#طفلة_بأتزان_العاقلين
الحلقه :الثالثه
بقلم :فاطمه سالم الورفلي
.....................................
............
-اني ولعت فيا النار.. شوي نسمع فيهن يقولن
حياة تضحك وتخبط في روحها :تي كان نقووولك شن قالي
ريم :خيره شن قالك؟
حياة مهستره بالضحك :قالي قالي ولا قالي جيبيلي رقمها
ريم شبحتلي :لواه لواه هدا من توا؟..
حياة حطت ايديها في وسطها :قادره ياوخيتي
ريم تصفق:يا حي يا حي حتى من الذبان خدي
حياة :وقعدنا كان احني
ريم غمزت لي حياة وضحكت.. وشبحنلي الزوز.. وقعدن يقربنلي.. ويطقن فيها لبعضهن..
فدوى :اسكتن.. ما تردنش عليهن..
...
ريم بصوت عالي :من اولى يوم طبقت واحد.. مالا اخر السنه حتى البواب مش ح يسلك
حياة بضحكه :الباين هكي يا ريم
ريم وقفت ورفعت ايدها شدت وشاحي:شن يا سمحه
-اني جيت بنتكلم.. نخصتني فدوى.. تنهدت وسكتت
حياة صاحبه ريم :امم شني ميار.. استاد بن يزيد يبي رقمك راهو.. شن نقولوله
ريم بتسهويك:زعميتها بتراجيك يا حياة لين تقوليلها.. لابدة عاطيتهوله من مبكري "شبحتلي على جنب وقالت".. هادي مش ساهله يا حياتي
حياة ضحكت :اللهم بلغت.. اللهم اشهد
ريم :هيا هيا حياة.. خلي نمشو ره قالولنا روحو.. الابلات مافيش
حياة :اوك جيبيلي شنطتي.. نستنى فيك هنا
-مشت ريم.. وقعدت حياة واقفه.. هي تشوفلنا.. واحني نشوفولها.. لين ريم تبعدت.. قربت منا حياة وتنهدت....
حياة :اسمعني راهو استاد بن يزيد مش ناوي على خير يا ميار .. راك تعطيه رقمك ولا شي.. راهو واحد مش ساهل.. عارفه ان تعاركنا معاك.. وخديتي موقف منا.. او مني اني بذات.. بس لي قاعد يصير في المدرسه هدي انتي ما تعرفيشي ره.. بس " شبحت لي فدوى وحياة الثانيه وهيام.. وقربتلي وقتلي بتوشويش ".. حتى هذين لي معاك ما توثقيش فيهن.. اسمعي مني ميار.. وخودي كلام المزبوط من توا
-اني نصدمت ردة فعلها وكلامها.. كل حرف هي تقول فيه.. عيونها يرقرقو.. وتقول فيه بأحـساس.. لدرجه حسيت انها وراها شي صاير لها.. هدا ليش تحكي هكي.. الخوف سكن فيا.. لين رعشت..
ريم :حياتي حبب هيا نروحو
حياة شبحتلي وعيونها يلمعن قريب تبكي...وتنهدت تنهيدة طووويلة.. وتبعدت.. وخلتني في دوامه وحيرة.. واول ما تبعدت عني بخطوتين.. طول فدوى نطت..
فدوى :شن قالتلك؟
حياة الثانيه :اي حقا شن قالتلك؟
هيام قرنت حواجبها :شني قتلك باش قعدتي هكي؟
