عرس ود كبروس 14
مجاهد يوسف
حاجة الشول مشت علي الغنمايتين حقاتها عندها طشت قديم مجدوع جمبهن بتكب ليهن فوقو العيش والكسرة الناشفة ومرات بتملاهو ليهن موية ، رفعتو ولقتو ملان بعر دقتو في كوع البيت نضفتو وعندها مخلاية فوقها عقاب همباز جابتها فرقتها فيهو وختتو ليهن قدامن وتشيل وتلمس وتهبش في العنز البرقاء وعويناتها مزرزرة والبرقاء بت البعامية تقيرة سميحة وعاجبها عجب شديد من ساعتها السخيلة ويومي معاها ولفت علي وجودها وشوفتها ، والليلة بقى ليها حار ومتشلوطة بنارين لا قادرة تحمي مبارك بيعتها وتابى ليهو بيها ولا قادرة علي فوتتها وفراقها
الحدربي لمن جاهو الكباشي سكت من مساعلة ود كبروس وقال للكباشي الليلة خبارك ما مشيت الحواشة ؟
_ ما عندي فيها شغلتن كدي بقولوا عليها ووصيت اب خشيم يعاينلها معاو وجيتك بدور شورتك ورايك في موضوع
_ انا اخوك آ الكباشي حبابك قول
الكباشي عاين في ود كبروس وسكت وود كبروس ابتسملو ابتسامة خفيفونة وقال كبح وقام وقال للحدربي فتكم بعافية انا ماشي علي بيتنا بدور اغرق للقفص واثبتو سمح واقفلو بالجنبات من ضي
_ الحدربي قال ليهو الله معاك وانا بعدينك العصر بجيك عشان دايرك
قال ليهو خير ومرق فات
الحدربي قال للكباشي حبابك
_ داير اعرس اخلاص انا آ الحدربي اخوي
_ خابرك خاطب بت عمك اخت اب خشيم
_ لا خاطبها ولا شتين ، القال منو انا خاطبها
_ زي السمعت كدي عمنول
_ لا لا كلام ساكت دا ومو بصح ، خليني منو هسع ووريني قولك
_ اكان علي انا موافق عاد بلقالها احسن منك وين ؟ ومبروكة تب وبخيتة عليك
_ خلاس امش وريها وكلم ناس البيت وانا جاهز والليلة دي بكلم ناس ابوي يجوك ويجيبوا قولة الخير ويحققوا الخطوبة ويححدوا يوم العرس معاك فد مرة
_ خبارك مستعجل كدي
_ المافي شنو وخير البر قالوا شنو ؟
_ قالوا عاجلو
_ انت شايف شنو ؟
_ لا لا علي العديلة تب بس اديني دقايق انمش اوريهم وأجيك
_ اخد راحتك وكلمهم علي مهلتك وان قلت لي اصبر كم يوم بصبر
_ لا لا دقايق بس وبجيك وماك الغريب البتدور ينسعل عنك
الحدربي فات بهناك كلم امو واخواتو وجاء قال للكباشي مبروك قالن خير
الكباشي اتكشم ومرق منكرب ومبسوط
ود كبروس ولا فات بيتهم وقف برة جمب الزريبة وبعد وخلى ود هباش فات وجاء داخل الديوان وناغم للحدربي
_ تعال تعال آ ود كبروس خش مافي زول وكويس انك جيت عشان نتابع كلامنا القبيلك
_ كلامنا القبيل خلو ، مالو دا اكان داير شنو ؟
_ منو ؟ الكباشي ؟
_ آي نان منو ؟
_قال داير اخلاص اختي ووافقنا عليهو وان شاء الله عقبالك آ ود كبروس اخوي
ود كبروس سكت مسافة وقال للحدربي ما كان تديو اختك والله
_ كيفن الكلام دا يا زول ؟
_ الزول دا ما كويس آ الحدربي اخوي وما ناويلك علي خير تب تب
_ دا كلام شنو البتقول فوقو دا آ ود كبروس ياخي ؟ انت عارفو ببقى لي شنو
_ ياخ عارفو ود عمتك وانا ابيت قروشك وأبيت العرس لشنو ؟
_ اها لشنو ؟
_ ما بسببو هو
_ كيف بسببو هو
_ انا ما كنت داير اقول ليك والله بس الزول ما صاح اسكت واخليهو يضرك
_ يضرني كيفن ؟
_ الزول دا انا امس لمن خليت المشي لود العد وقبال ما أجيك لاقاني في الدرب وناغم لي وقال لي انا عارف الحدربي داير يديك قروش تعرس بيهن ، وانا الساعة ديك والله براااي كدا خليت العرس وما كنت داير اشيل منك القروش
_ اها اها كمل
_ قال لو الحدربي اداك قروش وشلتهن منو عرست بيهن ياني الكاتلك وكاتلو
_ انا اخوك إت ، عدييييل كدي ؟
_ ماك طالبني حليفة لكن يمين زي ما بقول ليك ودا كلامو القالوا لي
_ وانت خفت منو ومن كلامو وقلت ليهو سمح وابيت تشيل مني القروش مو يا ؟
_ دقيقة انكمل ليك باقي الكلام
_ اها
_ انا قلت ليهو شن نفرك آ زول وما بتخوفني انا بكلامك دا وانت مالك ومال قروش الحدربي ؟
_ شوف الكباشي ، والله فعلا شن نفرو
_ زولك حدر لي ونطط لي عيونو مكان وقال لي كل القروش والبقر العند الحدربي ديل ما هيلاتو وحقات أمي وابوهو بانقا بعد وفاة جدكم اكل منها حقها وشال البقر منها وطردها من البيت وعمل السبب عرسها من ابوي وقال لي دحين اخير ليك تختاو وتبعد منو واوعك تشيل منو قرش اكان باقي علي روحك وروحو
_ هووووي آ ود كبروس
_ لو ماك مصدقني علي كيفك انا غايتو وريتك وما في شي بخليني اكضب عليك وانا يمين قبال كلامو لي ما كنت داير اشيل منك قرش
_ اها وداير يشيلن مني كيفن هو القروش والبقر ؟
_ ما بعرفو والله ، في تاني حاجة
_ شني دي ؟
_ بخيت ود الفويلح
_ مالو دا كمان
_ صاحب كباشي دا وشكلتو معاهو في نيمات الميجر كضب منهم ساكت
_ هو القال لي في بخيت كيت وكيت وكيت وهو المشى معاي بيتهم وقال ليهو ما عندنا مرة ليك
_ الناس ديل اصحاب شديد ومخططين لشي ومعاهم عوض الله بتعرفو ؟
_ عوض الله ود فضل ؟
_ آي ، وامس القريبة دي بالليل انا قاعد جمب خشم بابنا عيني لعوض الله مارق من بيت ناس خالي ود الفويلح ، وبخيت اكان دايرني آخد بلالة اخت عوض الله دا زاتو علا انا ابيت ، بعد فوتة عوض الله بخيت مرق وفات للكباشي ود هباش وقعد معاهو في اوضتن البرة الما فيها حوش وجاء راجع منو بالليل تب
_ والله لكن دا كلام عجيب
_ الرفيع بعد ما شلنا منو القفص وركبناهو وبعد انت حلفت حرام ما نفوت ود العد قال لي بخيت امس جاهو قال داير القفص يعملو مظلة في بيتهم وقال للرفيع بديك الدايرو بس ما تديو ود كبروس
_ شوف الحاسد
_ ما بس وقال لي انت والحدربي اعملوا حسابكم منو والقال ليهو كدي ود رجب صاحب عوض الله وقالوا الليلة بسرقوا البقر حقك
_ القال كدي منو ؟
_ قال لي الرفيع وعوض الله كلم ود رجب عشان خايف من بخيت هددوا ان ما سرق معاهو بكتلو وبضبحو شخخخخخخ
_ الدنيا دي كلها انت جطها لي بكلامك دا
_ انا يمين من عرفت الكلام دا نويت ما افارقك شبر وانت بعد مشيت والرفيع وراني ان ما جاني بخيت في البيت كنت جاييك لكن جيت انت براك ، ما شفتني جيت معاك طوالي ؟
_ اها والراي ؟
_ الراي انا وانت والرفيع وود رجب بعدينك الاربعة نترصد لهم ونخليهم بعد ما يسرقوا البقر تب ويمشوبو ونقبضهم متلبسين
_ لا لا ما كدي
_ دا احسن حل والرفيع القالوا لي وهسع قوماكا معاي نمشيلو زي الدايرين نديهو قروش القفص حقو ونخطط معاهو خطة سممممحة في بيتو نقبض بيها العولق ديل
_ انا بمش معاك عشان اضمن الرفيع وود رجب ديل معانا لكن الخطة خلوها علي
_ ورح ليهم هسع
وفاتوا
عوض الله فعلا بعد ما مرق من بيت ناس بخيت امس بالليل فات كلم ود رجب لانو كان خايف ينقبض وما بدور يسرق ودا مهددو
ود رجب نسيب الرفيع ولمن عرفو باع القفص لود كبروس والحدربي وانهم بجوهو الصباح وراهو كلام عوض الله عشان يحذرهم من غير ما يلفت ليهو نظر زول وعوض الله قال ليهو الكباشي وبخيت ومعاهم محجوب اب خشيم
الكباشي بعد مرق من الحدربي ركب الحمار هيلو وفات نيمات الميجر لقى اب خشيم هناك ساقو وفاتوا لبخيت في حواشتو واخدوا قعدتهم معاهو مساااافة طويلة وجوة الحواشة في نص القصب زول شايفهم مافي اتفقوا على الخطة الدايرين ينفذوها
الحدربي ومبارك بجاي لاقوا الرفيع وود رجب وبرضو عملوا الخطة الفي راس الحدربي
والحدربي قرر يتم خطوبة الكباشي علي اخلاص اختو ويتبوله ليهو زي الما عارف شي ؟
يتبع...
