عرس ود كبروس 7
مجاهد يوسف
بخيت ود الفويلح فات بيتهم وزعلان شديد من ود كبروس
ودا زاتو فات البيت وقال لامو انتي قبيلك ليه ما قلتي البهجة دي خطبها المرضي اخو الرضي المعولق دا وخليتيني افوت ليهم انحرج ساي ؟
_ المرضي شنو الخطبها ها ؟ ولا خطبها ولا شتين علا قالوا ليك كدا ما دايرينك ساي
_ القال لي الرضي اخوهو
_ كضب عليك ساي وانت مكلمو هو لشنو ما كان تكلم ابوها
_ ابوها كان مافيش وهو القيناهو
_ ما كان تسعلو
_ سعلو المعولق بخيت ود اخوك انا خشمي ما فتحتو
وانت سايقو معاك لشنو ؟ وانا شفتك قبيلك مع الحدربي ود بانقا جمب زريبتو اكان تكلمو يمش معاك
_ قلت ليهو لكن ابى وشكلو كدي زي الزعلان مني
_ زعلان منك في شنو ؟
_ ما بعرفو والله لكن ما ياهو الحدربي البعرفو ولا اداني ريق حلو
_ الخوف ينط ويابى اديك القروش القلت قال بديك ليها
_ سعلتو وقال ما بنط ، بس في حاجة شني ما عارف مغيراهو من ناحيتي
_ اتلقي في زول وصل ليهو كلام ، انت خشمك دا ما بتعرف تمسكو
_ امس اتكلمت فوق اخواتو ونبزتهن لبخيت وهو اكان ورانا بس ما سمعنا علا اكان بخيت الوصل ليهو الكلام
_ بخيت مو قوال وامكن سمعك براو
_ ما يسمع اكان سمع ، بس ما ينط
_ ماك طالبو شي اكان داير ينط من كلامو بنط
_ والله طالبو وما اخليهو ينط كلو كلو ، ويدفعن ولا علي كيفو
_ هي آ يابا ..
_ ما تقولي لي حليلو هو
_ماني قايلاها ليك
_ والله ما ممغوص علا من الرضي العر وباكر من الصباح بفوت لعمي الشيخ اشوف خطوبة المرضي دي صاح وللا كضب
_ المرضي بدور طيبة بت بتول
_ طيبة دي ياتها دي
_ بت بتول مرة تاج السر مالك ما بتعرفها ؟
_ تاج السر البتمتم وللا تاج سر تاني ؟
_ ياهو زاتو البتمتم
_ وطيبة دي ياتها دي ، انا الحلة دي ما خليت لي فوقها بت ما فكرت فوقها دي والله مرقت من بالي
_ والله كمان سماحتها بدعة وفالحة فالحة جابداها عمتها سنية اخت التاج
_ والله سنية دي اسمح منها مافي عديل واكان ما معرسة اكان اخدتها
_ هي اكبر ملاك ها العوقة دا
_ اكبر ملاي علا سمحة ساااي وتنشاف صغيرونة ، غايتو عبد المعطي راجلها والله ولا بستاهلها ادوها ليهو ساي الرمة
_ مالو ما بستاهلها والله راجل تمام ومالي مركزو مو عوقة متلك
_ هسي اكان انا مشيت كتلتو آ يمة سنية بترضى بي ؟
_ ها العوير دا ما تقول كدي ، وبتدور بيها شنو ؟ البنات عدمن وللا عدمن لمن تمش تكاتل في رجال الحريم ؟
_ قلت ليك كدي ساي ها ، هسي ان مات براهو ماني دايرها
_ عرس واحدي من بنات بانقا اخير ليك
_ والله اكان اخلي العرس كلو كلو ما اعرس منهن واحدي ، عليك الله آ يمة تاني ما تجيبي لي سيرتن ، سمح ؟
_ سمح ، وتاني ما تشاورني في بت
_ لا لا انا ماني داير غير البهجة وكيتن في الرضي بس العفين
والقاسية بس الواطة دي تصبح بس
بخيت زعلتن من ود كبروس فات في ليلو داك للحدربي وقال ليهو ود كبروس امس قال وقال وزاد ليهو الكلام من راسو وقال ليهو وانا والله كلامو فوق اخواتك القالو دا شدة ما وجعني لمن النوم زاتو طار مني وجيت اوريك عشان تعرفو زول ما فيهو خير وما يستاهل تديهو قرش
الحدربي قال ليهو انا كنت وراكم وسمعت القالو كلو وانت زدت الكلام
_ ما زدتو ولا شتين لانو الكلام الانا قايلني زدتو دا قالو لي لمن كنا في بيتهم ما لمن انت كنت ورانا
_ ما في عوجة
_ ما في عوجة كيفن آ الحدربي ياخ
_ يعني دايرني امش اكاتلو وللا دايرني اعمل شنو ؟
_ ما عندك شغلة بيهو وما تديهو قروش
_ دا براو ودا براو
_ ما براو زول ينضم في اخواتك متل النضمي دا مفروض تشاكلو والله
_ لا بشاكلو ولا بنضم معاو والقروش انا وعدتو والتزمت بيهن وبدفعن ليهو
_ عندك قروش مغلباك ساي اكان كدا ، ود كبروس شنو العفين الدار تديهن ليهو دا
_ كويس وانت كتر خيرك الجيت وريتني ،خلاس امش
_ انا بمش لكن زي ما قلت ليك والله ما بستاهل وامسك قروشك عليك ما تضيعن ساكت
_ سمح
_ الزول دا ما تشوفو كدي والله بعدينك يقول ليك ولا جميلتك
_ خلاس الكلام دا خليهو هسع
_ ودعتك الله وقبال امش بقول ليك تاني ما تشتغل بالزول الرمة دا وقروشك ديل ان ماك دايرهن وقنعان منهن اديني ليهن انا اشغلن ليك بدل تديهن العولاق دا
_ تشغلن لي شنو ؟
_ انت بس اديني ليهن عليك امان الله سنة واحدة محل تودي القروش ما تعرف من كترتن
_ انا ما عندي مانع لكن وريني اول داير تشغلن شنو وبتسوي بيهن شنو ؟
_ الداير اسويهو خلو وجيبن بس وبراك بتشوف
_ خليني افكر وبديك خبر
_ فكر براحتك وانت ان ماك زول اخوي وقلبي عليك ونحن نسايب ما كان جيت وقلت ليك كلامي دا
_ مافي عوجة وفيها الخير ربنا يسويها
بخيت مرق من الحدربي مبسوط ومتكيف وفات علي بيتهم وقبال يصل غشى الكباشي ود هباش صاحبو وزيملو في ضمنة نيم الميجر ولقاهو قاعد في الديوان حقهم والديوان اوضة فاتحة علي القبلة فوق فسحة وحوش ما فيهو وقدام الاوضة تلاتة نيمات جمب بعض تحت الكبيرة فيهن تيبارين كبار
الكباشي كان براو ومطلعلو عنقريبين واحد ليهو والتاني لمحجوب اب خشيم ود عمو ونديدو وبنوم معاو في الديوان وبجيهو بعد يحضر السهرة في النادي
بخيت حمد الله وكت ما لقى اب خشيم وقنب مع الكباشي والكباشي قال ليهو جاي من وين كدي من قبيلك اعاينلك ليك يومين ما جيت علينا هنا
_ جاي من الحدربي ود بانقا
_ عاد ما بقى نسيبك تاني ولاااا بتشتغل بينا نحن
_ اول يوم امشيلو الليلة وخطوبتي باكر وريتك
_ والله اكان محتار في خطوبتك الجات فجعة دي
_ والله جات فجعة ياخ
_ عليك الله بصحك آ ود الفويلح دار تعرس جااادي ؟
_ عاد العرس فوقو هظار ؟
_ ما فوقو والله لكن ما وريتني اللختار ليك منو بت بانقا دي
_ القسمة آ عولاق
_ انا عارفك ما بتقع ساكت
_ تتذكر يومتا لمن جاني ود كبروس وقمت معاو من الضمنة ؟
_ متذكر لمن اديت ورقك لود التويم الكيشة وخليت اب خشيم اداني سيخة فرحانبها وماسكها لي من يومداك
_ الضمنة خلها ، ود كبروس قال لي الحدربي داير يعرس ليهو ومشيت معاو لكم واحدي ما ادوهو
_ ود كبروس دا رمة ساكت ما بعرس ولا شي والحدربي ما عندو شغلة بس
_ والله الزول دا ملان قروش لمن مغلباتنو
_ عشان كدا دار تناسبو مو يا ؟
_ الليلة حرشتو علي ود كبروس وقلت ليهو جيب القروش انشغلن ليك
_ قال شنو ؟
قال ما عندو مانع ، وانا بعد كدي رطبتا آ ود هباش اخوي
_ وداير تشغلن شنو ؟
_ اول حاجة اعرس اختو بجزو منهن والباقي بفوت اشتغلبو في الخرطوم
_ دار تصرو بي بعرو ؟
_ ما اخير من يشيلن ود كبروس الخملة دا
_ وانت داير اختو ياتها فيهن
_ اخلاص الكبيرة
_ والله مرة تمام ولا بتستاهلها لكن ساي
_ مالي ما بستاهلها ؟
_ وود كبروس خبارو ما اخدلو واحدة منهن بدل شغال يكوس في بنوت الحلة الرمة دا ؟
_ قال ما عاجباتنو العفين
_ والله ما قاعد في الواطة ، الناس كلهم ينضموبو التقول داير يعرس بقروشو
_ زمة ساكت ياخ ولومك علي اكان الحدربي اداهو قرش ، ودعتك الله آ خازوق
_ باكر بتجي الضمنة ؟
_ ضمنة شنو البجيها ؟ باكر خطوبتي ياخ
_ والله لقيتها آ ود الفويلح
ود كبروس قام الصباح بدري واستحمى ولبس جلابيتو وانتظر لمن الرضي مرق باللوري وفات ناس الشيخ
يتبع...
