رجعتلكم بعد غياب طويل😃..گلت الكم بقة يمنه خطيبي عايش وچنت بكل يوم علاج طبيعي واخذ ادويتي اتذكر چانت اختي الچبيرة يوميه تجيلي ريوك صحي وتكتب بورقة شي يضحك وتجيبليا چنت بس اتريگ صحي😂 غداية مو صحي هو بس وجبتين اكل لان اگعد متأخر بهذا الوكت بنت خالي الي حجيت الكم عليها اتزوجت بغير دولة واكيد يعني مگمت اشوفها.اجتي اختي الوسطانيه من بيتها البيتنه وجابت وياها جدر دولمة چنت موصيه صديقتي عليه لان اكلها كلش طيب😛 من اجتي اختي شافتني يغسلون شعري بالغرفة ومااروح للتواليت ابد مقبلت گالت انتي كلشي مابيچ وهاي حركات عجزة وانتي مو عاجزة بعد تروحين للحمام وللتواليت اني بين الفرحت وبين الضجت اني اصلا ماامشي وبس فراش ومااحجيلكم شگد سمنت لان ماكو اي حركة المهم چانت بكل يوم اتجيبلي المشايه مالتي وتكلي يلا گومي طبعاً كلش صعبه اگوم بتك رجل وامشي بتك رجل گال الدكتور لازم متطخ الگاع كم مرة واتعلمت شلون اگوم بس چان لازم احد يلزملي المشايه يلا اگدر اگوم لان كلش ثكيله وانتچي عليها وتتزحلگ المهم اجتي اختي اخذتني للحمام وجابت اليه كرسي ورجعت اسبح بالصونده مو بالدوش اذا تذكرون😔 چانت تغسل شعري وتغسل جسمي بدون ميوصل مي لرجلي اليمنه عدت اسبوعين هيج صورت العمليه للدكتور گال اوكي شيلي الخيط ف اني مااگدر امشي خطيبي گال اني اجيب مضمد گرايبي متدرون شگد انتضرت المضمد ومتشوقه اريد اغسل عاد مثل البشر يومين وما اجة چان عنده شغل اجه فد يوم الصبح وشاله ابد متأذيت چان متخيط بطريقه مو مؤذيه بس طلع اتريگت وخليت اختي تاخذني هم اغسل😂 شويه اتحسنت نفسيتي لان گمت اروح للحمام والتواليت ومرات اگعد بالاستقبال يعني مو بس بالغرفه هنا بدينه نخطط اني وخطيبي للزواج بس مثل متعرفون خطيبي سنه عايف كلشي ويوميه يجي يشوفني ويهتم بيه كل وكته اليه چان الصراحة اتذكر اجة اسبوع كلش ثگيل چان مبقى احد مخابرنا وردنه اي شغله حتى بس نتزوج وكلشي انسد بوجهنه بقيت يوميه ادعي واضل ابچي لحد ما انام صدگ تعبنه بهذا الاسبوع وهيچ بيوم من الايام فد منظمه نزلت وظائف هو قدم وگال باچر تعال متتخيلون شگد فرحنه واني منمت من الفرحة گعدته الصبح وسويتله ريوك على تك رجل😂 خطيه ابد مقبل بس گتله اني حابه هالشي المهم راح واني رحت نمت گعدت ع صوته ديگعدني گال العصر يجاوبون اي لو لا بس ويايه وحده عدها واسطه وكلش تفتهم گتله اني حاسه حتصير گال ياريت اتمنى العصر وخابرو گالو باجر تعال باشر بده يشتغل😍 ورجعنه طرحنه الموضوع ع الاهل صار مشاكل هوايه الصراحة ومچانو يقبلون نتزوج يگولون ع السنه الجديده وصيري احسن المهم ضلينه بهاي دوامه المشاكل شهر كامل ورغم كل هذا چنه نجهز بيتنه اني ويا مرة وحده طلعت حتى اجهز المطبخ كلش تعبت ومگدرت ف گمت اوصي من النت وتقريباً جهزت كلشي.. بقيت علاج طبيعي وادويه وصار عندي ضمور اجة وكت مراجعتي للطبيب رحنه اني و والدتي واخويه وخطيبي بس هالمره بسياره اخويه😍 رحت بنفس اليوم للطبيب وكالعاده فتت للغرفه مال تداوي واجة الدكتور وگال سوي فلان حركة وسوي فلان حركة حتى يشوف درجة حركة رجلي گال كومي هم مقبلت گتله لا اخاف گال دا اگلچ گومي عاد گمت وهم ناسيه امشي على رجليناتي ثنينهم گال روحي سوي اشعه وتعالي رحت سويت اشعه واكيد امشي على المشايه وبتك رجل😆 رجعت للدكتور گال كلش زينه عمليتج ونجحت حافظي على وزنج واخذي عكازات وامشي بيهن ولاتدوسين قوي على رجلج اليسره بالتدريج يعني وگتله مااريد دوه كافي منطاني دوه گال بس اكلي صحي وهاهيه گتله دكتور يصير اتزوج گال وين المشكلة بس مو هسه طبعاً من تذبين عكازة وحده وحالتج تتحسن اتزوجي وهم ابقي على تواصل ويايه وعلى الضمور گال تقريبا ٦اشهر ويروح وگال درج ممنوع منع تام گتله ليش؟گال عضلتج الرباعيه كلش ضعيفه بأي لحظة وانتي تصعدين درج تنثني من كيفها وتنكسر ويروح كل تعبج وشغلي وگال روحي للمعالج ينطيج تمارين جديده وينطيج عكازات ويعلمج عليها وهم كتبله فد شي بالورقه رحت للمعالج انطاني تمارين وحفظوها اهلي بعدين انطاني عكازة حاول شگد ويايه حتى امشي ابد ابد مچنت اعرف يعني بكل حياتي ملازمة عكازة اني هالمره عكازتين؟هوايه صعبه اشترتلي والدتي بس بقيت بالمشايه معفتها وطلعنه من الطبيب رجعنه لبيت خالتي كلش فرحنه كلنه الحمدلله اخويه گال اني اعلمچ عليها بعدين اول مرجعت من الفرحة نمت گعدت ثاني يوم والدتي گبل جابت حليب وجوز وعصير برتقال اتريگت وسويت علاج طبيعي اخويه علمني على العكازة گبل اتعلمت وعرفت بس بعدني امشي من حوضي ..يعني مصار شي مهم بعد ولاطلعنه لمكان رجعنه ثاني يوم لبيتنه وهنا بدت السعاده خطيبي عنده شغل وراح نتزوج وبديت اتحسن ايام كلش حلوة الحمدلله بالوقت الي يرجع بي ويرتاح مرتين يمكن طلعنه جهزنه بعدين اهله دبرو اله فلوس معينه و وافقنه بهذا الوقت بنت خالي رجعت من السفر واختي الچبيرة سافرت اخذت بنت خالي ورحنه دورنه بدله ولكيت وحجزت😍 وصالون صديقتي چانت وگالت اني اجيج للبيت يعني كلشي ابالكم الله رهمة الله وسهلة وصار الحمدلله والشكر ..واتزوجنة😍❤️ تعرفون شنو بهاي السنه الي مرت عليه كلشي چان كلش صعب وفوگ طاقتي بس مااعرف من وين اجتني طاقة التحمل هاي اني مچنت هيچ ابد والله يعني سبحان الله چان ينسد شي بوجهنه وينفتح شي ثاني كلش هواية اتعلمت اشياء بهاي السنه بفضل الله ماكو شي مستحيل ولا اكو شي صعب كلشي چنت افكر بي واريده اتعب يلا يصير اليه وكلش افرح لان بتعب صار وصح اني خسرت صحتي وخسرت هواية شغلات المفروض الشابة الي بعمري عايشتها وفرحانه بس هوايه مقتنعه بكل تفصيلة بحياتي واحسها فضل وبركة من الله بالنهاية احب اگول الكم لتيأسون الله مستحيل يعوف عبده حاير اتقربوا من الله شگد متگدرون هو كلش يحبنه هواية ويتحمل كل سلبياتنه ويسامحنه على كلشي..شكراً لكل شخص قرة قصتي وياية وچان اله دور حلو بهاي السنه اني محظوظه بيهم❤️
