عرس ود كبروس 13
مجاهد يوسف
ود كبروس والحدربي مشوا صلوا المغرب في الجامع وبعد انتهت الصلاة ومرقوا من الجامع مرق وراهم حاج الشيخ وناغم لود كبروس ووقفوا ليهو الاتنين علا هو زاتو وقف ما جاء عليهم الحدربي عرفو داير ود كبروس براهو قال ليهو امشلوا آ مبارك عمك دايرك براك
_ عارفو دايرني لشنو استناني هني دقيقة بس وبجيك ما تفوت
_ سمح ألكع
_ سمح
وفات ليهو
_ حبابك آ عمي الشيخ
_ حبابك آ ود اخوي ، جيتك الجامع الليلة عجبتني بالحيل والحمد لله الهداك وسمعت كلامي وصليت
_ الحمد لله
_ ان شاء الله ربنا يثبتك وما تخليها تاني
_ ان شاء الله
_ والتلاتة شهور ماهن كتيرات والايام جراية وهسي تغمض وتفتح تلقاهن تمن ، وانا علي وعدي ليك واتفاقي معاك
_ التلاتة شهور حقات شنو ؟
_ نسيت كلامنا اللمس ؟
_ ايواااا ، لا لا ما نسيتو بس انا ما رجعت للصلاة عشان كلامك ولا عشان بتك لاني العرس خليتو انا آ حاج
_ خليتو كيفن ؟
_ خليتو ساي بس كدي دي
_ عشان انا قلت علا تصلي تلاتة شهور ؟
_ ما عشان كدي
_اكان شايف التلاتة شهور كتيرات بنقصن ليك ،
_ لا لا ما كدي بس انا..
_ اكان كتيرات وريني والله بنقصن
ود كبروس عرف انو هو في وادي والحاج دا في وادي تاني والحدربي اشر ليهو بيدو يستعجل عشان داير يفوت ، قام قال ليهو آي كتيرات آ حاج
_ ابقيهن ليك كم ؟
_بقيهن فد شهر
_ لا لا شهر بسيط ، خلاص شهر ونص اي شهر ونص بس امسك فوق صلاتك فيهن قووووي اصلو ما تخليها
_ سمح بس انت عارف انا قرش ما عندي
_ القروش بجن وانا زاتي ما بدور لي منك قروش
_ سمح وعديلة تب . اها انا ماشي ودعتك الله
_ خلاس امش وكلامي ما تنساو
ود كبروس قال للحدربي معليش ياخ بس عمك الشيخ دا كلامو كتير ات عارفو براك
_ مالو هو اكان دايرك في شنو ؟
_ ما مالو حاجة ، بس نضم معاي في الصلاة وقال لي تاني ما تخليها
_ بس ؟
_آي بس ،
_ سمح ورح وباكر بدري كلم حمد سيد الكارة عشان نجيب القفص
_ بمشيلو هسع وبوريهو في ليلنا دا
_ امشيلو آي احسن وانا ماش علي اهلي ونتلاقى باكر بدري هنا في الجامع
_ ان شاء الله
ود كبروس فات لحمد سيد الكارة واتفق معاهو يجيهو مع طلعة الشمش
عوض الله الرمتالي زول خواف شديد ومافي زول عارفو خواف لانو مضاري خوفو بالهوراش وهو زول جهامة وحلقومو عريض
الناس كلهم مغشوشين فوقو وقايلنو فارس والخلاهم يقولوا كدا يوم عرس عبد المجيد اب كرنك والايام ديك بعد شردتو من الجيش
اليوم داك الناس اكانوا يرقصوا ويعرضوا في الحفلة ومنطربيييين
وجوا اتنين حرامية كسروا الشباك حق دكان ود التلب واحد دخل جواو والتاني وقف ببرة يتناول في الحاجات من داك
الشارع فاضي قرد ما فوقو وكل الناس في الحفلة الفنان يلعلع والموسيقى شغالة والبنز دق والدارة ليها علالة
زوجة ود التلب نومها خفيف صحت بالكركبة وتورت ود التلب وقام براحة أتناول عكازو وقعد يتدبى
الوكت داك وفي نفس اللحظة عوض الله اكان نايم في بيتهم الحفلة فاتتو وصحى وسمع الغناء وبيت ناس اب كرنك العريس ما بعيد من بيتهم بالحيل ومرق ماشي الحفلة ومع مرقتو شاف ليهو كلاب هناااك في اول الشارع والكلاب نبحن فوقو وهو طوالي قام جاري منهن قال بصل فجة الحفلة قبال ما يصلنو
ود التلب الساعة ديك فتح باب الحوش حقو براااحة ومرق ولمن بقى قريب من الحرامي وقبال ما يلفخو بالعكاز فوووووو يجي عوض الله الكارداتنو الكلاب جاري وجري خوف وكتل ملف ويصدم الحرامي يطيرو هناااك ود التلب لمن اتشهد بس النيسان
وعوض الله وقف منبهط وما عارف في شنو الحرامي قعد يصرخ وود التلب قال لعوض الله هاك العكاز دا تمو دا حرامي دا وعوض الله خاف علا اتشجع بشوفة ود التلب واتناول منو العكاز وقال للحرامي جيتك ووقع فيهو لفخ
الحرامي التاني الجوة الدكان لمن سمع كوراك صاحبو البرة مد راسو داير يشوف في شنو وود التلب قال لعوض الله ألفخ اخوهو خلاص كفاهو دا
وعوض الله ولا كضب اتلفت علي الشباك وعاين للحرامي سمممح ولفحو فد لفخة ما تناها وداك دمو تزززززززز طار وقعد ينعرط ويكورك
الناس اتلموا جابهم صرخي الحرامي البرة والفي الحفلة كلهم جوا علي الدكان وعرفو عوض الله هو الدقاهم وقعدوا يشكروا فوقو وهيع هيييع كترت وهو يتكشم مبسوط ومن ديك فكاها في روحو وكتار البقوا يتحاشوهو وقايلنو مانع
وبعد كلام ود الفويلح واتفاقوا معاهو علي السرقة مشى بيتهم وقعد براهو وضربها لقاها فكرة ما نافعة لانو خاف ينكشفوا وينقبضوا وتاني ما في ليهم قعاد في الحلة اكان انقبضوا وابوهو زاتو زول صعب خلاص اكان عرفو سرق بتكيهو وبضبحو شخخخخخ
قام في ليلو داك فات لود الفويلح قال لبهو هوي انا ما معاك في سرقة بقر ود بانقا ولا داير لي قروش
_ هي عان هي عان ، شنو هو الما معاي ، ما علي كيفك انا ما شافع عندك
_ كيفن ما علي كيفي آ زول ؟ انا ما داير اسرق ولاني حرامي
_ آي ما علي كيفك عديييل كدي وبتسرق غصبن عنك ، بعد ما تتفق معاي واتفاق رجال تقوم تغير رايك وتنط ؟
_ انا ما بسرق ولا داير قروش حرام
_ اكان كدا انا ياني المبعجك بالسكين وياني الكاتلك
_ هوووووي يا بخيت ما بتخوفني بكلامك دا انا وقبل كدي حرامية امكن منك واتنين انا رقدتهم واطة براااي والحلة دي كلها عارفة انا منو وانا شنو
_ والله يا كلب بعد كشفت ليك سري ما تسرق البقر دا معاي البسويها فيك لا حكت ولا بقت
_ داير تعمل لي شنو يعني ؟ انت ما بتعرفني اظنك واحسن ليك اختاني
_ انت اكبر رمة في حلتنا دي وانا علي اليمين آ عوض الله اضبحك شخخخخ اكان ما سرقت البقر دا معاي
_ انا ما بسرق
_ يا تسرق يا تموت اختار ليك واحدي فوقن
_ والله باكر من الصباح اكلم ناس الحلة كلهم بيك
_ دا اكان الواطة صبحت وانت حي
بخيت شال سكينو وقبقب عوض الله وعوض الله قعد يبكي وقال ليو خلاس بسرق بسرق
بخيت قال قوم طير اهلك وباكر لو راجل كلم ليك زول بكلامنا دا
عوض الله مسح ديمعاتو وفات اهلو
الصباح ود كبروس بكارة حمد مشى جاب القفص والرفيع زاتو جاء معاهو وحفروا ليهو وركبوهو في الحوش
ودخل فوقو جدادة امو بي سواسيوها
والقفص سمح وكبييير
وجاهم الحدربي ثال ليهو بعد كدي باقي ليك الجداد ورح السوق ، الرفيع قال ليهم جيبوهو من ود العد ومن ود اب كلام احسن ليكم من السوق وبالمرة شوفو طريقتو كيف وانا زاتي بمش معاكم
وبكارة حمد زاتها مشوا ود العد
ود كبروس رفع معاهو غنماية امو البرقة عشان يبيعها
الرفيع قال ليهو دي موديها وين آ زول رافعها معانا
ود كبروس قال ليهو داير ابيعها واجيب بتمنها الجداد
الحدربي نزل العنز وقال لحمد غشينا بيتنا آ زول انا القروش عندي
وود كبروس قعد يتحلف وما رضى كلو كلو الا تنباع وقعدوا يتحلفوا ويتحاججوا لمن الحدربي زعل وحلف طلاق ما يمشوا ود العد
حمد فات بالكارة يشوف مشهادو
الرفيع فات بيتهم وشال فرارو واتعنقل فوق نيماتو
والحدربي فات بيتهم زعلان من ود كبروس
ود كبروس حلف يمين الا الغنماية تنباع وقرش من الحدربي ما يشيلو وام دين ما دايرو
حاجة الشول محتارة دايرة الغنماية ودايرة الخير لولدها وحنستو يشيل القروش من الحدربي دين وبعدينك يرجعن ليو ، علا هو مابي تب لو يخلي الشغلة قال ما بشيل قروش الحدربي
بخيت ود الفويلح جاء وشاف القفص وعرف الحصل كلو وانبسط وقال لود كبروس اوووعك تشيل قروش الحدربي وان للجداد اصبر لي بس يومين انا بديك قروشو
الحدربي جاء تاني راجع لود كبروس ولقى بخيت قاعد معاهو ابى يقعد وساق معاهو ود كبروس بيتهم وقال ليهو مالك في شنو يا اخوي وكان انا زعلتك وللا غلطت عليك في شي وريني
قال ليهو ما في شي ما في شي
_ لا لا في ولازم توريني
قبال ود كبروس ينضم جاهم الكباشي ود هباش داخل
والحدربي طوالي غير الكلام
يتبع...
