شظايا ورماد

البارت الحادي عشر

#شظايا_ورماد

رياض : مدري شبيهم ولد العم الصبح اقنع بوسام وهسه اواسي هذا
ام وسام : عين وطكتهم
رهف : بأستغراب.. ليش وسام شبي
ام وسام : عمه غير طلگ اليوم من الصبح
رهف : حطيت ايدي على حلگي. .ياااا ليش
ام وسام : والله يمه طلعت روحه هالبنيه انا من اول كتله بس هو مجلب احبها ما احبها .. يا عمه طلباتها ما تخلص كل ساعه تريد شي وهو ليل ونهار يشتغل والله حتى شكله تغير وضعف وهي ما تبطل كل طلعه وياه مشتريه شي بهذيج الحسبه يا قطعه ذهب يا جنط واحذيه يا ملابس كل هذا وكلنا ميخالف حقها بس هسه كلبت علي تگله اريد بيت لوحدي ما اريد اعيش وي اهلك حجه وياها وهي ماكو كللها ما عندي تكله دبر روحك ..البارحه اخر شي كلتله يا بيت لوحدي يا تشتريلي سيارة حالي حال بنات عمي كلهن عدهن سيارات ..الولد انخبص وصار عصبي حجايه منا وحجايه منا كلتله يا بيت يا سيارة يا تطلگني ..اخر شي هسه الصبح راح جاب سيد وطلگہا
رهف : عمتي تحجي وانا فاكه حلكي ما انكر فرحت هواي بداخلي بس بنفس الوقت زعلت علي وسام ممأذي احد ما يستاهل الي يصير وياه .. شوي وطلع عمي وكريم وياه ..حطيت الغده وكعدوا تغدوا ويانه عمي كل شوي يحاجي كريم ويگله احسن كشفتها ولا تبقى وياها وانت مخدوع بيها وام وسام تصبر علي ..لليل كملت ترتيب البيت وصعدت فوك لكيت 5 مكالمات من وسام..عاااا هذا شيريد وانا لازمه النقال دك وهم هو ..يبووو هسه ارد لا ..خلي النغمه شوي تطول يلا ..من قربت تخلص رديت ..الو
وسام : مو صارلي ساعه ادك وينج
رهف : مشغوله جنت رايد شي استاذ
وسام : استاذ !!
رهف : اي استاذ ما كلت رايد شي
وسام : سمعتي مو
رهف : سويت نفسي ما ادري ..بشنو استاذ ..ادري هالكمله تغثه لذلك كل شوي اعيدها
وسام : انا فسخت
رهف : اي سمعت ..كلتها بلا مبالاة
وسام : اهاا ويعني هالشي ما يهمج
رهف : لا اكيد ميهني استاذ
وسام : اهاا ..تمام لعد انا افكر ارجعها وحبيت اخذ رأيج
رهف : ادري بي يريد يستفزني ﻷن ما انطيته وجه .. اي استاذ شكو بيها رجعها هي حب 3 سنوات مو لعبه
وسام : صاح بعصبية.. رررهف
رهف : انا لازمه ضحكتي گوة .. خير استاذ طرشت اذاني
وسام : ماشي رهف ماشي
رهف : بعدني ما حاجيه وسده بوجهي ..ههههههه خربت ضحك علي شكد استفزيته ..اي احسن حتى يعرف انتي مو سهله ****
رفل : ضليت بغرفه ايلاف ما اطلع منها الا لضرورة وعمتي كلما تشوفني تشمر حجايه شكبرها عليه واغلس عنها ﻷن اذا حجيت ما نخلص
شفت سيف طلع من غرفته من اجيت وانا ما شايفته كلش متغير ضعفان وجوة عيونه سواد ..بأبتسامه.. هلا سيف شلونك ..من شافني ارتبك
سيف : هاا هلو الحمد لله
رفل : شنو رأيك ندرس صارلنا هواي مقارين
سيف : لا اصلا صرت اعرف اقرأ واكتب
رفل : ميخالف حتى تتقوى اكثر
سيف : لا ما اريد
رفل : زين نلعب
سيف : لا ما اريد اريد اروح انام
رفل : استغربت تصرفاته كلت القرايه يجوز يكرهها بس اللعب ابد كلش يحب احد يلعب وياه .. يجوز عمتي حاجيه عليه كدامه وحسباله انا وحده مو زينه ..جانت ايلاف تريد تطلع للكليه صحت عليها ..ايلاف
ايلاف : هاا
رفل : حبابه من ترجعين مري على اهلي جيبي اغراضي صارلي كم يوم انتظر ومحد جاب شي
ايلاف : تمام .. رحت للدوام ومن رجعت مريت على بيت خالي ..ادك بالباب ومحد يرد ..خررب حمستني الشمس ..جاي احجي وانفتح الباب
كريم : بأستغراب.. هلا ايلاف خوما صاير شي
ايلاف : هلا بيك لا مصاير شي بس ردت اغراض رفل
كريم : اهاا ..تفضلي تفضلي عذريني انا كلت اجيبهم بس مصار عندي وقت
ايلاف : لا عادي
كريم : هسه اصيح لرهف تجيبهم هي  محضرتهم اصلا
ايلاف : اهاا اووك .. انتظرت شويه واجت رهف
رهف : هلا شلونج
ايلاف : الحمد لله انتي شلونج بالمراجعه
رهف : زينه ..هاج هاي الجنطه تعبناج
ايلاف : لا عادي ماكو تعب ..يلا مع السلامة
رهف : الله وياج
كريم : انتظري انا اوصلج
ايلاف : لا ماكو داعي
كريم : الجنطه ثگيله ما تكدرين عليها لوحدج .. يلا امشي
ايلاف : تمام ..طلعت انا وياه خلصها سكته ..اباوعله شكله تعبان وحتى شعره ممرتب مثل كل مرة
كريم : هاي وصلنا ..انطيتها الجنطه .. سلميلي على رفل
ايلاف : يوصل وشكرا تعبتك
كريم : لا ماكو تعب ..
ايلاف : دخلت للبيت جانت امي كاعده
اسماء : هاا راح تسافرين
ايلاف : هههههه لا يمه جايه من باريس
اسماء : وعمه احجي عدل منين هالجنطه
ايلاف : بتنهيدة.. هاي اغراض رفل
اسماء: امممم هنوب البنكلادش مالتها صرتي والله يا الله
ايلاف : عفتها ودخلت جوة ..هاج خيه هاي جنطتج
رفل: اي رحم الله والديج .. رتبت اغراضي وطلعت لگيت ايسر يم الباب..هزيت راسي بمعنى شكو
ايسر : اريد احجي وياج
رفل : اي احجي
ايسر : تعالي فوك
رفل : كتفت ايدي..ما اصعد فوك وياك تريد تحجي احجي هنا
ايسر : بعصبية.. ررفل جاي اكول فوك
رفل : وانا اكول هنا يعجبك اهلا وسهلا ما يعجبك طلگني مو مشكله
ايسر : لا اله الا الله .. بعصبية.. ما اررريد حتى احجي وياج
رفل : بعد احسن
ايسر : ولج انتي شنو ناويه على موتج
رفل : جان يحجي بعصبيه ويأشر بأيده ..يمه انا خفت دخلت للغرفة وسديتها
***
ايسر : مر اكثر من شهر واحنه على نفس الحاله ما تقبل نحجي واذا حجينا نتعارك اريد افهمها انا مصدكها بس مجاي تنطيني مجال ابد ...
ضرغام : وهسه شلون
ايسر : ما ادري تعبت والله
ضرغام : اي اكعد وياها وفهمها الموضوع كله ترى هيج وهيج واي رجال بالعالم راح يعصب من يشوف هيج شي كدامه
ايسر : انت ليش ما جاي تفهمني ..مستحيل تسامحني والله تطلع من البيت كله ﻷن بعد ماكو حجه عليها
ضرغام : لگيتلك فكرة
ايسر : اي غرد صارلي ساعه احجي اريد حل
ضرغام : تخطب غيرها
ايسر : من امداك وامده فكرتك العوجه مثلك هو انا قبل ما اقبل اخطب الا هي مو هسه هي عندي واخطب غيرها
ضرغام : لا ولك افهم الفكرة شنو
ايسر : شنو كوول ****
رهف : اليوم اخر امتحان رغم هالفترة مرت بصعوبة كريم طول يلا رجع لحالته الطبيعيه وجنت المسؤوله عن البيت بس الحمد لله عدت سلامات وجاوبت بأغلب الامتحانات اجابه تامه ..جانت الامتحانات بنفس مدرستنا بس الكادر غيره ..طلعت وانا احل الاسئله وي البنات .. جان اسمع واحد يصيح علي
وسام : رررهف
رهف : التفتت علي ..يمه گلبي هذا شيسوي هنا ..تقرب بأتجاهي
وسام : شلونج
رهف : تمام الحمد لله
وسام : يلا امشي اوصلج للبيت
رهف : ماكو... بعدني ممكله قاطعني
وسام : اشششش امشي بلا صوت
رهف : رفعت تك حاجب .. شنو هو امر لو شنو
وسام : اي امر واذا ما مشيتي بالطيب امشيج بالقوة وتعرفيني
رهف : تمام ماشيه ما الها داعي القوة .. صعدت وياه للسيارة اول ما حرك سألني
وسام : شلونج بالامتحانات ان شاءالله مو صعبه
رهف : لا زينه مو صعبه .. جنت احجي واباوع كدام ما اباوعله
وسام : اي الحمد لله.. انا هالفترة ما دكيت عليج حتى لا اشغلج عن الامتحانات
رهف : اصلا تلفوني قافلته
وسام : اهاا
رهف : وكف السيارة فجأة .. التفتت علي شكو ليش وكفت .. باوعلي وحجه
وسام : انا حجيت وي امي علمودج وكالت تخلص امتحانات ونخطبها
رهف : بأستغراب.. شنو وهيج بلا ما تاخذ رأيي بكيفك تتصرف
وسام : بأستغراب..انتي مترديني يعني
رهف : شوف وسام انا لا خطه بديله ولا لاعب احتياط حتى تجيني بس تحتاجني ماشي وبعدين الفرق بيني وبينك هواي لو نسيت وانا صغيرة والحياه كدامي ليش حتى اقبل بيك
وسام : اهاا هيج صار الحجي يعني بطلتي تحبيني ؟؟
رهف : اي بطلت من زمان
وسام : بس عيونج تكول غير شي
رهف : بعصبية.. شتكول بلا
وسام : تكول ما نسيتي بعدج تحبيني
رهف : اهاا هسه صرت تقرأ عيون لعد قبل ما قريتهن
وسام : رهف رهف رهف كافي دخيل الله ادري تأذتي بسببي بس كافي عاد مو شلعتي گلب گلبي
رهف : رجعني للبيت بسرعه
وسام : خلي نتفاهم بالبدايه وبعدين ارجعج
رهف : ما اريد اتفاهم وياك بعد كتلك انا نسيتك وبديت حياتي ..انت هم ابدي حياتك
وسام : ليش ما نبدي سوه
رهف : ما ترهم
وسام : ليش ؟
رهف : هيج بعد ما ترهم قبل مو مثل هسه هواي شغلات تغيرت
وسام : اهاا ..ماشي مثل ما تردين
رهف : بعد ما حجيت شي وصلني للبيت وراح بلا ما يحجي .. هيج احسن حتى يعرف مو شوكت ميريدني يجيني.. بسيطه بعدنا بأول الطريق وسام افندي
****
رفل : جنه كاعدين كلنا على الغده
سيف : الحمد لله
ايسر : ما اكلت شي ارجع اكل
سيف : لا شبعت كافي
رفل : راح غسل ودخل لغرفته وسدها
ايسر : هذا شبي هيج ترى ما عاجبني كلش لا يحجي ولا اكله مثل العالم
اسماء : ما بي شي
ايسر : هو شنو الي ما بي ما تشوفينه
اسماء : الولد جاي يكبر اكيد يتغير قابل يبقى طفل
ايسر : والله وضعه ما يطمن .. المهم اريد احجي وياكم بموضوع مهم
اسماء : شنو ؟؟
ايسر : راح اخطب باجر
رفل : من حجه هيج طاحت الخاشوگه من ايدي وضليت صافنه علي ..هذا يحجي صدك ..ايلاف غصت بالاكل وعمتي تهلهل ما مصدكه
اسماء : واخيرا راح افرح بيك والله ما مصدكه ..منو هاي
ايسر : اخت صاحبي
اسماء : هسه احضر روحي لباجر مو
ايسر : اي
اسماء : لعد راح اتصل على خوالك ونسوانهم يجون ويانه
ايسر : لا ماكو داعي ..انا وياج نكفي
اسماء : براحتك ..يلا خلي اكوم احضر روحي
ايسر : كامت امي لغرفتها وهي تهلهل ادري بيها هيج تسوي عناد برفل .. اما رفل اباوعلها عيونها راح يطلعن من وجهها صارت تخوف .. يلا انا اترخص هم احضر روحي ..
ايلاف : راح ايسر وانا ما اعرف شنو احجي اباوعلها مكورة ايديها بعصبيه كوة لازمه نفسها .. رفل يولي انتي مو كلتي تردون تتطلگون ..انا حجيت هيج وهي طفرت وراه فوك
رفل : رحت وراه ركض ودفعت باب الغرفة بقوة
ايسر : بأستغراب.. دكي الباب على الاقل
رفل : طلگني مو تريد تخطب طلگني لعد
ايسر : لو تموتين ما اطلگج
رفل : بعصبية.. شنو لو اموت انت مو كلت فترررة واطلگج
ايسر : ما اطلگ انا من البدايه كتلج تبقين معلگه للموت ما اطلگج فاهمه
رفل : بعصبية.. هو شنو بكيفك تطلگ يعني تطلگ انا مو لعبه عندك
ايسر : ما اطلگ ما اطلگ
رفل : بعصبية.. ايسرر مو انا الي تجي على راسي مرة ثانيه فاهم لو لا
ايسر : ليش انتي حاسبه نفسج مرة .. راح يصيرلنا سنه وانا كلشي مشايف منج على الاقل اشوف حياتي اكون عائله
رفل : ررروح شوف حياتك منو لازمك وكون عائله على اساس شلون زوج هم راح تطلع مرتك خاينه وتطردها من البيت
ايسر : رررفل كااافي وهالموضوع ينسد طلاگ ماكو و راح اخطب باجر غصبا عن اليقبل والمايقبل
رفل : اهاا هيج صارت لعد اشوف منو يبقالك بالبيت
ايسر : دطلعي للباب اذا ما احش رجليج حش
رفل : اذا زلمه حشهن .. درت اريد اطلع من الغرفه لزمني من عكسي بقوة
ايسر : بعصبية.. انا كم مرة كتلج لا تعيدين هالكلمه تردين اراويج الزلمه شيسوي
رفل : عوفني
ايسر : اطلعي وانا اروح لكريم اكله شنو صار بالتفصيل وهو يتفاهم وياج
رفل : بلعت ريگي. . وانا كل هالمدة حسبالي صدكت انا ما مسويه شي
ايسر : صدكت ما صدكت راح احجي لكريم كلشي هو يريد يصدك او لا براحته
رفل : انت واحد حقير واستغلالي بس راح ارجعها الك يا ايسر ..اذا ما اخليك توديني بيدك ﻷهلي ما اطلع انا رفل ..نترت ايدي منه وطلعت .. بسيطه يا ايسر بسيطه .. اليوم كله خلصته بالغرفة وعمتي على العناد تفتح باب الغرفة وتهلهل ..شفت ناس حقيرة بس مثلها مشايفه .. ثاني يوم راحت هي وياه حتى يخطبون البنيه.. بس انا شنو نار وتشتعل جواي اريد شي يطفيها ماكو ..على اعصابي ضليت كاعده الى ان اجو ..ايلااااف. .ايلااف
ايلاف : شكو شبيج
رفل : روحي سألي امج شلونها خطيبته يلا بسرعه
ايلاف : هسه ما افتهمت انتي غيرانه لو ما تردينه لو شنو
رفل : دروحي هسه سألي
ايلاف : رايحه رايحه وامري لله
رفل : طلعت ايلاف وانا اروح واجي بالغرفة ..هاي وين صارت .. شوي ودخلت ..هاا شنو شكالت
ايلاف : ما ادري الوضع مدري شلونه امي مطنكرة ومن اسألها گوة ترد عليه
رفل : اي ما كالتلج اي شي
ايلاف : من كتلها شلونها حلوة لو لا كالت اي حلوة
رفل: حلوة!! .. اي وبعد
ايلاف : مكالت شي مفيد بس الاسبوع الجاي الخطوبة
رفل : طفرت من مكاني ..لييش شدعوة مستعجلين
ايلاف : والله ما ادري
رفل : وهسه شلون ايلاف دبريني خلي يطلگني والله ما اتحمل انا احتمال تلكونه هو وياها بيوم العرس مكتولين
ايلاف :ولج شنو مجرمه انتي
رفل : اي مجرمه بس خلي يجيبها
و اراوي الاجرام شلون يصير اذا ما اخلي يعض اصابعه ندم
ايلاف : بأستغراب.. شناويه ولج
رفل : كل شر وداعتج
ايلاف : يمة الله يستر منج ....
رفل : عده هالاسبوع بالويلات اريده يخلص ماكو ..بيوم الخطوبة جان ستوه مخلص ريوك وصعد لغرفته ..صعدت وراه وبيدي فستان من الي جابتهم ام وسام بجهازي .. دخلت علي بدون استأذان
ايسر : بأستغراب.. رايده شي
رفل : اي شوكت نروح للحفله
ايسر : رافع تك حاجب ..نروح !!.. منو الي يروح ترى بس انا وامي
رفل : لا عيب غير مرتك هم تجي ما يصير شوف حتى محضرة فستاني ..انا حجيت هيج وهو طكها ضحكه شعلوها ..حط ايدي بجيوب البجامه وتقدم اتجاهي
ايسر : انتي كل عقلج اخذج وياي ترى ادري شيدور براسج لا تتعبين نفسج وفوك هذا شنو هالفستان الخياط مخلص القماش مالته لو شنو
رفل : بعصبية.. هسه شنو يعني
ايسر : يعني ما ترحين ..يلا طلعي اريد احضر روحي
رفل : وهو جاي يحجي شفت البدله مالته معلگه ..بأبتسامه.. ماشي مثل متريد .. خليت الفستان بالغرفة وطلعت رحت ركض لغرفه ايلاف جبت صبغ اظافر ورجعت اله
ايسر : خير اكو شي بعد
رفل : اشرت على الفستان..نسيته
ايسر : بتنهيدة.. تعالي اخذي
رفل : دخلت جاي اخذه شفت ايسر داير على الكنتور ديطلع ملابس ..فتحت الصبغ ورحت يم البدله فرغت الشيشيه كلها عليها
ايسر : التفتت واشوفها لطخت البدله تلطخ .. خرررب ولج شسويتي
رفل : هو صاح وانا فلتت الدرج سويته خطوتين وهو وراي دخلت للغرفة وقفلتها عليه
ايسر : بعصبيه ..رررفل افتحي الباب لا اكسره
رفل : تعيش وتاكل غيرهااا هههههه
ايسر : اطلعي رفل لا اكسر الباب على راسج
رفل : بعدنا بالبدايه ليش عصبت بعدك مشايف شي والله اذا ما اخليك تطلب الطلاگ
ايسر : هيج صاارت بسيطه لعد ظلي هنا اشوف شكد راح تبقين  يعني الزمج الزمج
رفل : ما انكر جنت خايفة بس جنت فرحانه مثل الماي البارد ونزل على گلبي .. ضليت للعصر قافله الباب حتى لا غدة ولا شي
ايلاف : فتحي الباب عوبه
رفل : الدار امان
ايلاف : ههههه اي امان
رفل : فتحتلها الباب وهي ميته ضحك
ايلاف : ولج شسويتي خطيه لبس بدله ثانيه قديمه
رفل : يولي ليش ما يخليني اروح للحفلة
ايلاف : على اساس انتي راح تكعدين عاقله
رفل : لا والله جنت ناويه اسوي مصايب من مصايب بس كلها ما صارت
ايلاف : وانتي ما قصرتي .. يلا تعالي اكلي ترى ما اكلت منتظرتج
رفل : اي عفيه بالسباعيه .. كملنا اكل كعدت يم ايلاف وسيف على التلفزيون  بس عقلي مو يمهم
فكري كله هناك اكول هسه لبسها الحلقة وكلها كيك شنو سوو ركصوا ضحكوا ..احس عقلي وكف من كثر التفكير ..خلص الفلم وانا بعدني كاعدة ايلاف دخلت للغرفة وسيف ظل كاعد بس ما يحجي بس يباوعلي وينصي راسه. .بس اريد افهم شبي.. بهالاثناء دخل ايسر وانا افلت طفرت من فوك القنفة جاي اركض للغرفة ما لحكت  لزمني
ايسر : اااخ ولج لزمتج اليوم اعلمج تعالي
رفل : ايسر عووفني جاي تأذيني
ايسر : اعوفج !! .. كل عقلج تحجين
رفل : يحجي ويسحل بيه اريد افلت روحي ما اكدر لحدما وصل لغرفته دخلني وسد الباب
ايسر : هي هاي سوايه تسوينها ..ولج خربتي البدله كلها
رفل : اي ليش ما خليتني اروح
ايسر : اي مو ادري بيج ما تكعدين عاقله
رفل : ايسر حباب طلگني تخلص مني واخلص منك
ايسر : لا اريد اخلص منج ولا اخلصج مني
رفل : بعصبية.. لعد اتحمل الي يصيرلك
ايسر : تهدديني
رفل : اي اهدد وبكيفك بعد لا تجي تحاسبني كل شوي
ايسر : رفل لحد هسه مطول بالي وياج من تطگ فيوزاتي محد يوكف كدامي
رفل : تطك فيوزاتك وانا هم تطك فيوزاتي ونكهرب البيت كله .. جاي احجي ودك التلفون
ايسر : يلا طلعي هاي الحب جاي تدك
رفل : دفعني بره وسد الباب ..يااا هذا صدك يحجي ..حطيت اذني على الباب وسمعته
ايسر : بصوت عالي. .هلا حبيبتي هلا كلبي ..وانا هم اشتاقيتلج .. يا عمري انتي والله طالعه تخبلين اليوم ..ههههههه والله عليج سوالف
رفل : من العصبية جانت اكو تحفيه بالممر شلتها وركعتها بالباب .. ونزلت جوة بسرعه
ايسر : جاي احجي وانضرب شي قوي بالباب كمزت اشوف شكو لكيت المزهريه مفلشه ..ام السوادين ولج انا الج .. رجعت للمكالمه .. هاا شوف افكارك اخر شي راح تفلش البيت على راسي ولك هاي مخبله طلعت
ضرغام : والله انا الرايح بيها بس ضحكتك طرشت اذاني .. وعلى فكرة ترى هاي من الحب والغيرة تسوي هيج المفروض تشكرني
ايسر : خاب دروح
ضرغام : يلا باي ختيبي ماما تصيحلي
ايسر : ههههههه شوف هذا مصدك روحه دروح بابا روح ....
رفل : ضل كلما يشوفني يخابر بخطيبته وكله حبيبتي وضحك ولعبان نفس حسيته عناد بيه يسوي هيج ..توسلت بأيلاف حتى تحاجي امها علمود اشوف صورة خطيبته تكلها مماخذين صورة ايسر ما قبل .. جنه كاعدين وهو نزل متشيك على اخر حبه
ايلاف : وين رايح العشا جاهز
ايسر : لا طالع وي خطيبتي اليوم
ايلاف : اهاا ما عندك صورة الها اريد اشوفها
ايسر : على شنو مستعجله عن قريب العرس وتشوفينها
رفل : عافنه وطلع ..من الله ياخذك انت وياها
ايسر : طلعت لبيت ضرغام
ضرغام : ياا ما كلت اجي حتى احضر نفسي ما يصير تشوفني هيج بلا مكياج
ايسر : اهووو هسه اذا افرغ المسدس براسك هم احد يلومني
ضرغام : ههههه شبيك ما يصير اتشاقه وي خطيبي ..فوت فوت
ايسر : دخلت سلمت على عمتي وكعدت يم ضرغام
ضرغام : هاا بشر شلونها الخطه
ايسر : والله الغيرة مشتغله 24 ساعه على ساعه تضربني بالمسدس مرة ثانيه
ضرغام : ههههه هو هذا المطلوب ..من تشوفها كلش طاحت بغرامك سوي روحك عفتني علمودها
ايسر : ليش ما نقوي اللعب شوي
ضرغام : شلون؟؟
ايسر : امك عدها حمرة
ضرغام : امي وين شايفه الحمرة غير الديرم والكحل الحجر ما عدها
ايسر : دبرلي قلم حمرة
ضرغام : شتسوي بيهن ولك
ايسر : دبرهن وانا اشوفك شسوي
ضرغام : اكو محل كماليات بفرعنه هسه اشتري منه
ايسر : ماشي وجيب عطر نسائي وياك
ضرغام : راح تجيبلي شبهه بالمنطقه ههههه
ايسر : ههههه .. والله شوية واجه جايبهن ..اي عفيه عليك .. يلا حط منها وبوس قميصي
ضرغام : شنو عيني احط منها خب درروح
ايسر : جاي اكلك حط
ضرغام : انت ما تحطها
ايسر : لا تكشفني انت حطها
ضرغام : انا زلمه مشورب شكدني وشكبرني احط حمرة غير لو تموت ما احطها
ايسر : انت الورطتني بهالخطه كملها للنهايه
ضرغام : هو صوجي انا اساعدك اعوفك تلوب احسن
ايسر : يلا ضرغام صير حباب وحطها
ضرغام : لوو تموووت ما احطها ****
رفل : جنت كاعده ارتب بالغرفة ودخل عليه ايسر ..خير شكو
ايسر : اغسلي ملابسي هذن اريدهن باجر
رفل : مفارغه
ايسر : لا تشلعين گلبي وغسليهن
رفل : شو هذا عاف الملابس وطلع .. لزمتهن اريد اشمرهن بوجهه ..وكفخني عطرهن ..هذا مو عطره ..كعدت اشمشم بيهن عبالك شيشيه العطر كلها مفرغتها علي .. جان اشوف اثر حمرة بالقميص صخااام هذا شنو .. شوف حلگها شكبره ..من الله ياخذك انت وياها ..رحت صعدتله فوك ..بعصبيه فتحت الباب وشمرت الملابس بوجهه ..مره ثانيه خلي ام حلگ تنظف وصاختكم ..حجيت هيج وطلعت
ايسر : بأستغراب.. تعاي ولج يا ام حلگ هاي
***
رفل : ثاني يوم كعدت الصبح ..جاي احضرلي ريوك وسمعت صوت تلفون ..طليت على الاستقبال لكيت تلفون ايسر يدك ..تقربت منه مكتوب " حبيبتي "..صار عندي فضول ارد ..فتحت الخط بلا ما احجي شي
ضرغام : شنو وينك اليوم متأخر
رفل : استغربت معقوله شنو هالصوت الي ما بي صله بأي انثى
ضرغام : ولك شبيك ساكت يلا الآمر طالبك
رفل : هاي شنو ولد بنيه.. آمر شنو .. بهاللحظه دخل علي ايسر اول ما شفته شمرت التلفون
ايسر : عاقد حواجبه بعصبيه ..شتسوين بالتلفون ؟؟
رفل : رفعت تك حاجب.. انت خاطب لو تجذب علينا!!!..يتبع
#ارجوان