عرس ود كبروس 3
مجاهد يوسف
الواطة صبحت وحاجة الشول عندها غنمايتين واحدة بعامية لبانة مشت عليها حلبتها ملت الكورة ام قعر والغنماية التانية الكرتاء دارة ولا هبشتها علا بعدختت اللبينة في الشباك جات عليهن وحلتن ومرقتبهن من الحوش وكشتن علي الحدبة لراعي الحلة الغنم وجات صادة علبت كانونها وقعدت تسو في الشاي ود كبروس متندل نايم علي بطنو خشمو مفتوح لمن ريالتو سايلة ويشخر ساااي وناغمتلو
_ النبارك هوي النبارك قوم آ عشاي الشمش فقعت وجاتك قوم ادخل منها ما تورد
مبارك قام عيونو حمممر ويبتبتن وصاريهن اللتنين وصاري وشو صرة التقول مو هيلو وتترب نزل كريعاتو وجرجر عنقريبو علي الضل ورقد تاني نام
امو عاينتلو ولولحت راسها وفاتت علي مطبخها
وهو نام لمن الضل كمل جت وتاني الشمش جاتو وتاني امو جاتو وصحتو
وقبال يفتح عويناتو زي الناس قال ليها يمة انا داير بت كنيتر آ يمة
_ هي آ يابا حليلو هو قوم قوم خلاس كفاك رقاد
_ وحات الله آ يمة بتكلم جد داير بت كنيتر بس وكلو كلو آ بدور غيرها
_ بت كنيتر ياتا فوقن ؟
_ بدرية الصغيرونة القصيرونة
_ ها المخلقن دا ، دي مختوبة للشفيع ود العون مالك ماك خابر ؟
_ وحات الله آ يمة انتي كلو كلو ما بتطمني الزول
_ اطمنك كيفن عاد ؟ البنية مختوبة وقالوا العرس في قصير
_ سمح خلاس خليتها الله لا كسب الشفيع ولا بارك فوقو
_ ما تداعيو آ ولدي ما صاح منك وعيب عليك
_ سمح داير سمية بت عجيب
_ هي عان
_ اها بس ما تقولي لي برضا مخطوبة
_ ما مختوبة علا ابت الرضي ود عوض الكريم البي عربيتو وابت امحدعلي ود كرار الملان قروش وأبت الصديق ود عشة خالتها المغترب في بلاد برة دار ترضى بيك انت ؟
_ مالها ما بترضى بي ؟
_ ما بترضى بيك والله ، ترضى بيك شنو ها ولشنو
_ إتي آ يمة انا ما ولدك ؟
_ ولدي
_ طيب مالك بتكسري لي مجاديفي كدي ؟ إتي مفروض تشجعيني وترفعي لي معنوياتي ، ياخ القرد في عين امو غزال
_ علا دايرني أكضب عليك ساي
_ ما دايرك تكضبي علي بس اخطبي لي سمية دي بس
_ البت دي ابت الوريتك ليهم ديل عشان قالت دايرة تقرا وخر ليك ما تفكر فيها دي
_ اها نان اعرس مني نان ؟
_ عرس واحدي من بنات بانقا بس اخوات الحدربي
_ ديل انا قلت ما بدورن وتاني عليك الله آ يمة ما تقوليهن لي
_ سمح خشمي عندي وبصمو وقوم دخل عنقريبك دا وامش اتسوك وتعال تلقاني سويت ليك الفطور
_ قايم قايم بس آ يمة عليك النبي شوفي لي واحدة سمحة ، سمح؟
_ سمح
الحدربي قام الصباح وكلام مرتو الامس عاجبو ودايرو وما متمنى علا مبارك ود كبروس يقول دايرلو واحدة من اخواتو ع ان عارفو عاطل وعدمان ورمة ساكت لكن صاحبو من سعتن الصغار وقال والله لو كلام المرة دي طلع صاح وود كبروس قال داير واحدة من اخواتي يكون مية مية احسن حاجة لانو بكون ضرب عصفورين بفد حجر وحلف قال والله اكراما لصاحبي وأختي اسوي ليهم عرس الماشي والغاشي ينضمبو والقريب والغريب يفرحبو ويعجبو
