عرس ود كبروس 22
مجاهد يوسف
ود الفويلح بمغصتو الدار تشقو دي غلبتو الدخلة لبيتهم ورجع تاني ديوان ود هباش لاصحابو ديلك وفي الدرب عينو لود كبروس والرفيع والحدربي ماشين علي الكباشي وداك اكان معاو محجوب مطلعين عناقريبهم ومنطبحين فوقن يتونسوا
ووقف في فجتو ابى يمش عليهم
ناس الحدربي بعد وصلوا الكباشي واب خشيم ،وسلموا وقعدوا الحدربي قال للكباشي باكر ما تجيب ليك راعي للبقر لانو علي الراعي قال اخوانو واولاد عمو باكر جايين يشوفوهو وبرعوبن في بدالو على بال ما هو يبقى شديد
الكباشي قال ليهو عديلة تب وانا لمن قلت كدي داير اخدم بس ما اكتر ووكت خلاس المشكلة انحلت خير تب وما في عوجة
_ آي انحلت والله الحمد لله وكتر خيرك آ الكباشي وانت يا ا محجوب باكر ان الله حيانا تعال عليهم في بيتي واعتذرلو آ خوي قدام اخوانو وقرايبو
الكباشي قال ليهو ما في عوجة وباكر بعد يجوا انا بجيب محجوب اخوي دا وبنجي عليهم عشان انا زاتي بدور اعتذرلو غلطنا فوقو المسكين والبقولوهو اخوانو كلو نحن قابلاننبو والبرضيهم چت بنسيلن يا
_ لا لا ما بتقصروا خابركم تب انا وياها المحرية فيكم واها ودعناكم الله
_ وين آ ناس كدي اقعدوا خلونا انتونس في هواء الله البارد دا وعليكم النبي عاينوا لسماحة القمرة دي كيفنها ما بتحلى فوقها الونسة
الرفيع وود كبروس خشمن ما فتحوهو وود كبروس اكان صاري وشو ومكجنن الاتنين
الحدربي اخدلو ضحيكة وقال للكباشي والله قمرة سمحة بالحيل علا الليام راقدة وهسع انا ماشي اشوف الراعي اكان بدورلو شي اوديهو ليو ، وباكر ما تنسوا تجوا لاخوان علي الراعي
والتلاتة مرقوا وفاتوا
وفوتتن بي جاي ود الفويلح جاء لديل بي جاي قال ليهم مالن الخلايق ديل جوكم هنا لشنو آ الكباشي ؟
اب خشيم قال ليهو ها زول ها والله البركة الرجعنا وما فتنا الكنبو ،اكان مشيتنا بقت تعب ساي
_ لشنو وقالوا ليكم شنو ؟
الكباشي وراهو القالوا الحدربي كلو ، بخيت قعد يضحك وقال ليهو اكان كدي تخطيطك آ عفين كلو فشل
_ والله كلو فشل لكن بفوت مني وين تاني بلقالو دريب
_ احسن حاجة تسمعوا كلامي القلتو ليكم قبيل ونقوم في ليلنا ننتهي من العولق ديل قبال اخوان الراعي بكرة يجوهم
_ لا لا اصبر اصبر آبخيت ياخ
_ اصبر لمتين ؟
_ اصبر وما عارف لمتين ونحن حقو الليام الجاية دي نصهين منهم تب وما نعمل اي حاجة وانا استعجل بالعرس وبعد اعرس بلقالو طريقة
_ انت الكباشي عليك الله فيك راس ؟ هسع نحن نستنى كدي لامن انت تعرس حتين تفكر لينا في حل ؟
_ ما في غير ننتظر
_ انتظر براك انا والله لا بنتظر ولا بكضب عليك لاني محتاج وداير لي قروش اعرس بيهن ، ونويت اتقدم لبلالة بت فضل اخت عوض الله
_ واخت الحدربي ماك دايرها ؟
_ لا لا اخت الحدربي هدا طرفي منها ماني دايرها والحدربي دا انا الليلة بكتلو ليكم تب
الكباشي زعل وقال ليهو هوي آ ود الفويلح ارعى بقيدك آ زول ويمين بالله اسمع حليفتي دي تلحق تصلو علا اضبحك شخخخ من اللضان للاضات آ ود الفويلح
_ تضبحني لشنو آ الكباشي نحن موش اتفقنا انا اكتل ليك الحدربي وانت تديني قروش وبقر ؟
_ انا نطيت من كلامي معاك آ زول وما دايرك تكتلو ولا قرش زاتو ما عندي ليك
_ هو شنو هو ؟ انت قايل روحك علي كيفك تنط ؟
_ هي عان هي عان والله دا كلام لكن دا ، شن نفرك آ زول
_ آي ما علي كيفك تتفق معاي علي شي وتخليني اظبط اموري عليهو وتجي تقول لي خليتو ونطيت
_ والله علي كيفي وانا نطيت من كلامي معاك واكان ما عاجبك هداك الحيط وللا اقول ليك امش علي عمود الكهربة داك كسر راسك فوفو
_ انا ما بدق راسي في الحيط ولا في العمود لكن بعرف انجمك كيف وانا ماني طرورة ولا لعبة في يدك عشان تلعب بي وعلي انت
_ يا زول امش من هنا ها وخلقتك تاني ولا داير اشوفها في بيتنا دا
_ انا بمش علا يمين بالله آ ود هباش ما بخليك وبتشوف البسويهو فيك
_ سوي الدايرو كلو واتحداك
بخيت شات الابريق بكراعو ومرق منهم زعلان وفات علي بيتهم
محجوب اكان ساكت ساااي اصلو ما نضم ولا كلمة ما قالها علا اكان واقف قريب من بخيت وجاهزلو تب اكان مدا يدو علي الكباشي وبعد مرقة بخيت حتين قعد وقال للكباشي يمين عرفها الكليب واكنت دايرو بس يمد يدو عليك عشان الم فوقو بتن بعكازي دا اشهيهو العافية
الكباشي ضحك وقال ليهو شايفك تشيل وتتزحزح عليهو وتعاينلو بطرف عينك علا دا رمة ساكت وهوراش ما تشوفو كدي وبخاف مني
_ بس انا داير اعرف قال ليك بأدبك وبنجمك ، بدور اعمل شنو وينجمك كيفن ؟
_ ينجم منو ها دا خملة ساكت وانا والله لو الكلام دا ما في بطن بيتنا دا اكان وريتك فوقو
ود كبروس والرفيع بعد وصلوا الحدربي لحدي بيتو اي واحد فات اهلو
حاجة الشول اكانت مسوية ليها فطيرة بلبن وجاها ود كبروس داخل وقبال يقعد مشى اتوضا وجاء صلى العشاء لانو ما صلاو في الجامع
بعد انتهى قال لامو يمة قبيلك مشيت ناس عمي الشيخ والليلة نضمت مع البهجة والله آ يمة البهجة دي سمحة جنس سماحة
_ مشيت ليهم بتين ؟
_ قبيلك بعد المغرب ومشيت كفرتا للرضي قالوا وارداهو شوفة دعت
_ اجي ، وارداهو كيفن
_ والله وارداهو عديييل وكمان كضب علينا جنس كضب ، فتنالو انا والرفيع وبعد مرقنا منو ضحكنا لمن دموعنا جرت من كضبو
_ شوفة الدعت ما بتسو شي علا الخلعة الكعبة
_ غايتو طلع زول خواف خلاس ، بس آ يمة انا داير اعرس والله وسريع سريع قبال الدرت
_ هو الدرت فضل ليهو شنو ها ، ما كلها ايام والليام جرااااية
_ جراية شنو آ يمة والله يوم الليلة دا بس طويل طول يكره زاتو في الليام وابى يفوت كلو كلو
_ قوم اتعشى ونوم عشان تقوم بدري علي الحواشة
_ سمح
_ قبيل جاء بخيت هني وسعلني منك وقال لي الجاب حمار حاج الشيخ هني شنو
_ بخيت دا آ يمة زول حاسد وكعب وقلبو اسود بس ما تكوني وريتيهو
_ لا حاسد ولا شي ما تقول كدي علي ود خالك
_ والله اكبر حاسد وفقر ما تشوفيهو كدي ، انتي وريتيو موش ؟
_ آي وريتو
_ اتلقي زعل
_ ما زعل ها ، وفرح ليك كمان
_والله اتلقي المغسة شقتو والعجب اكان عرف عمي الشيخ وافق يعرس لي بتو بموت عدييييل
_ قبال كدي هو ما فات معاك ليهم ؟
_ فات معاي عشان يطيرها مني والله
_ سمح خليهو بخيت وابقى في مشهادك
الجو اكان سمح وفارض نفسو والقمرة بيييييضة والهمبريب هابي وبااارد وود كبروس بعد اتعشى جرالو عنقريب هنااااك في نص الحوش ورقد ويتذكر في البهجة وسارح بعييييد ويشيل ويتكشم براو ويتبسم لمن نام
وطقة الديك اللولانية صحى وقام فت وجرى علي الغنم لانو شاف حمار حاج الشيخ ما فيش ومشى تور امو من النوم قال ليها جانا حرامي وسرق الحمار
_ بسم الله اصبحنا بي الله ورسول الله ،حرامي شنو ؟
_ الحمار مافيش آ يمة
_ اتلقي مرق فات زريبة عمك الشيخ
_ امرق كيفن وهو مربوط
_ خلي الواطة التصبح وامش شوفو عندهم ما في حرامي بسرقلو حمار
_ لا لا الحمار دا انسرق والله انا مارق اكوسو
_ خلي الشمش تطلع حتين تفوت
_ بمش هسع امكن ألحق الحرامي قبال يبعدبو بعيد
_ ناغم لبخيت خليهو يفوت معاك
_ لا لا بفوت براي ما بناغملو ولا شي
ود كبروس مرق ويكوس والواطة لسة ما كشفت عشان يقص الدرب ومرق لحدي طرف الحلة ما شاف شي وجاء راجع
الصبح اذن مشى صلى وبعد الصلاة قابل عمو الشيخ في الجامع وما وراهو سلم عليهو وفات بيتهم والعين بقت بتشوف والدرب بنقص وقصاهو ومرقبو من الحلة وحتربو كدي علي الكبري والدروب لمن بقى قريب من الميجر كترت علا هو بقى نجيض اصلو ما فك الدرب المباريهو لمن كطع الكبري ومشى لامن دخلبو جووووة حواشة حاج الشيخ ولقى الحمار دمو يشر ومضبوح ومجدوع في نص الحواشة
ود كبروش اتشهد وحمد الله وقال دي مصيبة شنو دي هسي دي ودا منو الزول المعيق دا والحمار المسكين دا ذنبو شنو هسع ضابحو وكاطعلو راسو كدي ؟
ومرق من الحواشة وجاء الحلة وما تاهملو زول غير بخيت ود الفويلح
يتبع
