عرس ود كبروس 4
مجاهد يوسف
من شاف بت عجيب ساي ود كبروس الفيهو كملت وقلبو بس النوبة قال شحححح واشتغل تل تل تل وقعد يبطبط ، والبت سمحة سماحة لمن مكملاها عديل وظريفة خلاس وبابتسامة جميلة وعريضة وسمحة سلمت عليهم وقالت ليهم اتفضلوا اتفضلوا وديل طوالي اتفضلوا ولا كضبوا بخيت زاتو غير ضكران زول اجتماعي ووناس وما الزول البتخجل داك وبنضم مع اي بت في الحلة البنوت زاتن عارفاتنو وهو ما عندو اخوات في البيت امو وفد اخو اصغر منو لكن بنات الفريق كلهن عاديهن اخواتو وكلهن بنضم معاهن ومشهور بين البنات بغسيل الهدم لانو نهائي ما بتعب امو من هدومو يتوسخن بلملمن وبربطن في ملاية ويدخل فيهن لوح صابون وظهرة وبقيف قدام الباب اول بت تقع فوقها عينو بناغم ليها ويديها ليهن ويقول ليها غسلي ديل واكويهن ووديهن البيت لأمي
مع دخلتهم بيت ود عجيب وفي الحوش جمب الباب وقبال يمشوا علي حاج عجيب قال لسمية اسمعي قبال نخش ونقنب ونناضم ابوك نحن جايين ليك انتي
قالت ليهو أنا ؟ كيس الما جبت معاك هدومك اها ان شاء الله خير ؟
_ لا لا خلاس ارتحتن من هدومي لاني داير اعرس
_ اوعى بس تقول دايرني
_ بدور بيك شنو ها الخليقة دي ، انا داير اخلاص بت بانفا والخطوبة بعد باكر اكان الله حيانا
_ مبروكة والله ان شاء الله ربنا يتم ليكم بالخير
_ الله يبارك فيك وعقبالك
_ لا لا انا ما دايرة الا بعد اكمل الجامعة واتخرج واشتغل ، بدري علي
_ هسي نحن جايين ليك عشان نخطبك لمبارك ود خالتي دا
سمية ضحكت ومبارك ماسكاهو ام هلة هلة ويشبل ويبلع في ريقو ويغرود في عيونو ويتكشم
بخيت قال ليها قلتي شنو نرجع وللا نخش نناضم ابوك ؟
قالت ليهو خشوا اشربوا ليكم شاي وللا اتعشوا معانا علا موضوع خطوبة وعرس وريتك انا قبل شوية وما عندي كلام في مبارك ولاني مابياهو من عيبن فيو بس ما خاتة في راسي غير القراية وبس
بخيت قال ليها فكري فكري اول وشاوري عقلك ومبارك ما بحميك تقري
مبارك ساكت ساي ومشتح عيونو وتكشمو داك انقلب ابتسامة وصفراء ولسة يبلع في ريقو
سمية اعتذرت ليهم تاني وقالت لبخيت اعفوني من الموضوع قالت لمبارك لو داير لي الخير عدني اختك وادعي اكمل قرايتي وربنا ينجحني بس . ود كبروس خشمو ما فتحو وبخيت قال ليها خلاس سمح عفيناك وربنا يوفقك وتبقي لبنا دكتورة وامشي اعملي لينا الشاي ما بنرجع قبال نخش ونسلم علي ابوك وباكر ارجي هدومي
سمية ضحكت وقالت ليهو جيبن لي طوالي والله بربطتن اوديهن لاخلاص بت بانقا
وشربوا الشاي مع ود عجيب وبخيت وراو الجوا ليهو وود عجيب قال ليهم البت قبال كدي ابت كم واحد وما بتدور غير العلام وانا ما بدور اجبرها والفيهو الخير ان شاء الله ربنا يسويهو وقال لود كبروس البنوت راقدات آ ولدي وسمية دي متفلهمة ما بتنفع معاك وأعمل زي بخيت اخوك دا وأخد من بنات حاج بانقا وابقالو عديل واخوان عرسو اخوات
ود كبروس قعد يسنتت وكملوا شاييهم وبقوا مارقين
في الطريق قعد يطنطن في بخيت وقال ليهو انت الخربت الموضوع وطار بسببك ما كان تكلمها هي اول وجمب الباب ياخ
_ انت رمة وللا شنو ها ؟ خربتو شنو وخربتو كيف ؟
_ قعدت تتظورف وتتونس معاها ولا كنت جادي وهي قايلاك بتظاهر ولا خليتني انا انضم
_ والله غلطان الانا المشيت معاك لكن لومك علي تب اكان باريتك تاني وللا مشيت معاك لناس
_ احسن زاتو عامل خليقتك كدي زي الصبرة
_ انا الزي الصبرة ؟
_ والله اخير الصبرة زح مني كدا تزحزح وتزح فوق النار
_ زحيت منك
_ احسن زاتو ، كمان بتكلمها وبتكلم ابوها وفرحان انا داير بت بانقا وخطبت بت بانقا ، ان شاء الله تضوي بت بانقا دي وياها شبهك وشينة وقبيحة زيك كدا
_ ود كبروس حدك هنا واوعك تنضم وتتكلم في بت بانقا عشان ما اخسرك وهي ما سألتك ولا جابت سيرتك وبقت عرضي يمين بالله اركبك سكين ابعجك تبعج واشرطك كرررر لمن اشيلك مصارينك في يدك
_ عرضك شنو تعرض في جهنم متين بقت عرضك ؟ البركة فيني
_البركة فيك سويت شنو ؟ المهم ما تجيب سيرتها في لسانك
_ لا خلاس وهي زاتها التقول من سماحتها والله قبيحة وشينة زيك كدا والله بس شناة الحدربي اخوها
الساعة ديك الحدربي كان وراهم وسامع كل كلامهم اصلا هو جاء كايس ود كبروس عشان يشوفو عمل شنو وابى يسألو قبيل لمن جاهو في البيت قدام بخيت ، وعرف انو لسة مع بخيت وشافهم لمن مرقوا من بيت ناس ود عجيب وجاء عليهم وكلام ود كبروس مع بخيت كلو سمعو كان وراهم طوالي والاتنين ما انتبهوا ليهو
اخد ليهو وقفة شوية وخلاهم لمن بعدوا منو وناغم ليهم وقفهم وسلم عليهم عادي كأنو ما سمع شي وود كبروس انخلع ونطط عيونو وغلبو الكلام خايف يكون سمعهم
الحدربي ما وقف معاهم كتير وفات منهم وود كبروس قال لبخيت بكون سمعنا ؟
_ ما اظن
_ ياخ والله جاء في وكت كعب عديل والخوف يكون سمع كلامنا
_ كلامك براك آ زول انا ما نضمت فيهو بشينة
_ ما كلو منك انت دا
_ مبارك ابعد مني واختاني كدا كدا انا ماشي انوم
_ امش امش وانا زاتي ماشي بيتنا ولسة باقي لي بنوت الفريق داك ماشي اعزل لي منهن كم واحدة ما دام بت عجيب طارت
الحدربي وصل بيتهم زعلان زعل شديد من ود كبروس وكلم مرتو بالكلام السمعو القالوا ود كبروس لبخيت كلو ، قالت ليهو عان الخليقة كمان والله ما يستاهل تديهو شلن
قال ليها لا انا وعدتو ولازم اوفي بوعدي .
ويدبع
