عرس ود كبروس 26
مجاهد يوسف
حمد رفع حاج الشيخ في الكارة وجرى بيهو جري بيت ناس ود كبروس ، الرفيع بيتهم في الدرب والزمن داك اكان صاحي ومرق شايل الابريق وفرشتو داير يتسوك برة جمب الباب ووقف حمد قال ليهو دا مالو وموديهو وين
_ لقيتو واقع جمب بيتو قدام اللوري وماشي ناس ود كبروس دايرو يمش معاي نوديهو ود العد
الرفيع شاف حاج الشيخ لقاهو بروحو بس الدم يبقبق مالي وشو قال لحمد دقيقة وغسل ليهو وشو بموية الابريق نضف منو الدم وجرى جوة البيت جاب ليهو ريحة وملح كباهن الاتنين في الجرح وجاب معاهو كيس مخدة شرطو وربط الجرح وقال ليهو امشي بكرعيك نادي ود كبروس واجر جري وتعالوا لحاقني في بيت ود المصطفى الحاج دا فقد دم كتير ولو مشينا بالكارة بموت لينا في الدرب
حمد جرى لود كبروس والرفيع فات بالكارة تور ود حاج مصطفى ورفعوهو في البكسي هيلو ود كبروس وحمد جوهم جاريين ود حاج مصطفى قال ليهم انا شايف احسن نوديهو لامحداللمين البصير نجيض انا قبل كدي انفلقت في حادث فلقة قربت تضيعني والله مشيت ليهو مرقت منو شديد
الرفيع وود كبروس قالوا المستوصف بس وفاتوا بيهو ود العد
ود حاج مصطفى ما اشتغل بيهو ومشوا للبصير وفعلا نجيض فك الدلقان من الجرح وقال كويس انكم وقفتوا الدم بالريحة والملح ونضف الجرح كويس وعندو خلطة حقت اعشاب بلاها بحبة موية وجلط بيها الفلقة وقال ليهو ما بتجيهو عوجة بعد شوية بفتح وبنشربو ليمون وقضيم بنفعنو والحاج انضرب بسيخة وكويس انها ما جاتو في العضم والزول الضربو دا زول خواف
ود كبروس قال لحمد مالك ما صحيت الرضي عشان يجيبو باللوري
حمد قال ليهو ما عارف بس انا لمن لقبتو واقع ودمو يشر انخلعت وما جاء في بالي غيرك
الرفيع قال ليهو والله سبحان الله ياخ الظاهر لحكمة لاني انا زاتي ما فكرت في الرضي دا
ود كبروس مرق برة منهم وناغم لحمد قال ليهو الضربو منو ؟
_ ما شفت الضربو لكن لمن وصلتو اكنت داير اصحي الرضي وناس بيتهم بس شفت المرضي لا اقول ليك الرضي واحد فيهم لابد وراء اللوري ولمن شافني جرى قلت اخير اجيك انت
_ المرضي وللا الرضي آ حمد ؟
_ والله ما متأكد هم بتشابهو ياخ علا الكاطع شكو تمام التمام انو واحد فيهم
_ لابس شنو ؟
_ لابس ليهو جلابية بس زي المضروب في كراعو بعد كم خطوة قعد يضلع
_ مضروب في كراعو ؟
_ الكلام دا كلو اكان في اقل من دقيقة والدنيا دغش ما انفرز لي بالحيل
_ اقسم بالله عمي الشيخ دا ما يقوم من دي وللا قام منها وماهو شديد علا الحلة حقتنا دي ابقي واطاتها حمممرة من الدم
_ ها زول ها استغفر آ زول انت جنيت ؟ حاج الشيخ شديد ودي ضربة سلاخية والبركة الجات كدي
بعد ساعة ونص حاج الشيخ فتح بس جسمو مبتب تب ومهييييرد والحيل ما مشدود ووقعوهو قضيم وليمون اشرب اشرب آ حاج
ود كبروس فات جاب ليهو قرين وبرتكان
المرضي الضرب حاج الشيخ وحاج الشيخ شافو وعرفو والرضي السبب زعلتو الشنطة والشبكة الفات جابن باللوري حقو لود كبروس
بالليل بعد ناس ود كبروس فاتوا الرضي قال للمرضي قدامنا نفرين لازم نرتاح منهم آ المرضي ، حاج الشيخ وود كبروس بتكتل ياتو واحد فيهم ؟ المرضي قال ولا واحد انا لا داير البهجة ولا داير الحواشة ولا داير قروش بس دايرك ترجع لي طيبة بت التمتام
الرضي قال ليهو واحدة بي واحدة يعني اخدمني وانا بخدمك وليك مني بعد انتهي من الاتنين ديل اعرس ليك طيبة عرس مافي زول عمل زيو في الحلة
المرضي خواف ورمة ساي قال بكتل حاج الشيخ لانو ود كبروس عاتي ما بقدر عليهو والرضي اداهو السيخة وقال الليلة ما تنوم وهو بمرق بدري بمش يفتح الجامع ويتركع فوقو قبال الاذان تلبدلو في الدرب وتفتح راسو بالسيخة
والمرضي مشى نام في اللوري ولمن حاج الشيخ صحى والرضي الليل كلو ما نامو مستنيهو يصحى و مرق من البيت قبالو مشى اللوري وصحى المرضي ورجع اوضتو ومرتو برضو اكانت صاحية قالت ليهو في شنو ووراها بالواضح انهم الليلة كاتلين ابوها وقال ليها دي فكرة أمك مرتو قالت ليهو احسن اكتلوهو هو زاتو كبر وخرف ريحنا منو عشان من يجيب لينا ود كبروس ويديهو حقنا
المرضي استنى حاج الشيخ مرق وجاء جاري عليهو وضربو في جبهتو بالسيخة ودمو تززززززز طار وقعد يبقبق حاج الشيخ وقع والمرضي جدع السبخة في اللوري بوراء وقام جاري بيتهم
بعد دقايق الرضي مرق يشوف المرضي عمل شنو لقى حمد سيد الكارة واقف جمب حاج الشيخ وحمد شافو والرضي بسرعة جرى بعيد وابى يدخل البيت وبعد كم خطوة ركبتو الكبرو فوقها محجوب اب خشيم بالعكاز اول أمس جمب الميجر حرقتو وقعد يضلع منها
حاج الشيخ بقى شديد والحبة ما جاتو وغمتوا لامحد اللمين الفيها النصيب ورجعوا الحلة
في الدرب ود كبروس سأل حاج الشيخ من الضربو قال ليهو لا شفتو ولا رأيتو وربنا يسامحو ما تسعل ليك الزول وانا الحمد لله شديد ما عندي أي عوجة ولا علي خلاف
ود كبروس قال ليهو والله اسعل الحلة كلها لمن اعرفو منووبوريك بسوي ليهو شنو بعد اعرفو وفي زول في راسي انا شاكي فيهو
حاج الشيخ حلف عليهو انو ما يسعل اي زول
الرضي لمن ديل وصلوهو ودخلوا البيت من شاف حاج الشيخ جاء جاري عليهو وقلدو وقعد يبكي
وود كبروس محدرلو وممغووووس منو
الحلة كلها عرفت بفلقة حاج الشيخ والناس ملوا البيت كلهم جوا يكفروا ليهو ويتحمدلولو في السلامة
ود التلب بكى بطول حسو وقال علا يمشي المركز ويجيب البوليس
ود كبروس مرق وشاف السيخة في اللوري بي وراء شالها ووداها بيتو وبدمها والرضي شافو لمن شالها
وجاء شغل اللوري وقال لود التلب ورح نبلغ البوليس
وفاتوا ود العد بلغوا والرضي قال للبوليس انا بتهم مبارك ود كبروس
مبارك دخل السيخة في البيت حقهم وركب الحمار هيلو فات فطر مع حاج الشيخ وفات الحواشة والخطوبة اجلوها للاسبوع الجاي
البواليس جوا الحلة وحققوا مع حاج الشيخ وفاتوا بيت حاجة الشول ولقوا السيخة بدمها شالوها وفاتوا الحواشة وطوالي كلبشوا ود كبروس وودوهو الحراسة
الحدربي جاء الزمن داك بيت حاج الشيخ عشان يطمن عليهو ويكفرلو جوهم الرضي وود التلب داخلين ووروهم انو البواليس ساقوا ود كبروس ومشى لود حاج مصطفى وساقو وفاتوا المركز
الرضي ركب اللوري وفات ود العد كايس لحمد سيد الكارة ولقاهو ينقل لسة في حطب القطن قال ليهو قالوا انت اللقيت حاج الشيخ واقع
_آي انا اللقيتو واقع
_ نحن مشينا بلغنا البوليس وجاء الحلة وقبض ود كبروس
_ قبضوهو في شنو ؟
_ لقوا السيخة الانضرب بيها عمي الشيخ في بيتهم
_ بس ود كبروس ماهو الضربو لكن
_ الضربو منو ؟
_ ضربتو انت دا وانا شفتك قبيل وقمت جاري لكن من كراعك البتضلع منها دي عرفتك
_ صاح انا الضربتو وعارفك شفتني عشان كدا انا هسي جيتك
_ داير مني شنو ؟
_ دايرك ما تجيب سيرتي لو حققو معاك وتقول الضربو مبارك ود كبروس
_ اشهد زور يعني ؟
_ اخير ليك من الموت
_ كيف ؟
_ اقسم بالله تجيب سيرتي آ حمد علا اكتلك
_ والله اكتلني ساي ، انا ما بغرق ذمتي والله
_ بكتلك والله آ حمد
_ نان مالو ، انت كنت دار تكتل نسيبك ابو مرتك بغلبك تكتلني
_ يعني ما مصدق موش
_ مصدق وعارفك بتقدر وبتسويها لكن ماني خايف لا منك ولا من الموت
_ اها يمين بالله آ حمد الليلة انا كاتلك وحطبك دا ما بتتمو ولا بتمرقبو من الحوش دا
و...
ويتبع...
