رفيقه دربي 🌻

الحلقة الثانية

"في الكلية
_ وحشتني أوي، عاملة إيه يا رقية؟!
*أنت أكتر يا روحي، أنا الحمد لله بخير و أنت
_يا رب دايمًا يا قمر، أنا في زحام من النعم
*يا رب دايمًا، بجد جميلة أوي الجملة دي
_أهم حاجة تحسي بمعناها، لما تقوليها بتحسي بالرضا والسعادة فعلًا، أحنا في زحام من النعم بس مش واخدين بالنا، يعني البصر و السمع و المشي و غيرها كتير دي كلها نعم ربنا انعم علينا بيها و أكبر نعمة هي الإسلام، للأسف يا رقية أحنا عشان اتعودنا على النعم دي كلها بقينا فاكرين أن دا حق مكتسب، و لما ربنا يجي يختبرنا في إحدى النعم و يأخذها منا نزعل و نقول ليه
*ربنا يحفظك يا رب و يديم علينا النعم اللهم أمين
_أمين يا رب، بصي بقا في حاجة لازم نعملها انهارده
*هي إيه؟!
_هقولك، أحنا لازم ندعوا إلى الله
*ندعوا إلى الله مرة واحدة، دا شيء كبير أوي، و بعدين أحنا مش دارسين الدين كله، صحيح اخدنا علوم شرعية بس برضو نقصنا كتير عشان نشتغل في الدعوة
_يا حبيبتي مين قالك كدا، أنت مدام عرفتي معلومة يبقي الواجب تعرفي بيها غيرك، دا سيدنا أبو بكر الصديق من أول يوم في الإسلام اشتغل في الدعوة إلى الله، و آمن على يده ٦ من المبشرين بالجنة، ماقلش أنا لسه معرفش حاجة عن الدين الجديد أو الكلام دا، و ربنا بيقول للنبي صلى الله عليه وسلم في القرآن " يأيها المدثر • قم فأنذر" قم فعل أمر للوجوب يعني لازم تقوم، و كانت لسه الدعوة مستمرة و الدين كله مكملش و ربنا سبحانه و تعالي قال للنبي قم
*اللهم بارك، بس أنا خايفة البنات يحرجونا
_تعالي نجرب و بعدين يحرجونا عادي ليه لا، ربنا مش هيضيع أجرنا "و للآخرة خير و أبقي"
*اتحمست أوي للفكرة
_يلا بينا، في بنات واقفين هناك اهه تعالي نروح لهم
"وبعد أن اقتربت من الفتيات _السلام عليكم ورحمه الله وبركاته
+وعليكم السلام ورحمه الله وبركاته
عاملين إيه يا قمرات، و أخبار المذاكرة إيه، كلكوا ملكوش نفس ليها صح أنا، قولت كدا لرقيه بس قالتلي نسألهم
*أنا قولت كدا !!
_مصدومة من إيه يا حبيبتي، البنات عارفين إنك عايزة تسألي على المذاكرة، مش كدا يا غاليات
هم يبتسمون +صح
_اهه شوفتي، مجبتش حاجة من عندي، طيب يا جميلات كنت عايزة أسالكوا كام سؤال و همشي على طول، لو مش حابين بلاش هأخد البت اللي معايا دي و همشي
+اتفضلي يا حبيبتي أسألي
_إيه أجمل مكان رحتيه، طيب إيه أجمل مكان سمعتي عنه في الدنيا، طب لما قعدي لوحدك و اتخيلتي شكل المكان اللي نفسك تروحيه كانت إيه مواصفاته، مش شرط كل واحدة تقول الإجابة في العلن ممكن ما بينك و بين نفسك عادي بس اهم حاجه تكوني صريحة، تعملي إيه بقا لو قولتلك هعيشك في مكان أجمل من اللي روحتيه أو سمعتي عنه أو اتخيلتي في يوم بس بشرط واحد
+إيه هو الشرط؟!
_إنك تشتغلي عندي ساعة، ساعة واحدة و كمان اللي هتعمليه هينفعك أنت و بعد ما تخلصي شغلك تعيشي طول عمرك في مكان ميتوصفش من جماله
في دهشة+ساعة واحدة بس!! مين اللي يرفض عرض زي دا!
بإبتسامة _ناس كتير رفضت، بس لو حابين العرض ممكن أكمل مش حابين خلاص
في حماس +كملي، إحنا حابين جدًا
_تمام، المكان اللي هتعيشوا فيه هو الجنة، و الساعة دي هي عمرنا، فلو قضينا عمرنا في طاعة ربنا سبحانه و تعالي هيكون الجزاء أننا نفضل عايشين في الجنه خالدين فيها ابدًا، في كلام جميل أوي للشيخ عمر عبد الكافي كان بيقول في الرياضيات أي عدد على مالا نهاية يساوي صفر لإن مهما كانت قيمه العدد دا فهو بالنسبة لمالا نهايه ولا شيء و إحنا عمرنا في الدنيا بالنسبة لعمرنا في الآخرة صفر، و مع ذلك ربنا سبحانه و تعالي بيجزينا علي اللي بنعمله في الصفر دا بأننا ندخل الجنه للأبد، شوفتوا ربنا رحيم إزاي، ربنا في القرآن بيقول "قل يا عبادي الذين اسرفوا على أنفسهم لا تقنطوا من رحمه الله إن الله يغفر الذنوب جميعًا" ياه شوفتي رحمة ربنا وسعت كل شيء، قل يا عبادي، شوفي من رحمة ربنا حتي بعد ما غلطوا لا مش أي غلط الذين اسرفوا على أنفسهم يعني غلط كتير الإسراف يعني عمل الشيء بكثرة و مع ذلك قال سبحانه وتعالى يا عبادي، متخلاش عنهم حتي و هم بيعصوا، لا تقنطوا يعني لو اليأس جه يطرق باب قلبك ربنا بيقولك أوعي تيأسي في يوم، الباب مفتوح ادخلي بس، إن الله يغفر الذنوب جميعًا، يعني مهما عملتي ربنا هيسامحك و يغفر لك مدام عرفتي غلطك و ندمتي عليه و رجعتي، و الله ربنا مفيش أرحم و لا أحن منه، من رحمته بينا أنه بعتلنا الرسول صلى الله عليه وسلم و إننا مسلمين دي من أكبر النعم علينا، في حديث بيقول
قال النبي ﷺ :
" للهُ أَشَدُّ فَرَحًا بِتَوْبَةِ عَبْدِهِ حِينَ يَتُوبُ إِلَيْهِ، مِن أَحَدِكُمْ كانَ علَى رَاحِلَتِهِ بِأَرْضِ فلاةٍ، فَانْفَلَتَتْ منه وَعَلَيْهَا طَعَامُهُ وَشَرَابُهُ، فأيِسَ منها، فأتَى شَجَرَةً، فَاضْطَجَعَ في ظِلِّهَا، قدْ أَيِسَ مِن رَاحِلَتِهِ، فَبيْنَا هو كَذلكَ إِذَا هو بِهَا، قَائِمَةً عِنْدَهُ، فأخَذَ بِخِطَامِهَا، ثُمَّ قالَ مِن شِدَّةِ الفَرَحِ: اللَّهُمَّ أَنْتَ عَبْدِي وَأَنَا رَبُّكَ، أَخْطَأَ مِن شِدَّةِ الفَرَحِ. " ياه شوفتي ربنا واسع الرحمة والمغفرة، ربنا بيفرح بتوبتك قد إيه، أنا ربنا يفرح بتوبتي أنا !!أنا كنت مين أصلًا !ربنا عز وجل غني عني كُل الغني بس بيفرح لما بتوب وبرجع ! ربنا جميل أوي وجماله عز وجل إن مهما عصيتي وخالفتي طول ما أنت في فترة الإمتحان ولسه عايشة في الدنيا تقدري تتراجعي وتتوبي وتصلحي أي غلطة عملتيها، دا ربنا بيفرح بتوبتك، مفيش حاجة في الدنيا دي كلها تفرح أكتر من الحديث دا ورب محمد، طيب المكان اللي هتعيشي فيه شكله إيه، أقولك الجنة فيها ما لا عين رأت، يعني مهما شوفتي أماكن جميلة في الدنيا الجنة أجمل منها، ولا أذن سمعت، و مهما سمعتي عن مدن و دول نفسك تروحيها من جملها الجنة أجمل، و لا خطر على قلب بشر، تخيلي معايا كدا فتحتي جوجل و كتبتي أفخم قصور العالم و شوفي شكلها عامل إزاي، دا كله ميجيش حاجة جمب الجنة، الجنة كما ورد في وصفها لا مثيل لها هي نور يتلألأ وريحانة تهتز وقصر مشيد ونهر مطرد وفاكهة ناضجة وزوجة حسناء جميلة وحلل كثيرة ما لا عين رأت ولا أذن سمعت ولا خطر على قلب بشر، عن أبي هريرة رضي اللَّه تعالى عنه قال : قلنا يا رسول اللَّه : ( مم خُلقت الجنة ؟ قال : من الماء قلنا : أخبرنا عن بناء الجنة ؟ قال: لبنة من ذهب ولبنة من فضة وملاطها ) أي طينها المسك الأذفر وترابها الزعفران وحصباؤها اللؤلؤ والياقوت ومن يدخلها ينعم ولا ييأس ويخلد ولا يموت ولا تبلى ثيابه ولا يفنى شبابه، وصدق الله حيث يقول : "إذا رأيت ثم رأيت نعيمًا وملكًا كبيرًا" وما أخفاه الله عنا من نعيم الجنة شيء عظيم لا تدركه العقول، ولا تصل إلى كنهه الأفكار، الله شوفتي الجنة جميلة إزاي! اللهم ارزقنا الجنة بل الفردوس الأعلى من الجنه يا رب العالمين،الدكتور محمد الغليظ كان بيقول الكلام عن الجنة جنة فما بالك بالجنة نفسها، الجنة مش صعبة، كل اللي فيها إنك تخلفي هواكِ، ربنا يهدينا و إياكم جميعًا و كل بنات و شباب المسلمين.
"و ما إن فرغت من كلامها حتي وجدت...

"يا ترا إيه رد فعل البنات على كلام جميلة؟!
وهل أثر فيهم ولا لا؟!
دا هنعرفه الحلقة الجاية بإذن الله
رأيكوا يهمني يا جميلات"
#استغفروا
#دعاء_سمير