عرس ود كبروس 10
مجاهد يوسف
_الليلة زينة ساي
_ شنو دي الزينة ساي آ يمة ؟
_ مشيك الجامع وصلاتك للصبح فوقو
_ انتي آ يمة قايلاني انا ما عارف عدم الصلاة دا كعب ؟ والله عارفو لكن عندي ابليس ود حرام خلاس كل مرة اقول اقوم اصلي يجيني ناطي ويقنب يوسوس لي ويكسلني منها علا الليلة لعنتو
_ والله ما في شيتن معكسها عليك علا عدم الصلاة وتاني ما تخليها آ ولدي وشوف الله بفتحها عليك كيفن
_ سمح
_ بتشتغل وبتعرس وكل شي دايرو بتسهل ليك
_ ان شاء الله بس آ يمة انا العرس خليتو
_ خليتو مالك ؟
_ خليتو والله وهدا طرفي منو ،
_ اها دار تعمل شنو؟
_ بدور اشتغل والليلة دي بمش اشوف لي اي شغلة اشتغلها وامكن امرق في ود العد اشوف اكان في زول هناك داير يأجر حواشتو وللا يشاركها
_ امش ساي ان شاء الله تلقى الدايرو كلو وشاحداهو آ النبارك يفتحها عليك محل ما تقبل
ود كبروس شرب الشاي ولبس وبقى مارق عاني حلة ود العد ، ومع مرقتو من الحلة لاقاهو ود الفويلح راكب حمارو وماشي علي حواشتو والزمن داك لسه ما كان اتشاكل مع الكباشي وقال ليهو شايل وين آ رخمة متلوبس ومارق من الحلة دغشن كدي؟
_ ما داير لي معاك كلام آ بخيت
_ ماشي وين يمشن عليك الدبايب والعقارب والنصايب ؟
_ كنت مارق في ود العد اشوف لي شغلة لكن خليتها وراجع اهلي
_ وراجع مالك ؟ ترجع الموية من حلقك
_ مرجعاني ملاقاتك لي دي آ بخيت لاني مكجنك من يومداك واي حاجة مشيت معاي ليها باظت
_ وخاف انا ماش معاك ؟
_ عارفك ماك ماشي معاي علا وشك دا عليك الله وش يتصبح بيهو زول ويلقى الدايرو ؟
_ يلقوك فطسان وعفنان
_ تداعي كدي والله بس حبوبتي الهدية بت ناصر الله يرحمها
_ ان شاء الله تموت ميتتا ، عارف مات كيف وللا ماك عارفها ؟
_ ماني عارف
_ الله لا عرفك ، والله عارفها ماتت كيف علا ممسوخ آ كليب
( حاجة هدية بت ناصر حبوبتم اللتنين ومرة كعبة خلاس داعاية دعاء شديد أي كلمة بتقلبها دعوة ولا بتتلفت ولا بتفتش للكلام واكان كجنت ليها زول الله قال بي قولو
ماتت قبال كم حول
لقوها الصباح ميتة ومنفوخة والكتلها شنو ما اتعرف ، واي زول خمن السبب براهو البقول طقاها دعت والبقول عقرب جمال والبقول اكلت لها سم وبقت ميتتها ودعوة عند ناس الحلة وود كبروس وبخيت اكانوا صغار واللتنين حضروها وطارينها
ود كبروس ساب المشي وقبل علي الحلة راجع وبخيت قعد يضحك عليهو وقال ليو ارجع ارجع ات زاتك ماك زول شغل ومتحايل ساي انا عارفك
_ امش علي حواشتك آ بخيت والنضمي الكتير خليو
بخيت قعد يضحك وفات علي مشهادة وود كبروس رجع الحلة وقبال يخش بيتهم قال يغشى الحدربي ولقاهو واقف برة جمب الزريبة هيلتو
_ ود بانقا اصبحت شديد ؟
_ الحمد لله شديد ومتكيف ومبسوط منك
_ مني انا !
_ آي والله عشان شفتك قبيلك في الجامع علا مالك مرقت سريع ما استنيتني ؟
_ ساي والله
_ اها عملت شنو في الموضوع
_ موضوع شنو ؟ ما تقول لي العرس
_ ياهو العرس في غيرو ؟
_ خليتو وقنعت منو تب وهسي انا جاييك عشان اوريك كدي
_ دا كلام شنو دا ياخ
_ زي ما قلت ليك
_ لشنو طيب ؟
_ دي فلهمة وعوراء مني ساكت آ الحدربي ياخ لاني شغل ما شغال وقرش ما بملكو المعرس ليها شنو ياخ
_ قول خير بس وابقى عليهو ما تقنع منو
_ انا ما اكضب عليك والله كنت دايرو ومشيت لكم واحدي وما اتسهل لي وقلت الحمد لله والبركة زاتو الما اتسهل
_ اكان السبب القروش انا وريتك
_ انت ذنبك شنو ياخ ؟
_ لمن اديك قروش وتعرس بيهن دا اجر ياخ ما ذنب ،مالك داير تحرمني منو
_ اكان اجر واكان ذنب انا غايتو قنعت منو تب تب امسك قروشك عليك وكتر خيرك ما قصرت والله
_ اها داير تعمل شنو ؟
_ والله ما عارف وقبيلك كنت ماشي ود العد قلت اكان القى لي فيها شغلة بس لاقيت ود الفويلح الفقر دا قنعت من المشية ليها ، انت بصح مسعول من الخير آ الحدربي ، ود الفويلح دا مالك بعد ما قلت خير واديتو اختك تاني ابيتلو بيها ؟
_ كل شي قسمة ونصيب آ ود كبروس
_ لا لا بس في سبب ما ساي وانا امس ساعة الكرامة قلت ما بسعلك منو قدام الناس
_ خليهو الموضوع دا انا ما بريد انضم فوق الناس ، وبخيت الله يستر علينا وعليهو
_ خليتو ، علا هو زول خمقة ساكت ما فيهو فايدة
_ سيبو سيبو الكلام دا ، واستناني دقيقة انمش اجيب ليك القروش
_ قروش شنو ؟
_ القروش حقاتك الالتزمت بيهن ليك
_ لا يمين ولا قرش ما بتجيبو لي ، انا قلت ليك العرس خليتو
_ خليتو ما خليتو دي انا ما شغلتي وانا التزمت ليك بقروش وبجيبها ليك وبتشيلها
_ قسما بالله ما اشيلها ولاةفي يدي ما امسكن انت ألتزمت وقلت لي للعرس والعرس انا خليتو دحين امسك قروشك عليك آ زول وانا فايت ما بدور منك شي
وطوالي فات منو والحدربي قدر ما ناغم ليهو ابى يقيف ،
ووصل بيتهم وجرالو عنقريب علي ضل الضحى وانبطح فوقو وقعد يفكر
امو اكانت عندها جدادة راكضة ليها كم يوم والبيض فقس وتتحاوم ساي في الحوش ووراها سبعة سواسيو تمش منهن شوية وتقيف وتكتكت ليهن وهن يجنها جاريات
وود كبروس يعاين ليها سااااي
امو اكانت تعوس وجات من التكل قالت ليهو مالك جيت راجع وما مشيت ود العد ؟
_ خليت المشي لباكر ، يمة عندك جدادة تانية وللا ياها ام سواسيو دي بس ؟
_ ما عندي غيرها مالها ؟
_ جاتني فكرة هسع تيا دي
_ فكرة شنو دي ؟
_ حوشنا دا كبير آيمة وما مستفيدين منو أي شي ، ولو بنيت لي فوقو بيت جداد كبير وجبت لي فيهو عشرة جدادات بس وكل واحدة جابت ليها سبعة سواسيو زي دي ببقى عندي سبعين سوسيو ويعني بعد يكبرن ببقن لي سبعين جدادة ، رايك شنو يمة اقوم اضرب لي طوب وابنيهو
_ علي كيفك ، علا بتجيب العشرة جدادات من وين ؟
_ ببيع لي واحدي من غنمايتينك ديل اكان ما عندك مانع وبجيب الجداد
_ غنماياتي دبل اوعك تهبشن ؟
_ كدي عليك الله فكري معاي حبة في فكرتي دي ، ونبيع البيض بعد يكتر في دكان ود التلب والجداد زاتو بنبيعو
_ اعمل الدايرو بس غنماياتي ديل ابعد منهن
_ اها اجيب القروش من وين نان ؟
_ شيلن من صاحبك ود بانقا
_ قبل شوية كنت معاو وبراهو داير يديني ليهن علا انا حلفت منهن
_ امش ليهو واتدين منو قدر البجيبن ليك الجداد بس
_ سمح بمشيلو بس بعدينك العصر ما هسع
بعد الضهرية والقايلة وبعد شكلة بخيت والكباشي في نيمات الميجر بخيت جاء ناس ود كبروس لقاهو قاعد يتغدى هو وامو وقعد ياكل معاهم وقال ليهو الليلة لقيت عروس سمحة خلاس
ود كبروس قال ليهو عرسها براك انا العرس قنعت منو
_ قول لي العروس منو ؟
_ اها العروس منو ؟
_ بلالة بت فضل المولى
ود كبروس قلبو قال شحححح
بلالة بت فضل المولى دي كلو كلو ما فكر فيها واسمح بت في الفريق ان ما اسمح بت في الحلة كلها
وامو زاتها انبسطت وقعدت تتكشم وقالت ليهو والله مرة تمام وسماحتها مافي وبدعة وانا زاتي مرقت من بالي
بخيت قال ليهو انا هدي جيتي من بيتهم ولاقيت عوض الله اخوها وانت خابرو صاحبي من زمان ووريتو كل شي وقال لي خير وابوها فضل المولى زاتو ما عندو مانع ، قلت شنو ؟
يتبع...
