لمن وصلنه للبيت مااعرف عندي شعور كلش حلو گلت الهم طلعو السديه من الغرفه اجوي عمال شالوها لان كلش ثگيلة وبديت استخدم كرسي متحرك😍..شايفين شنو ابالكم اريده او اطلبه من اهلي يسوو بنفس الثانيه اليه لحد هذا اليوم الي داكتب الكم القصه بي اني مدللة بشكل مو طبيعي من الكل..اخويه گال هسه اليوم يجي المعالج الطبيعي ويعملچ تمشين اني اساساً مااعرف شنو يعني علاج طبيعي! ابد ماعندي فكره عنه ف صار وكت نومي نمت كلش فرحانه كلت باچر راح اتربع😍 تخيلو شگد چنت مااعرف .صار الصبح وهم ريوگ صحي وادويه گلت الهم وره الغده اريد البيت خالي گالو ميخالف صار العصر اخويه جاب سياره صديقه خلوني على الكرسي ودفعوني لحد الباب وشالوني وصعدوني طبعاً اكيد ابالكم رجلي چانت هيج ممكن نازلات جوة ؟لا ابد چانن عدلات والله يعني ماكو داعي للكرسي بس علمود تتغير نفسيتي خلوني استخدمه مو يخلوني بالكرسي احد گدامي يلزم رجلي والثاني يدفع الكرسي من وره هاي الطريقه استمرت شهرين ..چنت كل طلعه ويايه جنطه بيها حليب جاموس وادويه وحفاظات وملابس مو دا گول الكم چنت طفله اني . وصلنه البيت خالي كلهم اتفاجئو بيه وفرحو ابن خالي گال صديقي معالج طبيعي بالمستشفى روحيله باچر والدتي گالت لا انجيبه للبيت وشگد ميريد ننطي بس بنتي متطلع وتتعب بقينه يمهم واتعشينه ورجعنه للبيت يومين ندگ على المعالچ وميرد كلش ضجت گلت الخطيبي يخابره لان هوه من منطقتهم وخابره وجاوب گال باچر اني اجي وانطو عنوان البيت.صار ثاني يوم وكلش نشيطه ونفسيتي زينه لان راح يتغير حالي بيوم واحد لتنصدمون والله هيچ چنت افكر لان اول حاله بالعشيرة كلها هيچ يصير بيها اول حادث واول بنية اني ف محد يعرف شلون يتعامل ولا احد يعرف علاج طبيعي شنو يعني اصلاً منهتم نعرفه شعلينه شي ميهمنه بذاك الوكت خصوصاً اني ..صار الليل واجه بقة يسألني عن اسمي وعمري ووين كملت جامعة اثناء ميسويلي علاج حتى التهي ومااركز بالوجع علمني على كم حركة اسويها هاي شنو اني متمدده على قريولتي گال نزلي رجلچ بالگاع متتخيلون صدمتي گتله لا گال لتخافين متضغطين عليها ف مراح يصير شي بيچ موزين ضل يقنع بيه يمكن خمس دقايق عاد نزلت رجلي وعيني مدمعه من الفرحة رغم نزلتها وهيه عدله مثل متعرفون .لزمني من ركباتي وبده يثني بيها اكيد محد راح يحس بالوجع لو شكد احچي واكتب بس مبچيت ابد چنت اسمع طگطگة العظام لان بيها تكلسات (التكلسات تجي من منطقه مكسوره ومتتحرك فترة طويله) گال كم مره اسوي التمرين وشلون اختي الچبيرة حفظت الحچي وراح من فرحتي بقيت منزلة رجلي گال كل اربعه ايام اجي .بقيت اسوي التمارين بوقتها وماكو اي تحسن چنت عبالي راح اتحسن مباشرةً عدت الاربعه ايام واجه اليوم الرابع واجة المعالج هالمرة گال خلوها على الكرسي مالتها وبده يسوي التمرين الي هوه يضغط على ركبي ويثني رجلي هنا بدت رجلي كلش تأذيني تعرفون شگد چنت اعيط؟وابچي من شدة الوجع الدرجة تقريباً اغمى عليه عافني ارتاح شويه ورجع كمل تمارينه وعلم اختي على الجديد وراح ..چنت مدمنه مسكن والله وبس أون من الوجع وامي مگابلتني وتبچي
عليه.يلا كافي اشياء حزينه خل احچيلكم شي ايجابي بهاي الفتره چان مسموح اليه اسبح😍بعد مرور شهرين مشايفه حمام اختي الچبيرة و والدتي فوتوني للحمام وغسلو اليه بالصونده مو دوش لان مترهم الكرسي المتحرك چبير حجمة من المي صاار على جسمي گمت ارجف مستغربه من المي 😂يالله شگد فرحت بيومها حسيت نفسي دا اتحسن وبديت اسبح ..چنت كل التفاصيل الحلوة والمحلوة احچيها الخطيبي ويسمعني ويشجعني كلش هوايه وبس من عنده اسمع الكلام لان احبه حب فوگ الوصف رغم اعشق اهلي بس اهلي هوايه اخاف عليهم انه اقهرهم وابد مااحچيلهم مشاعر القهر بس اله تعرفون ليش؟ اني اصلا بطبعي مو هوايه احچي مشاعري والصراحة مچنت اعرف احچي !ي والله مااعرف يعني چنت طول الوكت ساكته اتعلم شنو يحچون واحچي شلون الطفل اول مره يتعلم يحچي هيچ چنت اني بس چنت اگدر اكتب مشاعري واعرف اكتب نوعاً ما ف چنت اكتبه اله ومن يخابرني هم بس ساكته ومااعرف احچي ومن يخابر كاميرا ابقه صافنه بوجهة بس رغم كل هذا چان ميحب يجي من اسوي علاج طبيعي ميحب يشوفني ضعيفه وابچي ميتحمل يعني والدتي هم مچانت تگعد يمي من يجي المعالج بس اخوية واضل مچلبة بأيده قوي ..چانو اهلي يوميه يطلعوني بالشمس الصبح علمود الفيتامين واكل صحي وعلاج طبيعي ..اجتي اختي الوسطانيه وجايبة الي هي واولادها ورد طبيعي لونه اصفر هذا اللون مميز عندي وجايبة اليه الاكل الي احبه وهم اهتمت بية كلش من ناحية نظافتي الشخصية والاكل وهم چانت تفوتني للحمام على الكرسي المتحرك وتغلسي بيوم من الايام چنه گاعدين دناكل اني اكل على قريولتي وهمه گاعدين بالگاع شگد شعور محلو واحد ياكل وحدة محد ويا صدك يحس نفس بي نقص ف صار حچي على ايام الحادث ومن خلال الحچي عرفت اني چنت عنايه مركزة اسبوعين وهم مچنت اعرف شنو عنايه مركزة شرحولي يعني شنو طبعاً شنو مو گلت الكم رجعت ذاكرتي وعرفت الاشخاص بس كلش انسة يعني بلليل احد يسألني شنو اتغديتي مااعرف والله هوايه انسى وهواية كلش مااركز چنت هوايه اردد هالعباره اني مااركز اني انسى وبده الموضوع فعلاً يزيد لان اتركز هالكلام بعقلي الباطني .گمت اتابع مسلسله سورية اني واختي الچبيرة لان نظري بده يتحسن بس هم مرات اتعب من الصوت والتركيز و بقيت علاج طبيعي سويت الايدي هم واستجابت للعلاج بس صار عندي خلل رجلي اليسره كلش چانت موزينه بوكت الحادث بس انتنث بالتدريج الرجل اليمنه الي هيه حالتها احسن من اليسره منثنت ابد يعني رجل عدله ورجل انثنت شگد حاولنه بالعلاج الطبيعي ابد مفاد يعني شايفين يصير شي حلو ويفرحني بالمقابل شي محلو يصير وانقهر شگد چانت مشاعري مخربطة ومچنت قريبة الالله مثل هسه يعني چنت ادعي بس اعرف مراح اتحسن واطول مااعندي ايمان قوي انه راح اتحسن بفترة قصيرة.عاد وصار موعد مراجعتي للطبيب بس هالمره صار شي حلو صديق العائلة يصير زوج صديقتي اجة علينه بسيارته للبيت يعني هالمرة رحت بالكرسي المتحرك😍 وگعدت ليورة بالعرض يعني ماخذة المقاعد الوره كلها اختي الچبيرة گعدت يم اقدامي وخلتها بحظنها واكيد هم غطتني لان كل ابرد واخوية گعد ليگدام ورحنه لبيت صديقتي هم چان شعوري محلو مستحية يشوفوني بهذا الوضع اتغدينه يمهم ورحت للطبيب يعني اني فرحانه لان كدرت اكعد على كرسي ف واعدت صديقاتي اشوفهم بالعياده ورها اخوية خابر السكرتيرة گالت بفلان ساعه تعالو واني مواعدتهم قبل الموعد الي گالته السكرتيرة بساعتين ونسيت اگللهم اتغير الموعد دگو عليه وكتلهم انتظرو اتغير الموعد بقو ينتظرون اني اتأخرت چانو جايبين الي هدايه خلوها يم السكرتيرة وراحو بعد ساعة تقريبا المغرب يعني رحت للطبيب اني واختي الچبيره واخويه
وسويت اشعة هالمرة اني گدرت احرك نفسي شويه😍خلص اشعة وگال نفس الكلام هسة يگلچ امشي بقيت كاعدة اجة الطبيب للغرفة مال تداوي اول مشافني گال نزلي رجلچ اليمنه گتله منزلتها اني گال اكثر حاولت گدام عينه مگدرت گال اسبوع اذا منثنت تعالي اسوي عمليه ابد ما اهتم لرجلي اليسرة الي متحسنه باوع للسلبي بس وحچةعليه لان ايدي مچانت تتحرك عدل تتحرك من چتفي مو بس ذراعي مااعرف فهمتو شرحي للحالة لولا گتله شوكت امشي تعبت عاد گال مو مهم المشي هسه انتي جيتي اليه ميته لتفكرين بالمشي اختي گال يعني شگد وتمشي گال العلم عند الله بس يجوز ستة اشهر وقلل الادويه اليه..صار وكت ليل مگدرنه نرجع لبيتنه ف بقينه عند بيت صديقتي وثاني يوم الظهر رجعنة للبيت الظهر ويا سايق تكسي ونفس الگعدة گعدتها مع العلم يصير انزل رجلي مسموح يعني بس وحده عدلة ووحدة تنثني مترهم اگعد بالسيارة هيچ رجعنه للبيت شگد اگللكم نفسيتي تعبت متتخيلون مگمت احاجي احد وبس انام ومااكل زين. بيوم من الايام اجتي والدتي دنحچي على العلاج الطبيعي ف قررنه اروح للمستشفى هناك اسوي گلت الها عادي اروح بس مااروح للدكتور بعد گالت شلون يصير گتلها والله مااروح وانسد الموضوع بديت اروح للمستشفى يوميه الصبح ساعتين وأكيد تعرفون نظرات الناس اليه مليانه شفقة واني كلش اركز بوجهم من يباوعون عليه ويكولون خطية ويدعون اليه هواية كلش چنت اضوج من هذا الحچي ومگلت الكم كلش ضجت من المعالج الطبيعي الي چان يجي للبيت لان انسان مؤذي رحت للمستشفى ولگيته هناك وهم صار مسؤول عن حالتي تقريباً بقيت شهر اروح للمستشفى وصار فرق برجلي اليسرة بس اليمنه بقت عدله مقبلت بعد اروح للمستشفى لان مدا استفاد شي بس اتعب وتتعب نفسيتي من الناس ف خطيبي گال خلي نجرب هاي الطريقة مال اهل گبل وافقت ف سوه اليه طحين وملح وعجنهم وگلاهم بالزيت حطهم بجيس نايلون وچان كلشش حار و حط الجيس على ركبتي اليمنه ولفها بشال بقة يسوي هذا الشي اسبوع ومااعرف شلون الصراحة نزلت بس مو هوايه نزلت وعدله چانت بدون انثناء يعني ابد منثنت .بوكتها حچت اختي ويانه نروح لدكتورها الي تراجع يمه هو اختصاص عظام وكسور اني اقتنعت لان بس اريد اغير الدكتور الي اروحله كلش سلبي چان محبيته نهائياً اهلي مقبلو اغيره وصارت سالفة وباء كورونا ثلاث اشهر اني بالبيت واقنعهم نغيره لحد ماا اقتنعو بس مچان اكو طريق نروح للدكتور الجديد .والدتي شافت مركز علاج طبيعي اهلي گالت امشي اوديج عليه رحت للمركز وهم شفت نفس المعالج الي مااحبه وبعد مرحت بقيت بلبيت لحد ما يوم من الايام اجة صديق اخوية مدرب منتخب مال رياضة اجة علمود يشوف وضعي كلش هوايه چان محبوب ويعرف يحچي شاف الاشعة والتقارير مالتي وانطاني امل چبير علمني على حركة وحدة ولازم مساج وياها گتله شگد وامشي؟ گال خوش سؤال اذا بقيتي على الشرحتة الچ اسبوعين وتمشين كلش فرحت اني وهو راح .بقيت شهر اسوي الرياضة الگال عليها والحمدلله كلش نفسيتي اتحسنت وشوية قل نسياني وبقيت استخدم الدهن مال اثار لوجهي حچيلتكم عليه سابقاً وبقو اهلي كله اكل صحي وحليب يجيب خطيبي بس للأسف فرق كلش قليل برجلي صار ..هنا بديت اصير قوية گمت اقرة كتاب وتقربت الالله اكثر صرت ادعي اتحسن واگول الحمدلله اني صار ويايه هالشي ولا خواتي او والدتي اني ميخالف اتحمل ولهذا اليوم اگول هذا الشي والدتي چانت تصير زينه من نفسيتي تتحسن گمت انتبه على هذا الشي وامثل اني زينه گدامها لحد ما نسيت امثل وصرت زينه فد مرة سمعتها تحچي چانت بالغرفة الخ جايين يمها خطار گالت الهم مااتذكر يوم مبچيت عليها لحد مانام يومية ابجي عليها متتخيلون شگد انكسر گلبي كلش انتبهت النفسي وبديت اتحسن چانت عندي امنيه وهيه ابوس قدمها😔والله چانت امنيتي لان قبل الحادث چنت يوميه ابوسها وابوس ايدها كلش هواية احبها ومتعلقه بيها وكلشي سوته اليه مااتخيل اي ام بالدنيا تسوي هواية كلش ضحت علمود بس اعيش ومااحس بنقص كل فترة تجيبلي هديه حتى افرح وصدك چنت افرح ..اختي الچبيرة سوت الي طبلة يم راسي عباره عن علبه خاصه بالادويه وبطل مي واني منا استخدم كرسي متحرك يعني من صدگ صرت عچوز گلت بيني وبين نفسي لازم اخلص الادويه واخلص من هذا المنظر يوميه من اگعد الصبح اني ممستوعبه الي صاير وياية گبل اباوع على الكرسي وانقهر..
