عرس ود كبروس 24
مجاهد يوسف
السكرية وبتها لمن في البهجة دقنها دقة حارة خلاس عشان ابت المرضي وهي قالت ليهن لو كتلتوني ما برضى بيهو ودايرة ود كبروس بس
امها قالت ود كبروس نحن ما بندورو ومتيمنة ما بمسك يدك آ البهجة والمرضي بترضيبو وكراعك فوق رقبتك
المرضي عرف موضوعو باظ وقال احسن حاجة يرجع لطيبة بت التمتام وفات ليهم جري
طيبة قالت ان بقى آخر راجل ما دايراو بعد ما سابني وفات للبهجة
اهلها حتهم ابوا المرضي وقدر ما حنسوهم ابوا كلو كلو والمرضي بكى ليهم بدموعو ويشيل ويجيب ليهم في الاجاويد ما خلى زول في الحلة ما جابو ليهم ووصل لعند شيخ الحلة وبرضو قالوا ليهو السماء قريب
تاج السر البتمتم ابوها قال ليهو انت في اللول وكت دايرها كدي مخليها مالك وفايت لبت الشيخ لشنو ؟
قال ليهو غلطان وستين غلطان وندمان وسافي التراب وتووووبة تاني اكان اخليها وكلو من الرضي اخوي هو الجبرني
وبرضو ما نفع ولا قالوا ليهو بتقول في شنو
قام فات للرضي اخوهو قال ليهو كلو منك انت دا ولازم تمش ليهم وترجع لي طيبة خطيبتي
الرضي قال ليهو البركة اللبوك انا من اللول ما دايرك تخطب بت التمتام دي بس انت معولق ساكت وعامل فيها رياد وبعدينك انت هسع زعلان ومنفتن فيها كدي زي الشافع لشنو ؟
_ مالك ومالي ياخ بس ورح رجعها لي
_ اصبر اصبر آ المرضي اخوي اناةبعرس ليك البهجة والبهجة اخير من طيبة واحلى منها
_ ياخي ماني داير البهجة انا ياخ وهي زاتها ما دايراني بتعرسها لي بالرجالة ؟
_ ما بالرجالة بس بالمخ والتفكير انت اصبر لي بس انشوف لي طريقة أطير بيها ود كبروس الرمة دا اول حاجة
_ دا ما بطير دا ياخ ولا شتين بعد عرف البهجة دايراهو ورايداهو
_ يرض عضامك وعضامو والله ما ياخدها ان طنبر
_ دار تمنعوا كيفن ؟
_ والله امنعو منعة وامنع ابو اهلو زاتو
_ علا دار تكتلو ساي
_ كتل انا ما بكتلو لكن انا عارف بمنعو كيفن
حاج الشيخ بعد جاء من ود كبروس جاتو البهجة بتو شكت ليهو من امها واختها قال ليها معليش وحصل خير وامشي نادي لي امك ، امها جات وقال ليها داير اوريك كلام انتي ماكي عارفاهو وقبال ما تقعدي في الدولاب حقي في علبة جواها جزلاني القديم امشي جيبيها لي وتعالي
مشت جابت العلبة ادتها ليهو وقعدت وهو فتحها وطلع الجزلان وفتحو وطلع منو ورق كتير ملفلف ومطبق كباهو كلو في عبو وفي ظرف مربوط بأستيكة قروش شالو هو بس ورجع باقي الورق في الجزلان وقال لمرتو الظرف دا فوقو ورق الحواشة هيلت كبروس الله يرحمو وانا داير اديهو لي ولدو مبارك واسلمو حواشتو
_ الحواشة تديها ليهو لشنو وانت مشتريها من ابوهو قبال يموت ؟
_ انا ما اشتريتها منو ولا شي وماسكها ليهو امانة بس لحدي ما ولدو مبارك يكبر ويقول داير يعرس ودي الوصية القالها لي ابوهو قبال يموت
_ الحلة دي كلها عارفاك آ حاج اشتريتها منو
_ صاح ودا الكلام الاتفقنا عليهو نحن والقلناهو للناس لكن الصاح انا ما اشتريتا منو وماسكا ليهو امانة في ذمتي وفي رقبتي دي وود التلب عارف الكلام دا
_ ما بتديها ليهو والله وتعبك فوقها السنين الفاتت كلو داير تودرو ويروح ساي ؟
_ دا حق ناس آ مرة ما حقي
_ حقهم شنو ؟ انت حقهم قاعد توديهو ليهم كل سنة وياكلو ويشربوا من خيرك وان ختوك اكان الجوع كتلهم
_ دا حقهم قلت ليك والحواشة حواشتهم وما كانت متعباني في شي وهسي الحق لزومن ارجعو لأصحابو وانا باكر بعد اديهو الورق دا بسوقو معاي وبديهو القروش هيلاتو العندي كلهن
_ خاف عندو قروش عندك ؟
_ وقروش كتيرة مي شوية خاتيهن ليهو في البنكي
_ انت جنيت اكان كدي يا راجل وماك شديد
_ جنيت كيفن آ مرة ؟ عشان داير اسلم الولد امانتو وارتاح من همها اكون جنيت ؟
_ امانتو شنو آ راجل خاف ربك ، يعني عشان داير تعرسلو بتك دار تبقيهو زول ؟
_ الحق حق ودي امانة في رقبتي دي وربنا بسعلني منها يوم القيامة آ مرة ، وباكر بدري بسوقو البنك اديهو قروشو چت ،
