بعدها كلنه سدينه ابواب السيارة وطلعنه من منطقتهم دنروح للبحيرة ماخذين ويانه فواكه وگهوة وحليب وحب وحلويات رايحين ناكل هناك مرايحين نسبح😅اخذو كراسي اثنين واحد اليه و واحد الوالدتي وهم اخذو فرشة تنحط بالگاع ومخاديد حتى ياخذون راحتهم بالگعدة اني چنت كلش متحمسة ادخل للمي واسبح لان اكثر من سنه مرايحةللبحيرة ومن صار الحادث هم چان شته واصلا حالتي متسمح اروح المهم گتلهم اني انزل منو يجي ويايه اولاد اختي گبل نزلو حتى قبل ماافكر اني عاد اختي الوسطانيه گالت اني اجي وياج لزمت ايدي ونزلنه للمي يعني الجو حار وشمس بس شايفين اول مندخل المي بارده ثلج تصير بدت تمشي وصلنه للمي الي شويه مرتفع يعني لحد الركبه گتلها لا كافي روحي اسبحي اني ابقى هنا العب بالمي 😂 بقيت بالمي وسويت علاج طبيعي واني گاعده بالمي احس كلش صار وزني صار خفيف يعني فعلاً المي جزء من العلاج الطبيعي اجتي اختي الچبيرة يمي وگعدنه بالمي واختي الوسطانيه هم اجتي يمنه والدتي چانت گاعدة تباوع علينه متحب المي وزوج اختي ويا اولاده يسبحون ضلينه اني وخواتي شكو سالفة قديمه تضحك نتذكرها من كل گلبنه چنه نضحك گالولي ليش منگوم نروح ليگدام شوية المي اعلى حتى تسبحين وهذا شي زين الچ اني وافقت لان مراح يعوفوني وصدگ وحدة چانت گدامي و وحدة ورايه حتى اسبح براحتي واني نسيت شي اسمه سباحة بس بقيت احاول احرك رجليانتي بالمي تقريباً بقينه ثلاث ساعات بالمي عاد قررنه نرجع للبيت ف طلعنه من المي واختي الوسطانيه لزمت ايدي ومشينه لما طلعنه اني گعدت على الكرسي وانطتني منشفه حتى ماابرد انشف شعري واخليها على چتفي وانطت مناشف للبقيه هم وسوت النه گهوه وحليب سوت اليه لان مااحب الگهوه وبقيت ناكل حلويات ونشرب شي دافي خلصنه وتونسنه ف قررنه نرجع للبيت فرشو شي على الكشن حتى ميتبلل وگعدت اني وطلع زوج اختي ليگدام والبقيه اجوي مشي اني بقيت لان اتعب بالمشي والبقية مصعدو لان الطريق مو عدل وتتأذه السياره رجعنه للبيت نزلنه كلنه وبده السره على الحمام منو يغسل اول واگيد اني اول وحدة😂 مو اگللكم هواية اتدللت سبحت ولبست شي ثخين لان السلبت ميطفى ابداً واني ابرد واجتي صديقتي يمي بلليل وخلص هذا اليوم صار ثاني يوم الصبح التمينه كلنه حتى نتريگ اني بديت اساعد اختي بالاشياء الاگدر عليها وسوت غدة وره الغده هم رجعنه اخذنه قيلوله😅صار الليل سوت النه اكل ومن كلمنه اكل مااتذكر منو اقترح نباوع فلم بالحديقة حديقتهم چبيرة عاد جابو ميز وخلو تلفزون عليه وجابو فراشات فرشوها بالگاع وطلعنه للحديقه گعدوني بالگاع يمهم واختي الوسطانيه جابت شاميه وحب وچاي اتفرجنه الفلم وبعدين البگ موتنة😂دخلنه جوه وصار وكت النوم طبعاً عدت اربعة ايام ب بيت اختي بعدها صار نرجع للبيت لان اخويه وحده و والدي هم رجعنه بتكسي للبيت جان مصادف عيد ميلادي بعد مرجعنه بكم يوم والدتي وخطيبي سوولي مفاجأة وبعدها اختي الوسطانية سوتلي كيكة وفتحت وياية كاميرا وهم سوت الي عيد ميلاد وبعد يومين صار موعد مراجعه الطبيب گلت الكم اروح علمود اسوي اخر عملية واخلص من هذا الكابوس بس للاسف..رحنه للطبيب اني و والدتي وخطيبي واخوية بتكسي اني گعدت بالنص فتحولي الباب ولزموها ومديت رجلي ومرات اگعد عادي مثلكم كل شوية اغير الگعدة من اصعد لازم محد گاعد ليوره اگعد على حافة الكرسي الي يم الباب واسحب نفسي للنص وبعدين انزل رجلي واگعد بالنص اذا طريق طويل حتى رجلي امددها واذا قريب لا انزل رجلي اكيد اجة ابالكم ليش هيچ اصعد؟ اني هيچ اصعد لان رجلي اليمنه متنثني هوايه ف مستحيل اگدر اخليها بداخل السيارة لحد هذا اليوم اني اصعد السياره بهاي الطريقة ..تعرفون شنو اي شي ابالكم حتى لو چان مستحيل الصلاه والدعاء راح تحققه الكم من تصلون وتدعون من كل گلبكم مباشرةً تحسون اكو فد مشاعر غريبة بينكم وبين الله من صدگ ترتاح النفسية كلش هواية وتحسون امنيتكم المستحيله مبقى شي وتتحقق. وصلنه للمنطقه الي بيها الطبيب رحنه ابيت خالتي بيتها بي درج واني اگدر اصعد ف صعدت وهاي الروحة كلش اتونست بيها الصراحه كله كضيناها نروح للمولات ومطاعم ونمشي بس مو هوايه نمشي وچنه بلليل يطلعون اليه كرسي مال تخم مريح اليه كلش ويخلون فد طبله عليها مخده اخلي رجلي عليها حتى اگعد يمهم فتره طويله ومااتعب لان اني من انزل رجلي هوايه مثلا اگعد على ميز طعام او تخم او سياره اي مكان انزل بي رجلي اتعب بسرعه يعني اكثر شي نص ساعه وگبل اگول اريد شي اخلي رجلي عليه لهذا الوقت الي اكتب الكم هالقصه بي . وهم سوو اليه عيد ميلاد مفاجأة خطيبي و والدتي وبنت خالتي وزوجه خال خطيبي هم😍😍❤️فد يوم طلعنه للمول اني ووالدتي واخويه وخطيبي وزوجه خاله وبناتها وبنت خالتي هم يعني هلگد اتونست محسيت بالوقت اني ثلاث ساعات متواصله امشي😍 اتفاجئت من گعدنه ناكل وشفت العداد مال خطوات بتلفوني رحنه للمول العصر رجعنه تالي الليل وگبل نمت لان تعبت اجه ثاني يوم الي هوه موعد طبيبي طبعاً اني اخابره قبل مااجي بيومين حتى يحجزلي علمود ماانتظر هوايه اني محچيت الكم كلش چنت قبل الحادث عجوله ومو صبوره نهائياً يعني الشي الي اريده لازم يصير بنفس اللحظه مااعرف شي اسمه صبر بعد الحادث اكثر بشر بعائلتي الچبيره صبر وتحمل اني بحيث الى هسه اني مثال عدهم للصبر والتحمل 😌بس عبالكم بحياتي الطبيعيه اصبر؟ لا ابد😂😂 بقيت نفس طبعي احس كلش هوايه متحمله فوگ طاقتي مو مال اتحمل شغلات الي تصير بحياتنه اليوميه يي نرجع للموضوع من صار الصبح گعدت متأخر اتريگت ورحنه للطبيب واجتي والدتي واخويه وخطيبي ويايه مثل كل مره الحمدلله ف السكرتيره صاحت اسمي وگالت فوتي من غرفه التداوي گمت اني و والدتي رحنه للغرفه وانتظرته هوايه😡بعدين من اجه تعرفون فحص زاويه رجلي وحركتها وگال روحي سوي اشعه گمت ورحت للغرفه مال اشعه اني مذكرت الكم ركبتي اليسره تتحرك يعني مااعرف شلون اشرحلكم بس تتحرك مو ثابته وهوايه توجع من نايمه فتره طويله واكوم اريد امشي كلش تتشنج وتيبس المهم رحت لغرفه الاشعه واخذت اشعه للرجل اليمنه واليسره قبل مااطلع وصاني گال اشربي حليب لمده اسبوع حتى مضار الاشعه تنزل من جسمج خطيه هو ميدري لهسه اشرب حليب😂😂طلعنه من غرفه الاشعه ورحنه لغرفه التداوي وانتظرته گال تعالي للغرفه دنحچي فتت اني وخطيبي و والدتي گال مستحيل اسوي عمليه لليمنه رجلج اليسره مو مال اعتماد من مشيتي لليوم اني اگلج ضغطي على اليمنه بس اليسره مو قويه وبيها فراغ العظام وشوفني الاشعه كلش ضجت منه گتله لا انت گلت بس اليمنه ليش هسه اتغير الكلام گال والله متتحمل وحتخسرين هوايه اذا انكسرت ترجعين لنقطه الصفر من صدگ ضجت وانغثيت بچيت گبل گال روحي سوي مفراس حتى تتأكدين گتله ميحتاج هاهيه كلش أصر انه اروح اسوي رحت سويت مفراس ورجعتله شوفني رجلي بالتفاصيل الدقيقه كومه اماكن يم ركبتي فارغه ماكو اي عظم وانتهت مرحله تكوين والتئام العظام ماكو اي حل غير الزرع (زرع عظام)من شوفني وشرحلي گال براحتج بعد بس اني مستحيل اسوي اليمنه اذا تردين روحي لغير دكتور وكتبلي اسمه گتله مااريد من ارجع للبيت انطيك خبر شوكت اسوي عمليه ..
