بقيت متمدده بالغرفه الي يطلعون بيها الاشخاص الطالعين من العمليات واحوص بس اريد اطلع داگول الاهلي على الانجاز المسويته😂عاد اجوي شخصين سحبو السديه وصعدنه بالمصعد اول منزلت للطابق الي بي غرفتي اخويه وخطيبي واكفين ينتظروني اول منفتحت باب المصعد ابتسمت الهم وبوسوني من خدي وگالو الحمدلله على السلامه اني حتى مجاوبتهم گبل گتلهم اني دا احس بنج نصفي سويت گالو ندري الدكتور اجه وحچه كلشي النه😡فد ضجت چنت حابه اني ابشرهم عاد دخلوني للغرفه وشالوني من الچرچف الممرضين وخلوني على السديه بدون مخده ضليت اگول اريد مخده واريد مخده وميجاوبوني اخر شي عصبت گتلهم مخده اريد گال خطيبي ميصير البنج يصعد براسج اقل شي ٦ساعات مترفعين راسج يعني اتخيلو حتى مي من عطشت شربته واني نايمه طبعاً محچو اي شي گاله الطبيب اليه واني نسيت اسألهم بهاي الاثناء فكني البنج وبده الوجع مستحيل احد يتخيل كميه الوجع بديت ابچي و أون گتلهم اريد مسكن قوي صاحو الممرضه گالت ممنوع بس براسيتول وخلت اليه مغذي براسيتول وبده يخف الوجع عاد انتبهت على بطني عبالك حامل وبشهري راح اجيب كلش عاليه لان انطوني ١٤بطل مغذي ومچنت اگدر اتدرر الحمدلله يعني منفضحت😂 گلت الهم انطوني مي وطلعو من الغرفه حتى اگدر اتدرر براحتي🌚 لان اصلا اكتشفت البنج هو الي يمنع هالشي وعانيت الصراحة بعدين دگيت على والدتي فاتت للغرفه دتغيرلي الحفاظه ارتاحيت وحسيت جزء من الوجع راح عاد گتلها ماما جوعانه اريد لفه همبركر انتي مو وعدتيني گالت بعيني هسه اگول الخطيبج يجيبلچ وراح خطيه جابلي ومقبلو الامن مال مستشفى يصعدون الاكل ممنوع عاد جابو اليه عشه مال مرضى من المستشفى وعصير برتقال شربت شويه واكلت كلش شويه وبقو يلحون اكلي حتى يصير بيج حيل والمسكن ميأذيج ميصير معده فارغه واني صدگ بس مرتين انطوني براسيتول بعدها لو ابقى ابچي واصيح محد يجيني المهم مقبلت اكل اكثر گتلهم بس اريد ارفع راسي حموت والله لزمت تلفوني خابرت خواتي كاميرا كتلهم مابيه شي اني زينه بس ميقبلون اگوم حچينه شويه وراحو حتى مااتعب ونمت بعد مرور ساعه گعدت لگيت صاير الوكت الي اگدر اشيل راسي گمت وگعدت بس مااحجيلكم كميه الوجع الي اني بي احس ظهري دينقسم بالنص وراسي ديگصو بالسجين على كيفهم حرفياً وجع قوي يعني لدرجة ابد رجلي موجعتني متحملت الوجع گتلهم اريد مسكن گالو ميصير الدكتور گال يأثر سلبي على نمو العظام وهو اليوم زرعها كتلهم ميخالف اقبل بكلشي سلبي بس مااتحمل بعد وبقيت ابچي لحد ما نمت يمكن نمت كم ساعه بحيث من گعدت الغرفة تقريباً ضلمه و والدتي نايمه على قنفه گبالي واكو كرسي يم قريولتي نايم عليه خطيبي عبالكم عفتهم نايمين؟ گعدت من الوجع وهم بس ابچي عاد الحمدلله رحمت بحالي الممرضه من صاحها خطيبي وخلت اليه براسيتول خف الوجع بسرعه ونمت نومه للصبح گعدت الصبح لگيت اخويه بالغرفه اجه للمستشفى يعني و والدتي گاعده وخطيبي نايم😂 باسوني اخويه و والدتي وجابو اليه ريوگ من المستشفى اكلت من كل گلبي واحس صرت احسن الحمدلله عاد گالو اهلي هسه يجي الدكتور وگعد خطيبي اني هم گلت الهم ممكن تطلعون اريد اغير تيشيرت العمليه وفعلاً طلعو وغريته والدتي بقت يمي تساعدني لان ايدي بيها كانيولا وانطتني عطر وخلت اليه حمره وفات خطيبي للغرفه مشط شعري واخويه يروح ويجي يبوس برجلي يگول عمري البطل 🥺گعدنه شويه وهم شكيت من وجع راسي خابر الطبيب خطيبي گال شويه واجي انتظروني انتظرنه الدكتور وبعدين لمن اجه سلم علينه وسألني عن صحتي ونفسيتي گلت الحمدلله بس وجع راسي وضهري مداتحمل گال هذا مال بنج النصفي عادي اسبوع ويروح بس كثري سوائل انتي عاد گال شيلي رجلج ام العمليه يقصد گلت لا توجع گال شيليها تگدرين شلتها گال نزليها عاد جتي ممرضه وجايبه ادوات تعقيم ومگص متتخيلون شگد انرعبت والله😂انطاني تمارين يعني علاج طبيعي گال سوي و جاب المگص شگ البجامه لحد العمليه و وخر اللفاف والگطن گال گومي شوفيها اني خفت گال كومي انتي قويه گمت شفتها كلش صغيره يعني تقريبا اقل الشبر الفتحه ومخيطه بشكل حلو عاد بقيت گاعد شفته شلون يعقمه ويمسحة قوي حتى لا ييبس الدم بعدين من كمل حط لاصق ضد المي وگال هم كل يوم تعقيم واسبوع وتعالو العياده وميصير تمشين ابد ولا تنامين على بطنج وراح كملو الاجراءات مال طلعتي من المستشفى ولبست بجامه والدتي لان عريضه عليه وجابو اليه كرسي متحرك شالوني اخويه وخطيبي گعدوني على الكرسي اخويه يدفعني وخطيبي شايل رجلي اليسره حتى مااعرف مخابرين صديقتي وزوجها جايين شفتهم جوه كلكم تعرفون شلون صعدوني صديقتي گعدت يم رجلي وخطيبي بالصدر واهلي اجوي بتكسي خطيه زوج صديقتي يسوق كلش بطيء علمود مااتأذه ..وصلنه بيت خالتي طابق ثاني ونفس الحاله هم شالوني لحد ما فوتوني للهول على قريولة خلوني هاي القريوله خالتي محضرتها اليه البيت چان هدوء محچيت الكم انطانب باندول اشربه عند الحاجه فقط هنا بدت المعاناه اول شي مااقبل اكثر من شخصين يمي اتعصب واتنرفز حتى صوت نفسهم يوجع راسي والاضويه مطفيه لان ابد مااگدر بس مو كل الوكت مطفيه حتى تلفوني عفته هذيج الفتره لان الاضاءه مؤذيه وميحتاج احچيلكم والدتي كلشي صحي جابته اليه وكلشي اشتهي وبس تبچي من اتأذه يعني هو اسبوع تقريباً نص الايام حالتي زينه بس بعدين فجأه واعيط وابچي ويگعد خطيبي يفرك رجلي واخويه يگعد ويا واني حاطه ايدي على راسي ومغمضه كلش هوايه چنت اتشكه وسلبيه بس والله حقي يعني عمليه وفوگاها عظام بدون مسكن مستمر واسوي علاج طبيعي من صدگ تأزمرت ومحچيت الكم اخويه وخطيبي يشيلوني من اريد اروح تواليت وهم نفسهم يشيلوني للحمام خطيبي يغسل شعري يعني ادنج راسي للگاع على جانب ابد مااتبلل وبعدين يطلعون وتجي والدتي تساعدني اغسل جسمي كل قطعه وحد😂 وامسحها بالمي يعني هو اكيد مو شي نظيف وممقتنعه بس مااگدر اسبح ولا اگدر امشي متقبله الموضوع هيچ فد يوم اثناء سهري من الوجع وخطيبي يمي ومعافني ولا لحظه گتله بعد شهرين نتزوج گال هاهيه گتله لتقشمر اني جديه گال والله ممقشمر اني هم جدي بهذا الشي يعني .وفات الاسبوع وصار موعد مراجعتي نزلوني مثل متعرفون وگعدت بالسياره مثل متعرفون ومن وصلنه للطبيب جابو كرسي متحرك وهم گعدوني بي بنفس الطريقه الي شرحتها اول مدخلت فوتوني من الغرفه مال تداوي لان عمليه ومااگدر اتحمل بره اگعد وعندي تداوي وهم شالوني وخلوني على السديه اجه الممرض صاحب التداوي اني صعدت البجامه للرجل اليسره حتى يشوفها اني رحت للعياده بتراكسود😂لان مريح واگدر اصعده حتى يداوي خطيبي و والدتي دخلو ويايه المهم وخر اللزگه عالنص وگتله اني اوخرها حتى مااتأذه وخرتها وانتظرته جاب المعقم والديتول وبده يقعم وهم قوي حتى ميتجمد الدم على العمليه وهالمره موصاني انه يحتاج اعقمه كل يوم لان اني حفظت من كمل اجة الدكتور سلم علينه وسأل عن صحتي ونفسيتي وگالي نزلي رجلي من السديه نزلتها گال رجعيها ليوره بعد رجعتها يعني حتى موصل زاويه٢٥ صارت اليمنه احسن منها😂😂 وهم انطاني تمارين هو الدكتور مو المعالج وگال ممنوع ببسي وميصير تمشين حاولي على گد الحمام واذا متروحين بعد احسن وميصير تنامين على بطنج نامي جانبي على الرجل اليمنه وخلي مخده بين رجلج وانطاني ادويه وگال اكلي صحي مااريد تسمنين لو كيلو گتله يصير اتزوج؟گال جية الخ انقرر وطلعنه عاد قررنه نرجع ثاني يوم رجعنه للبيت وصينه عشه وراها حضرو الغراض والجنط ولمو كلشي اني بس گاعده ونمنه من وقت ثاني يوم الصبح اخويه صديقه المقرب خابره وبالصدفه چان بنفس مكانه گال اني ارجعكم حتى تاخذون راحتكم ف وافقو كلهم من اجه هم شالوني ونزلوني من الدرج وكعدت بالنص ورجلي ام العمليه لافتهل بالمسند وخالتها ليگدام 😅محچيت الكم المسند گال شهرين لما تجيني متتزعي بس على گد الحمام والرياضه والخيط مااشيله اله بعد مرور ثلاث اسابيع ولازم ادز اله صورته حتى يقرر ..الطريق كله مشربت مي تعرفون ليش😂بس اكلت جبس لمن وصلنه للبيت گتلهم نزلو الجنط اول بعدين اني مقبلو گال انتي هم كتلهم والله اني بالاخير وهم مقبلو شالوني ونزلوني اختي الچبيره محضرتلي قريولتي ومنظفه البيت يلمع ومسويه غده طيب مستحيل اكو هيچ اخت والله لو اني بمكانها مااتخيل نفسي اسوي كل هذا ف كعدوني بالمطبخ على الكرسي گبال ميز الطعام نزلو الغراض وغسلو اني بس عقمت ايدي صبت اختي الغده اتغدينه چان عند اهلي كرسي مال مكاتب هذا الي بي چروخ من جوه ف شالوني گعدوني وهم اختي دفعتني وخطيبي لازم رجلي وشالني خطيبي خلاني على القريوله واختي لزمت رجلي گلت الاختي اريد هدوم وعطر ومكياجي جابتلي كلشي وبدلت ورتبت نفسي سويت علاجي طبيعي وشربت الدوه ونمت ف گعدت لكيت خطيبي يننظرني اگعد ديروح بيتهم گتله ابقة ابيتنه وعيش يم اخويه بالغرفه اني نفسياً احتاجك يمي بكل ساعه كلش شي صعب عليه وعلى اهلي بس خطيه ثنينهم قبلو حتى مينكسر گلبي ..
