فوتوني لغرفة التداوي مااحچيلكم شگد انرعبت احساس يخوف لان مااعرف شلون راح يشيل الكلبسات وراح توجع لولا؟ چان شكل الولد أبيض وشاب صغير بالعمر وصبور😅طول خلگة ويايه الصراحة عبالك الله دزة اليه بهذاك اليوم المهم فتت للغرفه واجه يمي حتى يبدي شغله گلت اله ليش متخلي مخدر يلا تشيلهم ؟ضحك وگال ميصير مراح يأذيج وانتي قويه ..جاب آلة مااعرف شنو اسمها بس هيه تشبه البلايس😅 حتى يبدي يشيل الكلبسات بده شال اول وحده واني عيطت من الوجع وكل شويه اگول اله كافي خلي ارتاح اتوسل بي چنت وابچي يعني اتخيلو بعز البرد ويسوي هيچ شي مؤذي واني جسمي كلش متأذي اساساً .چان تقريباً ١٠٠ كلبس وأكثر برجليناتي طول بيها نص ساعه من كملهم جاب معقم بااارد ثلج وحطه على الجروح بعد ما شال الكلبسات طبعاً اثناء مديشيل الكلبسات اني رفعت رجلي ليفوگ بدون مااحس واخذت صور لرجلي اختي الچبيرة بعد ما كمل تداوي اليه عاد الممرض جاب لاصقات ضد المي خلاها على الجروح وگال الاختي يوميه لازم تعقمون الجروح وتخلون لاصق جديد وسويت تحاليل دم والحمدلله چانت كلها نظيفةو زينه ..بعدها فوتوني للطبيب چانت اول مرة اشوفه واني بوعيي شاف الاشعه كال تغذيتج كلش زينه والعظم بده يلتئم وشوفني الاشعه اصلا مشفت عظم وبالمناسبه ابد محبيته لان ما اهتم بيه ولايسألني عن نفسيتي ولا اي شي ايجابي يحچي اتذكر خالتي سألته ذاكرتها حتبقى هيچ؟ هيه كل فتره دتنسى وقليله تركيز جاوبها بكل برود عادي ممكن تطول سنه الله اعلم وسد الموضوع هو وگال كلش زينه صحتها الحمدلله و غيرلي الادويه وانطاني هم مسكنات وعلم اختي على كم حركة اسويها حتى ميصير ضمور برجلي وهو اصلا چان صاير عندي ضمور برجلي يعني رجليناتي من فوگ ليجوه ضعاف😂 ..صارت الدنيا المغرب ورجعنه للبيت چان الطريق طسات بي هوايه واني شايلة الكلبسات بالجديد يعني اللحم يطخ اللاصق ف الوجع مينوصف نهائياً لو شگد مااكتب الكم .. انطتني اختي الچبيرة مسكن ونمت وكعدت لمن وصلت الباب البيت وهم نزلوني مثل مشرحت الكم فوتوني للغرفه وغيرولي هدومي وحفاظتي وسوو اليه اكل كملت اكل اختي الچبيرة فرچتلي اسناني وغسلت اليه وجهي وبعدها نمت .يعني تعرفون انسانه چانت دتجهز زواجها وفرحانه بثانيه وحده اتغير حالي تغيير جذري هذا الشي وره مرجعت ذاكرتي وعرفت خطيبي كلش هوايه اتأذيت منه اتذكر يوميه بلليل قبل ماانام اشوف صور الحلفة مالتي وصور الحادث بعد ما دزوها اليه اهلي وصديقاتي وكل العالم هوايه انقهر وابدي ابچي من الوجع والقهر واگول ياربي حتى لو ماامشي سنه اني راضيه بس خفف الوجع عني واگول ليش مفرحت مثل باقي البنات اتنغصت فرحتي زين ليش ماامشي كومة حچي سلبي تخيلو من البجي اتعب وانام هذا البچي والصور الاشوفهن بقت ستة شهور يوميه ينعاد هذا السيناريو طبعاً كلش سلبيه صرت يعني تقريباً اتمرضت نفسياً لان شفت الي اني بي مصيبه كلش چبيرة يعني شنو مااعرف شوكت امشي يعني شنو هيچ اتشوه جسمي ويعني ويعني الالاف الافكار تجي براسي چان خطيبي ميقبل اسهر حتى ماافكر بسلبيه وچنت اكول اله حتى لو مااسهر هذا واقعي بأي وكت يأذيني يعني مااعرف شلون تحملني هوه وشلون اهلي تحملوني كلش هوايه ابچي بسرعه ونحسه وماعندي ثقه بنفسي ..تدرون چنت اتمنى اكل ويه اهلي بالگاع او على الميز واتمنى افوت للحمام ! يعني اي شي هسه احنه نسوي واني اسوي چنت اتمنى اسوي هوايه اتحسس من يداروني او يهتمون بيه . صادف رأس السنه واحتلفو اهلي بي اني بلليل حلفت اختي الچبيرة وبنت خالي امشي!!! تعرفون شنو ممنوع وماعندي عظام فقط تيتانيوم يعني الله سترني مصارت مصيبه هلگد لحيت شالوني وانتچيت عليهم ومشيت بس كل ثگلي عليهم يمكن چانو ناصبين عليه😂ورجعوني للفراش مااحچيلكم شگد فرحت.مره اختي الچبيرة گالت اطلعج غيري جو لان كلش كأيبه صرت گتلها لا ومقبلت ابد كلش لحت هوايه شالتني وحدها وخلتنب على الكرسي مچان اكو بلبيت غيرنه اني وياها ف طلعتني للباب مال بيت گتلها كافي گالت لا انزلج اكدر اكو فد دچة عاليه گدام الباب گتلها مراح تگدرين گالت ثقي بيه ومعليچ اني چانت ايدي مكسوره وبعدني ممسويه علاج طبيعي الها يعني مااگدر الزم يده الكرسي لزمت الكرسي من الايد اليسرة بس ودتعبرني الدچة چان اتزحلك وگبل انزل للگاع على السيراميك البارد ثلج مااحچيلكم شگد ضحكت بدون اي توقف وهيه تضحك ويايه وتحاول تشيلني بس كلش صعبة اني بالگاع والكرسي تقريباً عالي وهيه وحدها تشيلني گال راح اشيلچ چان توگفني بس كل ثگلي عليها خطية گال ارجعي ليوره خطوتين چانت گتلها مااعرف طبعاً لحد مشالتني وانشلع گلبها احنه نضحك بدون توقف خابرت بنت خالي اجتي گبل وصعدوني اني والكرسي من الدچة وفتوني جوة طبعا بس احنه نعرف وگعت وحچينه الاختي الوسطانيه وبقه سر مخفي عن والدتي واخوية لليوم هذا شگد چان يوم ممتع وتغيرت نفسيتي رغم الوگعه ..هيچ گضه الشهر نفس الروتين السلبي وصار موعد مراجعتي هم والدتي اخذت اليه ستاركس ونفس الفراش والبطانيه ونفس الشيله بس الفرق فتحت ايدي😍 رغم چانت ترتفع شبر واحد فقط وهم بيها ضمور بس فرحت بيها وهالمرة الطريق مچنت بي نايمه طول الطريق خطيبي واختي الچبيرة ايدهم على ظهري واني ايدي الخ لازمة الفراش بيها قوي كلش لان اخاف واخاف من السياره عندي عقده صارت..الطريق الي هوه ساعتين اني اتفرج على الشارع ومبتسمه مثل الطفل وكل شوية اگول الاهلي (نفس الاشخاص الي اجوي اول مراجعة) شگد حلو الطريق والمنظر مستحيل تتخيلون فرحتي يعني والله چنت طفلة واحب اكول الكم هاي المراجعة للطبيب رحنه بنفس الطريق الي سويت بي الحادث اخويه لمن وصلنه لمكان الحادث گال شوفي الجام مال سيارة الهسه بالگاع مااعرف ليش انقهرت وبس حبيت انام ومااكمل الطريق واني گاعدة اتفرج بس گلت لا لازم اتغيروماابقى هيچ ضعيفة قبل منوصل للطبيب بنص ساعه نمت ..وصلنه للطبيب الظهر گلت الهم جعت جابو اليه اكل وشربت شويه بيبسي ويا😍 چان ممنوع عليه منع تام ولحد الان ممنوع .اجه الطبيب ودخلنه جوة اجتي صديقتي واهلها عليه چنت كلش خجلانه يشوفوني هيچ اسناني مكسوره ونايمه على سديه كلش فرحو وگالو الحمدلله كلش متحسنه ابتسمت الهم بس وهم گلت بگلبي شنو هالحچي؟ اني وين متحسنه اكيد ديقللون مني وهيچ حچو ودعوني وراحو من يم الطبيب.. اجة اخويه ودفع السديه لغرفه الاشعه اخذت اشعه جديده صاحب الاشعه گال جية الخ مو احنه نحركچ حتى تاخذين الاشعه انتي تتحركين وايدچ مااريدها هيچ اني سكتت وبگلبي گلت كل عقله؟ وهوه شدخله؟خلص الاشعه اليه و گال اكو تحسن كلش جبير هسه يگلچ امشي كلش فرحت ومباشرةً دخلنه للطبيب اول مشافني گال گومي اگعدي وحدچ اني شفتها هوايه صعبه اگوم وحدي باوعت على اهلي عيني مدمعه ومقبل يساعدوني حاولت گلت اني راح اگدر وصدگ گدرت وگمت بهاي الاثناء اختي گالت اني مااعرف اچذب دكتور احنه برأس السنه مشيناها الطبيب شويه ويموتني هلگد عصب😅 گال لتعيديها ابد ماعندچ عظم وممكن يطگ التيتانيوم وتخسرين رجلج بعد وجاب فد مطرقه يستعملها اي دكتور حتى يختبر الاعصاب هو ضربني على ركباتي ثنينهم بس شنو بنفس الوكت الي چان ضايج كلش هوايه اتأذيت وبداخلي گلت شلون اهلي يسكتون وهو يضربني هيچ؟مچنت اعرف هذا للاختبار طبعاً نسيت اگول الكم من رجع الدشبول على رجلي چان الكسر ضارب على العصب يعني على شعرايه ورجلي اليمنه تصير مجرد منظر بجسمي! المهم گال ابدي علاج طبيعي وشوفي معالج يفتهم او روحي مركز تأهيل اريد مرة الخ من تجيني متربعه😂 كتب اليه ادويه جديدة وگطع عني ابر تخثر الدم😍 وصارت دنيا مغرب ورجعنه للبيت يعني اليوم هذا چان نوعاً ما حلو وبي شغلات ايجابيه...
