عرس ود كبروس 12
مجاهد يوسف
الرفيع لمن وصلوهو ديل لقوهو متعنقل فوووق في شجرة النيم القدام باب الحوش حقهم وشغال فيها بالفرار قطع وهو زول ظريف شديد وجنو مشاغلة وهظار وضحك ومن شاف الحدربي وود كبروس ساب النيمة وجاهم نازل وقعد يضحك
الحدربي قال ليهو سلام عليك ، مالك مبسوط كدي وشارطك الضحك ؟
قال ليهو والله من شفتكم ظهرتو من اول الشارع اعاين ليكم واصلو ما قايلكم جايين علي وقاصدني انا
_ مالنا ما بنجيك
_ لانو لا عندي اخت ولا بت كبيرة تنفع عروس وقلت اكيد قاصدين بيت عمي جاد الرب جاري دا
_ والقال ليك جايين لعرس منو ها قول بسم الله
_ بسم الله ، بس اي زول يشوف ود كبروس الايام دي دخل ليهو بيت في الحلة دي طوالي بقول داير بتهم
ود كبروس قال ليهو الحكاية شنو آ زول ؟ وهو انا بقيت مشهور كدي وما عارف وللا شنو
_ الحلة كلها تنضم بيكم انتو الاتنين
_ انا زاتي قنعت تب من العرس وناس الحلة اللشوفو ليهم موضوع غيري ينضموبو تاني
_ كدي اتفضلوا علي البيت
الحدربي قال ليهو مانا متفضلين وجيناك بندور القفص هيلك حق الحديد دايرو ود كبروس دا بدور يسعالو فوقو جداد
_ اصلا هو حق جداد وانا لمن جبتو جبتو من واحد في ود العد وما عندو شغلة غير سعابة الجداد ود ابو كلام اكان بتعرفوهو ، بتعرفوهو مو يا ؟
_ بنعرفو آي وخلينا منو هسع والقفص نحن دايرنو
_ انا بديك ليهو آ ود كبروس علا الشغلة دي مي ساهلة ما تقول قجتك للقفص ومليك ليهو جداد وبس خلاص
_ نان في شنو تاني ؟
_ داير نصيحتي ؟
_ بالحيل
_ باكر امرق في ود العد وامش لود ابو كلام في بيتهك وقول ليهو انا جاييك من الرفيع ودايرك توريني جدادك وتوريني الشغلة دي كلها واخد ليك معاهو كم يوم شوف شغلتو كيفنها واتعلمها كويس وتعال شيل القفص وديهو بيتكم وانا ما بدور لي منك فوقو قروش هسع وبصبر ليك لامن تشتغل وتستفيد حتين تجيبن لي ، قصرت معاك ؟
_ لا لا ما قصرت والله علا انا شايف ما ضروري امش ود العد
_ لا لا ضروري ما تقول كدي واخير ليك تسمع كلامي وتمشلو وتتعلم الشغلة دي في الاول حتين تشتغلها عشان ما تبقى عليك البقت علي انا
_ البقت عليك شنو انت ؟
_ انا بعد جبت القفص وقجيتو دخلت لي فوقو كم وعشرين جدادة وكم ديك والققص بشيل اكتر من كدي علا قلت ابدا بيهن وياها كانت قدرتي
_ اها
_ عليكم امان الله وماكم طالبني حليفة كل يوم القى لي جدادة ميتة ويووومي بخش امرقها واجدعها والبكتلها شنو ما عارف لمن انقرضن جت وليوم الليلة ما عرفت سبب موتن
_ مالك ما مشيت لو ابكلام وسعلتو
_ ما مشيتلو والله وتاني ما فكرت في الجداد
_ يعني هسي انا اشتغلها وللا ما اشتغلها
_ ما بقول ليك ما تشتغلها علا وريتك تعمل شنو وود العد مي بعيدة
الحدربي قال ليهو
_ كدي انت ادينا القفص اول حاجة اكان ما عندك مانع
_ مانع شنو آ الحدربي اخوي ، انا زاتي ما مستفيد منو شي غير مالي لي الحوش ساي
_ نشيلو هسع
_ علا بكارة شيل ساي ما بنشال ليكم لانو تقيل ونحن عشرة تنفار الدخلناهو في الحوش يوم جبتو
_ ما بتفكفك ؟
_ ملحم كلو زي الصندوق ما بتفكفك جيبولو كارة بس
الحدربي قال الكارة ساهلة ورح آ مبارك والليلة ما في طريقة ونحن بنمش هسي يا الرفيع وبنجيك باكر اكان الله حيانا
_ علي العديلة
وفاتوا منو بجاي جاهو بخيت ود الفويلح بجاي اكان مراقبهم من بعيد ومحروق شديد من ود كبروس وعارفهم جوا للرفيع دايرين القفص حقو للجداد لانو عارفو جادعو ساي
_ الرفيع كيف حالك ياخ
_ حبابك آ بخيت
_ مالك علي الشدرة دي كاطعها ، اكانت سمحة وضلها كبير
_ داير حطبها اسويبو راكوبة وبعدينك سلك الكهربة حقنا الجاي من العمود البفوق ليها دا قربت تكطعو قلت احسن اكطعها واستفيد منها
_ كدي ناولني الفرار دا انطلع اساعدك
_ الدنيا مغارب آ زول الباقي خليتو لباكر بقوم عليهو دغش وبكطعو
_ ما تخليني انساعدك ياخ
_ لا لا كتر خيرك
_ مسعول من الخير
_ اسعل ساكت
_ داير القفص هيلك المجدوع في حوشك دا
_ شن بتدةوربو ونعلك ات حتك دار تسعالك جداد
_ لا لا ها جداد شنو ها
_ اها شن بتدوربو ؟
_ بدور اسيلي بيهو مظلة في الحوش
_ دا قفص جداد كبير وجاهز ما بنفع مظلة
_ انت اديني ليهو وانا بخليهو بنفع مظلة
_ ما بغلى عليك علا سبقوك عليهو الحدربي وقريبك ود كبروس لو جيت قبل سوية اكان لقيتهم معاي
_ يعني عشان جيتك ليو دار تعزز بيهو علي
_ قلت ليك اديتو قريبك
_ دفع ليك كم فوقو
_ ما اتقاولنا فوقو بس قال دايرو وانا قلت ليهو خير
_ انا الليلة دي بديك فوقو الدايرو
_ انت آ ود الفويلح ما بتفهم وللا شنو ؟ قلت ليك اديتو لناس الحدربي وبقى حقهم ابيعو ليك كيفن بعد اديتهم يا
_ ما دفعولك هم
_ ولاني داير منهم فوقو قرش
_ انت اصلا رمة ومعولق زيهم وواحد وما فوقك خير
_ مقبولة منك كتر خيرك آ ود عمي
_ تعمى ويطول عمرك
_ لا حول ولا قوة الا بالله ، ها زول ها انت لسانك دا مالو كعب كدي ؟ والله من جيتني ساي عرفتك بتقول داير القفص لانك زعلان من الحدربي عشان ابى يديك اختو
_ الخوخة التقلع سنونك انت وهو ، واختو انا الابيتها لانها قبيحة وشينة ما ابى لي بيها هو
_ الحلة كلها عارفة وشكلتك القبيل مع الكباشي كانت في شانها ، امش امش انت والله الما فيك خير
بخيت فات لعوض الله وقال ليهو داير قروش وللا ما داير ؟
_كيفن ما داير
_ تعال نسرق بقر الحدربي
_بتتكلم جد وللا بتهاظر آ بخيت ؟
_ البلاهة خلها معاي وللا ماك معاي
_ معاك تب ، علا نسرق البقر كيف ؟
_ بتعرف الكمبو البهناك لود العد ؟
_ بعرفو آي وكم مرة مشيت سكرت فوقو
_ باكر نمش ليهو انا وياك فوقو حرامي انأ بعرفو نمش نتفق معاهو ونجيبو هني يسرق لينا بقر الحدربي چت
_ واكان انقبضنا ؟
_ تقبضك بطنك ، انت باكر ورح معاي بس
_ سمح وباكر قريبة
يدبع
