شظايا ورماد

البارت السابع

#شظايا_ورماد

صرت مثل المخبله اريد اسكت ما اكدر لحدما اختنكت ****
ايلاف : ووولج رررفل ..رررفل
رفل : ها شكو شبيج
ايلاف : بسرعه طلعي ايسر ينتظرج بره
رفل : حبابه كليله ترجع ويانه
ايلاف : يا ربي هاي تريد تموتني ولج داك عليه فوك العشر مرات وانا ما منتبهه من صوت الديجي اول ما فتحته حرك عشيرتي كلها ..يلا بسرعه
رفل : بتنره ..ماشي ..لبست بسرعه وطلعتله اول ما كعدت بالسيارة بلشت الرزايل
ايسر : بعصبية.. صااارلي ساااعة ادك وين انتن
رفل : على كيفك ما نسمع من الديجي
ايسر : هسه من افلش الديجي على راسجن هم احد يلومني
رفل : هسه انا شدخلني تصيح بوجهي اصلا بس كالت ايلاف ايسر يريدج طلعت بسرعه
ايسر : استغفر الله ربي
رفل : ضرب على الستيرن بقوة ..بعدين ساق بسرعة بس جان كل شوي ويباوع للمرايا مالت السيارة و لو يسب لو يستغفر اريد افهم شبي هيج عصبي بس ما اكدر احجي كلت خلي اسأله والي يصير يصير ..ايسر شبيك ..التفتت بأتجاهي
ايسر : اكو سيارة ورانا
رفل : شنو ..لا اراديا التفتت وره
ايسر : بعصبية ..لج غبيه لا تباوعين
رفل : يعني جاي يلحكونه لو شنو
ايسر : اي من طلعت من البيت لحد هسه
رفل : بخوف ..لييش
ايسر : شمدريني
رفل : جان عصبي كلش ..اخر شي فتح المجر مالت السيارة وطلع المسدس ..ايسرر شداسوي
ايسر : راح اوكف السيارة واشوف شنو يردون
رفل : بعياط ..لا لا شنو توكف السيارة يكتلونك والله
ايسر : بعصبية.. اي غير افهم شنو يردون
رفل : جان يحجي بعصبيه ويسوق .. لزمته من عكسه بقوة ..لا تنزل والله يكتلوك يعني هم ليش يلحكونك غير يرودن يكتلوك ..باوع على مكان لزمتي ورجع باوع كدام
ايسر : انتي مو تردين تخلصين مني بلكت اموت وتخلصين
رفل : بعصبية.. اناا ردت نطلگ مو تموت
ايسر : بلعت ريگي.. خلص بس وخري ايدج اريد اسوق راح نندعم
رفل : مراح تنزل الهم
ايسر : لا
رفل : كول والله
ايسر : بعصبية.. لا اله الا الله والله ما انزل شبيج
رفل : تمام تمام ..عدلت كعدتي وهو كل شوي يباوع للمرايا والله خفت بوكتها ..ما اعرف خفت علي او خفت على نفسي من بعده شيصير بيه ..وصلنا للبيت بطلعان الروح ..اول ما دخلنا دك على ايلاف دك 5 مرات ماكو ال6 يلا جاوبت
ايسر : بعصبية.. انتي وين صااارلي ساعه ادك ..اهووو لا تكملين ..شوفي اسمعي عدل اول ما تجين روحي لبيت خالي رياض ..اي ابقي عدهم وانا اجي اخذكم ..بدون ليش ايلاف نفذي
رفل : سده منها وهو عصبي
شكله جان يخوف حتى انا خفت ..شوي ودك على ضرغام
ايسر : ها ضرغام شلونك
ضرغام : هلا بيك الحمد لله
ايسر : اكلك اكو سيارة اليوم كله تلحكني
ضرغام : حتى انا ولك بس ما متأكد كلش
ايسر : لا تكولها
ضرغام : والله. .شوف هذا من جماعة سرمد انا متأكد
ايسر : انا هم شكيت بيهم
ضرغام : باجر نروح للملازم ونكله شنو ما رايدين ارواحنا
ايسر : ماشي بس ديربالك على نفسك ترى ما عندي غيرك
ضرغام : ماعنده غيري وهذولاك الناس
ايسر : ههههه اي انت وهذولاك الناس ..التفتت على رفل
ضرغام : لعد لا تلعب بمشاعري وتكلي ما عندي غيرك
ايسر : خاااب ما توولي مو صوجك صوجي انا ..يلا ولي
ضرغام : انا اولي بسيطه
ايسر : هههههه يلا الله وياك
رفل : سبحان الله ستوه جان عصبي شغير حاله هيج بسرعه .. كعد بالصاله وانا هم كاعدة يمه كل شوي يلتفت عليه احس عنده حجي بس ما جاي يكوله ..بهالاثناء دك تلفونه
ايسر : ها ايلاف ..اي جاي انتظريني
رفل : وين رايح
ايسر : اجيبهم من بيت خالي
رفل : ليش ما تخلي عمي يجيبهم
ايسر : لا انا اجيبهم شوي وراجع
رفل : ماشي ..لزمت كلبي جان يدك قوي من الخوف .. ما طول شوي ودخلهم كلهم
اسماء : شكو شصاير
ايسر : مصاير شي المهم هالفترة لا تطلعون ابد ابد لحدما احل المشاكل العندي
اسماء : واذا احتاجينه شي
ايسر : يابه اذا تحتاجون اي شي خابروني بس ابد لا تطلعون
ايلاف : ماشي مثل ما تريد ****
امل : الو ..ها كريم
كريم : بسرعه طلعي من الحفله انا بره
امل : ليش ؟
كريم : تعالي وانا افهمج يلا بسرعه
امل : ماشي ماشي ..رحت بسرعه للسيارة ..خير شكو
كريم : وسام دك علي كال شفت رهف تعبانه بالحفله فأخذتها للبيت روح اخاف تبقى لوحدها ويصير عليها شي
امل : يعني شيصير عليها كريم اريد اكمل الحفله
كريم : بعصبيه.. ااامل هسه وكتج ..حركت السيارة بسرعه لحدما وصلنا للبيت الف حسبه وحسبه ببالي دورت بالبيت ماكو صحت عليها هم ماكو .. رحت ركض لغرفتها لكيتها طايحه بالگاع...رررهف خرررب الحظ
امل : يا هاي شبيها
كريم : بسرعه شلتها وخليتها بالسيارة.. امل عدلي شالها يلا
امل : ماشي..ادك على خاله ام وسام تجي ويانه
كريم : لا ابد لا تدكين على احد ما نريد نخرب عليهم ..وصلنا للمستشفى گبل اخذوها للطوارئ....
رهف : فتحت عيوني..هاي انا وين ..الريحه جانت تموت
كريم : الحمد لله على السلامة
رهف : عقدت حواجبي.. تذكرت اخر مرة من ضليت اصرخ شنو صار بعدها ما اتذكر ..شسوي انا هنا
كريم : لكيناج بالغرفة مغمى عليج ..شنو صار ..اختنكتي من الحفله والهوسه ؟
رهف : هزيت راسي بأي .. شوكت اطلع
كريم : فد شوي خلي ادفع وارجع
رهف : رفل ما اجت
كريم : ما كلت ﻷحد عن الصار
رهف : بتعب .. اي احسن
كريم : يلا راح اكمل واجي اخذج
رهف : ماشي ..طلع كريم شوي ودخلت امل
امل : خير شصاير وياج هاي الفترة كلها  ما عاجبتني
رهف : مو لازم اعجب احد انا
امل : بس الله اليستر منج وراج سالفه مو خاليه انتي
رهف : امل ما ناقصتج والله ****
رفل : مر هالاسبوع واحنه گلوبنا بأيدينا توتر وخوف لا طلعه ولا طبه انا انشغلت شوي بسيف وتدريسه وعمتي ﻷن لا تطب ولا تطلع وين تذب حرگتها اكيد بيه
ايلاف : رفل باجر يبلش الدوام شلون
رفل : ما ادري والله حاجي ايسر وشوفي
ايلاف : حاجي انتي مو جنها علاقتكم تحسنت شوي
رفل : انتي كلتيها شوي وعلى فكرة هالايام بس احاجي يگب بوجهي
ايلاف : هو هالايام كلها عصبي
رفل : تتوقعين لزم الي يراقبونه مدري يتبعونه
ايلاف : ما اتوقع ﻷن لو لزمهم ما تلكينه متوتر هيج
رفل : الله يعديها على خير
ايلاف : آمين
رفل : جاي نحجي ودخل ايسر
ايسر : وين الغده ميت جوع
ايلاف : اي هسه اصبه
رفل : كمت انا وايلاف نحضره حطينا وبدينه ناكل ..بس شكله جان مرتاح احسن من قبل كم يوم كلت احجي هسه احسن .. ايلاف باجر يبدي دوامج مو
ايلاف : بلعت ريگها .. اي باجر بس يجوز ما اداوم
ايسر : لا داومي المشكله نحلت
رفل : صدك والله
ايسر : اي
رفل : باوعت لأيلاف وغمزتلها .. درت على ايسر شفته يباوعلنا رافع حاجبه .. انحرجت ونزلت راسي
اسماء : اي ومنو طلعوا
ايسر : واحد من جماعتهم محبوس يمنا ومعترف عليهم والاغبياء يلاحكوني يردوني اغير بالاعتراف مالته اخر شي قبضنا عليهم وانسدت السالفة
اسماء : اهاا
ايلاف : يلا الحمد لله ما سوولك شي
ايسر : اي الحمد لله
رفل : خلصنا ..كملت شغلي وصعدت فوك ..هو جان كاعد على الجربايه ..طلعت الملابس اريد اغسلهن صاح علي
ايسر : رفل  رفل : هاا
ايسر : ليش غمزتي ﻷيلاف
رفل : هاا هيج شغله بينا
ايسر : رافع تك حاجب ..شغله بينجن !!
رفل : اهووو ايسر الا تعرف كلشي
ايسر : على منو هاي الاهووو
رفل : يابه عليه بس خلصني اريد اروح اغسل الملابس
ايسر : روحي..روحي ****
رهف: اول ما رجعنا من المستشفى قررت انساه ليش انهي صحتي وشبابي علمود واحد ما معبرني وفوك هذا خطب يعني كل الطرق الي بيني وبينا انسدت ..بالبدايه ذبيت حيلي كله بالشغل
عزلت البيت كله واغسل المواعين وارتب كل شوي اسوي شغله ما اريد اشغل تفكيري بي ابد ..انهلكت هلاك حتى كريم يحجي عليه وامل متونسه ﻷن ما تلزم شي ..لحدما بدأ الدوام وقررت اشغل نفسي بالدراسه واحقق حلمي وحلم بابا ..جنت ابتعد عن اماكن الموجود بيها كلش ما اريد التقي بي ابد كله كاعدة بالصف ادرس ..كالعادة جنت كاعدة برحلتي اراجع ودخلت علية بنيه
اسراء : هلو رهف
رهف : بأستغراب.. هلا اسراء مو
اسراء : اي انا .. اجيت اسألج شي
رهف : شنو ؟
اسراء : صدك استاذ وسام خطب ؟؟
رهف : اي
اسراء : ياا ربي يعني بعد ماكو امل كلش
رهف : لا ماكو
اسراء : هي نفسها البنيه الحلوة الكلتي عليها
رهف : عقدت حواجبي .. يا بنيه ؟
اسراء : انتي مو كلتي يحب بنيه تخبل ويموت عليها
رهف : للحظة انصدمت ..انا من حجيتها جنت اجذب عليها بس كل حجايه حجيتها تحققت ..معقولة يا ربي
اسراء : شنو معقولة
رهف : ها ماكو شي ..اي نفسها الي كتلج عليها
اسراء : يلا باي بس حبيت أتأكد
رهف : باي .. يا ربي دخيلك والله لو احجي هالسالفه لمخبل ما يصدك بيه .. خلصت الدروس وجاي اطلع للبيت وسمعت صوته صاح علي
وسام : رررهف
رهف : يمه كلبي كام يركص ..لزمت صدري ..والله يا كلبي طلعت مو كفو غير كلنا ننساه شو بس سمعت صوته كمزت ..التفتت هو جان يقترب رسمت أبتسامه على وجهي
وسام : هلا رهف شلونج
رهف : الحمد لله تمام
وسام : ان شاء الله دوم ..تعالي خلي اوصلج
رهف : لا ماكو داعي هو هذا بيتنه
وسام : ميخالف بطريقي انتي
رهف : لا شكرا استاذ ماكو داعي
وسام : صرت استاذ هسه ؟
رهف : رجاءا وسام الله يخليك ابتعد عني .. انت وانا نعرف كلش زين ملازم نبقى قريبين هيج ..ابتعد تسهل الامر علي اكثر
وسام : بتنهيده.. ماشي مثل ما تردين
رهف : شكرا ..رحت ركض اريد ابتعد قدر الامكان عنه وهذا كلبي ما بطل يدك بسرعه عبالك عنده سباق ****
رفل : مرت ايام واحنه وضعنا مثل ما هو ساعه نحجي مثل الاوادم ساعه نتعارك بس الي تغير جنه نكعد سوه انا وهو وايلاف وسيف ونخلصها شقه وضحك حتى سيف تغيرت نفسيته ...
ايلاف : بدلع ..رفل
رفل : يبوو شكد اكره هالاسلوب احجي شعندج بلا ما تتماوعين
ايلاف : باجر عندي سفرة واريدج تحاجين ايسر حبابه
رفل : لا يمه اخاف
ايلاف : لا والله هو يقبل اذا انتي حجيتي
رفل : منو كلج يقبل
ايلاف : انا اكلج والله هو تغير من اجيتي للبيت والله كلنا لاحظنا اصلا تدرين
هو حتى على الغده ما جان ياكل ويانه بس من اجيتي انتي ظل يسولف و يتشاقه ويانه اصلا انا بحياتي مشايفته يضحك
رفل : خااب ما ترحين كال مايضحك اخاف سنونه جانت مسوسه والله يا الله
ايلاف : شوفي حتى انتي تغيرتي ..هاي الخاب مالته انتي جاي تاخذين منه وهو ياخذ منج
رفل : ولج والله دوختيني هي ملابس واخذ منه وياخذ مني
ايلاف : اهوو رفل بطلي تحشيش حبابه كليله هو هالايام ما يرفضلج طلب
رفل : والله اسويلي عركه يلا يوافق وهاي صارلي شكد الح علي اروح لبيتنا ما يقبل
ايلاف : عفيه لخاطري انا اخيتج عفيه
رفل : موافقة بس اليوم تسوين حشو الدولمه وانا الفها ﻷن ما اعرف المكونات شنو
ايلاف : اي غير تدللين ..بس والله اذا ما وافق اطلع الحشو من خشمج
رفل : تمام ..خطيه كامت ركض سوت الحشو وانا اضحك عليها وكل شوي اباوع للباب اخاف عمتي تجي وترزلنا
ايلاف : يلا كملت
رفل : عاشت ايدج .. تربعت خليت الغراض كلها يمي وكعدت الف بالدولمه مو كلش خبرة بيها انا بس قبل جنت اساعد امي باللف .. انا مبسطه ودخل علي ايسر
ايسر : صايرة نادرة
رفل : شسوي هاي اوامر الوالده
ايسر : عاد سويتيها زينه لو تنشمر بالزبل حرامات
رفل : تدري الصدك الحشو سوته ايلاف بسريه ترى محد يدري
ايسر : ههههه لا اذا ايلاف زين حسبالي انتي
رفل : بعصبية.. تقلد علي مو
ايسر : ههههه لا يابه حشاج ..خلي اساعدج
رفل : ليش تعرف ؟
ايسر : قبل جنت كاعد لوحدي اكيد انا اطبخ قابل اظل جوعان
رفل : اهااا حسبالي البنات الي تجيبهم يطبخون ..طلعت مني بعفوية
ايسر : بعصبية.. رررفل.. اشتغلي وانتي ساكته
رفل : تمام ..بعدها سكتنا ما حجينا شي..واحنه دنشتغل دخلت عمتي
اسماء : والله خوش زلم عدنه ..كاعد تلف الدولمه حضرة الضابط ؟
ايسر : ليش عندج مانع ست اسماء
اسماء : لا يابه احنه ما نكدر نعترض
رفل : راحت وعافتنا وانا خايفة لا تصير عركه بينهم ولحد الان ما اعرف سبب كرهه الجبير ﻷمه ..خلصنا حطيتها على النار حسب تعليمات ايلاف وصعدت فوك ..ايسر جان متمدد على الجربايه وعاقد النونه ..يبووو هذا  بس لا زعلان علمود هالحجايه .. زعلان ؟
ايسر : شتكولين ؟
رفل : والله كلتها بعفوية مو قصدي شي والله
ايسر : لعد راضيني
رفل : عقدت حواجبي.. شلون؟
ايسر : وهو يطبطب على الجربايه.. تعالي هنا
رفل : لا ابد والله لو اموت ما اجي
ايسر : ما اسويلج شي بس تعالي
رفل : اخاف انت مو امان
ايسر: رافع تك حاجب.. انا مو امان مو صارلج
اقل السنه وياي بنفس الغرفة وما مسويلج شي هسه صرت مو امان
رفل : اوووه يابه مو قصدي تمام تمام راح اجي يمك
ايسر : بعصبية.. ما اريد بعد
رفل : انا اريد .. سوالي مجال واجيت تمددت يمه ..هاا هسه ارتاحيت
ايسر : اي
رفل : يلا الله وياك ..جاي اريد اروح سحبني
ايسر : وووين بعدني ما راضي ترى
رفل : شوكت ترضى لعد .. كعد يباوع بعيوني ..وانا ضليت ابلعم .. استحي من هيج يباوعلي .. احس حرارتي صعدت رفعت عيوني للسگف
ايسر : وين موديتهن رجعيهن
رفل : بأستغراب.. شنو هنه
ايسر : عيونج رجعيهن الي
رفل : رجعت حطيت عيني بعينه .. يبووي ضليت اعرك من التوتر ..لزم وجهي بأيده وبأبهامه يشمي على خدي روحه وجيه
ايسر : من شنو خايفة
رفل : مخايفه
ايسر : لا خايفة
رفل : ما اعرف متوترة بس ..يحجي ويحرك بأصبعه على خدي ..رفع ايده لشعري وفتحه
ايسر : تدرين ذابحتني بهالكعكة شعرج حلو دائما خلي مفتوح
رفل : هزيت راسي بأي.. ما اعرف ليش هلكد مستسلمه شعور خوف وتوتر و فرح كلهن اجتمعن بنفس الوقت ..ظل يمرر اصابعه بين شعري ياخذ خصله يشمهه ويرجعها ..جنت مستغربه تصرفه
ايسر : رفل شوكت
رفل : بأستغراب.. شنو شوكت ؟
ايسر : تعرفين قصدي مكافي صارلنا هواي
رفل : بلعت ريگ وضليت امسح كصتي من العرك توترت كلش ..بهالاثناء سمعنا صوت دكه موبايل بالبدايه غلست كلت الصوت من بره بس الدكه ما بطلت ..جان صوت موبايل كلاكسي وايسر عنده ايفونات اثنين لذلك استغربنا ...فز ايسر عاقد حواجبه
ايسر : هالصوت منين ؟؟
رفل : ما اعرف .. كام من الجربايه يتبع الصوت منين جاي اخر شي وكف يم الكنتور
ايسر : بعصبية.. الصوت جاي منا
رفل : سويتله بأكتافي اشارة ما ادري .. فتح الكنتور وبدأ ينثر بالملابس خانه وره خانه ..الى ان لگه موبايل بين ملابسي ..باوعلي بشك و عاقد حاجبه
ايسر : هذا منين رفل
رفل : فتحت عيوني على وسعهن.. منين هذا وشيسوي بملابسي .. ما اعرف
ايسر : بعصبية.. شنوووو ما تعرفين شيسوي بملابسج هذاااا
رفل : والله ما اعرف اصلا اول مرة اشوفه
ايسر : اول مرة ..بعصبية.. عليه هالحجي رفل عليه انااا
رفل : وروح ابويه ما اعرفه ولا شايفته ..بهاللحظه دك مرة اللاخ..ضليت اباوعله ويباوعلي
ايسر : هذا مكتوب ميثم ..منو ميثم
رفل : بعصبية.. جاااي اكلك ما شايفه التلفون بعد منين اعرف منو ميثم
ايسر : ماشي راح افتحه بس تكولين الو كلمه ثانيه اكسر راسج مفهوم
رفل : بلعت ريگي وهزيت راسي بأي.. فتحه اول ما كلت الو ..صاح الثاني ..رفل وينج ظل بالي حبيبتي صارلي ساعه ادك عليج !!!..يتبع
#ارجوان