بتمني لو انك تفهمي بتمني لو تحسي بالحاسيهو ....مجبور عل كل شيء انا ......قال كلامو دا ودنقر بعاين للارض وبعدها ابتسم بانكسار وقال:المهم انك كويسه .....
كان شارد ومحسي بتلفونو الكان بضرب .....بعد مسافه كدا حسي بيهو واتلفت عاين للشاشه لقي المتصل فهد .....ابتسم ورفع التلفون وفتح الخط ...قبل مايقول شيء جاهو صوت فهد :لي ساعه متسجم بدق ليك ....انت وين جادع تلفونك دا...انت عارف كم مره دقيت ليك ....عليك الله عاين لي تتلفونك دا ....
ايهاب ابتسم وقال:براحه يافهد ....معليش تلفوني كان بعيد مني اشان كدا ...
فهد :ماعارفك اليامات دي مالك ...بس المهم انت وين هسي؟
ايهاب في نفسو"التاعبني كثير يافهد...كثير شديد"
فهد وقت مالقي رد قال :الو ...ايهاب انت معاي ...ايهاب ..ياايهاب سامعني .....
ايهاب بعد مسافه قال:اه معاك ....
فهد:كان جنبي كان ضربتك بي طوبه ....مااقاعد اتكلم معاك انا ....مشيت وين ...
ايهاب:نفسي اعرف كل ماعمل ليك شيء تقول بضربك بي طوبه ....انت الضربك منو لمن تجي تضربني انا المسكين دا ...
فهد:عارفك بتغير في الموضوع بس ....المهم انت وين هسي؟
ايهاب :في البيت ....
فهد :خلاث تعالي لي راجيك في مكانا ...
ايهاب قال :كويس ...وبعدا المكالمه انتهت ...
عاين للتلفون وقال"ياربي في شنو ...اللهم اجعلو خير"
وبي هناك .........................
في بيت ناس يارا .........................
كانت ماسكه صوره في يدها ....عاينت ليها ومررت يدها فيها وقالت :اشتقت ليك ....كلو بي سببو ....بي سببو حصل دا كلو ....انا بكرهو ....قالت كدا وختت الصوره وطلعت من غرفتها .....وعيونها مدمعه........
بي جااي يارا كانت طالعه من غرفتهاشافت قدير ...
عاينت ليها وقالت في نفسها "لازم نخت حد للبحصل دا ..."
قالت كدا واتحركت وراها ......
قدير حست كانو في زول وراها طوالي وقفت واتلفت
قدير من شافت يارا قالت بي صوت براحه:دا الكان ناقصني ....
يارا اتقدمت بتجاها لحدي مابقت واقفه قدامها وقالت بصوت مبحوح :قدير اسمعيني بس
نفضت يدها وقالت :اسمعك ...عايزاني اسمع شنو مثلا....انا بكرهك ...افهمي الحاجه دي ..
قربت منها وقالت :قدير انتي عارفه انو اخوي مالسبب
دفرتها وقالت :انتو سبب كل شيء ....انا بكرهكم ياريتكم ماجيتو من الاساس ...قالت كدا ومشت..
يارا بقت واقفه في مكانها وبتعاين لي قدير المشت ..
قالت بي صوت براحه "لي ياقدير ....اخوي ماالسبب...قالت كدا رفعت عيونها للسما وقالت :يارب انا تعبت من كل دا .....
بي جاي .............................................
ياحبوبه ....البحصل دا لازم تختي ليهو حد ....ماشايفه قدير دي ....
اخدت نفس وقالت :قلبها محروق يااحمد ....مع الايام بتهدي براها .....وبتفهم .....
احمد :تلاته شهور .... تلاته شهور ياحبوبه ....ولسه هي ماهدتت .....حبوبه اتكلمي معاها ...يارا الفيها مكفيها ....ماشايفه قدير بتزيد عليها كيف ....
الحبوبه دنقرت راسها وقالت :يارا لازم تمش من هنا ...بعد دا ....اهل ابوها اولي بيها ....
من قالت كدا احمد انفعل وقال :حبوبه انا بقول في شنو وانتي بتقولي في شنو .......انتي عايزاها تدمر يعني .....
الحبوبه:احسن ليها تمش .....دا قراري يااحمد ماعايزه نقاش خلاث.....
احمد ضرب يدو في حيطه وقال :اذا شايفها تقيل انو تقعد هنا انا زاتي ماقاعد ليكم .....خلي البيت يفضي ليكم انت وقدير....قال كدا وطلع ......
من مرق احمد ختت يدها في راسها وقالت :انت مافاهم شيء ....قعادها هنا ماحيجب ليها الا الاذي...انت ماشايف الانا شايفاهو .....
وبي جاي احمد...............
وقف تحت الشجره وقال :انتو عايزين تدمروها .....هي ماحتتحمل اكثر .....من جهه اخوها ...ومن جهه قدير.....وهسي انتي ياحبوبه .......
وبي هناك في مكان تاني وتحديدا .....في المستشفي ..............
فتحت الباب براحه ودخلت وغفلتو وراها .....اتحركت براحه وفي كل خطوه كانو كرعينها بتتقل اكثر....
لحدي ماوصلت جنب سريرو ......
قعدت جنب السرير ....وقالت بي صوت براحه:ثلاثه شهور ....كنته بحاول اجي وماقادره ....عارف لي لاني ماعايزه اشوفك كدا ...لاني انا السبب ....قالت كدا وبقت تبكي .....وتتزكر ....ماكان بنعاد في راسها الا لحظه الحادث
فلاش باك........... .
اتلفتت عل صرخه صحبتها وهنا شافه العربيه قربت منها .....وماكان فاصل بينهم كثير ....اتصنمت وماقدرت تتحرك ....بس في اقل من ثانيه العربيه غيره مسارها بس ماكان الوقت الصحيح ولاالطريق الصحيح لان في اللحظه الانعطفت فيها العربيه ....كان في شاحنه جايه من الاتجاه التاني ودخلت فيها ....
العربيه لما انعطفت تالين لمحت زول بتعرفو ....بقت متصنمه في مكانها وهي بتعاين للعربيه بتتقلب قدام عيونها .....بعد مسافه حتن جمعت وصرخه سونار .......بعد تعب حتن قدرت تتحرك ..
بقت تحاول تقرب للمكان الهم فيهو ....بس في راجل رجعها لي ورا ....
تالين :ياعمو ...خليني امر عليك الله ....قالت كدا ودموعها عشره عشره ....وهي شايفه الدموم الطالعه من العربيه ........وهي بتحاول تتفكه من الراجل لمحت سونار ....ومنظرو ماكان مطمن ...
اند فلاش باك ..........
صحت من زكرياتها وقالت :خفت اليوم داك افقدك .....قالت كدا وقشت دموعها وكملت وقالت :انت غبي ماكان تعمل كدا ......شايف عملته في نفسك شنو .....قالت كدا ودموعها بقت تجري تاني ....
رفعت يدها وختتها في يدو وقالت بي صوت مبحوح:كفاك نوم....سونار..قوم بعد دا.... وهي قاعده كدا حست بي حركه ......طوالي قاممت وهي بتقش دموعهاا....شافتت الممرضه ولااتكلمت طلعت طوالي .........
اول ما طلعت من مستشفي طلعت تلفونها وضربت عل رقم .....بس مافي رد .......طوالي دخلت تلفونها وتابعت طريقها..............
وبهناك ..........................................
يارا طلعت من البيت ....وبقت ماشه وماعارفه هي ماشه وين .....بس متحركه .....بعد مسافه لمحت زول بتعرفو ........قالت في نفسها "فهد"
احاسيسها كانت مبهمه .....هي بقت ماعارفه دايره شنو ولاشنو .....وغيبوبه اخوها ...وكره قدير ...ومن جهه فهد ...ومن جهه ايهاب .....كانت حاسه كانو هي في متاهه وماعارفه تطلع منها كيف ....
وقفت في مكانها واخدت نفس ....وبعدها غيرت طريقها ....وكل الفي بالها انو تاني ماحترجع للبيت داك تاني ......هي تعبت من كل شيء ....ماحتتحمل شيء تاني ........
وهي ماشه حست بيد اتختت في كتفها ...اتلفتت بي خلعه ....بقت تعاين ليهو شكلو اتغيير 180 درجه ...كانو دا شخص تاني ....بلعت ريقها وقالت :جاسم
مااتكلم بس هز راسو بس .....
بتعاين ليهو مستغربه من شكلو ....بس قاطع شرودها صوتو وهو بقول :تعالي .....نقعد هناك....قال كدا واتحرك ......
مع انها ماكانت عايز تمشي ....بس كان في شيء جواها بقول ليها امشي ....اتحركت وراهو ...
قعد في مقعد كدا ..وجات قعدت جنبو .....بقو ساكتين ......بعد مسافه قال :يارا انتي كويسه ...
ردت وقالت :الحمدلله عل كل حال ...قالت كدا وسكتت....
جاسم :انا ماكويس يايارا .....قال كدا بدون مقدمات ...
في شيء جواها اتاثر بي نبره صوتو ...قامت رفعت راسها وعاينت ليهو وقالت :جاسم مالك .....في شنو..
انتظرت منو انو يتكلم بس مااتكلم ......فسكتت ماضغطتت عليهو .....
يارا في نفسها"مابراي التعبانه وحياتي مشاكل ..."
وبهناك ........................................
رفع راسو .....ومع رفعت راسو ....لمحها ....حسي بشيء جواهو ....بس اتلفت للاتجاه التاني كانو ماشاف شيء ....
"هي ما لي ....هي ما لي ....ماحتكون ....." كان بردد الكلام دا في راسو وهو مغمض ....
قاطعو الكمساري وهو بتقطق ليهو ...فتح عيونو ....وشاف الكمساري ....دخل يدو في جيبو وطلع القروش واداها ليهو ....
بقي سارح وماعارف لي وين حيصل وشيء المضايقو اكثر انو صحبو بحبها ....وحاسي بي نفسو كانو بخون صاحبو كل ماقلبو يدق ليها .....
نزل ....وبقي ماشي مسافه لحدي ماوصل للمكان ...
دخل واول مادخل لمح صاحبو قاعد ومدنقر راسو ...
مشي عليهو ومن قرب منو قال :فهد .....
فهد رفع راسو وقال:اخيرا وصلت ....
ايهاب ابتسم لي صاحبو وقعد جنبو ....
فهد:ايهاب انا ماسامحتو ....ولا قادر اسامحو ...بس ...قال كدا وسكت....
ايهاب من سمعو عرف انو هو بتكلم عن ابوهو ...طوالي خته يدو في كتفو وقال :عارف ماساهل انك تسامحو بس في نهايه هو ابوك ....
فهد ابتسم وقال:ابوي....قال كدا وبقت الكلمه دي تردد في راسو ........وسرح ...بتذكر قبل كم سنه..
فلاش باك............................
مشي عل امو الكانت بتبكي ويدينها ملانه دم ...قال ودموعو في عيونو:امي .....
امو من سمعت صوتو بقت تقش في دموعها....
فهد:امي ....قال كدا وماقدر يطلع كلمه غيرها ....
امو حضنتها عليهو وقالت :انا كويسه يافهد ....ماتبكي اند فلاش باك ......
ايهاب عاين لي فهد الكان شارد ودموعو جات في عيونو ....واول ماخته يدو في كتفو فهد زي اتخلع كدا ....
ايهاب:فهد ....
فهد قشي دموعو وقال :انا كويس مافي شيء ....قال كدا وغير الموضوع وقال:قررت تقدم وين ....
ايهاب فهمو طوالو قال:حااقرا برا ...
فهد اتلفت عليهو وقال بي دراما :تخليني وين انا ياهوبي ....من دونك انا بموت
ايهاب بقي يضحك وقال :حسبي الله فيك يامنقولي ...ماعارف امك دي اتوحمت عل شنو لما ولدتك ...واحد معاق....
فهد :اكيد عل عسل حبي ....
ايهاب دفرو بي هظار وقال:بي حركاتك دي بقيت تشككني ....
فهد فهمو قاصد شنو ....قام ضحك ......
رغم كل شيء ...وكل الكان حاس بيهو كان بضحك ...ماعارف نفسو بضحك كدا لي .....كانو كان بحاول يدفن كل آلامو الحاسي بيها بي ضحكاتو ...
وبهناك في المستشفي ..........................
كان راقد وبعاين للسقف ....ماكان عندو امل يعيش بس كل النفسو فيهو كان يشوف اولاود قبل مايموت ...
حسي بي الباب بفتح ...طوالي اتلفت ...ومن شافها عيونو دمعت وحاول يقوم ....بس هي كانت اسرع وقربت منو وقالت وعيونها مدمعه:خليك راقد....
دموعو جرت وقال:خديجه.....قال كدا وسكت شويه وقال:ربنا اخد ليك حقك ياخديجه .....داير يكمل بس سكتتو وقالت:ماتتكلم في فات ياالقاسم ...ان شاءلله بتقوم بالسلامه ....وتشوف اولادك ....
بقي يعاين ليها ومستغرب ...رغم كل العملو فيها...بس لسه اللمعه الفي عيونها والخوف عليهو كان ظاهر.....
يتبع ............................................
هلوووو بعد غياب .....
يلا عارفه بعض منكم حيشوف انو الاحداث جايطه بس بارت عن بارت بتتوضح الصوره .......
البارت عارفاهو غير جوط افكاركم ماعمل شيء ...بس يلا زي ماقلت حتفهمو بارت عن بارت..
حاسه بي نفسي قلبت هندي هههههه...
يلا رايكم ؟
وتتوقعو الحيحصل شنو ؟
امم منو الحيكون كابل مع يارا؟
يلا قلبهاتي ♥ماتنسو الفوت اذا عجبكم البارت ♥وبتتمني تعملو متابعه للحساب وتدعموني♥
أنت تقرأ
احلام مراهقه>~<✌
Romanceبقلمي:مجنونه من عالم اخر😆✌ يلا الروايه 😹💔حلووو بس فيها شويه اكشن وخيال كدا😂😂💔
