حتى نفسي قررت ما اروح والله ما تحمل اشوفه كاعد يم وحدة ثانيه ويضحك وياها بس كلت اروح اشوف شنو بيها واختارها
امل : يلا رهف كملتي لو لا الكوسترات اجو
رهف : نازله .. لبست بدي وبنطرون سود وفاتحه شعري ..لبست الجبه والشال ورحنا لبيت العروس ..البنات راحن يعدلن بروحهن وانا رحت لمكان  العروس اريد اشوفها .. جانت بنيه كلش حلوة شنو نزاكه شنو جمال ..بلعت ريگ وانا اباوعلها واريده يباوع بوجهي هه
امل : والله هالوسام خوش يعرف يختار شفتيها شكد حلوة
رهف : امممم كلش حلوة .. كلبي ضل يأذيني كلش والدمعه حابستها كوة بس واحد يطخني ابجي ..النسوان بدأت تتجمع على العروس ويصلن على النبي وانا عيني ما شلتها منها ابد .. لحدما سمعت رفل
رفل : اجيت شوي متأخرة عنهم بس شفت رهف صحت عليها ..رررهف ..التفتت علي واجت بأتجاهي حضنتني وتبجي ..يا كلبي والله مشتاقتلج
رهف : وانا هم والله.. طلعت حركه كلبي كلها حاضنه رفل وابجي بقهر اريد اسكت ماكو.. النسوان كلها ضلت صافنه وام وسام عالجت الموقف
ام وسام : خطيه صارلهن هواي محد شايفه الثانيه
رفل : رفعت وجهها ..ولج شبيج كافي
رهف : مشتاقتلج
رفل : وانا هم بس كافي عيب كلبنا العرس مناحه ..شلونج
رهف : وانا امسح بدموعي ..زينه الحمد لله
رفل : سامحيني من دكيتي علي هذيج المرة ما كدرت اسوي شي ..بس من ايلاف كالت اشوفها تداوم كل يوم ارتاحيت
رهف : بأستغراب.. ليش ما تدرين ايسر اجه وحجه وي امل
رفل : لا
رهف : حجه وياها وبعد ما ظلت تحاجيني حتى على شغل البيت
رفل : بأستغراب.. اهاا هو كال احلها بس ما ادري بي جايلكم ..يلا اريد اشوف العروسه قبل لا يدك علي ..التفتت على العروسه .. ما شاء الله تخبل طالعه .. رجعت التفتت على رهف ..بس تدرين على الطبيعه احلى بارزه عيونها اكثر
رهف : عقدت حواجبي.. على الطبيعة ؟ ليش انتي شايفتها
رفل : اي من زمااان بالكليه جانوا يمشون كله سوه
رهف : بعصبية.. لعد ليش ما كلتيلي
رفل : رهف شبيج ..ترى شفت هالشي خصوصية فما حبيت احجي اخاف اخرب عليهم ..شبيج عصبتي
رهف : ماكو شي بس انا احجيلج كلشي يصير وياي وانتي ما تحجين شي
رفل : اسفه والله تدرين بيه ما احب احجي هواي
رهف : مو مهم ..انتي وايسر شلونكم بعده يحبسج بالغرفة
رفل : لا شوي هالايام صاير احسن شوي مو هواي .. امي هم تدك عليج
رهف : اي
رفل : بلعت ريگي.. شلونها
رهف : زينه وهسه جاي تراجع دكتور
رفل : بيها الخير
رهف : بدأت مراسيم العقد وهي مبين عليها الفرحة ..اجه هو وانا كلبي صارت دكاته الف بالدقيقة ..شلون يباوعلها بلهفة وحب وهي همين اول ما كعد باسها براسها ..لعد شكد يحبها ..لبسها الحلقة وباس ايدها والنسوان تهلهل.. هلاهلهن جانت سجاجين و تنغرس بكلبي بحياتي ما تمنيت التعاسه ﻷحد والله بس اليوم تمنيت كل هذا ما يكمل ينتهي يصير شي وتخرب الحفله ما اريد اشوف فرحتهم .. كمل لبس الذهب وكلما يلبسها قطعة يبوسها جان لازم ايدها بقوة وكلها تضحك علي
رفل : التفتت لرهف جانت مو طبيعيه ما اعرف حسيتها مقهورة او مريضه ..رهف حبيبتي شبيج
رهف : ماكو شي شوي اختنكت من الهوسه ..راح اطلع بره
رفل : تردين اطلع وياج
رهف : لا لا لوحدي شوي وادخل
رفل : تمام
رهف : طلعت لطرمه مالتهم جانت هاديه النسوان كلهن جوة ..اجت مرة بأتجاهي
المرة : خاله محتاجه شي
رهف : لا خاله تسلمين بس اختنكت جوه كلت اطلع شوي
المرة : هاا براحتج خاله
رهف : عافتني وراحت وانا اعظامي بدأت تطكطك من البرد والقهر ظلت دموعي تنزل امسح بيهن اخاف احد يجي ويشوفني و ترجع تنزل ..شوي وسمعت صوته
وسام : بأستغراب.. رهف شتسوين هنا
رهف : مسحت دموعي وبصوت مخنوك ..هناك هوسه فأجيت هنا
وسام : صحيح واخاف مو زين عليج وتختنكين
رهف : اي
وسام : رهف بيج شي ليش جاي ترجفين هيج وعيونج ورمانه ... شكلج جنتي تبجين صاير شي
رهف : شوي مريضة
وسام : سلامتج ..لعد انا رايح للبيت اوصلج وياي بدل ما تبقين كاعدة هنا
رهف : اخاف احد من الولد وياك
وسام : لا كلهم رجعوا
رهف : تمام ..عدلت شالي وطلعت وياه ..وهو كل شوي يلتفت عليه
وسام : رهف متغيرة كلش وين رهف التضحك 24 ساعه وسوالفها ما تخلص
رهف : راحت
وسام : بأستغراب.. شنو راحت ؟؟
رهف : التفتت علي .. رهف القديمه راحت
وسام : رهف جاي تخوفيني شكو ..كريم وياج لو امل كولي وانا اتصرف وياهم
رهف : لا ...بعد ما تحملت غطيت وجهي بأيدي وظليت ابجي واشهگ بحركة
وسام : شفتها تبجي وكفت السيارة بسرعه.. رهف ولج شكو شبيج ليش هيج تبجين شصاير منو وياج فهميني
رهف : وانا مغطيه وجهي ما رفعته ابد ..انت وياااي انت
وسام : عقد حواجبه.. اناا ؟؟ شمسويلج
رهف : رفعت وجهي اباوعله ..اي انت ليش خطبت هاا ليشششش
وسام : شنو ليش خطبت غير احب البنيه وخطبتها
رهف : بعصبية.. وانااا شنووو
وسام : بأستغراب.. شنو انتي شنو
رهف : بعياط .. انااا اااحبك وانت ولا يمك جاااي اتعذب وسااام والله جااي اموووت
وسام : رهف شنو هالحجي حب شنو انتي بعدج صغيرة ما تعرفين شنو مشاعرج احتمال ﻷن الفترة المرت عليج جانت صعبه وجنت انا يمج واساعدج حسيتي هيج بس والله هذا مو حب يجوز انجذاب اعجاب بس مو حب صدكي
رهف : وسام انا جاي اموت والله وانت تكول اعجاب لك احبك من زمان مو من هسه وانت جنت تحسسني بهيج شي جنت تعاملني زين ما اعرف شلون اوصلك الفكرة بس انا حسيت انت هم تحبني
وسام : قابل كل وحدة اعاملها زين معناها احبها شنو هالحجي رهف ..بعدين انتي شايفه شكد فرق بينا انا اكبر منج بهواي انتي بعدج مراهقة ومتعرفين مشاعرج عدل صدكي هذا مو حب وكدامج طريق طويل والف من يتمناج بعدج صغيرة وبالبدايه
رهف : كلماته جانت خناجر بگلبي ما كدرت انطق كلمه وحدة ما كدرت انزل نفسي بعد يكول الفرق بينا هواي هن كلهن 5 او 6 سنوات ..مسحت دموعي ..صحيح كلامك
وسام : والله لمصلحتج جاي احجي كلنا مرينه بهالمرحله
رهف : خلاص وسام افتهمت .. رجاءا اريد اروح للبيت
وسام : ماشي
رهف : طول الطريق ساكتين هو كل شوي يلتفت وانا دايره على الجامه .. وصلنا جاي انزل وصاح
وسام : رهف الله يخليج فكري بكلامي وشوفي والله هو الصح ما اريد اخسرج
رهف : لا تخاف خلص مراح افتح هالموضوع مرة ثانيه واعتبر نفسك اصلا ما سمعته .. الله يهنيك ويسعدك وياها .. كلتها ودخلت للبيت بسرعه ..ركضت للغرفة ابجي اريد اسكت ما اكدر صرت اصرخ بصوت عالي ...اناا ليششش حجيت لو باقيه ساكته اشرفلي ليششش ليشش ..ضليت اجر بشعري واصرخ. .. يتبع
#ارجوان