عرس ود كبروس 27
الحلقة الاخيرة
مجاهد يوسف
حمد ولا اشتغل بالرضي ولا خاف منو وقعد يربط في حطبو عارفو هوراش ساكت ما بسوي ليهو اي حاجة
الرضي مرق ومشى اللوري وعندو سيخة غليييدة جابها وجاء داخل بيها الحوش وقال لحمد اها الليلة بتجر مني وين والبحلك مني منو؟
حمد لمن شافو جادي صرا وشو وزعل وقال ليهو يعني انت جادي آ عولاق ؟
_ ياتو يوم هظرت معاك انا يا كلب والشغلة دي فيها سجن دحين قبال اكتلك معاي وللا باقي علي كلامك ؟
حمد ولا رد عليهو وجرى بهناك للكارة وشال السوط من جمب الحصان وقال ليهو تعال لي جاي آ الرضي لو راجل
والرضي جاهو
وحمد طوالي محطو بالسوط وبقى يزح منو ويجيهو جاري ويديهو محطة بأقوى ما عندو وسوط العنج حار وطويل والرضي بقى يتدارق من الجلد ولمن غلب فيهو حيلة فناهو بالسيخة وحمد زاغ منها وقال ليهو جيتك انعدل لي آ عفين ووقع فيهو جلد
الرضي بقى يتجارى ودا يقلس فيهو وجرى منو برة الحوش وقفل الباب ببرة وركب لوريهو وفات
حمد مشى فتح الباب وودى الحطب الفي الكارة وشال معاهو السيخة وفات المركز
وقال للبوليس الحاصل كلو والبواليس مشوا جابوا الرضي
وحققوا معاهو وحلف ونكر حطب لكن درب السوط اكان ظاهر في جسمو وعصروهو لمن اعترف بشكلتو مع حمد بس وحلف ستين يمين ما فلق حاج الشيخ وقال الضربو ودكبروس
حاج الشيخ جاء زاتو المركز لمن سمع بقبضة ود كبروس والرضي ولقى التهمة راكبة في ود كبروس عشان لقوا السيخة في بيتو وحمد والرفيع شهدوا انو ما هو لكن ما صدقوهم لانو السيخة دليل
في الآخر الرضي اعترف عشان يمرق منها المرضي اخوهو
وحاج الشيخ اتنازل وقال للضابط الصلح خير ونحن اهل وديل كلهم اولادي وانا الرضي دا غير انو زي ولدي ماخد بتي الكبيرة انا عافيهو والضابط قال خير وما دام انتو اهل الصلح فعلا خير وفكاهو ليهم وكلهم فاتوا الحلة
في الحلة حاج الشيخ اكان زعلان وقال للرضي انا شفت المرضي اخوك وعارفكم حرشتوهو انت وخالتك دحين ارحل من بيتي دا وسوق مرتك دي معاك لانها برضو ما فيها خير وسوق خالتك برضو معاك وقال للسكرية انتي طلقانة عشان تتدأبي لانك انتي المحرشاهم وقال لبتو انتي كتر خيرك آ بتي وبارك الله فيك جبدتك امك قلبك اسود زيها
بتو قعدت تبكي بطول حسها وقالت ليهو علا تسامحني يا ابوي الشيطان عماني وامي وراجلي هم السبب وهم الحرشوني وكروي في ود كبروس وانا غلطانةنمانة وسافة التراب لاني سمعت كلامهم وقفت معاهم
حاج الشيخ سامحها بس قال للرضي لازم ترحل الليلة وتسوق معاك مرتك وخالتك وما توروني وشكم تاني،
الرضي رحل في نفس اليوم وساق مرتو وخالتو معاهو وحاج الشيخ والبهجة بتو بقوا براهم في البيت وحاج الشيخ بعد ما ديل رحلوا جاب ود كبروس وقال ليهو بكرة بإذن الله العقد والعرس بعد اسبوع ان شاء الله ود كبروس قال ليهو لا بعد اسبوع العقد بس علا العرس بنأجلوا لبعد الدرت
بخيت ود الفويلح ومحجوب والكباشي متفرجين بس وزعلاين من الرضي زعل شديد قالوا خرب ليهم كل شي والكباشي فات ليهو في البيت وقال ليهو باكر تجيب لي طوبي
الرضي خسر عمو الشيخ وضيع كل شي بشفقتو وطمعو في حق الناس وسكن مع امو في اوضة المرضي
والمرضي من يوم فلقتو لحاج الشيخ طفش تاني ما عود صاد ولا في زول خابرو ختر وين
والرضي حمد الله بطفشة المرضي دي وقعد في بيتو البناهو يعرس فيهو
