طفلة بأتزان العاقلين

رابعه

#طفلة_بأتزان_العاقلين
الحلقه :الرابعه
بقلم :فاطمه سالم الورفلي
......................................
..................
-بمفـهومنـا احني.. ان الطـفل هو المخطـئ!.. والام لي تربيه وتصلحه.. طبعا هدا شنو!.. هدا لي داخل الصندوق.. والمعروف.. بس لي مش معروف!.. وخارج الصندوق عارفين شنو؟.. لي هو ان تكون الام هي بحد ذاتها مخطئه.. والطفل على صح.. بس منو ح يسمعه وقتها!.. او يصدقه!.. او يسنده؟.. هنا يكمن السؤال.. والحيرة تكون هـــــي سيدة الموقف.. خاصة زي حالتي انـي🍃... تعالو نكملـكم شن صار معاي السي السيد بن يزيد 💁
....................
...
-اني قلت في خاطري يعني مراقبني؟ .. قعدت ساكته

استاد بن يزيد التفت يمين يسار :ايي خيرك ما عطيتيش رقمك لي ريم ولا هيام

-اني نصدمت و لدرجه حليت عيوني على وسعهن..

استاد بن يزيد :الباين انتي تبي اتعبيني.. خشي خشي وساهل بعدين

-فرحت لما قال خشي.. وما اهتميتش لباقـي كلامه.. لان نبي شي يخليني نهرب عن وجهـه.. طبعا هو قعد يشوفلي وحاط ايده على لحيته.. وحاسه بنظراته محاصرتني.. واني نمشي بسرعه.. ومش قـادره نتلفت..نسمع فيه تنهد.. وتنحنح.. صدمني لما قال..

استاد بن يزيد :ره مش ناسي كسرة الروشن راهوو

-ارتبكت.. ومارديتش عليه.. وقعدت نجري بسرعه.. ونسمع فيه يضـحك بهمهمـة.. لعند وصلت لفصلي..خديت نفس بقوه.. ورفعت ايدي.. طقطقت عـلـى الــبــاب 🍃.. شوي انفتح الباب..

اني:صباح الخير.. عادي نخش يا ابلة!

الابلة :انتي من الفصل هدا؟

اني :اي..

الابلة برفعه حاجب :خشي.. شكلك اول يوم؟

اني اختصرت الاجابه وقلت :اي "بدون ما نشرح ان تاني يوم ولا ايي شي.. ما خاطريش نحكي 💁"..

-واول ما خشيت.. جن في عيوني.. هيام وحياة وفدوى.. على طول ابتسمنلي.. وقعدن يشيرنلي باش نقعمز جنبهن.. التفتت الجيهة الثـانيه.. لقيت حياة وريم.. وشكلهن باين عليهن الحزن غريبه؟ .. درت روحي ما نشوفش في فدوى وهيام وحياة.. وقعمزت قدامهن.. وبدت الابلة تشرح في كواكب الشمسية 💁🍃... شوي نسمع في هيـام تقول..

هيام :ريتيها!.. دارت روحها ما تشوفش فينا

فدوى :خليها خليها.. المهم احني نقعدو في جرتها.. لين نعرفو شن قالتلها حياة صاحبه ريم

-اني نصدمت... وفهمت.. ان هن ما يندرنش عليا نسمع فيهن.. وخرت ظهري اكتر.. باش نزيد نسمع..

هيام :حياة نوضي قعمزي جنبها

حياة :خلينا مقعمزين جميع.. فكيني منها

هيام :نوضي نوضي بس.. وديري روحك تعاركتي معانا.. باش تكسبيها

فدوى :والله فكره.. حياة هيا نوضي

حياة :اووف منكن.. ديما فوق راسي كل شي.. " و وقفت قالت"..يا ابلة عادي نقعمز اهني؟