رمادي الطبائع 3
ابراهيم: نور كنك نحكي معاكي
صكر الفيس وهو مستغرب من نور
ابراهيم: هذه كنها ؟؟
/
/
/
/
كان هذا سبب جديد تبكي منه كانت بتحكي كل شيء صار معاها اليوم لـ ابراهيم بس هو زعلها عشان مش بيستقر هنا طلعت لـ امها أدور عليها
لقيتها تحكي ع الفون عرفت انها تحكي مع مرت عمها
جميله ام عبدالله: والله بخير الحمدالله أنتو أموركم
صالحه ام ليلى: كويسين الله يسلمك كنت رانه نحكيلك ان كل شيء نصيب وماتمسكيها في خاطرك ونحنا هل بس شكل الشباب مش متفقين مع بعضهم سامحيني ياخيتي والله لو عليا اتجيك اليوم لكن هذه النصيب ليلى مش موافقه
جميله: صادقه فعلا نحن هل وبعدين اهم شيء البنت اتكون متريحه ومواقفه ونحنا يهمنا رأيها في الاول والآخر ونا الحق كنت بنزوجهم مع جموله ربي يخليه ليا بعد شهر وماتمسكيها في خاطرك ع قولتك نحنا هل نبوكم زي قبل معانا وما تغيبو عشان هالموضوع
صالحه: لا مستحيل الله لا ايجيبها اللي اتخلينا انغيبو ع بعضنا وعيالك عيالي والحق نا حكيت للبنت بس وباتها ماعنده علم وكان هك كنت اكيد بنقولك مبروك علينا بدال مافيش نصيب
جميله: الحق حتى عادل ماعنده علم كان الموضوع بيني وبين عبدالله بس
صالحه: يلا هذا النصيب مش كيف مانبو والله عبدالله ماينرد غير هذا قول الله هيا انسيبك توا وربي ايكمل ع جمال ولعقبه لعيالك والبنات
جميله: أمين ولعقبه لـ ليلى حتى هي
صالحه: مع السلامه سلمي ع البنات
جميله: مع السلامه وانتي سلمي ع ليلى
/
/
/
/
وصكرت صالحه وشافت بنتها
ليلى: شن قالت
صالحه: نصيب وماتغيبو ع فرح جمال بعد شهر
ليلى: حسيتيها مش عاديه معاكي ولا عادي
صالحه: كلامها عادي وان نصيب بس صوتها مستغربه ان نرفضو ولدها
ليلى: وليش مانرفضه
صالحه: عشان ماينردش
ليلى: نا بنتك؟😕
صالحه: ترا امشي ارقدي وريحي بالك وربي ايعوضني بنسيب احسن منه
ليلى: أمين
/
/
/
