صدفة ... ثم نصيب

صدفه 6

مساء العافية

صدفه ... ثم نصيب

روسكان الجبوري

البارت 6

٧٣

دخلت للبيت وأمي راحت تستقبل أبن اخوها.. صعدت لغرفتي وكعدت مااعرف شسوي الانتظار والترقب صعب أحس نفسي مربطه وأحمد أكد عليه مااتصل ...

وره شويه صعدتلي سماهر كالت : انطتيه السويج وراح ..

تنهدت.. مقهورة ع سيارتي وحرماني منها بس،حرماني من السيارة هاي أهون من الاضرار
المنتظرتهه ..

كعدت يمي ع الجرباية..
_تهون حبيبتي..

_شلون بس كوليلي شلون منين مااجيبهه أني خسرانه وانوب هالولد بين الحياة والموت أي شي يصير بي برگبتي .. دمه ملطخ بأديه.. راح يكتلني التفكير.. كوليلي شسوي والله مخنوگه حيل وهاي بعدنه بأولها...

جانت كاعدة بصفي حضنتني من جتفي ..

_اششش كافي لتسوين بنفسج كافي.. الولد ان شاءالله يكوم بالسلامه

مسحتلي دموعي.. من وين طلعتلج هالدموع من يمتى طيف تبجي؟ دكومي صلي واقري قرأن والله ترتاحين وادعيله يكوم بالسلامه .. يله تحركي لتظلين هيج تفكرين وتسوين بنفسج مو زين ولاراح تستفادين شي من البجي

٧٤

هي عافتني وراحت لغرفتهه واني كمت غسلت وجهي ورجعت لفراشي.. تلفوني سويته عام وحطيته جوه المخده وتمددت وتلفلفت باللحاف رغم صيف وحر بس جسمي يرجف خوف مرعوبه من المجهول..

ألف فكرة برأسي..

مااعرف نمت او لا بس حسيت بأول ساعات الفجر انفتح باب غرفتي.. شلت رأسي بابا ..

_ها بابا كاعدة؟
كعدت ع حيلي مجنت نايمه

_ها بابا كاعدة تعال فوت ..
_ليش منايمه؟
_وين اكدر انام هستوك رجعت؟

_أي اناملي ساعتين وارجع للمستشفى
_شنو الصار؟؟

_خابرج أحمد وفهمج مو؟
_اي
_ماكو شي جديد

جان تعبان حيل بابا.. أبد ما لامني.. تنهد وكعد يمي ع الجرباية تعبان ومهموم ...

_طيف بابا احجيلي شنو الصار بالتفصيل
_بلشت احجيله وماضميت عليه شي من لقاء ذوالفقار ويايه بالمكتب

٧٥

وكلامه لحد ماصار الحادث..
من خلصت شفته ساكت يمكن شك بيه أني متقصده ادعمه...

_بابا ترى والله مجان قصدي ادعمه.. والله مشفت.. الشارع جان اظلم.. اني فاتحه اضاءة بس هو مفاتح ونص سيارته من جهة السايق صايرة ع الشارع .. واني تخربطت بالمكتب حتى اسأل رند..

انفعلت واني اشرحله وابررله..

_كافي بابا كافي مصدكج .. شي صار بعد.. قدر ولطف..
بجيت.. شلطف بابا شلطف.. مستقبلي ضاع وحياتي تدمرت أبنهم اذا صار بي شي،اني شنو مصيري..