#طفلة_بأتزان_العاقلين
الحلقه :العشرين
بقلم :فاطمه سالم الورفلي
.....................................
....
عند هيام :
نبكي ونمسح في دموعي بي كمي.. لين شوي رن الجرس.. حسيت بشعور غريب.. وشوي تليفوني قعد يرن.. شفت الاسم لقيته مهيب نصدمت ومعاش عرفت ماندير.. زعما وافق على الشرط!.. غريب! .. يمكن وافق!.. قعد يرن واني نشوف لتليفون لين فصل.. تنهدت.. وشوي زاد عاود اتصل.. خديت نفس وخديت التليفون وفتحت الخط..
مهيب :افتحي الباب
هيام استغربت و وقفت من صدمه:شنيي!
مهيب :افتحيي البااب تسمعي فيا ولا
-صكرت عليه مصدومه .. قعدت نستوعب شن قال!.. قعد يرن الجرس ويعاود.. والتليفون يتصل.. زفرت.. وطلعت من الدار.. وقعدت نشوف للباب وقاعده في حالة صدمه .. وخوف .. طلعت حياة من الحمام حشاكم
حياة :خيرك فتحتيش!.. اووف باهي باهي اهو جايه
هيام بلعت ريقي وقلت:ما تفتحيش حياة ما تفتحيش
حياة تنشف في ايديها في حوايجها :تي شن ما نفتحش!.. قريب يتقلع الباب... ايووه هيا هيا جايه
-ومشت فتحت الباب.. واني خايفه نطربق في صوابعي..
ام مهيب :ويننكم!.. قريب روحت قلت لي مهيب شورهم في محلات ههه
حياة ضحكت :لا والله مش في باب محلات.. ماما وخالتي في العياده.. اهلين كيف حالك خشي!
ام مهيب :ايي عندك حق.. خش الخير.. والله عندي كلمتين بنقولهم.. وين هيام
حياة التفتت شبحتلي:هياام تعالي.. اهيا هيام
ام مهيب كهبت راسها شافتلي :ااه ما شفتهاش.. كيف حالك بنيتي باهيه
هيام ارتبكت :اه اا اي حمدلله الحمدالله.. كيف حالك انتي
ام مهيب:سلمها وخيتي.. امم والله شن بنقولك.. اهيا جيتي من امكن
حياة نخلعت:شن في ان شاء الله خير خيرها؟
ام مهيب:هههه خير خير.. والله شن بنقولك اا مهيب فاجئني وليدي قال لي نبي نتزوج في هلساعه.. واني ما صدقت ههه خريطت بلاد بحالها وهو ماباش يتزوج.. ومدام توا نويه الزواج.. قلت هي نمشي تو نخطبله قبل ما يغير رايه وليدي بسلامته
حياة :ربي يتمم على خير منو بتخطبيله لي امها داعيتلها
ام مهيب ضحكت :سبقتيني بالكلام هههه .. وخيتك هيام يا حنه واحني نلقو خير منها!
حياة نصدمت :هاا!.. اا مبروك الف الف مبروك ربي يتمم على خير "وشبحتلي فنصت فيا"
ام مهيب:والله توا مشيت طول لي زمزم قتلي مدا بيا نتهنى على بناتي.. واني في هالظرف هادا ما نقدرش .. ندير عرس و ورده ما تحضراش.. فا قلت نقرو فاتحه وخلاص.. وعاد الراي رايك يا بنت خوي
