عرس ود كبروس 1
مجاهد يوسف
_ غايتو باكر اكان جاء زول قال ليكم شافني الدغش لافح بقجتي وخاتر كي لا وراء وطاش من الحلة دي تب تب ما كضب عليكم
_ ها زول ها وخاتر وين كي لا وراء
_بدور اغرب كي وتاني ماني معود صاد
_ خبارك ؟
_ زهجة ساكت وزعلة من الحال اللنا فوقو دا ، عطال وفلس وقهر وسهر والبنسويو غالبنا
_ ماك براك آ ود كبروس وعليك امان الله فايتنك بالصبر بس
_ انت ما عندك مشكلة آ الحدربي أخوي ، بغنمكم وبقركم واكان بعتلك عجيلة ساكت بتملا جيبك قروش علا الكلام انا دا وعلي العلي كمان الحاجة شابكاني عرس عرس ويومي بتنضم معاي
_ عرس والله واسمع كلامها وما تطش ولا شتين
_ اعرس بشنو آ الحردبي ، شفت ليك عريان اشترالو طاقية ؟
_ عرس آ زول عشان الله يفتحها عليك
_ والله اعرس علا تتقفل فوق تحت وهو زاتو اعرس بشنو ؟ انا قرش ما عندي
_ ما عندك شغلة بالقروش ، انا اخوك آ ود كبروس بس انت قول خير ووريني داير بت منو بس وامرق منها
_ امرق منها كيفن ؟
_ انت مالك آ زول بس وريني البت الفي راسك
_ وانا خاف خاتي لي بت في راسي ؟
_ مافي زول ما خاتيلو بت في راسو وقلبو ولا في زول قدرك كدي ما بريد
_ هو انا قلب زاتو ما عندي ، الفقر ما كعب آ الحدربي ياخ ، قبال حول ما بكضب عليك كنت بريد نعيمة بت جاه الرسول وجاء المكاشفي ود اب عبطة من السعودية وكف ختفها وعرسها ووجعني عرسو دا بالحيييل وقلبي دا انقطع لمن جاتني وردة بقت لي بتايفود ومن الزمن داك تاني ما فكرت لي في بت
_ البنات راقدااات وطشة من الحلة دي يمين ما بخليك تطش ، وبديك تلاتة يوم فتش فيهن وشوف البت البتنفع معاك وحكاية قروش دي علي الطلاق عرسك من وإلى كلو علي
_ والله كلمتك دي براها بالدنيا چت علا ماني داير ولا بكلف عليك ساكت خليني اطش بس
_ لا حرم ما بخليك تطش وتعرس بس
_ اها قول عرست اعيشها بشنو ؟
_ متين الله شقالو حنك وضيعو ؟ بعدينك في بطن بيتكم ما قاعدين تاكلوا ؟
_ كيفن ما قاعدين ناكل آ زول ؟
_ اكان بيتكم زاد نفر في مشكلة ؟
_ ما حكاية يزيد نفر وللا ينقص ؟
اها حكاية شنو ؟
_ العرس بدور وبدور ومتطلباتو كتيرة
_ العرس ما عندك بيهو شغلة تب وانا حرم متكفلبو براااي وچتك عليهو
_ انت قايلو ساهل ؟
_ اكان ساهل اكان صعب ما عندك بيهو شغلة
_ ما بدور اكلف عليك
_ انا براي القلت ما جيتني وشحدتني والخير راقد آ زول
_ قبيلك قلت لي فايتنك بالصبر
_ بدور اطمنك ساكت عشان ما تفوت ، انت بس حدد المرة وتر بعيد وخلي لي الباقي
_ بس البتدفعو كلو يبقى دين علي
_ الحالة واحدة آ ود كبروس وما بيناتنا واكان الله فتحها عليك واحتجت ليك ما بتقصر عارفك
_ سمح آ زول وسمح تب وانا من باكر بفتش وبكوس
الحدربي فات بيتو وود كبروس زاتو فات علا ما دخل البيت قعد قدام باب الحوش ويفكر في كلام الحدربي صاحبو ويعزل في البنوت واتفرجخ تب ومسح التراب وبيدو قعد يكتب وبداها من جيرانهم
آسيا بت الحسن
كتب اسمها وقعد يفكر فيها وسريع سريع مسح اسمها وقال لكة ساي وبتجر الكلام ووشها مطاول لا لا لا
الهدية بت جادين
يعني وما بطالة بس شعرها قصار والشعر ما مشكلة بس فيها شبه من اللمين اخوها التليفة لا لا لا
فايزة بت حكيم
سمحة لكن عندها كشر ونضامة لا لا لا ما بتنفع معاي
دارين بت العوض
جبهتها ناطة وعندها جلحات زي الدومة لا لا لا
عواطف بت العبد
والله دي سمحة ياخ لكن ما بدوني ليها وزي الناضم فيها خضر ود خالتها لا لا لا اشوف غيرها احسن
مرضية بت كباك
دي اسمح واحدي لكن ابوها فدن ومتلقي حجج وكلامو كتير واخوها الشاذلي ود حنوت خلاس وقبل كدي داقي التهامي نسيبو ويوم العيد عشان شات السخلة لا لا لا ما دايرها هي زاتها عينها زي الفيها حوصة كدا
التاية بت الفضل
دي والله ظريفة ياخ ورقصت معاي في حفلة الحمودي ود الكتنبحيلل بس لكن عندها رواشة ياخ وجنها قوالة لا لا لا
بتول بت الصبر
بسسسسس بس ياها دي بتول دي بس انمش اكلم امي واسعلها منها
يدبع
