صدفة ... ثم نصيب

البارت23

صباحكم عسل وراحة بال ..
وعدت الصبح انزل ...
ممكن تصويت + تعليق ع الفقرات

قناة قصه صدفه:
٤٧١

مرات من نتصايح وأاذيها بالكلام تدخل غرفتها واسمعها تبجي ..
كولشي ولا دموعها .. نقطة ضعفي ومن أدخل وانوي ارضيها تصدني وتطردني ونرجع للمربع الاول ...

سهراتي بره البيت كثرت هروباً من المشاكل ..
أخويه يحجي عليه لان أكثر وقتي لو شغل لو سهر .. قليل الفي للبيت ..

يوم بعد يوم صرت أشوفها تذبل كدامي .. أهمالي تعبها وعنادها تعبني .. حرفياً مااعرف شتريد وشلون اتعامل وياها ..

أزهر بدأ يلح عليه اخذ طيف وارجع لان البنية ممرتاحة ودائماً تسولف لسارة انو تحس بالوحدة ومخنوكة ومشتاقه لاهلها ..

جنت شبه قافل ورافض فكرة الرجعه للعراق اذا ميصير حل للمشاكل بيناتنا لان أهلها حيل مدلليها واذا صارت قريبه منهم راح يساندوها ويمكن اخسرها خاصةً اني تماثلت للشفاء وهذا جان سبب زواجنا ..

اللي يضعف موقفي انو اني لسه مماخذ زوجتي يمكن طيف تصرح لاهلها بهذا الشي وبسهوله يفرقوني عنها ..

هواااي افكار ببالي تأرقني وتحرمني افكر بصورة صحيحة

٤٧٢

كل همي تبقى يمي ومااخسرها ..
فرفضت رفض قاطع الرجعه للعراق ..
يمكن مر شهر او أكثر واحنه هذا حالنا ..

مرة بليله جنت راجع متأخر للبيت كالعادة .. دخلت الشقه جان صوت اغاني عالي مشيت بالممر المؤدي للصاله أدور مصدر الصوت لكيت طيف تركص بل تترنح ع انغام اغنية صاخبه والصوت عالي ..

منظرها صدمني .. جانت اشبه بوحدة تحت تأثير مشروب كحولي او حبوب كبسله وهالشغلتين مموجودات بالبيت ..

تترنح لدرجة مغريه .. مندمجة ويا الصوت العالي .. رحت طفيته جان موبايلها مفتوح .. باوعتلي بعيون ناعسه ..

حجت وهي تجر الحجي جر بخدر ..
_همممم انت ..
مسحت وجهه بيدها وعقدت حواجبها ..

_ادرررري شكوو طفيته جنت دااركوووص ..
يااخي حتى بهاي تتدخل ..

تقربت الها ..
لزمت زندها هزيتها بشك ..
_ششاربه انتي ؟؟

٤٧٣

_اي بيبسي ههههه...
كالت بيبسي وجرتها ضحكة طويله ..

عفتها ودورت المكان اشوف شنو ماخذه خفت خاف ماخذه حبوب خفت خاف ماخذه حبوب ومحاوله تنتحر ابد ماخطر ببالي انو متقربه للي بالثلاجة رغم كم مرة سألتني عنه وحذرتها تتقرب منه ...

لگيت ٣ قواطي بيره فارغات للاخير .. وباب الثلاجة مفتوح وهوسه بالكاع .. قواطي البيره تشبه الى حدما قواطي الباربيكان ..